東京濃厚雞湯拉麵店登港 日本直送雞白湯、素食蔬菜湯任揀(有片)
2019-05-20

香港越開越多日式拉麵店,湯底選擇自然亦變得多元化。最新有呢間源自東京,喺日本同海外有超過20間分店,主打濃厚系雞湯嘅拉麵專門店,雞白湯喺日本熬足13小時再直送到港。另有香港限定嘅濃厚蔬菜湯選擇,配埋低糖質蒟蒻麵夠健康又啱素食人士!
 


麺屋 武一首間香港分店位於尖沙咀,主打濃厚雞湯拉麵。Menu上嘅拉麵主要可以分為三類:濃厚雞湯底、清雞湯底,同香港限定嘅蔬菜湯底。濃厚雞湯底當中嘅雞白湯新鮮日本雞隻熬煮13小時,再從日本直送到港。再加上以雞骨、洋蔥、昆布等熬煮嘅清雞湯底,口感香濃幼滑。
 


濃厚鹽味拉麵($88)

而濃厚雞湯底亦再分為醬油、鹽味、味噌、辣味噌四款風味,當中以鹽味最能夠突出濃厚雞湯原本嘅鮮味。湯底味道以雞肉鮮香為主,驚喜在於油膩感比想象中低,香而不膩。


麵條用日本嚴選小麥製成,口感清爽。而且粗幼度啱啱好,做到掛湯效果。雞髀肉叉燒口感柔嫩,皆因係以和風高湯、昆布、醬油等先低溫炆煮再浸過夜。再加上日本直送嘅免治雞肉丸,係一碗充滿雞肉唔同香味同口感嘅拉麵。
 


濃厚醬油拉麵($88)

濃厚醬油就即係用醬油配搭濃厚雞湯底,增添醬油香之餘亦唔會完全蓋過雞湯鮮甜味。配料當中另一加分位係生洋蔥碎,辛辣刺激可以解膩。
 

更多【新店直擊】:
1. 全新港式菠蘿油雞翼!銅鑼灣新開雞翼專門店
2. 中環新開日式炭爐串燒店 資深日本師傅駐場 主打12款雞肉部位
3. $25自製個人化黑啤拉花 GUINNESS期間限定醇黑體驗館

 

(左)中幼直麵,(右)低糖質蒟蒻麵(每碗+$10)

店家注意到香港人非常注重飲食健康,所以特別引入低糖質蒟蒻麵,顧名思義係用蒟蒻製作,比一般麵條減少91%糖質、92%卡路里同84%碳水化合物,亦係Gluten-free,比較粗身而爽口。
 


濃厚蔬菜拉麵(鹽味)($85)

為香港愈來愈多素食者而設計嘅蔬菜拉麵,湯底用洋蔥、胡蘿蔔、粟米、香菇、薯仔等共13款新鮮蔬菜先煮熟再打成蓉,所以比雞湯更為濃稠!啖啖蔬菜清甜香味,配料亦係車厘茄、粟米仔、菠菜等全素配搭,不含肉類成分所以素食者可以放心享用!
 


拉麵店唔少細節位亦非常貼心,好似有提供原味雞湯畀大家自行調整湯底濃度,亦有提供三款特色迷你丼畀怕一碗拉麵唔夠食嘅男士們。尖沙咀店同部分日本分店一樣糅合拉麵店同居酒屋概念,所以亦供應餃子、串燒等特色小食。
 



麺屋 武一
地址:尖沙咀棉登徑13-15號棉登大廈地下A號舖




文、相、片:Cathy

關鍵字
尖沙咀
拉麵
雞白湯
素食
低糖質麵
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
2020-09-18
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
油麻地新開小木屋Cafe 嘆西日Fusion龍蝦湯烏冬配咖啡
2020-09-08