尖沙咀新開和風小店 米粉班戟、午市定食配甘酒雪糕(有片)
2018-11-09

日式班戟熱潮繼續!尖沙咀呢間日本餐廳裝修以木為主,落地玻璃窗加簡約風格相當舒適。主打之一係日本近年興起嘅米粉班戟,就算對麩質敏感嘅朋友都可以一試。而午市定食就提倡「一汁三食」概念,配埋有唔同功效嘅雪糕或者熱茶,滿足口福之餘仲幫你健康加分!
 

甜鹹口味米粉班戟


蜜庵本膳位於尖東站附近,主打日式料理同米粉班戟,後者採用米粉代替小麥粉,不含麩質,體質敏感嘅人都可以放心享用。店主指見未有餐廳將米粉班戟引入香港,所以就想一試,米粉亦特別喺日本搵廠房訂製,用日本米磨成米粉。班戟漿就用米粉加日本雞蛋、北海道粟米粉同法國發酵牛油調配。
 


相信大家最想知道嘅係米粉班戟同普通班戟食落最大分別係咩?其實味道方面唔會有太大分別,唔會食到有米味,不過班戟面口感比一般嘅煙韌啲,鬆軟當中帶少少彈牙。原來秘訣在於店主特別加入少少自家製甘酒,令班戟漿粘度更高。班戟全部即點即做,要等10至15分鐘。
 


和·米粉班戟($92)

呢款口味係最有和風感嘅一款甜食班戟,配料有日本產紅豆蓉、日本抹茶或焙茶粉、沖繩黑糖蜜、蜜漬黑豆、同混入黃豆粉嘅忌廉。開飯仔揀咗抹茶粉,清新茶香配鬆軟班戟簡單而滿足。
 


黑糖蜜甜度頗高,大家可以按自己口味增加。反而紅豆蓉唔太甜,起沙口感相當討喜。黑豆軟糯入味,最令人驚艷嘅係黃豆粉香味濃郁嘅忌廉,甜香柔滑。
 


南瓜芝麻·米粉班戟($138)

甜味班戟暫時有三款常設口味同三款期間限定,呢款有秋日氣息嘅南瓜芝麻就係期間限定之一。日本南瓜醬當中加入甘酒同豆乳增添風味,碟邊灰色嘅係用台灣芝麻粉整嘅香濃芝麻醬。南瓜同芝麻聽落好似無乜關係,食落其實又幾夾,先食到南瓜醬嘅甜味,芝麻嘅香味慢慢滲出。最值得一讃嘅係芝麻醬香味濃郁,但唔死甜亦無苦味。
 


和王牛漢堡咖喱($188)

三款鹹食班戟中,應該以呢個用熊本產100% A5和王牛配特製咖喱嘅組合最能夠滿足一班食肉獸。和牛漢堡扒口感細軟,可惜略為鬆散。而咖喱汁係用日本咖喱同印度咖喱調配,再加西班牙辣椒粉,後韻帶辣加香料味,但又唔會蓋過牛肉味道,同班戟亦夾得到。碟邊黃色嘅係檸檬吉士醬,同菠蘿乾一樣達到微酸解膩嘅作用。
 

午市限定和風定食


午市自選三主菜定食($118)

定食配搭相當豐富,可以揀白飯或者十榖飯,配三選一嘅冷盤、燒物/炸物、鍋物菜,連餐湯、沙律同甜品。背後係日本飲食文化常見嘅「一汁三食」概念:一碗湯、三道菜式配一碗飯,達至多樣同均勻飲食。
 


開飯仔採訪當日就揀咗白飯、合鴨醬油煮、沖繩紅鹽燒三文魚,同山椒豚角煮。細節睇得出餐廳用心,例如飯特別選用岩手縣珍珠米,粒粒飽滿分明,口感軟糯。合鴨醬油煮嘅鴨香同鹹香突出,山椒豚角煮亦非常入味,同樣適合送飯。
 


和王牛漢堡丼($158)(晚市供應)

晚市未有供應定食,而係以三款丼飯代替。漢堡扒同樣選用熊本產100% A5和王牛,配醬油漬日本蛋黃同餐廳自家製漢堡香汁。
 


而紅色嘅飯係因為加咗用紅酒、紅菜頭等調配嘅醬汁,食落有淡淡酒香。和牛漢堡扒加醬油漬蛋黃增加香味,配搭嘅炸蓮藕片薄脆香甜,有啲似食緊炸番薯片。
 

更多【新店直擊】:
1. 泰式家庭口味!熬足12小時牛骨湯底 元朗新開船麵專門店
2. 任食Movenpick、Haagen-dazs! 海洋公園酒店新開幕 首推全環保海鮮自助餐
3. 咖啡達人主理 尖沙咀酒店check-in飲精品咖啡

 
自家製甘酒軟雪糕


美人軟雪糕($38)

細心嘅話或者都留意到,餐廳唔少餐點都加入甘酒嘅元素,其實甘酒係日本嘅傳統酒之一,近年因其滋補養顏功效同有天然益生菌,特別受年輕女士歡迎,甚至有「飲得嘅美容液」之稱。呢度係香港第一間供應自家釀造甘酒嘅餐廳,原材料從北海道引入,再喺店釀酒。
 


雖然叫酒但其實並無酒精成分嘅,雪糕亦係無用到雞蛋或者牛奶整,以豆乳為主嘅全素版本。軟雪糕食落有甘酒甜味,帶豆乳香。店主亦反覆研究配方,令軟雪糕口感綿滑而入口即溶。另有京茶咖啡軟雪糕口味。
 


遊樂無罪·茶($32)

茶包裡面有有機可可豆、牛奶烏龍茶同甜葉菊,有抗氧化、幫助燃燒脂肪同放鬆心情嘅功效。聞落係帶甜味嘅奶香,飲落就以甜味為主,不過因為係熱茶所以的確唔會有罪惡感。亦有梳打、咖啡同甘酒飲品選擇。
 





蜜庵本膳
地址:尖沙咀赫德道8號地下A號舖




文、相、片:Cathy

關鍵字
尖沙咀
米粉班戟
pancake
甘酒
雪糕
甜品
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-04-08
邊行邊食!灣仔區掃街5大推介
2019-03-22
【特約分享】多間特色餐廳進駐 尖沙咀新食力銀座38
2019-03-25
A4和牛沾麵配雞白湯 李泳豪旺角新開拉麵屋
2019-03-27
無辣不歡!5大麻辣愛好者必試川菜推介(有片)
2019-03-27