喂喂，芝士控呀，有間人氣北海道芝士蛋糕專門店呢，喺尖沙咀開咗新舖呀。雖然佢哋都有唔少分店，但呢間，係全球第一間嘅premium店嚟呀，仲要喺正最新270度維港景色觀景台附近，好天嘅話買件cake坐出去，望住個海食都咪話唔疏乎。

Premium店有咩特別？當然係所有cake都premium啲啦，全部蛋糕都加上金箔喺面，閃令令好鬼靚。啲金箔仲有個樽仔畀你自己灑上去，鍾意幾閃都得啦。

而且，仲有幾個size揀，人少少食唔到個平時嘅5吋裝，唔緊要。新店有細方磚裝同一口裝，同樣都係兩層芝士：上層馬士卡邦芝士，下層忌廉芝士，最底層海綿蛋糕；一層軟滑一層綿密，芝士味濃。想要食到雪糕口感嘅，輕輕解凍一陣就食得，如果想要蛋糕嘅質感，咁就解凍返4個鐘啦。

原味、抹茶、紫薯、檸檬、朱古力、玫瑰荔枝味，仲有1至3月限定嘅開心果芝士味，通通都有三個size揀，全部蛋糕都係由日籍師傅每日人手限量製作。

另一個半圓嘅朱古力芝士蛋糕都好靚，面頭嘅金箔仲係星形嘅添。呢個cake係用咗法國品牌Valrhona 66%嘅朱古力去製作，香醇、微甘，搭埋雙層芝士同朱古力曲奇餅底，再喺外層淋上朱古力漿而成，係幸福嘅味道。

各款cheesecake固之然係主打甜品，不過舖頭另外仲拎到其他日本國內人氣品牌嘅香港獨家代理權，所以同場仲加映其他朱古力同日式甜品呀。好似神戶「Frantz」嘅草莓松露朱古力系列咁，畀牛奶朱古力包住嘅日本士多啤梨，酸酸甜甜又非常脆口，整體甜度適中，其中黑色禮盒裝嘅可可味，更加係新店限定。

日本通實聽過「茶游堂」，喺度可以買到宇治抹茶大福、抹茶年輪蛋糕、宇治抹茶芝士撻、宇治抹茶士多啤梨朱古力等10款抹茶產品，抹茶控想食嘅話唔使下下飛日本喇。

Luna Cake Premium
地址：尖沙咀廣東道3-27號海港城海運大廈2樓OTE205號舖

文、相：Kar