又平又快 Foodcourt一樣有好嘢食

2016-09-12

出街食飯，最好梗係可以坐耐啲，舒舒服服慢慢食啦，不過有時都有例外嘅。例如趕住睇戲呀，或者得一支公去食，再唔係就係糧尾要慳住使呀咁，就會想搵返啲平平地、又快快脆但都「食得落肚」嘅嘢食，唔想次次都係咬包或者快餐店，其實有冇諗過food court都係一個唔錯嘅選擇？仲可以唔使就朋友想食乜，我食日式你食中式都可以坐埋一枱食。

皇帝雞

Photos by msamypoon & Foodie.jody
由韓國人開嘅韓式炸雞舖，food court價錢但係餐廳嘅享受，一兜炸雞最平30零蚊就有交易，再搭埋炸年糕添，係幾抵食。炸雞有3種味揀：韓辣、醬油同甜辣，全部都熱辣辣，又夠多醬，都幾惹味，惟一要挑剔嘅係炸雞塊皮唔夠脆囉。

Istanbul Kebab

Photos by Szekaijessica & 阿丸
土耳其嘅嘢食喺香港都唔算話好普及，不過有去過土耳其旅行嘅朋友，或者間唔時都會掛住嗰邊嘅kebab。Kebab即係用軟身嘅薄餅包住一堆菜、肉同醬，算係平得嚟又填得飽肚嘅小食。呢間餐店嘅kebab主要有羊、雞、牛肉揀，都幾足料，羊肉kebab有微羶味。用錫紙包住食，裡面比較多汁，怕食得麻煩嘅可以揀叫飯。BTW餐牌上有道「原味乳酪」，奉勸真係要好有勇氣嘅朋友先好試。

French Corner

Photos by hk.foodie & apple妹
又係開喺西九龍中心，冇計，佢個美食廣場真係比其他商場嘅出色。就好似呢間舖頭仔咁，廿蚊就可以買到9粒章魚小丸子，粒粒都漲卜卜，淋晒燒汁灑上紫菜，即叫即整夠晒熱。粉漿嘅比例啱啱好，如果真係要挑剔嘅係裡面粒章魚比較細囉。舖頭另外有賣窩夫，9蚊件，好抵。窩夫底係格仔餅嚟，整得都幾鬆軟脆口，可以揀返朱古力醬或者花生醬。

素食軒

Photos by mx8034 & 喬子
喺紅磡嘅foodcourt入面，睇演唱會前食啱晒。印象中好少可啲foodcourt會有齋舖，呢間舖仲要有苦瓜呢味餸畀人揀……講真，味就唔算真係好好味，但你嚟呢到食，都係求快同抵啫，佢符合晒。三餸飯40蚊有找，仲有多碗湯。食苦瓜嘅就梗係揀苦瓜炒蛋，其他餸例如茄子、素肉餃等等都OK㗎。

za爺煮意

Photos by Browncony
鰂魚涌個美食廣場入面，咩國菜都有得食，其中呢間食西餐嘅，都有燒春雞食！有得揀半隻或者全隻，隻雞整得幾入味，難得雞肉都係滑嘅。另外有經典嘅農夫包，香脆包入面裝住嘅係咖喱黑豚肉，仲要跟多碗飯，一定夠飽。而呢度嘅王子蒲燒鰻魚脆黑漢堡或者都吸引到好多人，竹炭漢堡夾住超長鰻魚同厚玉子，又係相機食先啲friend。

文：Kar

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。