即叫即整芝心玉子燒+香噴噴鐵板魷魚鬚 油麻地新開港式小食店
2020-08-27

軟嫩多汁嘅玉子燒唔少人都鍾意食,最近油麻地就有間小食店,班底之前有多次活動擺檔經驗,落單等三分鐘左右就有一份即叫即整嘅玉子燒,配料落足仲有半融芝士!其他小食都有板有眼,鐵板魷魚鬚越炒越香,本身魷魚就夠鮮甜,加少少七味粉就好惹味喇。
 


廟街玉子燒顧名思義就係開喺廟街主打玉子燒啦,幾個後生仔之前參加過美食博覽、冬日美食節、西貢廟會等活動,都係擺擋賣玉子燒同小食,所以雖然係新店但做起嚟好熟手。玉子燒選用日本雞蛋同水牛芝士,蛋香濃郁之餘又做到牽絲效果!
 


明太子芝士玉子燒(期間限定,$40/份)

新推出口味,玉子燒裡面係日本明太子醬、蟹柳同水牛芝士,上面再加沙律醬、蟹籽、木魚碎。玉子燒熟度啱啱好,食落又軟又夠厚身,而且仲保留到半熟蛋汁。
 


切開就見到半融嘅芝士,口感軟滑同玉子燒真係好夾。明太子醬鹹辣味道突出又唔會蓋過其他食材味道,一粒粒咬落爆開嘅蟹籽就增加口感層次。
 


鹹蛋黃魚皮芝士玉子燒($40/份)

將之前大熱嘅黃金魚皮加落去,而且仲係自己炒鹹蛋黃魚皮,零舍香口!加埋沙律醬同豬肉鬆,配搭新穎。
 


玉子燒比較濕潤嘅關係,所以最好趁熱食,如果唔係魚皮就會變腍。而鹹蛋黃嘅鹹香同玉子燒都幾夾,而且沙律醬酸酸甜甜咁令玉子燒食落味道再豐富啲。
 


鐵板魷魚鬚($40/細盒,$70/大盒)

開飯仔私心推介,因為聞起嚟真係香得好過分!秘訣原來係先用鐵板炒雞皮同肥豬肉逼出油分,加上用嘅係大件厚肉嘅紐西蘭有機魷魚,唔單止有鮮味,仲有Omega-3呀。
 


魷魚鬚食落相當爽口,比較幼嘅尾部特別香脆,而魷魚肉就煙韌而且帶少少肉汁。加少少鹽同七味粉就非常惹味。
 

更多【新店直擊】:
1. 老字號新雄雞舊址新開心機麵包店 創新拉絲菠蘿包 + 重口味芫荽蒜蓉包
2. 必試足料西班牙海鮮燉飯 上環新開生活概念店連餐廳
3. 正宗西班牙churros專門店登陸尖沙咀 即叫即炸 彩虹糖衣+微甜雪糕



豚肉大阪燒($40/份)

大阪燒口感鬆軟,裡面有唔少菜絲,同鹹香燒汁夾埋唔會太膩。上面嘅豚肉係豬腩片,煎香後肥肉特別甘香,而且保留少少軟骨,食落特別有咬口。
 


雙色章魚小丸子($30/8粒)

雙色係指芝士醬同日式燒汁,而章魚小丸子偏軟腍,食到出裡面章魚肉嘅彈牙口感。
 




廟街玉子燒
地址:油麻地廟街30-34號地下B4號舖




文:Cathy
相、片:Tom Li

關鍵字
油麻地
小食
玉子燒
魷魚
大阪燒
章魚小丸子
廟街玉子燒
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
3天前
【2021生日優惠】超爽著數!免費任飲任食日式燒肉/火鍋(持續更新)
2021-04-12
【最平$298最貴$938】佐敦新開日式和牛燒肉放題 獨家引入鹿兒島小田和牛
2021-04-09
帶媽媽味遊異國!母親節Brunch六選
2021-04-20
3月份好評餐廳十強
2021-04-08