【飲食潮流】醜帥出頭天！趣怪醜比頭點心到港

DIM SUM ICON又有新搞作，繼蛋黃哥同Little Twin Star之後，今次有日本嘅「醜帥」代表醜比頭精靈！無錯，第一眼見到佢可能會覺得佢有啲醜，但亦有唔少粉絲對佢地二見鐘情㗎。今次醜比頭系列將會喺四月一號登場，包括有點心、甜品同特飲。不過甜品同特飲會先喺三月十七號見大家！

呢次甜品總共有七款，每款顏色都襯返醜比頭精靈，粉絲影相呃Like啱哂！例如呢款就係粉屁桃士多啤梨奶凍同紅魔菇摩卡咖啡蛋糕，前者粉嫩得嚟夠Sweet，後者一樣吸睛又有咖啡香。

甜品當中仲有兩款係盆栽造型，好似呢個奶奶頭木槺布甸（隻精靈真係叫奶奶頭，正所謂粉紅色...），而且唔單止外表趣怪，布甸以3.6北海道牛乳打成嘅忌廉做底，口感特別軟滑。

其他甜品仲有香濃嘅朱古力慕絲杯、招牌燉奶椰皇、芝士蛋糕同朱古力蛋糕。特別係兩款蛋糕分別用咗65%純芝士同60%純朱古力製作，同醜比頭精靈一樣咁有內涵。

最後兩款特飲奶奶頭特飲同粉屁桃特飲同樣真材實料，前者係用咗3.6北海道牛乳嘅朱古力特飲，香濃得嚟又Creamy；後者係有埋蜜桃肉水蜜桃梳打，清新之餘Refreshing。

雖然暫時未見點心嘅蹤影，不過暫時知道總共會有十四款點心！醜比頭粉絲們記得留意啦。

隨時接收最新資訊
讚好OpenRice專頁！