呢個暑假又多個好地方去啦，因為終於等到藍精靈嚟到香港！尖沙咀海港城嘅「藍精靈．十分勁」亞洲巡迴藝術展唔單止有展覽，行到餓仲可以去唔同餐廳食盡藍精靈主題美食。香噴噴嘅藍精靈曲奇、粒粒精緻嘅馬卡龍、甚至仲有呃Like一流嘅三層High Tea Set！
Homie Cookies Baker Smurf曲奇
由藝人鄭欣宜開設嘅Homie Cookies本身已經夠邪惡誘人，今次仲以藍精靈做主題，推出咗呢款加咗藍色M&M’S朱古力同白色棉花糖嘅曲奇，配色襯返之餘又夠Sharp。忠實Fans記得留意埋曲奇紙袋上面嘅貼紙，因為係特別為咗今次嘅Crossover而設計㗎！
韓冰 Mushroom Village綠茶冰 + Smurfy沙冰
炎炎夏日，玩到攰嚟嘆返杯冰凍甜品就一流啦，呢間韓式甜品店就用咗綠茶綿綿冰，加上Orea餅碎同蘑菇形嘅蛋白餅嚟扮藍精靈嘅蘑菇村。另外仲有藍精靈波子汽水味沙冰，唔好睇少上面層忌廉，特別加咗少少爆炸糖裝飾，零舍刺激。
LE CAFÉ de Joël Robuchon Smurf馬卡龍Box Set
呢間法式甜品Cafe嘅出品一向備受歡迎，今次推出嘅就係印上藍精靈主角人物嘅馬卡龍，四款圖案分別係藍色嘅雲呢嗱、紅色嘅士多啤梨、橙色嘅芒果同黃色嘅菠蘿，一盒八件有齊四款口味各兩件，最抵讃嘅係圖案仔細得嚟全部都清晰可見。
niji bistro 藍精靈雞尾酒
估你唔到，呢間以蛋包飯著名嘅日式餐廳今次玩雞尾酒。無論係有酒精嘅Cocktail Floating on beach，定無酒精嘅Mocktail The blue Danube，都跟足主題以藍色為主，上面加埋鮮忌廉嚟扮藍精靈頂帽。
Dan Ryan's Chicago Grill 精靈雪糕窩夫
仲未夠喉？咁仲有呢間美式餐廳特別設計嘅精靈雪糕窩夫，小巧可愛嘅圓形窩夫加上雲呢嗱雪糕同士多啤梨，一樣都幾似藍精靈頂帽啵。
Three on Canton 藍精靈主題下午茶
港威酒店呢間自助餐廳亦有藍精靈主題美食，而且仲係唔少女士最愛嘅三層High Tea Set！其中Mini版嘅藍莓杯子蛋糕、士多啤梨配棉花糖同波士藍酒忌廉啫喱杯都係藍精靈嘅招牌藍色，而紅莓牛油鬆餅上面仲有藍精靈主角圖案，可以配藍莓果醬同奶油忌廉。
如果High Tea Set唔夠飽，Fans可以留意埋佢地嘅自助餐，一樣有水泡形嘅藍莓慕絲蛋糕、戴咗帽嘅藍莓意大利芝士蛋糕，同有藍精靈朱古力牌裝飾嘅藍莓杯子蛋糕。
另外自助餐當中嘅三款藍精靈美食，同樣會喺馬哥孛羅旗下兩間餐廳add@Prince同馬哥孛羅咖啡廳嘅自助餐當中供應，想Encore就可以轉下場啦。
藍精靈主題美食
活動日期：即日至2016年8月21日
隨時接收最新資訊
讚好OpenRice專頁！