【食指動】Come on!去澳門一日食五六餐由朝食到晚!
2016-01-30

世人已經無法阻止香港人一有假就去旅行嘅習慣,就算係得個週末,都要近近地搭船過返轉大海。冇計啦,要搵食嘛。我指搵好嘢食呀。得嗰一兩日,梗係要爭取時間食盡澳門嘅好東西啦!由朝食到晚,一日食五六餐一啲都唔過份呀。不過,quota有限、時間有限,去澳門搵食之前要做足準備呀!

澳門同香港有啲似,都係一個不夜天,無論係朝早6點幾,定係凌晨2點幾,一樣都可以喺條街度搵到食! 今次就集中講新馬路一帶嘅美食先啦。Check it out!


喺首頁一撳,就可以由香港介面轉咗去澳門介面喇,拉落少少就有埋地區揀,想自己set邊個區喺首頁都一樣得。


好嘅一日由特厚蛋治早餐開始  南屏雅敘


Photos bysuzi1005 & owenverna & Lawrence Lau

南屏雅敘係澳門最古老嘅冰室,1968年開業到而家都差唔多有近半世紀歷史。喺呢間兩層高嘅老店,除咗食到佢哋獨有嘅特式餐點之外,更加係份舊澳門情懷。一朝早去到,人多就一定㗎喇,當中有唔少都係澳門當地人喺度一邊嘆早餐、一邊刨報紙,另外都會有啲趕時間嘅買完個包就走。

一場去到,當然就要坐低慢慢嘆返個醒神早餐啦。識食嘅,一定係食特厚蛋治或者特厚叉燒蛋治,記得嗌烘底。話明特厚,當然有返咁上下份量啦,目測有成1.5吋高,聽講係用4隻蛋炒㗎,又香又滑,食完又飽又滿足!如果食得落,最理想就嗌埋份沙翁嚟食啦,而家唔係周圍都搵到嚟食㗎。成個沙翁鋪晒砂糖喺面,都算幾鬆軟,而且仲好香蛋味,好邪惡咩?都幾㗎。不過香港人唔係愈邪惡嘅嘢愈鍾意食㗎咩?


繼續邪惡午餐:吉列豬扒包   勝利茶餐室

去澳門,食豬扒包是常識吧。不過豬扒包喺澳門相當普遍,大部分餐廳都有得食,隨機入一間食又得,一早揀定間心水嘅又得。


想食咩都可以直接喺<搜尋-餐廳,菜式或食品>度打,好似我咁直接打豬扒包﹐就搵到晒澳門邊度有豬扒包食喇!既方便又快捷!


呢間位於新馬路,近營地大街嗰頭嘅茶餐廳,裝修比較舊,長方型舊式茶記格局,就咁睇同一般茶記冇咩分別。不過「舖」不可貌相,呢度就深藏咗令人一試難忘嘅豬扒包!


Photos by 龍格保

呢間嘅豬扒包之所以咁特別,就係在於佢塊豬扒,唔係生炸或者生煎豬扒,而係吉!列!豬!扒!個size仲要大過塊夾住佢嘅法式麵包呀!塊豬扒熱辣辣,炸得嚟又唔會太乾,啲肉汁仲保留到。塊包都唔弱,外層係脆嘅,咬落就好鬆軟,成個包嘅感覺都幾良好。呢度嘅蝦多士同樣出色,不過就唔係成日都有得食喇,想食到外層炸到脆一脆,裡面嘅蝦膠彈牙得嚟又有鮮蝦味嘅金黃色蝦多士,就要睇你嘅運氣喇。


下午茶通街掃:葡撻X牛雜  瑪嘉烈蛋撻店明記牛什美食


Photos by Cur & 高妹文迪

葡撻係去到澳門另一樣必食嘅美食。行街行到咁上下,可以去呢間位於葡京同新馬路之間嘅蛋撻專門店。蛋撻要熱辣辣先至好食,而呢間店座落喺行人專用區中間,雖然本身店內冇設座位,但就都可以喺舖頭門口嘅幾張木枱木櫈度,即買即食。

呢度嘅葡撻,酥皮同蛋黃都烘到金黃色,仲有幾粒「黑焦」喺面(唔知有冇人同我一樣,覺得葡撻總係要有多啲啲黑焦喺面先至好食),酥皮香脆,牛油味重,層次分明,中間蛋漿部分幼滑得嚟亦充滿蛋香,真材實料,甜甜der。美中不足係有啲油膩,墊住食嘅紙巾食完之後都索晒啲油。不過一餐半餐就算啦,咪諗咁多啦。但想食嘅,就要畀多少少耐性喇,舖頭門口成日都大排長龍㗎。

而鍾意食內臟嘅朋友就要留意了,澳門有間車仔檔牛雜,充滿街頭風味,嚟到可以試下。呢間牛雜每日傍晚大約5點零6點先至開檔,賣晒就收檔。車仔檔上面,滷水牛肚、牛腸、牛蒡、牛肺、牛柏葉……乜都有,一串一款咁買又得,一盒幾款咁買又得,辣又得唔辣又得,得咗。啲滷水非常入味,全部都炆到好腍,而牛柏葉就好爽口,索晒啲汁,點忍?又或者應該問:點揀?如果同行嘅朋友唔好牛什,都仲有魚蛋、魚皮、蘿蔔、腸仔等等掃街小食可以揀,各取所需。


豐富海鮮晚餐  陶陶居海鮮火鍋酒家


Photos by hongkonggunking & Cur

嚟到晚餐,當然要跟返全日隊形,繼續食好東西啦。入選米芝蓮車胎人美食嘅餐廳,應該都算好東西喇啩,300蚊就可以食到三道菜。

日頭食咗咁多肉,夜晚都係時候輪到海鮮出場啦。陶陶居喺澳門有超過70年嘅歷史喇,呢間老字號會提供新鮮海鮮,喺門口嘅魚缸度就可以見到啲龍蝦呀魚呀喺度游嚟游去,睇到流晒口水。叫返碟聖子皇啦,大大條用蒜蓉、粉絲、蔥花嚟蒸香,最簡單嘅煮法同時亦最能保留原條聖子嘅鮮味!另一道清清地嘅海鮮推介就係清蒸開邊鮑魚,有大約半隻手掌咁大隻,嫩口彈牙。


綿綿蟹粥宵夜   六記粥麵

最後再食多餐宵夜都唔係好過份啫(好似係),喺澳門夜麻麻要搵食,其實都唔難。


入咗<進階搜尋>就可以有篩選咁揀餐廳喇,例如要睇下邊度夜麻麻都有宵夜嘅,就梗係搵<深宵營業>啦,搵咗先出發冇咁易撞板嘛。


Photos by milffy & lanelanemui

同樣都係入選米芝蓮車胎人美食嘅呢間餐廳,位於十六蒲附近,喺新馬路搭車過去都唔係好遠。蝦籽撈麵係吸引嘅,一條條幼得嚟又爽口嘅麵條,撒晒一粒粒嘅蝦籽喺面,係香嘅,嚟到澳門冇乜理由唔試。不過如果你個胃唔夠大嘅,建議考慮要留肚食埋碗蟹粥。事關呢碗蟹粥份量都有返咁上下,用成2隻蟹去熬,即叫即蒸㗎,個粥底又煲得好綿,2個人食嘅話,每人都可以食到4碗咁多。如果你幸運嘅,隻蟹仲分分鐘有蟹膏食到!

係,澳門去得多,有時已經唔知有咩好行,不過,食嘢嚟講,依然都仲係可以由朝食到晚咁食足成日喎,大滿足!仲等咩呀?OpenRice app已經全面Upgrade,下載了app的用戶記得Update,而未下載的就到App StoreGoogle Play下載吧。咁得閒搵個周末咪又過下大海囉。



文:Kar

隨時接收最新資訊
讚好OpenRice專頁!

關鍵字
澳門
葡撻
豬扒包
蟹粥
新馬路
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【當時得令】氹仔舊城區隱世茶記嘆瓦煲咖啡奶茶
2016-02-03
2017及歷屆米芝蓮香港澳門指南完全版
2016-11-09
【當時得令】三盞燈周邊的茶記隱世美食
2016-11-17
好新奇!KFC推出全港首部語音及體感偵測技術點餐機(有片)
2017-04-20
11月澳門美食美酒節 過大海嚐米芝蓮星級大廚手勢
2016-11-01
台北澳門輕旅行必睇 OpenRice訂枱優惠攻略
2017-04-07
餐廳資料
更多
收起
本月熱門
情人節愛意滿瀉 甜蜜蜜堂食/外賣下午茶推介
2021-02-01
【隨時更新】零食速報 每周新款零食、酒品點評
2天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
1月份好評餐廳十強
2021-02-09