【開飯熱店入圍名單巡禮】鑽窿鑽罅食勻元朗
2016-03-08
話說今屆開飯熱店大賞又嚟喇,開飯仔就委託咗最Like瓹窿瓹罅搵食嘅喵星人,合組「為食貓偵探團」,上山下海、一帶一路偵查全城大大小小講飲講食情報,廿四小時儘量不眠不休咁四出發掘屬於港喵(oops,唔係,係港人)嘅真正味道。


對大部分住喺巿區嘅喵(或者人啦)嚟講,元朗其實都幾偏遠。不過,又成日都聽聞話元朗除咗涼粉出名之外,其實仲有好多好嘢食。為咗食,坐車坐耐少少,行路行多少少又有咩所謂吖,為食貓偵探團喺美食隊長帶領下,又出動喇!

山長水遠飲牛奶  農場鮮奶有限公司


Photos by →小蚊豬← & wongvivian86

佢哋第一站就揀咗一間偏離巿中心嘅餐廳,揸車去當然方便啲啦,如果唔係就要轉多幾程車,或者好似呢幾隻食得太多好東西話要行多啲當減肥嘅小喵咁,行山咁行入去,呢間餐廳其實就係位處喺條行山路線度呀。

一路行餓底貓就一路嗌肚餓,公主貓就係咁問到未……好啦,到喇,由美食隊長幫大家拍板叫嘢食。美食隊長話嚟到一定要飲牛奶同食薑汁撞奶或者其他奶類製品喎。下?咩話?山長水遠入到嚟淨係飲牛奶?係呀,呢度嘅牛奶係自家製出品嚟㗎,好新鮮。啲牛奶同出面飲到嘅唔同味㗎,幾重奶味。而薑汁燉奶同樣都係咁香奶味,仲好滑添,反而薑味就唔算好重,淡淡地咁調下味。

酒店級綠茶牛角包  Wins Goodies


Photos by pinginlife & Fan_doraemon

美食隊長睇穿公主貓又好想食甜品,於是就帶咗佢去呢間由前酒店總廚主理嘅甜品店嘞。元朗其實有好多甜品,不過呢間食到嘅甜品就比較特別,唔係周圍都有得食。一場入到嚟,就梗係要嚟拜訪下啦。

又係綠茶呀!今次係綠茶牛角包,個包喺雪櫃拎出嚟㗎。咁咪凍囉?係㗎,但係咁先令到牛角包嘅餡,即係綠茶忌廉凍凍地,有啲似雪糕咁嘅質感,連埋好鬆軟嘅牛角包一齊咬,幾爽皮。牛角包另外仲有云呢嗱味揀。另一款個賣相都幾特別,成隻人字拖咁嘅蛋糕,係芝麻芝士餅。芝麻同芝士味都一樣咁濃,仲有兩層餅底添,公主貓同佢部相機都食得好開心呀。

獨創口味菠蘿油  華嫂冰室


Photos by hero生活旅~* & 喜利

元朗都有好多正餐嘅選擇,美食隊長點名話要食呢間喎。招牌菜係蕃茄蛋菠蘿油,呢度獨創㗎。個菠蘿包熱辣辣,面頭嗰層酥脆卜卜,裡面啲包又好鬼軟熟。除咗平時都有夾住嘅牛油之外,仲夾多隻有少少蛋汁流出嚟嘅荷包蛋,同埋大大片新鮮蕃茄,吖,又估佢唔到咁夾喎。

鍾意食蕃茄應該要叫多個豬扒雞翼蕃茄通粉,個蕃茄湯底濃郁到呢,好有鮮味,好甜,件豬扒都大大件幾抵食,最緊要唔韌吖嘛。隊長話最後要飲返多杯熱奶茶喎記得,又香又滑㗎。

自製沾麵乜味都有  


Photos by MeiKa & T.LAU914

搵食之前記得要做足功課,呢間日式小店喺壁球場隔籬條巷仔度,唔易搵㗎。不過美食隊長一早就睇定晒啲路,當然就順利帶到隊啦。

餐牌冇乜得幾多個選擇㗎咋,淨係賣沾麵,湯底都係得原味、黑蒜湯同蝦湯揀,不過麵條呢,除咗麥麵之外,仲有啲自家製嘅麵條揀,日日都唔同味㗎,例如檸檬麵、紅椒麵、胡椒麵、蘿蔔麵等等,而隊長佢哋呢日呢就係橙皮麵。啲麵幾彈牙,浸完落濃味嘅湯底度之後,都仲可以食得出有淡淡嘅橙香。餓底貓食完都唔係好夠喉,仲請咗店員幫佢溝返少少清湯,飲晒成個湯底,一滴都冇淨!

神級壽司  寿司の神


Photos by kyko & tadrpm

如果你對元朗壽司嘅印象,淨係得大大件、條鰻魚超長咁少年你真係太年輕,美食隊長發現到有間神級壽司店,唔係用size嚟取勝!叫得神級,唔淨係因為佢個名叫寿司の神,或者老闆個偶像係日本寿司の神小野二郎,而係師傅神級嘅刀功同技術。間舖頭細細間,成日都排長龍,好彩隊長醒目,一早卜定位咋。

呢度有得食Omakase,由師傅根據時令嚟發板,好鬼有驚喜。其中件响螺壽司,握好之後再放咗岩鹽同柚子皮嚟調味,將响螺嘅鮮甜進一步逼到出嚟,又爽又脆。另外你咪睇佢件吞拿魚腩壽司係薄切,上面有成3塊魚腩咁多㗎,入口快溶,食到幾隻為食貓想encore。

今次講住咁多先,元朗區其實仲有好多好東西食,入圍嘅食店仲有鮨文士林台灣麵焰拉麵阿茶茶。館拉麵天王,要揀一間best of the best出嚟呢票真係唔易投呀,不過都要投㗎,諗多陣好喇,3月21號就截止㗎喇~ 喵~

投票網站:http://tiny.cc/op_2016




文:Kar

隨時接收最新資訊
讚好OpenRice專頁!

關鍵字
開飯熱店大賞
入圍名單
元朗
綠茶牛角包
蕃茄蛋菠蘿油
壽司
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【開飯熱店入圍名單巡禮】來一場正宗葡萄牙盛宴
2017-02-27
【優秀開飯熱店大賞 2017】頒獎禮盛況
2017-05-17
【開飯熱店入圍名單巡禮】觀塘有寶!一區食勻多國菜式
2017-03-07
【開飯熱店入圍名單巡禮】走訪各路中式飯店感動胃兒
2017-03-08
【開飯熱店入圍名單巡禮】小城地道茶記麵檔尋滋味
2017-02-27
【開飯熱店入圍名單巡禮】渡過美好的小食甜點時光
2017-02-27
餐廳資料
更多
收起
本月熱門
【隨時更新】便利店尋寶 每周新品速報
1天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
6天前
日本人氣茶室登陸尖沙咀 招牌Tea Set、甜品推介(有片)
2019-09-25
高CP值火鍋放題 (1)
2天前