呢隻千層雪糕蛋糕,相信係香港唔少七八十後嘅集體回憶之一,可能你細個去超市都曾經扭計要媽咪買返盒先肯走。可惜而家就算你唔洗扭計都買得起嘅時候,香港已經搵唔返。不過,喺日本便利店就輕易買到,鐘意一班人開心Share一整條得,自私食一個迷你杯亦得!
就算佢唔係你嘅童年回憶,睇下呢條廣告,望住位「小鮮肉」點整,可能都會立刻有興趣。
呢款千層雪糕蛋糕嘅誘人之處,唔單止在於佢獨特嘅花紋,而且一刀切落去,表面嘅朱古力脆皮,同下面一層層嘅朱古力同雪糕,夾埋就係令人非常滿足嘅層次感!
如果覺得太甜膩嘅話,就可以配埋生果一齊食,加多少少裝飾用嚟慶祝亦絕對唔失禮。
當然如果一個人食唔哂成條,唔好做大嘥鬼,買細杯裝一樣得。
好消息係,無論係盒裝定杯裝,都可以喺日本便利店同超級市場搵到。不過同時亦有一個壞消息,官方網站建議要雪藏喺-18℃以下,要帶返嚟香港非常有難度。
幸好有網民報料,唔單止日本有得買,係澳門、內地、新加坡部分超市都有得買。唯有繼續努力返工,賺錢去旅行嘆返夠本啦!
隨時接收最新資訊
讚好OpenRice專頁!