【另類過大海之旅】教你匿喺澳門嘅酒店食一日-酒店都有真。平民大排檔?
2016-03-02
好喇,呢排拜晒年喇嘛,即係逗咗好多利事啦,有錢就梗係儲起佢……至奇,哥話你聽有錢就係任性,咁又唔係話賺咗好多,但就點都夠你去轉大海嘅。吓!又係澳門悶唔悶啲呀。傻的嗎,邊個叫你又大三巴~觀音像~媽閣廟景緻真優美?而家去澳門梗係去歎下啲靚酒店,入面多嘢玩多嘢食到你唔洗出街!

最近小編就去咗開業半年都冇嘅Studio City,即係開幕嗰時星光熠熠,有羅拔迪尼路、里安納度、Mariah Carey等國際巨星撐場嗰間呢,講到咁豪華,唔知入面有啲咩食呢?係咪全部鮑參翅肚架?我驚幾多利事都唔夠喎!

一落船咁肚餓梗係整個快靚正先,入到去就見到有條街寫住「澳門食街遊」,成個格局都幾懷舊,地板都係似澳門啲老街,唔似一般酒店會有嘅豪華設計,不過食嘢又會唔會有返啲街頭風味先?風味呢家嘢唔係話啲料幾名貴,相反係好平民好大眾,一開波就畀我見到有間叫「風味大排檔」,啲檯同設計都跟足出面大排檔咁大膽,就一於先挑一挑機!


趁天氣仲凍凍地,先嚟一個「酸辣乳豬海鮮煲」,一上檯都幾有氣勢,上面有蝦、青口、蜆、乳豬,仲有原隻龍蝦,當個湯一滾起,啲香味就出嚟,個湯底係冬陰功,再加咗蕃茄,酸辣味好平均,首先要食就係乳豬,雖然呢個食法唔係食皮脆,但都唔想太腍,豬肉本身好嫰,食落吸收晒湯嘅香辣味,亦同時為湯底提供肉香,至於海鮮全部都好新鮮,龍蝦啖啖肉,不過估你唔到最正都係個湯,食得辣嘅朋友會好開心,因為個湯越滾會越辣,而且增加咗海鮮嘅甜美,會令人上癮,要食都要快手,呢個煲做到四月三十咋。!


之後我都叫咗幾個小炒,一個係椒鹽龍脷,椒鹽炒得香,有避風塘風味,龍脷炸到好薄好脆,不過如果你唔係好好魚就可轉鮮魷,因為都有啲骨。另外有個葡式豬肉炒蜆,蜆隻隻都好大隻,似花甲,加埋豬肉片配搭幾特別,豬肉似薄片叉燒質感,汁方面就甜甜地,有茄汁,送飯就一流。最後貪得意叫咗個乾炒牛河,睇下同香港有咩分別,基本上係無,呢個唔係貶義,而係想講好有香港水準,河粉條條分明,要讚嘅係食完唔會覺得成口油,之後查返,原來阿師傅係香港人,謎底經已解開!


我自己對到埗第一餐就相當滿意,滿意在於通常將平民嘢放入酒店或大商場都會變質,但呢度反而無,可能重點係佢無強行將平民菜高級化,忠於平民味道,從呢個角度去改良,最後你聽到個價錢都嚇一跳,一個小菜都係七、八十蚊,完全真係大排檔水平,可以話平靚正!呢條食街仲有好多驚喜,下回分解!
關鍵字
Studio City
大排檔
澳門
酒店
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
2017及歷屆米芝蓮香港澳門指南完全版
2016-11-09
【開飯熱店入圍名單巡禮】盡享酒店的五星餐飲體驗
2017-03-08
黃埔新酒店自助餐 必食即製分子雪糕
2017-05-11
11月澳門美食美酒節 過大海嚐米芝蓮星級大廚手勢
2016-11-01
好姊妹high tea之選 Benefit少女粉紅下午茶
2017-03-28
台北澳門輕旅行必睇 OpenRice訂枱優惠攻略
2017-04-07
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
迎接全新2020 1-2月下午茶推介
2020-01-06
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13