sikingthegreat1的个人专页

睇comment, 大家講到好似幾唔錯咁, 咪諗住搵次機會試下囉. 點知....首先order完要等勁耐, 我以為慢工出細貨, 點知上菜發現唔多對路, 羊扒完全冇羊味, 冇羊羶味, 你話係咩肉都得.... 另外個意粉, 多汁到一個點, 唔知以為倒瀉水, 真係未見過king prawn意粉會搞成咁.... 連我最鍾意嘅duck confit 油鴨脾飯都唔多掂, 得個鹹字, 嗰隻死鹹真係幾難頂, 200幾300蚊咁就倒左落海.仲有, 味道都算喇, 連service都好一般, 一個就反應慢幾拍, 另一個就好似病病地咁, 無精打采. 講真都幾趕客.呢個時候我frd先話其實佢lunch食過一次, 覺得平平無奇, 但我地講到咁想試又覺得可以畀多次機會.... 佢話上次lunch嚟, 有魚生飯, 食落都覺得唔太新鮮, 味道非常一般, 完全唔值呢個價, 似係出面求其一間日式飯店, 50幾蚊一個飯嗰啲咁, 明明就係貴出面3倍....失望. 其實呢度好食嘅西餐 / 日本菜絕對存在, 特別係西餐, 選擇繁多, 有得揀真係唔好揀呢間, 又貴又唔好食.…查看更多

一睇到已經覺得非常抵食. 揀到四餸都只係30蚊左右, 五餸set都係35蚊咋.價錢唔貴之餘, 嚟到嘅時候, 最驚喜嘅係, 餸嘅量都好多. 午餐肉係成塊大大塊, 紅腸出面可能3片左右, 呢度6,7片都有,  而更誇張嘅係時菜, 4蚊, 但夾極都夾唔完!味道都ok喎, 性價比嚟講絕對冇得輸. 最正嘅係老闆好好人, 談天說地傾咩都得, 就算傾心事都唔怕. 最緊要係同聲同氣嘛. 我仲要親眼睇住佢"夾硬"請個學生飲汽水. 原先學生哥諗住慳錢, 點知佢話唔使, 直頭請佢飲. 好有人情味. 見到唔少食客行過都會傾幾句, 成件事真係好warm. 呢頭咁少深黃店, 住附近真係可以多多幫襯呀~~…查看更多

又話老字號, 大佬, 碗糖水就貴一貴, 仲要係溝左水嘅..... 點搞呀.....老細話呢間出名, 咁我話晒都係街坊, 我知呀. 但聽人講水準已經大不如前, 所以其實都三幾年冇幫襯過. 但今次同同事食飯, 佢地住九龍新界, 嚟到就指定糖水要食呢間, 咁我唯有陪大家去試試啦..... 點知.... 果然名不虛傳, 真係大不如前而且, 佢地加價加到離晒譜, 一碗糖水要成30幾40蚊! 我一睇到個menu已經眼都突..... 你仲要貴得嚟做唔到相應嘅質素添仲有呀, 成間鋪真係唔憂做咁款, 店員啲態度極度冷漠, 落個order都好似阻住佢地忙裡偷閒咁..... 咁唔想做不如早少少落閘好過啦.....又貴, 又唔好食, 又要受氣, 咁樣樣, 下次真係點都唔使預我, 多謝晒…查看更多

家中長輩之前食過, 話幾鍾意, 所以有人生日之下, 就訂左嚟家嫂食.我自己就第一次食, 300幾400蚊嚟講, 食物種類同選擇就真係唔算少嘅, 又刺身, 又雞煲, 又打邊爐. 問題係, 你個肚裝得落幾多先? 我已經算好擦得, 都只係每樣嘢只能淺嚐一下, 到最後都已經好飽. 所以選擇雖然多, 但其實普通人可以enjoy到嘅其實未必真係咁多.而且, 個量係多呀, 種類係多呀, 但質素就.... 相當麻麻. 不過長輩又有啲唔同, 見到成大隻刺身船送上枱, 已經覺得好有派頭, 視覺上好有效果, 咁就已經wow左. 但仔細食落, 其實真係麻麻地, 好多都偏乾, 油脂唔多.雞煲就好少少, 合格嘅起碼. 邊爐就..... 係有啲海鮮嘅本身就, 但又係同一個問題, 量係多, 但擺埋一齊首先疊住晒其實唔靚, 啲少少黑色嘅水就一直浸住大碗入面所有海鮮.....基本上, 如果貪圖視覺效果, 或者影相, 就會好似好多食物咁囉, 長輩可能鍾意嘅, 影完出嚟whatsapp俾親友好似好壯觀, 但後生少少就應該唔會prefer喇, 重質不重量啦, 而如果真係重量, 市面上都大把平100蚊嘅任食啦~~最後仲想一提service嗰part. 食到9:50, 就有人話要先埋左單先, 因為就快夠鐘, 但明明係無限時任食架喎, 而且當時個邊爐先嚟左冇耐, 第一轉嘢食都未碌熟...... 問多兩問, 原來係仲有40+分鐘先到宵夜session, 要截左單先. 呢點都奇怪架喇, 咁我問埋可唔可以畀卡, 佢又lur住話冇.... 然後長輩問我做咩唔畀卡, 佢話佢上次都係, 咁我追出去啦, 點知佢話已經碌緊, 冇得cancel, 冇得改用cash. 我話我明明問左, 你地話冇, 佢就指住收銀枱話貼左張紙寫話有. 喂大佬, 你提早咁多行埋嚟收錢, 我邊有機會行出去望呀? 仲要係話我自己冇問清楚, 我想講, 我不嬲都用信用卡儲分, 每次簽卡機會都唔放過, 所以每次都一定會問. 仲話返我轉頭話我冇問清楚? 唔好話鋪頭唔知點解急住要喺食客食緊嘢嘅時候, 明明傾緊計都要夾硬站亂歌柄, 要人地俾左錢先?另外想提一提, 用餐過程中, serve我地張枱嘅姐姐, 其實態度一直都友善, 呢點係要clarify的. 主要係收錢嗰個人, 仲有就係櫃枱收錢嗰度, 態度真係幾差.…查看更多

嘢食水準ok差, 其實都只係好普通嘅焗飯, 但完全係唔好食. 雖然價錢唔算貴, 但質素實在太差.後來食完先知, 啲人話原來呢間鋪頭衛生情況都好唔掂, 我算比較好彩, 只係嘔左一次, 至少冇話全個下晝攬住個廁所.....前兩日仲聽到佢地話, 會對政見同佢地唔同嘅食客嘅食物做手腳, 加料俾佢地嘆.... 呢個真係已經超越廚藝高低嘅問題, 係去到有冇尊重自己嘅專業, 同埋有冇尊重食客嘅問題. 你去幫襯佢, 但你其實唔知人地點睇你, 如果佢當你同佢政治立場唔同, 咁就真係祝你好運喇.....…查看更多

約左食飯, 先話要OT.... 唯有拿拿臨做完啲嘢先急急腳趕去飯局. 不過咁都有個好處, 就係我冇時間去之前research下間食店, 去到就可以盡情迎接surprises啦~~ 好多人都話, 灣仔有唔少未係好出名嘅食店, 咁所以唔多唔少都有諗過, 咦, 今晚呢間會唔會係呢....?鋪頭地點唔起眼, 不過搵啱地點的話, 一出lift就見到大大個鋪頭名了. 入面其實都ok好坐, 坐位夠闊落, 而枱與枱之間嘅空間, 以香港嘅標準嚟講算係咁架喇. 我一嚟到, 剛剛好趕得切第一輪嘢食. 吞拿魚特選算唔錯, 有拖羅味, 亦有鮮甜味, 油脂唔算特別多, 啱我, 而且最開心嘅係冇嗰啲吠極都吠唔斷嘅筋. 當然以上都唔算係咩特別高嘅要求, 不過做得到的話, 就算未必係好突出, 但至少都係幾唔錯了. 至於另一味就係薄片嘅金目鯛, 呢樣就食得到佢地用料幾新鮮, 食落有好清新嘅感覺, 而配嘅汁亦好夾, 輕微嘅酸味正好突顯出魚嘅鮮味.  之後就輪到朋友點嘅主菜. 火灸左口裙邊飯, 左口魚經過適當加熱, 油脂就迫左出嚟, 令到魚同飯都好香, 好食. 如果再燒多啲, 個魚就唔好食喇, 而燒得唔夠, 個油香亦未必可以出到, 所以真係啱啱好. 另外就係炸魚, 後來我問返, 呢隻魚係平目魚, 而日式嘅炸魚我平時算係比較少食, 喺有啲新鮮感之下, 覺得幾好食, 剛上菜嘅時候食, 真係完全feel唔到啲細骨, 而且廚師唔會炸得到乾爭爭, 喺脆脆嘅表皮下, 魚肉仍然有好好嘅口感. 當然啦, 唔同英式嗰種啖啖肉, 畢竟佢都會有大骨, 但鍾意唔鍾意有骨就好個人嘅, 而我雖然唔多鍾意, 但個肉啂質感同味道, 絕對都係令人回味嘅. 最後就係鮮帶子刺身, 佢最好就係唔會有一大浸雪味咁, 相信個來貨都真係有一定水準. 之後就到我再揀食物喇, 由於頭先吞拿魚根本唔夠分, 而家就再補多兩件sushi, 重覆嘅就唔多講喇. 然後就係活赤貝刺身, 呢樣其實係我見隔離枱食到津津有味咁, 所以又想睇下係咪真係咁精彩. 結果? 真係ok, 有時食赤貝會有一種半腥半澀嘅味道, 但佢冇, 而雖然價錢唔平, 但份量都算相應地多返, 所以真係值得一試. 最後我再揀左安格斯牛肉軍艦, 呢樣我自己覺得相對上普通少少喇.   然後有一個朋友要走喇. 其餘我地就留低繼續傾下計. 點知傾傾下, 又想食多少少嘢, 結果就嗌左生蠔同劍魚腩刺身, 順便都飲下啤酒啦. 生蠔都算中上, 至少佢夠肥美, 我自己就鍾意海水味重啲嘅, 而佢就唔算重, 咁所以唔算係my favourite cup of tea喇. 反而劍魚腩唔錯喎! 一嚟到見到我都覺得係好食架喇, 食落去亦冇令我失望, 厚身得嚟唔會難咬, 咬落去時個魚香慢慢散發出嚟, good呀~~最後仲想提一提, 店員嘅服務態度友善, 你知啦, 呢點喺香港絕對唔係必然. 喺呢度食, 可以真正咁relax下, 享受一下放工後同朋友相聚嘅時光, 真係正~~…查看更多

聽過朋友講話呢度唔錯, 於是提早兩個禮拜訂左呢晚慶祝太太b-day.  入到餐廳發現都真係幾靚, 燈光啱啱好, 有啲情調咁. 個酒櫃幾型, 如果屋企有返一兩個就好喇....其實坐低都enjoy左一陣個氛圍, 先醒覺要睇menu叫嘢食, 如果唔係驚唔夠時間食完成餐! 我覺得麵包好好食. 表層脆脆地, 入面夠軟, 而三款包各有自己特色, 其中有芝麻同香麥味嗰個真係very good. 本身我就唔太好茄子, 所以個香草茄子醬我就係咁意試左少少only. 反而另外紅紅地色嗰個辣肉腸南瓜醬就有好認真咁點左好多. 味道幾rich, 配麵包好夾, 呢個大家真係唔好錯過呀.太太揀左生蠔頭盤嘅餐, 令我都有機會食到啲蠔. 三款蠔之中, pinky味道最淡, 還好. 濃少少嘅有anceline speciale, 呢隻味道會濃郁啲, 加上鹹鹹地嘅海水味, 唔錯唔錯. 而最濃嘅就係比較出名嘅gillardeau, 呢款唔使多介紹啦應該, 鍾意食蠔嘅人一定聽過. 重口味少少嘅一定啱食~~湯我就要左番茄湯with ham. 清新嘅番茄湯加左ham, 味道即刻豐富左好多, 而嗰少量油脂亦令到個湯更香. 冇辦法, 有少少肉香 / 油香 係真係唔同啲.至於我個starter就係呢個蟹腳. 平時食蟹腳, 我總會搞到手忙腳亂, 但呢個, 只係用刀叉就已經可以拎到啲蟹肉出嚟, 主要係因為真係幾大隻, 所以難度唔高. 少少煙肉碎亦成功帶到個味道, 令呢道菜嘅味道又多左一個層次.之後就有呢個雪葩. 當然呢個meal唔係嚟到尾聲啦, 只係俾我地清一清個口腔, 準備迎接之後個main course嘛!登登登登! 呢個就係我嘅main course. 好香好香嘅魚. 配菜有我最愛嘅露荀. 煎香嘅程度啱啱好, 保留到魚原本嘅鮮味, 配合淡淡嘅醬汁, 再加埋杯白酒, perfect match~~ 魚幾厚身, 但食落去口感係正嘅, 唔會爛溶溶又唔會"鞋", 可見真係煮得恰到好處.main course之後係一杯花茶. 呢個時候, 其實已經過左兩個鐘喇.  最後就係dessert. 我試左上面嗰個紅茶焦糖燉蛋. 個燉蛋一路食一路有紅茶味, 感覺好舒服. 如果唔怕因為茶而瞓唔着的話, 呢個真係要試. 另外嗰個cherry cream cheese mousse配啫喱就係太太嘅. 我都挖左一羹食, 都唔錯, 不過我都係鍾意我自己呢個紅茶燉蛋多啲~~ :)總括而言, 呢餐真係大滿足. 由一開始嘅麵包到最後嘅甜品, 都非常滿足, 亦都冇令太太失望. 如果想試下fine dining, 呢間餐廳可以算係一個好選擇呀~~…查看更多

之前search到公司附近有間土耳其菜餐廳, 早兩個禮拜五終於搵時間去會一會呢個地方~~去到先知餐廳喺19樓, 一出lift就發現, 原來有開揚靚景睇!! 可惜我部cheap cheap手機影夜景唔靚, 但淨係望到個境都已經覺得好正.除左外面個景之外, 餐廳本身亦幾好坐, 座位好鬆動, 亦乾淨企理. 我地咁早到, 當然係飲返杯土耳其style咖啡先啦. 佢地整咖啡嘅方式真係好特別, 老闆話坐熱嘅台係特登由土耳其帶返嚟架, 上面鋪滿沙, 然後就拎住個咖啡壺一路喺個盤入面兜嚟兜去, 咁就可以均勻咁多角度加熱咖啡. 呢個體驗都幾有趣~~ 朋友遲左少少, 我就先嗌左個沙律先. 而正餐方面, 我地嗌左個lentil soup, 一個意粉同一個好有土耳其風味嘅類似falafel嘅嘢. 呢個東西由一塊包同一啲餡組成, 當中有茄子, 有青椒, 有好幾種蔬菜, 有薯條, 有啲yoghurt醬咁. 連埋個包一齊食, 真係幾唔錯~~可能你會諗, 喂, 點解全部蔬菜嚟嘅, 其實你都可以嗌肉, 例如羊呀, 雞呀, 牛呀咁. 不過我地想試下蔬菜呢個, 所以揀左個蔬菜嘅啫~~    最後老闆又向我地推介一個地道土耳其甜品, 我地見機會難得, 好, 又試下. 基本上個甜品對香港人嚟講, 算有啲偏甜, 畢竟多數香港人都追求唔太甜, 呢點同中東 / 東歐嗰邊幾唔同, 呢個冇辦法. 個食物本身都幾得意嘅, 食落有少少似棉花糖嘅口感, ok鬆化咁. 香港又真係冇乜點見過佢又真嘅.唯一最可惜係我地真係早到, 老闆話10點後就會變成飲嘢地方, 我地望望個menu, 都有唔少酒同cocktail. 淨係bar台上嗰度都好多樽酒, 不過我地見有排等, 都唔好意思咁樣坐成晚去等, 所以唯有下次先試下啦. 其實喺咁靚嘅景之下飲嘢, 應該幾好feel架. :(…查看更多

自己住呢頭, 成日經過見到呢間感覺幾唔錯嘅地方, 於是終於搵日的起心肝約埋幾個frd一齊幫襯~~ 少少感受喺到分享下.讚:   點解話感覺唔錯? 其中一個原因係, 因為本人幾好杯中物~~ 而經過呢度就次次都見到個menu..... 嗱, 就係呢個, 咁你話點能夠唔心動先? 啤酒都唔係最特別, 最特別係佢地有埋手工啤﹗﹗當然, 同出面其他一啲專門俾你飲手工啤嘅地方相比, 佢嘅選擇唔係最多最齊, 但假假地都叫有啲options, 至少喺高街 / 第三街嚟講, 似乎冇咩其他店鋪有先啦~~   另外一點吸引我嘅, 係食客坐喺入面嘅感覺. 呢間唔係嗰啲俾你食完就走, 又或者俾非常精緻嘅高檔大餐你嘅地方, 而係一個俾三五知己, 又或者一班frd, 再唔係就幾個同事收工後嚟傾吓計嘅地方. 所以個重點就係坐得舒唔舒服, 同埋有咩view. 我最鍾意嘅, 就係門口邊嗰個坐喺餐廳入面望出去嘅位~~ (可惜當日已經有客人坐左, 所以我冇得坐) 夜晚嗰度唔多車經過, 靜靜地非常舒服, 又唔會話好光咁, 真係幾啱傾計. 至於店內呢, 簡簡單單, 有少少手工藝feel, 算頗堪玩味, 肯定唔係平時悶到死嗰啲裝璜先.食物方面, 佢得意嘅地方在於, 係每個地方嘅風味都會有, 每個dish都有一個地方嘅特色, 譬如我幾鍾意嘅呢個黑豆飯, 餐廳就滲入左巴西特色, 個番茄salsa係有啲拉丁味道.仲有呢個胡椒蟹雲吞撻, 聽個名都知係新加坡代表喇. 呢個組合好精彩, 蟹肉拆晒出嚟唔使你郁手, 加個外層 / 底層增加口感, 少少香料又令到個味道更立體. 份量細細咁, 最適合傾計飲嘢嘅時候食.飲住啤酒嘆芝士牛坑腩焗薯條, 真係人生一大樂事~~如果話有咩唔滿意的話, 唯一就係價錢略貴啦.... 不過自從地鐵通車前後, 西營盤, 西環一帶, 租金都飛升, 物價自然隨之上升..... 唉, 冇辦法, 我地都做唔到啲咩, 對餐廳嚟講, 呢個或者算係一個先天性嘅缺陷啦. 不過偶然嚟同frd聚吓, 如果成個體驗都舒服又enjoyable的話, 就算貴少少都值得嘅.…查看更多

朋友約食火鍋, 仲要係公司附近, 我當然二話不說就應承啦~~呢間喜記, 老實講, 本身真係未聽過, 不過可能正因為咁, 喺旺角/油麻地呢頭, 7點幾8點嘅放工時間, 都可以唔使等位, nice~~ 入到去發現入座率都有7成左右, 睇嚟係我唔識嘢喇..... 而我地呢個位, 仲要咁啱睇到電視添~~ (對我嚟講就冇意思, 因為我唔睇, 但就fit晒朋友) 醬料就例牌咁啦, 好處係人手夠, refill效率高, 咁就唔使餓住等咁耐啦~~ 飲品櫃可見, 飲品選擇唔算特別多, 不過自家制嘅嗰幾jar, 都唔錯, 配合打邊爐就啱晒. 而由於朋友們唔多食辣, 所以湯底揀左個清少少嘅. 但都唔錯喎, 起碼都可以就咁飲返幾碗, ok清甜架, 好過油淋淋或太濃味嗰啲, 冇得就咁飲.  至於食物方面, 有幾樣都值得講吓. 譬如呢個蟹籽墨魚油炸鬼, 有趣呀, 出面唔多見架, 而佢地組合埋一齊, 原來又幾match喎, 而且幾樣食材texture各有不同, 反而令到口感好豐富, 值得一試. 另外有個魚片, 雖然望落同出面差唔多咁, 但熟左之後食落去就真係同出面嗰啲有多少唔同, 連唔太好呢樣嘅我都覺得好食, 咁應該都真係唔錯喇. 接住就係魚滑, 只係得4粒, 計返都唔平, 不過好就好在幾好食, 比起另外我地叫左嗰幾樣丸同餃都要好食, so如果大家有機會, 不妨試試. 另外, 店員熱誠推介嘅至尊本地手切牛頸脊, 又真係精彩嘅. 分左三層, 每層都真係有唔同. 最難得係本地嘛, 喺呢個年代, 特別要支持本土嘢啦係咪先? 不過呢次就真係唔係盲撐, 而係真係ok, 鍾意有咬口嘅, 鍾意有多少少脂肪嘅, 又或者鏜意細細粒一口過嘅, 全部都照顧到. 價錢去到近3舊水, 初頭感覺好貴, 猶豫左一輪好唔好叫, 不過後尾啲牛肉嚟到, 發現個量都ok, 所以都慶幸有叫到. 至於響鈴, 午餐肉同山根, 分別都係我同朋友鍾意嘅食物, 本身就點都會叫, 而呢幾樣最後都冇令我地失望. 咁我地幾個人當然冇可能食得落太多樣嘢食啦, 但呢幾樣我地食左都係ok嘅, 加埋以上一啲比較特別少少嘅嘢食嚟睇, 呢道嘅嘢食嘅水準, 應該都有返咁上下嘅. 喺價錢唔算好貴, 嘢食ok, 地點就腳方便, 又唔使煩等位嚟講, 呢間都算fulfill晒以上條件, 有機會去開嗰頭, 可以考慮一下喔.…查看更多

喺香港, 放題嘅選擇真係唔少, 起碼有幾十間. 而吉壽呢, 價錢算中等, 但overall個experience又算唔錯. 餐廳幾大, 以我所見, 大部份食客都坐得舒舒服服, 對比有啲好迫夾, 或者枱與枱之間距離好近嗰啲, 吉壽呢方面已經win~~食物方面, sashimi真係算唔錯. 好幾樣都頗為肥美, 而我個人覺得, 一定唔可以錯過嘅係油甘魚, 池魚王同埋劍魚腩. 油甘魚本身好鍾意, 可能有bias, 但池魚王同劍魚腩咬落去真係好有滿足感, 有鮮味亦有少少油脂味, 真係幾得~~由於sashimi真係幾唔錯, 我真係食左唔少, 變左其他食物就冇食咁多. 不過都有少少可以推介下, 包括壽司嚟講, 鵝肝帶子呢個組合ok, 鍾意呢兩樣嘅人應該會幾滿足. 另外個鹽燒三文魚腩比我想像中好, 原先我其實係tick錯左, 不過嚟左之後都食啦, 以免浪費, 點知燒得幾香, 放埋口邊時已經聞到個香味, 算係意外驚喜.另外就係蟹柳天婦羅. 有啲人可能會嫌係cheap嘢, 但我覺得呢間嘅蟹柳天婦羅真係幾好, 唔知係炸嘅油溫呀, 炸嘅時間呀, 個粉呀定係咩喇.最後仲有個菇都值得一提. 送到嚟嘅時候香噴噴, 上面少少香草令到個香味更出, 而且喺刺身, 壽司同其他炸物之間, 有一道菇嚟balance一下, 之後再繼續食返刺身時, 感覺會比較fresh, 好似短時間內第二次食刺身 / 壽司咁, 可以開心多一次, 幾好架~~…查看更多

近年好興韓燒, 年中都食過好幾次, 但呢次朋友介紹話有個地方好食, 於是呢日放工就一齊去食下~~ 上到去, 首先覺得個feel都ok, 地方唔係話十分大, 但坐得ok舒服, 枱同枱唔會太貼, ok好坐. 剛坐低, 就黎左幾碟頭盤, 全部都可以refill的, 其中個泡菜特別好食, 辣得黎有少少甜味, 令我地食完又食. 而嗰碟大大舊白蘿蔔, 唔係用黎食架, 係用黎抹個剪爐個燒盤, 用落其實幾好用, 變左唔使不斷換個盤, 成件事都efficient啲~~ 另外有個醬料corner, 我見有啲人好似走漏左眼. 嘢食黎講, 普遍都幾好食, 好多都唔使再加額外醬料都已經好夠味, 其中平均黎講牛比豬更好食. 而真係唔可以miss嘅係海鮮, 扇貝又好, 帶子又好, 真係正~~ 印象中扇貝我起碼食左4,5隻~~ 除左燒嘢食外, 亦有其他熟食提供, 其中上圖個冷麵, 我覺得值得食, 除左味道好之外, 其他地方唔多見, 甜甜地有少少酸, 喺熱辣辣嘅嘢食之間, 涼一涼好舒服~~最後不得不提, 臨尾每人會有一條雪條, 我要左蜜瓜味, 好好食, 食飽之後整返條真係very good~~…查看更多

行經the one上去睇戲時, 不時會見到呢間鋪頭排晒隊咁, 今次終於搵到機會黎一試究竟. 開放式嘅design, 雖然枱多, 但唔會有焗促嘅感覺, 不過就會嘈少少, 有得有失啦.嘢食方面又真係唔錯. 青木瓜絲大蝦沙律夠足料, 大蝦好食, 青木瓜絲幾清新, 而且個量都唔少~~ 豬頸肉米紙卷亦唔錯, 但更出色嘅係燒木棉魚. 燒得好香, 配埋啲鹽好好味, 而且食落冇影出黎咁乾, 值得一試.食越南嘢, 一定要叫個粉食嘅, 咁個粉就中上啦, 如果食量唔大, 不妨留返啲位食其他嘢. 因為最精彩嘅應該係最後呢兩樣.... 一個係滿到瀉嘅椰青海鮮飯, 個椰汁嘅椰味好香, 淋喺海鮮飯上面, 成個飯說不出的好食, 鍾意椰味嘅人不容錯過. 至於海鮮酸辣鍋, 足料之餘, 個湯好正, 有海鮮味, 而且酸酸辣辣咁 (唔會太酸), 開胃到令人食指大動.overall黎講, 幾唔錯, 難怪成日都見到咁多人排隊. 如果唔想排咁耐, 好似我咁8點幾先到就得~~…查看更多

今日放假, 約左friend試試屋企附近呢家貌似幾吸引嘅餐廳. 食物有好幾種菜式, 主要都係歐洲 / 西方菜式, 而我地既然黎到呢度, 理所當然要嗌啲crepes試下啦, 就要左個招牌嘅焦糖牛油crepes. 有crepes又自然都想食埋galettes, 所以亦嗌左個smoky chicken galette. 然後諗諗下覺得似乎都係唔夠食, 於是另外再叫埋一個法式油封鴨脾.招牌crepe幾唔錯, 甜度適中, 唔會太「死甜」, 而個crepe本身亦好香, 水準真係唔錯.至於個smoky chicken galette 亦佳, 幾鍾意呢幾樣材料嘅配搭, emmentale cheese同雞本身已經夾, 再加埋好香嘅紅洋蔥, 令到呢個galette更香, 味道更豐富, 唯一要挑剔嘅係價錢有少少貴 (如果a la carte咁嗌). 話雖如此, 對比起其他區嘅西式店鋪, 佢嘅價位已經唔算係貴架喇. 最後不得不提係呢個食到我地lam lam脷嘅法式油封鴨脾. 首先賣相已經唔差, 點知食落去都係有驚喜. 鴨油本身已經香到不得了, 再加埋個port wine sauce, 成道菜就變得非常非常好食, 個醬汁可以話係冇得頂. 鴨脾本身係慢煮而成, 不但保留到佢自身嘅味道同質感, 而且亦得夠食到製作上嘅用心, 以百零蚊嘅價錢黎講, 絕對令人非常滿意. 如果大家唔怕有少少油, 睇落有少少肥膩的話, 去呢度食嘅時候, 呢道菜絕對值得一試.…查看更多

又食放題? 冇錯, 我又食放題喇~~今次去銅鑼灣嘅滿屋, 喺正朋友公司樓下, 地點黎講, fit到漏~~場地黎講, 值得講講係因為喺同類形, 類近價位嘅放題餐廳黎講, 滿屋算相對spacious, 相對冇其他嘅咁迫, 呢點對於一坐就兩粒鐘嘅放題黎講, 都唔可以話唔重要架.另外值得一提嘅一點係, 如果你鍾意飲清酒, 滿屋亦可以滿足你, 呢個亦係佢地另一樣比同類形, 類近價位嘅放題餐廳優勝嘅地方, 呢度嘅清酒可以任意refill, 幾正~~至於嘢食, 大家最關注當然係刺身. 係唔錯的, 好肥美, 而且夠厚切, 食落夠晒口感. 至於壽司黎講, 燒嗰幾款我都鍾意, 燒得啱啱好, 另外都好值得一試嘅係芝士燒左上去嗰啲, 算係相對比較少見而又work嘅配搭, 無論搭邊款, 都出到芝士嘅味道, 亦唔會搶去配搭嘅食物嘅味. 至於個人口味黎講, 當然都係要食黑松露, 而事實上亦係唔錯的.其他食物方面, 燒蠔幾好, 唯一係油左少少, 但味道幾唔錯. 蝦天婦羅nice, 夠熱, 表面夠脆, 入面隻蝦都好食.overall 幾好, 整體質素中上, 另有個別食物唔錯, 係可以re-visit嘅選擇~~…查看更多