Hoppervs的个人专页

寫過嘅食評當中，呢間餐廳對我嚟講真係相對難寫。因為佢對我嚟講真係一啲都唔出眾，但又唔難食，要我形容就係你食完好快就會忘記嘅餐廳。假如朋友約你食你會去，但唔會推薦俾人食，自己亦唔會特別去食嘅餐廳。食物方面味道真係好雞肋，意粉係較幼身嘅扁意粉嚟嘅，但佢煮得有啲過淋，而我個人係鍾意食落有咬口、彈牙嘅意粉，所以唔係太啱我口味。四粒蝦仁算大粒，食落都算食係爽口。兩款嘅意粉汁都略嫌有啲太稀太水(見圖)，食落麻麻地。:(脆薯塊上菜嘅時候都仲係熱辣辣，食落都脆身，但味道同我喺一般快餐店或者超市買返嚟炸嘅係一樣味，冇咩驚喜但都ok 嘅。整體嚟講我覺得好一般，但見到甜品好似好多好評，如果遲啲有機會可能會去試多次。…查看更多

依家喺香港消費越嚟越貴，外面食碗雲吞水餃麵都要百幾蚊，但喺春記係百幾蚊就有兩大盒水餃雲吞，可以食足一個星期。咁嘅價錢真係抵到爛，啱哂月尾窮人(我)食。雲吞水餃睇落粒粒都好飽滿又新鮮包起，我即刻忍不住煮咗幾隻嚟食。雖然味道唔係驚為天人，但真係對得住個價錢有餘。雲吞嘅餡料係半肥瘦豬肉加蝦，水餃就比雲吞多咗木耳絲。兩者比較我就鍾意食水餃多啲，因為木耳爽脆嘅口感加埋豬肉蝦餡食落較有層次。值得一讚嘅係個皮，皮薄得嚟煮嘅時候又唔容易穿，我特登比平時滾耐啲啲水餃雲吞都亦然完好無缺！性價比咁高，我(糧尾)一定會回購！…查看更多

太安樓一向都係食宵夜嘅好地方，食物選擇多，價錢又親民，鋪頭又相對開得夜啲。太安樓雖然食物選擇多，但唔係間間都好食，食物質素較參差。而呢間人氣炒飯店，我個人認為係屬於較好食嘅店。其實金旦炒飯早就係街坊名物，對於收工收得晏嘅人嚟講簡直係恩物。所以就算係平日夜晚十點都好多人等，我一等就等咗半個鐘，但好彩佢都有啲櫈仔坐下唔駛企住等咁攰。服務方面，睇得出老板係一位對自己工作好有熱誠嘅人，見我第一次嚟食會好耐心好熱情咁介紹我有咩好食，邊啲係受歡迎嘅食物，仲俾咗細細舊自家制叉燒我試下，話係佢地signature。舊叉燒遞到埋嚟都仲係熱辣辣，上面鋪滿蜜汁，咬落多汁滑嫩，真係要學食神套戲入面大叫 “好好味呀！”我最終叫咗盒至尊蛋包飯加雞扒，雖然等咗成半個鐘，但當你見到其實廚房嘅人係冇停過做嘢，忙到滿頭大汗，就會體諒下，所以當日我見到雖然等好耐但係無一個客人有催，大家都好有耐心等待嘅。返到屋企，一開盒飯係見到一塊大雞扒，表皮令立立鋪滿成個蛋包飯，外賣嚟講賣相真係好吸引，令人垂涎欲滴。雞扒下面則係有別於日式蒲公英蛋包飯嗰種軟綿綿、半熟蛋皮包滑蛋嘅做法，而係一層薄薄嘅蛋皮包住個炒飯。隨飯附送係一盒甜甜嘅蜜汁俾你淋上個雞扒飯度食。炒飯顏色係似撈咗醬油嘅啡色，炒到粒粒分明。炒飯入面仲有頗多叉燒粒同粟米。其實收工頹飯嚟講，金旦一啲都唔頹，簡直係積極飯。唯一缺點就係食食下會覺得太油膩，但坦白講炒飯本來就係屬於油膩濃味嘅食物，鍾意食健康清淡就唔會揀食炒飯啦，係咪？…查看更多

蘇浙匯我覺得係喺東區算係比較出眾嘅上海菜館，裝修環境不俗，服務同食物整體嚟講都係中上。其中我覺得最好食嘅就係脆鱔！炸到好脆好香！脆到上面淋咗汁都完全不減個脆度！就算攤凍咗食都係脆卜卜，好香口。個汁甜甜地亦好襯個脆鱔，真係會忍唔住一啖又一啖接住食，如果睇波煲劇有呢碟脆鱔真係不得了，應該會不知不覺間食好多碟。我覺得去食蘇浙匯脆鱔真係必點小食！咁去食上海菜又點能夠唔食小籠包呢？坦白講唔係我食過最好食，但係真係唔錯！皮夠薄，湯汁亦多。熱嘅時候咬穿少少個皮啜湯汁再食個小籠包又或者攤凍啲一舊啪入口亦得，得咗！我曾經因為工作關係喺上海住過兩年，早餐好例牌係食素菜包(香菇菜包)加杯豆漿，唔知係咪習慣咗呢？返到嚟香港之後久唔久會有條癮食素菜包，但食過幾間都係俾啲羅漢齋類形或者白菜餡嘅素菜包，完全唔係嗰回事。但正宗上海素菜包喺呢度就食到，切碎咗嘅翠綠色菜帶住淡淡油香同香菇，食落甜甜地，相信唔鍾意食菜嘅小朋友都會食得好滋味。…查看更多

台式飲品店喺香港係長青樹，由我學生時代到依家都仲係人氣不減，越開越多，越開越多花款變化，但可惜我到依家都暫時未搵到一間特別令我驚艷嘅台式飲品，而呢間亦唔例外。呢間店據了解係台灣藝人詹子晴(丫頭)有份開嘅，除咗係攞明星開嘅店嚟做賣點之外，佢另外嘅賣點係飲品入面嘅珍珠係白色而唔係黑色同埋有芋圓可以選擇。坦白講我覺得啲選擇就幾特別，但味道就真係唔特別。芋圓同外面嘅甜品店食到嘅味道差太遠，比起上嚟真係好細粒令到芋圓煙煙韌韌嘅口感大大減低，咬兩下就冇咗。冇曬食芋圓時咬下咬下嘅樂趣。不過都唔係完全冇優點嘅，佢勝在杯嘢飲入面好多粒芋圓，亦因爲細細粒唔怕塞住飲管口，但要注意唔好飲太快因爲會唔覺意吞咗幾粒。白玉珍珠論味道同口感就好過芋圓，但同黑糖珍珠比就弱好多。除咗顏色特別可以影相呃like之外，我真係諗唔到有咩特別過人之處。反而杯茶最好飲係桂花味好香，亦飲到片片桂花，鍾意飲桂花茶就真係可以飲下呢間。之於玫瑰奶茶都唔錯，但花茶嚟講個人就鍾意飲桂花多啲啦。…查看更多

百味堂其實唔係第一次食，之前曾經有位朋友好有心咁買過個牛奶忌廉包同我一齊分享。可惜嘅係麵包入面嘅忌廉餡真係唔好食，日本便利店嘅忌廉泡芙/包係好食過佢十倍。百味堂個包入面嘅餡料唔夠Creamy，奶味又淡得個甜字。個麵包味道質感印象中都好一般，所以對於百味堂印象麻麻地，自從嗰次食過之後覺得係無需再去食嘅店。但前幾日行過太古城百味堂聽到位小朋友好興奮咁同佢媽媽講話百味堂嘅牛奶雪糕好好食，我見佢不停力sell佢媽媽買，就勾起咗我既為食又好奇嘅心，就買咗杯牛奶味雪糕嚟食(小朋友嘅媽媽亦都屈服咗，同仔仔一人一杯雪糕哈哈😄)。第一啖食落已經覺得牛奶雪糕比忌廉包好食太多，甜甜嘅牛奶味非常香濃，雪糕筒亦夠脆。但口感食落唔似食開嘅軟雪糕，有啲似細個食牛奶樂雪條嘅口感但比牛奶樂雪條軟身。因為口感有啲似雪葩/雪條嘅關係，所以質感相對地唔夠一般雪糕滑，但勝在味道好同獨特嘅外型，啱晒放上網呃like!…查看更多

就咁講茶米呢間餐廳你未必聽過，但KiKi麵你就一定知，而呢間餐廳就係同著名嘅KiKi麵合作嘅。喺餐廳門口已經見到一堆KiKi麵同印住KiKi logo嘅茶水bar，真係唔抬頭望餐廳名都唔知間餐廳唔係叫KiKi。坐底之後環觀四周大部分都係中年女仕同年輕OL。晏晝飯嘅餐牌選擇唔算多，食物得撈腸粉，甜品同Set Lunch。Set Lunch係日日唔同嘅(星期一至五)，但都會有前菜，小食，主菜，甜品同一杯嘢飲，價值148蚊。另外有個廚師推介Set Lunch就會貴10蚊。星期三嘅Set Lunch我就揀咗擔擔麵(kiki品牌),小食係涼拌青瓜雞絲雲耳，另外加咗碟個set無嘅櫻花蝦蟹肉撈腸粉。佢嘅前菜係幾粒切開咗一半嘅蕃茄仔，蕃茄仔算甜但唔係非常新鮮。個小食係我覺得十分之難食嘅，青瓜唔夠新鮮爽脆，雞絲有一半都係雞皮，肉非常少，唯一放得入口嘅係雲耳。唔知係咪食完個咁難食嘅涼拌青瓜雞絲雲耳，個撈腸粉我覺得好食好多，櫻花蝦份量都幾多，仲食到啖啖蟹肉，腸粉亦熱辣辣軟綿綿。但價錢嚟講就貴咗啲，因為都算細碟，幾啖就食晒。擔擔麵如果你係大胃王就一定唔夠，但好彩我之前食咗個腸粉，所以食埋個麵啱啱好。茶米嘅擔擔麵唔係平時食開嘅花生肉碎辣油濃湯麵，而係肉碎撈麵。肉碎份量同麵差不多，每食一啖麵撈一啖肉碎都唔會唔夠肉碎撈。雖然見唔到花生碎，但撈完個汁之後都食到啲花生味嘅。雖然擔擔麵一般嚟講都係辣嘅，但呢碗擔擔麵我覺得係一啲都唔辣嘅。甜品係茶凍，食落嘅啫喱有淡淡嘅茶味，入面有一粒藍莓同半粒一分為二嘅草莓。水果一啲驚喜都無，我寧願佢就咁俾個茶凍我更好。整體嚟講間餐廳唔算難食，如果係返工返開嗰頭，想簡單食個細細地份量嘅lunch但又唔想食三文治同沙律嘅話都可以食下，但睇返個價錢，份量同食物質素嚟講嘅話，茶米就真係麻麻地抵食啦。…查看更多

雖然喜茶已經開咗一段時間，但排隊人數都係有增無減，令我感到神奇嘅係好多排隊嘅人都竟然係內地人，喜茶據我所知係內地品牌，唔通香港喜茶特別好飲？等待嘅人數越多，我嘅好奇心同期待感就越重。就咁睇攞茶嘅位置，最多人嗌多肉葡萄同芝芝莓莓，不過我就叫咗芝士金鳳茶王冇糖少冰。因為好多人用手機落單嘅關係，我排隊買嘢飲雖然只係等咗五分鐘左右，但等嘢飲就等咗半個鐘多啲。我覺得喜茶同我飲過嘅奶蓋茶唔一樣嘅地方係個杯嘅設計。佢個杯蓋係可以自由調較杯口嘅大細，越大就越容易飲到奶蓋，越細就越容易飲到茶，設計方便又人性化。芝士奶蓋係好飲嘅，質感綿密濃稠，味道帶少少咸又香嘅忌廉芝士又點會唔好飲呢？但坦白講唔值為佢等咁耐。至於茶就實在係完全無討論價值，既唔難飲到要彈到上天花板，但又唔係好飲到要極力推介。係屬於 “既然俾咗錢又唔難飲咁咪飲埋囉”嘅感覺，茶葉嚟講真係另外一兩間店做得更好。我覺得如果要飲真係手機落單算，實在係無耐性再等咁耐飲一杯喜茶。…查看更多

基本上係我每次去筲箕灣都會食，唔食嘅原因都只係因為間店唔開門。之前係其他食評有提過，我係一個好鍾意雞蛋味甜品嘅人，而雞蛋仔係其中之一。我唔係專業食家，所以無辦法評論係咪最正宗嘅雞蛋仔，但呢間雞蛋仔真係非常啱我口味。我知道有啲人比較鍾意較麻糬口感嘅雞蛋仔，唔鍾意脆嘅，覺得脆嘅雞蛋仔食落冇咁實在，但我係一個好貪心嘅人，對我嚟講一粒好食嘅雞蛋仔要有齊曬兩種口感，而低調高手就做到啦！佢一粒雞蛋仔入面，一半係脆過蛋卷，一半係雞蛋仔獨有嘅煙韌口感。蛋漿唔係一味得個甜字，蛋味香濃，真係我食過好高質嘅雞蛋仔。…查看更多

我唔俾好評原因唔係因為好難食，而係我真心覺得呢間嘢真係真係吹大咗，有啲啲名過於實。我今次食咗佢嘅周月沾麵，麵份量要咗100g，大約係大半碗嘅份量，正常份量係200g, 大食嘅可以叫300g。其實佢個麵本身係整得唔錯，又彈牙又掛到汁，溏心蛋都好食。但係個沾麵汁真係好麻麻地。我本身口味並唔係清淡派，鍾意食沾麵好大嘅原因係鍾意嗰個濃濃嘅魚介豚汁。但濃味唔等於死咸。好可惜係佢個沾麵汁入面嘅豚肉真係咸到飛起，口感又鞋又乾。明明已經係肥豬肉又浸係個汁入面點解口感可以咁差？個汁本身係食到好香魚介味同少少酸味嘅，但真係唔係我食過數一數二好食嘅沾麵。可能我期望太大啦，食完真係有少少失望。…查看更多

有冇人同我一樣都好鍾意食越南菜呢？今日越南癮又起就同老公去咗食安南。相比起主菜，我其實更愛叫小食，老公話我去食越南菜食到好似食點心咁(笑)。 我地嗌嘅所有小食件數都係雙數，全部都係四至六件，唔怕唔夠分。第一碟嚟嘅係越南粉卷，每件粉卷都鋪上滿滿嘅炸蒜同脆蝦米，再淋上咗帶少少咸味嘅蔥油。 粉皮晶瑩剔透，厚度適中，口感順滑綿密。 最細心係佢將大部分香港人都唔鍾意食嘅芽菜、香菜分開放，無放埋粉卷上面，我試連埋粉卷食咗幾條芽菜，都幾爽口同冇乜草青味。餡料係半肥瘦肉碎，木耳同蝦米，都算足料。伴碟嘅扎肉亦份量十足，唔係薄薄一片，係同個粉卷一樣厚架！點埋個魚露汁真係好好食，後嚟侍應見我點囇個魚露汁亦有主動幫我添。第二碟係喺香港越南餐廳較少見嘅浮萍餅，如果要我形容，我會將佢形容為有住淡淡米香，食落冇咩味嘅砵仔糕。香港砵仔糕有紅豆，越南砵仔糕有嘅係蝦粒同脆麵包粒同埋蔥油。食法有兩種，一係將帶少少咸咸嘅椰青水汁同辣椒加上浮萍餅，一係就係加魚露汁。對我嚟講算係非常有特色嘅小食。第三碟係人氣好高嘅牛油雞翼，就咁聞落去係少少香茅味，炸蒜味同黑椒味。食落舊雞翼本身唔係好食唔到牛油味，但反而就咁食雞翼上面嘅一粒粒炸蒜時就食到好重牛油味。雞翼外皮炸得非常脆，但又唔會脆硬到𠝹損親口。嗰種酥脆係一口落去就會聽到咔滋一聲，咬開雞翼會見到入面係有少少肉汁。非常邪惡又好食！如果係鍾意食香口嘢，牛油雞翼真係必點！第四碟係香醋蜜椒牛仔骨，相比頭先嗰幾碟遜色啲，個汁油膩感有啲重，不過橙香黑胡椒味好出又甜甜地，如果個汁無咁油相信會更加好食。牛仔骨塊嘅肉質算唔錯，有咬口得嚟又唔韌，牛嘅脂肪比例亦唔錯。最後一碟嘅馬拉盞炒通菜係最一般，比較好嘅地方係通菜唔會炒到黃晒呢點係加分，啲汁喺曬底，建議撈一撈先食如果唔係食到底會好咸。好特別嘅脆脆蝦米砵仔糕上菜速度算正常，我地七點九嗌嘢食，八點五十已經食曬所有嘢買單，侍應服務態度亦唔錯。…查看更多

今日去開銅鑼灣，諗住去試新開咗嘅泰式奶茶，大約夜晚九點到已經見到排晒長龍，等咗大約五分鐘就有位職員大聲宣布“而家太多人等緊攞嘢飲啦，飲品暫停，排隊買嘅人要再等耐啲，雪糕唔駛等！”我聽完上前想問職員飲品要暫停幾耐時就見到個牌寫住等一小時，果斷放棄飲泰式奶茶食泰式奶茶味雪糕。雖然話雪糕唔駛等，但其實都有條隊，只係短好多。雪糕口味除咗泰式奶茶味仲有綠茶味，亦有兩隻味雙拼，但我今次只係叫咗泰式奶茶口味，25蚊一杯。雪糕比一般軟雪糕奶味重啲質地厚身啲，但同意式Gelato比就相對稀身同水啲。口味就真係同我飲過嘅泰式奶茶一樣味，好甜同茶味好濃，顏色亦同奶茶係一樣色嘅，相信鍾意飲泰式奶茶嘅人食呢個雪糕唔會失望。如果你同我一樣唔鍾意排隊又想跟下依家嘅泰式奶茶熱潮嘅話，可以不妨試下食個雪糕。再唔係依家天氣咁熱，食住個雪糕等攞嘢飲都應該無咁辛苦。…查看更多

喺DALLOYAU食完晏之後，腦海第一個念頭係 “下次一定要嗌埋幾個好姊妹嚟先得。” 原因係佢集齊曬開女子會嘅幾個要點:1)環境好，適合影相鋪面乾淨，裝修高尚優雅，枱同枱之間有一定間距，唔會太局促。同一班姊妹一齊影相時唔太怕其他人會入鏡。啲櫈全部都係軟軟嘅類絨毛梳化質地，同朋友仔傾偈傾耐咗都唔會怕坐耐咗會唔舒服。2)服務好，態度細心雖然侍應人數唔多，但係都兼顧到樓面，唔會話要嗌嘢食/飲會搵唔到人。侍應亦都細心，當日我去食晏發現Set Lunch得威靈頓牛扒同另一個素漢堡，朋友叫咗威靈頓牛扒，我又唔太想叫同一樣但嗰日對素漢堡又不太感興趣，侍應見到我望住個Set Lunch有猶豫時都主動同我講如果個set無啱食可以幫我轉煎三文魚。服務態度值得一讚！3)食物質素好，份量可調節雖然Set Lunch選擇並唔多，但佢其實有兼顧到唔同人口味。有濃味豐富啲嘅(威靈頓牛扒)，有素食嘅(素漢堡) 同清淡低卡啲嘅(三文魚)。同一班姊妹食飯，最耗時間嘅地方莫過於要照顧唔同姊妹們嘅口味同需要，而Dallouyau個Set Lunch 就做到啦！除咗Set Lunch之外亦有A La Carte Menu,臨走前見到隔離兩枱都有另外叫Set Lunch入面冇嘅Carbonara，令到我都有啲好奇想下次去試下。Set Lunch有個沙律，湯同主菜3樣嘢，但其實係可以揀2 course或者3 course, 細食啲嘅朋友都唔怕會浪費食物，大食嘅又唔怕會唔夠食。嘢食質素方面亦做得唔錯，沙律唔係求其俾幾條菜淋個汁就算，我當日食嘅沙律係有蕃茄，小貝柱同火腿。湯就係法式洋蔥湯，個芝士法包吸滿曬個湯，真係好邪惡！不過我發現呢個湯真係唔係人人鍾意，有部分人會覺得浸淋晒嘅麵包好難食，但係我自己就鍾意飲洋蔥湯嘅，亦覺得Dallouyau整得唔錯，湯底唔會過咸。我曾經喺法國巴黎一間小店飲過，當時覺得個湯就咁飲都咸到傻，加埋咸咸地嘅芝士真係咸到好似飲海水咁😖😖😖！主菜嘅三文魚煎得非常香，塊三文魚扒亦夠份量，脂肪比例好好，唔係薄薄一塊，塊三文魚對我嚟講煎得啱啱好，接近全熟，但中間位置係未熟透，如果一定要食全熟嘅朋友記得同廚師講要熟啲。我厚顏無恥地問朋友分一小舊威靈頓牛扒俾我試下，Dalloyau 嘅威靈頓牛扒同我食過好唔一樣嘅地方就係牛扒中間係一小塊鵝肝，試完我覺得塊扒冇乜特別，反而係包住塊扒嘅蘑菇蓉好香！香到撈埋牛扒加酥皮加鵝肝都完全搶唔到佢風頭！素聞Dalloyau甜品好有名，但可惜眼闊肚窄嘅我食完成個lunch(加一小舊威靈頓牛扒)後真係飽到食唔到，有啲後悔冇叫2course加甜品就算😔😔😔。…查看更多

細個好鍾意食樓下街坊麵包店賣嘅雞蛋糕，濃濃嘅蛋香，超級鬆軟又帶點水份嘅口感，細個覺得簡直係人間最高享受。雖然依家大個咗之後蛋糕嘅選擇多咗好多，市面上越來越多新奇複雜嘅口味，花巧漂亮嘅外型，但係我食過咁多蛋糕，始終都係對嗰種普通嘅雞蛋糕念念不忘，間唔中就想食下，唔知呢啲係咪就係所謂嘅情意結呢？有一晚屋企人喺呢間麥蛋糕買咗一條古早原味蛋糕一齊食。我從來無聽過呢間嘢，睇個包裝同蛋糕亦覺得冇咩特別，但一食，不得了！！係我細個食過嘅味道！！係我鍾意食嘅雞蛋糕！嗰刻真係咩回憶都返曬嚟！蛋糕好鬆軟又唔乾身，一刀切落去見到個蛋糕係有彈性嗰種，唔係一切就搨，蛋糕無任何裝飾，忌廉呀，唧花，咩都無。就係簡簡單單好撲實嘅長方形蛋糕。蛋糕顏色係淡黃色，蛋糕面係啡色，就咁睇落係有啲似日本嘅蜂蜜蛋糕，但味道同口感係完全唔一樣。麥蛋糕食落比日本蜂蜜蛋糕無咁有黏性，蛋糕底亦冇一粒粒糖，甜度亦無蜂蜜蛋糕咁甜。我最鍾意呢個蛋糕嘅地方，就係佢嘅蛋香。我係一個好典型嘅香港人，好迷雞蛋味嘅甜品，所以對蛋捲蛋撻雞蛋糕嘅蛋香有一定要求。而麥蛋糕嘅蛋香係真係好香！我覺得雖然味道簡單，但令人回味無窮，值得推薦！…查看更多

之前見到網上介紹呢間嘅雞蛋腸粉係必食，咁今日去太安樓就決定試下，見到餐牌上面寫住雞蛋腸粉係23蚊，同阿姐講要一客，佢問我要唔要蔥，我話唔要，到佢落粉漿嘅時候又問要唔要蔥我又答唔要，但呢個時候佢居然話 “下？但我落咗啦喎。你頭先話要！” 坦白講，我覺得搞錯張單真係唔緊要，講句唔好意思整返好就ok。但你仲堅持係自己係啱仲聲大大咁迫我硬食就真係好無賴，之後仲同我講要收我25蚊。本住息事寧人就唔同佢嗌交，但心入面默默覺得就算幾好食都以後唔會再嚟食。但可惜個腸粉係真係完全唔好食。腸粉好油膩又粉，腸粉本身一啲都唔滑，唔知係咪為咗掩飾呢樣嘢所以上面嘅汁係非常非常油，個汁亦唔係豉油，係一種好奇怪嘅味，甜甜地夾油膱味，個人真係唔識欣賞。雖然係雞蛋腸粉但我真係食唔到蛋香，太安樓咁多好嘢食真係可以唔食呢間。☹️☹️☹️…查看更多