wine list的个人专页

晚上六時已經坐滿四成嘅枱， 今時今日一點也不出奇， 因為香港市民在疫情之下已經慣咗提早食晚餐。最先到的是脆脆BB豬沙律， 一隻碟上， 普通沙律菜加沙律汁墊底， 四件乳豬放面， 微暖， 不是熱的， 比起以前四格點分開上 熱辣辣的脆乳豬比較遜色了。 再嚟蟲草花涼拌鮑螺片小食， 普普通通不過夠曬凍。主菜到先嘅就係 鴛鴦豆腐燴加拿大龍蝦， 雖然豆腐又平， 龍蝦用碎粒， 加埋罐頭龍蝦湯， 不過整得好食， 可能個組合令到啲味好夾。 酥香鴨半隻 都還可以。 蘆筍山藥炒藕片 十分清淡， 算係素食推介。 菠蘿咕嚕肉 大汁咗啲， 但係個汁唔夠味。最後有啲驚喜嘅就係鐵板蔥香脆皮海參， 鐵板蔥油都幾重鹽味， 海參發好曬但係冇入味， 中間讓薯蓉之後再落漿炸脆， 有啲新意！ 如果釀蟹粉仲矜貴， 又可以收貴啲！壽包就普普通通， 但係最好就係唔使等20分鐘！ 十分鐘就有！…查看更多

今日一行四人去試新嘢！set lunch 有三個course。 一個人叫什菜湯， 原來係南瓜蓉忌廉茄雜菜， 味道濃沃非常好味！ 另外三個叫沙律， 沙律汁有胡麻醬同埋醋， 除咗標準嘅生菜洋蔥之外， 仲有cream cheese碎同埋原粒橄欖， 唔係豉油王西餐喎！主菜的龍利魚夠熱唔腥， cream sauce OK。 西班牙海鮮飯仲有啲失色， 欠缺色彩及只得三粒蝦， 其餘海鮮都碎哂同啲飯撈埋一齊。 8安士 西冷牛扒 ok， 夠厚肉。 羊肉柳認錯，夠嫩滑。第三個course係飲品或甜品。 叫咗一個 Americano， 根據係cream唔係奶， 即磨咖啡似樣。 另外三個叫咗是日甜品 brownies加雪糕， 雪糕當然係凍啦， 但係個brownies 居然係熱㗎！ 跟餐的甜品都有咁嘅水準， 一定要再嚟！…查看更多

第三次到這裏惠顧午餐， 又看看今次如何。點了一個 芥末墨魚西班牙飯， 一份牛扒。 磨菇忌廉湯還算有水準， 飲到很多自家磨的蘑菇蓉造成的湯。 芥末西班牙飯夠味道 夠熱， 芥辣味會唔會太重， 但係啲飯太熟， 同普通白飯分別不大。 牛扒有點驚喜， 切開的時候原來只有兩至三成熟， 服務員都很醒目， 知道出事之後快快手手收回再加熱， 再返嚟的時候就變了八成半至九成熟， 可即其他配菜就凍咗喇。因為加18蚊可以變套餐， 主餐之後我們叫了 一杯 mocha 及一份甜品。 mocha OK， 朱古力略蓋過了咖啡， 甜品係cheese cake， 不過係攞貨產品， 普普通通啦。如果要選擇輕盈午餐， 會再返嚟。…查看更多

上次惠顧這間餐廳， 已經係十多年前嘅事。 今日一試， 水準依然！230元的雜錦便當， 十分抵食。 前菜係冷茄子， 小食係魚頭蘿蔔， 蘿蔔十分入味， 魚頭也很鮮味。 和食有牛肉薄燒， 沙律菜底。 刺身有八爪魚、 三文魚、 鮮蝦及池魚， 只是池魚放耐咗偏黃， 其他刺身也很新鮮。 天婦羅當然唔少得， 脆口唔油， 炸蝦也很大隻， 仲有片魷魚添！ 跟昆布湯及白飯， 一定夠飽肚！朋友叫了刺身定食。 前菜有蓮藕片， 爽口依然。 沙律菜， 刺身有帶子、三文魚丶大蝦、八爪魚及池魚。 另外還有角切魚生飯， 昆布湯當然唔少得。 210元正， 算係超抵食！…查看更多

半年前曾經來過啲個隱世商場， 而家再嚟果然唔同咗， 舖頭開多咗，人流亦多咗。 今次有目標， 識得有間用waffle 做漢堡包的店舖， 可惜嚟到要等 四至五張枱。 眼見吧檯有人剛剛離開， 一問之下，唔介意坐巴臺可以即刻入座！ 仲等！？睇完個餐牌，你唔會散叫， 一定叫套餐， 有沙律、 一杯 mocktail 同埋主菜。 飲品一早就叫， 但係最遲才到， 見到個bartender 真係未停過。 沙律普通， 招牌菜 waffle 漢堡包 就有驚喜！ 薯條夠熱夠脆， 漢堡是圓形象個乒乓波， 十分juicy及好味， waffle不是脆口的感覺， 而是很有質感， 因為蛋漿落咗其他herbs， 所以味道也很特別， 亦很飽肚。是次經驗不錯， 有機會會再試！…查看更多

今天有到將軍澳區， 發現有個隱世商場在海天晉之內。 都有很多食肆， 外面還有一些露天的檔口售賣與寵物關連的東西。 最後揀選了這間22。燒春雞唔錯， 雖然得半隻， 但內裏好多汁亦唔算太鞋。 薄漢堡包就有驚喜， 啲牛肉漢堡成寸厚， 落單時問過我啲牛肉要幾熟， 我話要全熟， 其實出嚟係九成半， 可以接受， 但係肉質就鞋咗啲同埋乾咗啲。杯咖啡都還可以。 有機會，會再次惠顧。…查看更多

在這裏可以慢慢食， 好休閒， 疫情之下呢間餐廳都係做一轉晚餐。朋友訂枱， 到埗check-in，安排咗門口位。 經常有人出入開門閂門， 疫情之下都唔係壞事， 起碼空氣通先啦。先嚟前菜小食， 叫咗兩杯黑白生啤同埋提子生啤， 提子生啤有甜似子果汁。 刺身拼盤新鮮度一般， 池魚都還可以， 雞軟骨兩個籃裝住都食到好多舊， 魷魚喺枱度出現過之後 就拎去燒， 一等咗成個鐘。 燒雞翼一般， 炸雞配日本沙律汁永遠都有保證。環境都幾熱鬧， 雖然逼夾咗一啲， 冷氣係爭些少， 感覺上算良好， 有機會，會再惠顧！…查看更多

兒童節去康怡食個午餐， 極少機會會上三樓， 因為長期都排曬隊。 今次都唔例外， 但這間舖頭竟然有位， 餐牌有套餐亦不算貴， 就入去試下啦。帶位入座的服務很好， 在選位上細心又有禮貌。海南雞絲扎肉湯粉， 有骨！ 原來雞件當雞絲！ 海鮮喇沙湯粉的海鮮完全沒有味道， 全部雪藏貨亦沒有入味， 好在有喇沙湯底， 唔係喇沙湯底好味，而係有啲味先至唔會淡茂茂。 印尼炒飯材料足夠， 有肉粒蝦粒同埋臘腸粒， 但係沒有蝦片及串燒， 煎蛋變了炸蛋， 不奇怪， 只是不正宗。 鮮蝦炒金邊粉的蝦完全沒有味道， 一望個顏色就知道唔係用正中嗰隻汁醬來炒的。 另外叫咗一個馬拉盞炒芥蘭同埋蒜蓉炒芥蘭， 這個反而ok， 只是汁醬多了一些。 餐飲揀選了龍眼水及咖啡， 咖啡普通但龍眼水的龍眼很大粒， 老人家食得很開心（指龍眼肉）。 服務雖然好， 但食物質素欠佳， 有待改進， 唔怪得唔使排隊就可以入座。…查看更多

朋友介紹， 這品牌也有很抵食的龍蝦餐。 晚上就到杏花村嚟試下。7:40pm 致電分店查詢， 佢哋話仲有位，但係要八點半之前到。 到步先知原來八點半截單。澳洲龍蝦$208 配上湯伊麵底， 開邊上 ，好鮮甜， 足一斤重， 但係上湯太多， 似係食湯伊麵！乳鴿$18一隻， 星期一至五仲抵，$1隻！ 原隻上 ， 畀埋手套你自己搣 ， 不過唔夠入味...另外叫咗個蒜蓉炒大芥菜， 啲芥菜夠淋， 一定有拾過先落鑊炒， 啲汁都係偏多。連埋加一都係$382， 算係抵食， 短期內一定會再返嚟食多次！…查看更多

知道而家有平貨嘅西澳龍蝦， 咁就要去試下！ 去到這間分店， 點叫一個超值龍蝦鮑魚二人餐。 泡菜小食的酸瓜醃得幾好， 最後成碟都畀我哋食曬。 燒鵝拼叉燒先到， 正常的， 有柯打斬完即刻出到， 質素一般， 肉質比較實。 螺頭湯就真係一般， 粒螺頭大約一粒骰仔咁大。 冰鎮南非鮑魚改椒鹽， 唔係好夠熱， 十分韌。 龍蝦就ok， 鮮味十足， 用少少西式配料煮埋個伊麵， 效果都唔錯。 最後薑蓉蒸馬友原來係成條上， 好大條起碼有一斤重， 食落又有鮮味。埋單$576， 都算係咁上下。…查看更多

朋友訂了枱。 很奇怪地， 當我在接待處核對資料之後， 接待員問我的朋友到咗未？ 餐廳有紀錄，應該清楚過我， 我話唔知， 接待員便帶了我去中間位置的一張圓枱。 原來我的朋友已經到了， 在卡位向我打招呼， 這裏的帶位系統認真有問題。我們點了一個二人套餐。 酸辣紅海蜇花一點兒也不辣， 我還以為自己食緊雲耳！ 口水雞還可以， 少少辣， 都夠香。 酸菜魚夠酸， 但係話明要中辣， 出嚟個效果最多都係一個小辣。 自家酸菜炒肉末配薄餅都還可以， 炒得夠乾身及夠味道。 干鍋福建椰菜花， 得個樣， 一啲都唔辣， 不過好夠熱好有鑊氣！ 宮保蝦仁就有啲失望， 用雪藏蝦仔一啲味都冇， 宮保汁亦都很淡味。 最後個酒釀桂花湯圓， 夠香夠清但係唔夠熱！ 另外兩杯藍妹都夠凍。知道這間分店是走新派的配搭路線， 但以現時的廚房技術， 出嚟嘅效果認真奇怪。…查看更多

休閒嘅星期日， 去一個休閒嘅商場， 食番個優閒嘅下午茶， 簡簡單單嘅一餐， 都係人生嘅小享受。這間店舖已經開咗兩個月， 終於有機會嚟試而係唔使排隊等位。點咗一個煙三文魚牛角酥茶餐及柚子西多士茶餐。 先嚟煙三文魚牛角酥， 賣相同餐牌嗰張相極類似， 牛角酥外脆內軟， 一定有烘過， 好味。 柚子西多士落單的時候＂走牛油＂， 嚟到檯面的時候， 廚房唔記得＂ 走牛油＂， 不過自己一撥就解決到嘅問題， 想幫佢哋慳番啲資源都唔得添。 多士非常厚身及鬆軟， 極好味！ 奶茶ok， 鴛鴦的比例適中。這間店比起其他同牌子的分店比較光猛， 比較精神。 是次環境及食物，非常滿意。…查看更多

與朋友到apm午飯， 下午兩點十五分入座， 果然大把位， 唔使同人逼。午餐餐牌很簡單， 只得幾頁紙， 點餐用手機掃描枱角的q R code， 操作算為方便。 我們點了一客切角雜錦魚生Don， 及一客鹽燒豚肉Don套餐。點餐後大約十五分鐘， 隨即送上 切角雜錦魚生丼， 兩分鐘後再送上整套的鹽燒豚肉Don套餐。 切角雜錦魚生Don ok， 啲魚生都夠新鮮， 不過稍為細粒些小。 但係鹽燒豚肉Don 就有些失色， 飯夠熱 ，汁夠未， 但係鹽燒豚肉偏乾身。 跟餐的小食，沙律ok， 但係啲炸雞就好乾身， 啲肉好實， 應該係返炸的， 前菜的豆腐也不嫩滑， 口感實實地， 但係又未於去到硬豆腐嘅程度。成餐飯冇水冇茶， 之後仲要去買嘢飲， 經歷真係麻麻地。…查看更多

這間摩斯漢堡， 雖然地點比較偏僻， 但都幾多熟客。 今天來到上環， 試下呢間喺四樓嘅環境嘅餐廳。 望出去有個平台， 十分開揚，光猛。簡簡單單點一個牛油果和牛漢堡餐， 跟熱咖啡， 追加摩斯脆雞。 和牛漢堡嘅牛肉偏鹹， 全靠 牛油果及沙律汁醬帶起個食慾。 摩斯脆雞就沒有失望， 食咁多次都依然咁 惹味， 夠脆， 雞油又不沾手， 只是熱度爭少少。 今次杯咖啡就有啲失望， 比之前嘅燶咗啲， 應該係咖啡沖起咗之後， 在咖啡機坐耐咗。環境乾淨， 音樂柔和， 光線充足， 起碼坐得舒服！ 總結呢一餐普普通通，ok啦。…查看更多

今天到中環工作， 以前是戲院的娛樂行， 現今已經大變身。 12點45分試試看看outback的副線AG 在這裏新開， 有沒有位坐先， 竟然仲有少量座位未有人坐， 咁就快快手手買嘢食先點了一個 Bacon Bomb burger， 放在burger的餐牌第一行， 應該係最代表性嘅。 配有小食或沙律， 揀選咗沙律配黑醋汁， 加多個熱咖啡。 付款後隨即在鄰近的咖啡機等候， 熱咖啡即刻炮製， 兩至三分鐘便有得取貨。搵到位後隨即放上電子感應位置， 一分鐘之內漢堡包都有專人送到， 比想像中快好多， 可惜沙律畀錯咗汁， 都唔緊要， 因為都好好味， 啲沙律菜夠新鮮。 個包就普通咗啲， 內有兩片bacon及很多的bacon碎。 杯咖啡就好得， 雖然食完個包，飲的時候已經不會太熱， 但見到咖啡泡分解後， 有一層咖啡油在面， 酸道適中， 咖啡豆烤味濃郁， 香味充足！下次要試層層疊烤牛肉包， 因為見到隔離枱好似好好味！…查看更多