adakan87的个人专页

第一次試過外賣等30分鐘係比生雞返屋企自己煮，離曬大譜，咩點會有咁嘅餐廳，我自己煮就唔會買外賣，唔識做生意就唔好做，仲要等咁耐，等到一肚氣仲要自己煮，真係一次就好了…查看更多

因為好鍾意打邊爐，有時都會自己一個人打邊爐，見到食評唔錯諗住去試下，原來1個人要計2個人價錢(大人加小童價)，所以建議1個人就不要選擇這。因為1個人這樣價錢不值得。…查看更多

與朋友相聚，想揾個地方食飯同暢談一翻，上網見哩間食評唔錯，所以選擇咗哩間餐廳。book咗7 點，去到無咩客，好快就有台，環境唔錯，位置寬闊，坐得都舒服。我地兩個人，咁啱見到有兩個2人餐可選擇，一個$268，另一個就$380幾，貴d個個頭盤可選兩個，主菜亦多d選擇，不過我地怕食唔曬，所以都係選了$268哩個。餐湯個湯好濃蘑菇味，同埋有好多蘑菇打碎嘅蓉，一粒粒，不過打得唔夠細，個湯有d稀，同我之前飲過嘅蘑菇湯有d唔同，無咁幼滑，但味道都可以。頭盤其實豬頸肉唔錯，肉質夠淋，有d香草味，調味又唔會太濃，無盖過d肉味，表面有dd脆，不過所謂秘制醬竟然係泰式酸辣醬，仲要係平時係超市買到個d，有d失望。沙律個沙律原本有4片蕃茄，但食咗先札諗起影相，首先蕃茄食落夠新鮮，都算清甜，但d沙律菜就一般，有d苦，都得好少芝麻醬，最後食剩d菜。主菜1隻雞幾香，送上台都聞到香味，一切開d肉好嫩滑，好易就切得開，啱啱好唔會過火太老，同埋好多肉汁，調味都適中，唔會太鹹，但d肉都入曬味，但外皮唔夠脆，有d韌，好開切開，另外，我食唔到有芥未子味，但蜜汁都唔錯。主菜2原本以為係連頭一大隻煎過個種海蝦，但送上台後先知係雪藏無頭嘅海蝦肉，所以都幾失望。不過個飯黑松露嘅味都幾濃，但食落就感覺係一樽樽個d黑松露蓉嘅味，但哩個價錢都算ok，至於飯軟硬度適中唔錯，d蝦雖然爽口，但就無鮮味，應該係話無味。全個飯只有黑松露嘅味。甜品木槺布甸，比較硬身，只有淡淡嘅忌廉味，甜味唔夠，好普通。總括嚟講環境唔錯，坐得都舒服，傾偈係好地方，不過食物就一般。…查看更多

因為見無人排隊,於是就入咗去。裝修有懷舊feel，如果兩人搭台就有點窄。打開餐牌，都係平時茶餐廳食常嘅常餐，炒野，焗飯，選擇算多同埋賣相都較精緻美觀，相當價錢亦較普通茶餐廳貴。我地兩個女仔點咗1隻乳鴿同軟殼蟹炒麵，出面較少機會食到。乳鴿size唔算細，睇上去油份好充足，皮一d都唔乾，唔似出面有d大排檔咁炸到乾曬又燶，聞上去都好香，食落都熱辣辣，唔錯，皮唔算脆卜卜，不過都未至於係淋，都有d脆口，值得讚係d皮好薄無咩脂肪，一咬落去好多肉汁流出嚟，d肉都算嫩，好易𡁻，最緊要係無雪藏味，同埋d味啱啱好，唔會過鹹或太淡，d肉都有入到味，下次會再食。炒麵較為失望，d炸蒜唔係新鮮炸，食落淋淋地，唔香，軟殼蟹d肉無咩鮮味，同埋唔夠脆，不過蟹膏都ok，蟹本身上菜個陣都係唔算熱只係暖暖地，應該炸完放咗陣，另外，炒麵炒得算乾身，少油，但食落有d硬，要𡁻好耐先吞到，d麵嘅味道有d淡，少咗d避風塘嘅香同惹味。…查看更多

天氣好熱，好想食雪糕，咁啱見到就試下。雙色係指綠茶及焙茶雪糕，先試綠色，係綠茶味雪糕，綠茶味唔算太濃，可能係雪糕少咗d苦味，感覺有d好幼細嘅冰係雪糕度，有d似沙冰，但就比沙冰滑好多，跟住再試啡啡地色嘅雪糕，係焙茶味，有少少烘焙嘅燶味，茶味濃d，我中意焙茶嘅味多d，至於紅豆都有起沙，但唔夠甜同香。蕨餅第一次食，綠茶當然係綠茶粉，黃色嘅係黃豆粉，個兩杯就係綠茶醬及焙茶醬嚟。綠茶粉蕨餅一入口綠茶粉慢慢溶，好濃嘅綠茶味，但對我嚟講有點太苦，食到蕨餅感覺有d似凉粉嘅質感，但有d似糯米滋皮嘅滑，好特別，甜甜地，幾好味。但我個人偏愛黃豆粉味，黃豆粉都係甜甜地，有d豆香，同蕨餅一齊食幾夾，但又唔會太甜:)。…查看更多

上次食過雙重芝士煎肉餅飯，今日一心想食榴槤肉煎餅飯，因為上次食唔到，但原來要夏天先有。我地有3個人，叫左3款唔同嘅肉餅飯試下。最驚喜係核桃芝麻煎肉餅， 一送上台就好香芝麻味，肉餅表面煎到脆脆地，入面d肉又唔會太乾，核桃好脆，黑芝麻更香，好似芝麻糊咁 味，但又有肉嘅香味，估唔到哩兩樣食材同肉餅咁夾，另外，肉餅嘅肉調味較輕，所以核桃同芝麻嘅味都無被蓋過，好味。最好味係辣味菜莆煙肉煎肉餅飯，一樣外皮煎到脆，肉質嫩，菜埔爽口，但唔太鹹，至於煙肉味就唔算好出，另外加咗d辣椒少少辣更惹味，越食越想食，另外要推薦佢地鋪嘅辣椒油，應該係自家製，睇上去同出面食魚旦粉嘅辣椒油差唔多，有d渣個陣，一食落就知唔一樣，好香，但唔會太辣，有d瑤柱味，加埋肉餅食送飯一流。另外，薑葱煎牛肉餅飯就薑味太濃，無咩葱，蓋過肉嘅味，婇似食緊燒味飯d薑葱咁，但值得讚嘅係哩個肉餅除煎得香脆，肉汁係3個之中最多，同肉質係最鬆軟彈牙，如果少d薑就更好。另外仲叫咗奶茶，奶茶一般，有d澀。…查看更多

聽過朋友推介哩間店嘅米線，咁啱經過附近，決定一試。入到門口已經聞到香味，因為唔算太肚餓，只係要咗酸辣米線加山根，牛丸，本身唔食得辣，只要咗小小辣。米線一送上就比d香味吸引，d肉碎好有油香味，首先飲咗啖湯，酸味啱啱好，唔會酸到嗆喉，好濃肉味，d肉碎有滷過，d肉醬帶出成個湯底嘅味。米線煮得有d過軟，不過仲可接受，山根吸曬d湯好好味，最重要係d山根無油億味。牛丸都爽口，無雪味。d湯越飲就越想飲，不過之後都有口喝感覺，應該都係有味精。對比起出面其他連所米線店，我覺得佢地個酸辣湯底好味好多，同埋份量都唔少。…查看更多

好耐無去台灣，所以決定食台灣野懷念下，第一時間就想起程班長。今晚7點幾去到門口已經排咗好多人，不過好彩等咗唔算耐，2個人15分鐘左右就有台。今次點咗紅燒半筋半肉牛肉麵，豆乳雞，滷大腸，手工滷肉飯，紅豆芋圓，冬瓜茶。原本想要酸梅汁，但可能賣曬無了。首先豆乳雞一上台已經好香，有d似鹽酥雞，食落外層好脆，雞肉都算嫩，但唔算多汁，值得讚係無咩多餘嘅油，同味道唔會太濃，但又夠惹味，係減咸版嘅鹽酥雞。紅燒半筋半肉牛肉麵每次必點，湯底又香又濃，但唔係味精嘅咸味，每次食完都唔會口喝到狂飲水，牛筋好淋，好似食緊花膠咁，牛肉滷得好入味，麵唔係平時食開個種，佢地係用扁身寬嘅麵，好有咬口，吸埋d湯更好味。滷大腸唔算好淋，要慢慢𡁻，同埋唔係滷得太入味，但個汁搭夠，同埋加咗d麻油，好香。手工滷肉飯比較有驚喜，因為上次食嘅係肉燥飯，同我平時去台北食嘅唔同，係肉粒碎，但今次嘅手工滷肉飯同我台北食嘅差唔多，係半肥瘦嘅肉粒飯，滷水味道好香好濃，半肥瘦嘅肉粒滷得好入味，有一陣陣油香，不過d飯就唔係台灣食個隻珍珠米，無咁煙韌，口感差d，哩個滷肉飯係我係香港食過最好食最接近台灣味道嘅滷肉飯，連伴菜d青瓜都好清甜，好清新，可以中和一下d濃味。甜品紅豆芋圓，紅豆煮得好綿同起紗，好有紅豆嘅香味同甜味，個種甜味係本身紅豆嘅甜而唔係加糖嘅甜，所以好清，唔會越食越口乾，我一向好怕太甜嘅野，但哩個糖水啱啱好，原本以為d芋圓黃白色只不過係顏色唔同，估唔到味道都唔一樣，黃色芋圓有淡淡嘅蕃薯味，白色就無咩味。冬瓜茶對我嚟講有點甜，但都可以接受，因為個種甜好清，有冬瓜水嘅味道，夠解喝。不過我都係中意酸梅汁多d，有d鹹鹹酸酸甜甜地，好開胃，同埋出面飲唔到哩隻味。下次要早d嚟飲返先得。…查看更多

食完飯時間尚早，於是揾個地方坐下，再傾下偈，友人提議哩間食評唔錯，一於試下。去到9點幾，已經滿座，我地拎籌等緊個陣落咗單先，侍應話先落單先排，所以就第一時間落單，好彩，等咗10幾分鐘就有位。原本我同另一個朋友最想食榴槤班㦸或糯米滋，但原來係無哩兩樣野，榴槤只有一碗碗固種甜品，有點失望。最後要咗芒果班㦸，糖不甩，湯丸伴蛋白及木瓜雪耳糖水。 芒果班㦸嚟先，芒果好甜，甜到無芒果嘅酸味，有點奇怪。糖不甩原來係芝麻湯丸無糖水版，味道可以，芝麻都夠香，其他兩樣就普通，無特別。…查看更多

我地一行4個女仔為其中一位慶祝生日，壽生女突然話想食哩間，所以當天先訂位，好彩都訂到。我一早去到餐廳，原來想拎位坐住等，點知原來有入座限時90分鐘，咁只好等齊人先入去。等位時諗定食咩，一入座就即時落單，感覺好似同時間比緊賽咁。今次點咗生煎包，蟹粉小籠包，4小碟，手抓餅，西洋菜雲吞，擔擔麵，外婆紅燒肉燒賣，酸辣湯，大白菜肉絲炒年糕。生煎包係當中最好食，包底夠脆唔硬，又多肉汁，熱辣辣，其次就係蟹粉小龍包，蟹肉唔算少，有鮮味，唔會腥，其他就一般。另外，外婆紅燒肉燒賣同我地平時食開嘅燒賣婇唔同，因為哩隻燒賣包嘅係糯米飯，不過都ok。埋單$480，唔算貴。…查看更多

男朋友生日，佢想食西餐，上openrice揾到哩間餐廳，之後book台，book窗口位，順便book埋甜品，因為可以寫上男朋友個名，希望比驚喜佢。上到去環境唔錯，好有情調，適合情侶。今次點咗蜜瓜火腿，蟹餅，鴨肶意大利飯同大蝦牛扒，我仲點左香蕉雜果沙冰。蜜瓜火腿一般，蜜瓜唔算甜，火腿有d過鹹。蟹餅好味，啖啖蟹肉，外面脆入面多汁，加埋個汁一齊食更好味，個汁酸酸地，令蟹味更出。鴨肶意大利飯又係一個好味之選，鴨肶外皮好鬆脆，但唔油，鴨肶肉好嫩，一d都唔鞋，仲有味道啱好唔會太鹹，但個飯好濃芝士味，好易膩。另外，大蝦牛扒必食，大蝦煎到好香口，肉質彈牙，牛扒要咗半熟，外面煎到有少少脆口，入面仲保持到半熟，切開見到有牛肉汁流出，但唔會有血水，肉質好嫩無渣，好有肉味，好好味。杯沙冰都唔錯，食到果肉，味道天然。…查看更多

之前為慶祝週年紀念，就book咗黃金海岸住一晚，所以就book咗哩間餐廳。 入到去環境都ok，唔好迫，我地兩人但比咗4人枱我地，點咗沙嗲串燒，炒金邊粉，柚子大蝦沙律，同胡椒炒蟹，仲有椰青。首先沙律送上，d柚子好甜，甜得嚟帶少少酸好開胃，好少食到咁好食嘅柚子沙律，蝦都好新鮮，好好味。之後就串燒，串燒ok，個沙嗲醬好味，有花生粒，好香又唔會太辣，好惹味。炒金邊粉都可以，唔會太油，有鑊氣。最後主角胡椒蟹，真係好好味，d胡椒好香，但唔好太辣，鹹味啱啱好，唔好搶咗蟹嘅鮮味，蟹好新鮮，好甜，蟹走過油，但唔會太乾，好juicy,d 胡椒撈飯一流，全餐飯都好滿足，雖然蟹有d貴，但都值得。…查看更多

之前睇到雜誌介紹海膽拉麵一直好想試，尋日終於有機會一嘗。間鋪有d難揾，因為鋪外門無招牌，門口又細，繞咗大廈一圈先揾到，原來係m記旁邊。今次我同男朋友好早就去到，大概6點幾，但係入面差唔多坐滿，大概得十個坐位，第一時間問仲有無海膽沾麵，好彩仲有3碗，我就要一碗試下，我男朋友再點另一款櫻花蝦醬油沾麵試下 。海膽膽麵好快送上，首先試一下個湯，好清甜，海膽味唔算太濃郁，另外麵上有雞肉同糖心蛋，糖心蛋啱啱好，流黃，好食，雞肉有驚喜，睇上去好似白灼，但食落好入味，但唔會搶咗海膽鮮味，好夾。跟住就試埋我男朋友碗櫻花蝦醬油沾麵，蝦味好濃，對我嚟講醬油唔算太鹹，可能我平時食開重口味，湯有少少辣，但惹味，不過湯就較油。兩碗比較，我就中意 櫻花蝦醬油沾麵多d，因為味濃，同埋我本身好中意食蝦。總括兩碗都好味。…查看更多