atinaxatina的个人专页

本身有一次喺open rice book左枱，準時去到，侍應黑口黑面同我地講：俾張飛你，等3張。我地就黑人問號，咁我同walk in 有咩分別呢？再問侍應：無呀，都係要跟飛再等。咁算，無謂拗，我地選擇唔等，就去左附近既餐廳食。然後今次我地經過見無人排隊，見到有兩張空枱，走入去，佢就話有人book左，再攞左兩個reserve 牌出黎，擺左喺張枱度。結果兩次都個係無成功食到。其實，啲野幾好食都無用啦，book枱無得食，有空枱無得食，點都係唔想做你生意。🤷‍♀️…查看更多

好高質既餃子🥟每一隻既餡料都包得滿滿的尤其推薦白菜餃唔會太濃味同埋一定要食菜圃配埋餃子一齊食正。留意一點白菜餃好快就賣晒，要食就要趁早。食完令人好滿足嘅小店，支持。…查看更多

今日去觀塘上堂，都要醫醫肚先，真係要快靚正先得！今日揀呢間絕對係揀得好啱。地點都幾就腳，好容易搵到，餐廳都好大，坐得都幾舒服。我地叫左一個照燒汁雞扒滑蛋飯，一個香蒜牛油帶子意粉，配忌廉磨菇湯同沙律，再加多個pancake餐。照燒汁雞扒滑蛋飯真係好大碟，細食既要叫少飯，塊雞扒煎到啱啱好，仲係好juicy，配埋個燒汁真係送飯一流，$46仲包埋野飲，抵！香蒜牛油帶子意粉，先上沙律同餐湯，大大碗，個意粉都煮得好到位，蒜香味十足，亦有粒粒帶子，呢個一人份剛剛好。Pancake餐既pancake唔係熱香餅，係好厚實既，但絕對唔乾，配上蜜糖，食多幾塊都無問題，因為雪糕賣哂，所以可以揀木糠布丁，唔太甜，好creamy，我仲用黎配pancake食，又好搭。每個菜都送埋飲品，真係好唔錯，食到好飽好滿足❤️…查看更多

我想食Shakeshack好耐啦，開左喺公司隔離都無去食過，因為知道食飯時間一定排隊排餐懵。特登星期六放假去朝聖一下，一點左右到達，可能今日風雨關係，排左十五分鐘左右就成功買到啦。買完唔係即刻有得食，等左都十五分鐘先有得攞。我地叫左一個Shack stack，一個double Shack burger，兩份cheese fries，一杯lemonade 同milk tea shake，賣相相當吸引，令人流哂口水！我個Shack stack上面貼住小心熱，又真係新鮮熱辣，個炸大啡菇連埋cheese，一啖咬落去啲cheese流哂出黎，仲可以拉絲，拉極都唔斷！個大啡菇超級juicy，再加埋個脆漿，真係好正！個burger仲有層牛肉，都係好juicy，煎得啱啱好。不過又流汁，又拉絲，都真係食得幾狼狽。Cheese fries 既薯條炸到好香脆，充滿足料既薯仔，加埋啲芝士就一定要趁熱食，凍左痴到一舊舊。一碟既份量兩個人食都夠，我地叫多左。杯Milk tea shake話係Hong Kong exclusive。我覺得只係一杯好好好好甜既milk shake，我想飲返可樂算啦。今餐啲卡路里多到嚇死人，不過偶爾食一次，又幾好食，邪惡下都無所謂啦。不過啲座位大部份都outdoor，好似今日大風大雨唯有擔住把遮黎食，都係揀返風和日麗黎食，對住個海景chill下，會再開心啲。…查看更多

我真係好鍾意飲珍珠奶茶，亦都真係飲過好多間。但始終有飲珍珠奶茶既quota，不能飲太多，所以如果買左一杯唔好飲既，我會好傷心。呢排開左咁多台式飲料店，都好想全部試下，今日就特登去買呢杯珍煮丹既黑糖珍珠鮮奶，價值$30。今日可能因為落大雨，排左十分鐘就買到啦！飲品既甜度同冰量都可以揀，我就買左一杯正常冰微糖。店員推薦我地試埋個鮮草，話都係自家制既。等左五分鐘到就攞到呢杯黑糖珍珠鮮奶，摸落杯底啲珍珠係熱辣辣架！啲冰亦都好貼心係碎冰黎。店員提我地要搖勻先飲。相機食先之後就即係試飲，啲珍珠超Q彈，而且充滿濃濃既黑糖味，鮮奶都好香，配合埋又唔會太甜，剛剛好。個杯睇落好似唔係好大，珍珠大概有三份一杯，飲完飽到飯都唔洗食。呢間我會encore！滿意！下次想試泰泰珍珠鮮拿鐵。…查看更多

今日一行兩人想食台灣野，就見到呢間台灣菜餐廳，位置喺銅鑼灣，地鐵站行過去都好好方便。我地都真係好肚餓，叫左好多野食。叫左涼拌木耳，滷水拼盤，豬軟骨滷肉飯，蒜泥白肉，手抓餅，炒A菜，三色芋圓紅豆沙。夏天食呢個涼拌木耳真係好開胃，木耳爽口，少少辣辣地，酸酸地。滷水拼盤我地揀左滷蛋，雞翼，豬大腸。全部都滷得好入味！大腸尤其出色，好香口，一啲都唔會膩！雞翼肉質都好滑！正！豬軟骨滷肉飯，大大碗，超抵食！豬軟骨煮到非常入味，啲軟骨無牙都咬到。飯多，滷肉多，再配埋豬軟骨，真係好滿足。蒜泥白肉，絕對係厚切，入口即溶，配上蒜泥，啖啖肉。手抓餅都好有台灣風味，唔會太油，一定要趁熱食！炒A菜炒得好夠火喉！而且啲菜好新鮮，食咁多肉一定要配返碟菜既。三色芋圓紅豆沙，真係清甜入心。芋圓相當有咬口，做飯後甜點一流。飲品方面我叫左熱烏龍奶茶加珍珠，茶味相當濃郁，甜度適中。餐廳都相當多人排隊，最好book位先！食物味道方面都好出色，價錢亦好合理，都推薦大家去試下。…查看更多

今日去pacific place睇戲前食個飯先。戲院樓下有幾間餐廳，望完一輪就揀左食泰國野啦。餐廳裝潢都幾靚，無諗過入到去環境嘈到同去大排檔無分別，同坐對面既朋友講野都要好俾心機先聽到。我地叫左半份軟殼蟹米紙卷，蝦餅，金邊粉同埋喇沙。一碟有三件米紙卷食落好清新，入面卷住半隻軟殼蟹。軟殼蟹炸得都幾脆，但黎到有少少凍左，好似唔係即刻上碟咁。清新感來自於個醬汁，另外可以再點蛋黃醬。蝦餅就真係炸到熱辣辣，脆卜卜，食完好似會熱氣到生痱滋。蝦餅入面無炸到乾哂，仲封住左啲汁喺入面。如果個醬係泰式辣醬就好啦。金邊粉炒得幾乾身，味道偏淡，配料就好多，覺得一般啦。我地等碗喇沙等得最耐，餐飯都食完都未黎。海鮮方面有蝦有魷魚等，個湯底唔夠濃，都係一般啦。本身食泰國野都想飲返杯Thai ice tea，但竟然無，有少少失望。…查看更多

今日等睇戲之前要醫一醫肚先，對於觀塘工廠區既cafe同餐廳我都非常有興趣，所以都成日上openrice度睇。今次揀左呢間個名好特別既cafe，四點左右去度有tea食，叫左個公司三文治加杯cappuccino 。個公治好足料，麵包亦都烘得好脆好香口，用紙包起黎揸住食非常方便。杯cappuccino 個拉花都拉得好靚，咖啡味都好濃郁。環境都算幾嘈，唔係靜到烏蠅飛過都聽到既cafe，所以大聲啲講野都無問題。要多多支持呢啲唔係連鎖既工廈cafe:)…查看更多

今日經過深水埗要即刻試試好出名文記車仔麵。喺午飯時間去等左三個位就到我啦。個個位都係面壁咁食，係自己一個人食飯既好選擇！落單係自己用白板筆喺塊膠板menu上面自己圈，再交俾waiter既。我揀左粗麵，雞翼，豬紅，湯底揀左腩汁，再加左少少秘製辣汁。碗車仔麵由落單開始計大概十分鐘到就上到枱啦！熱辣辣，香噴噴。雞翼鹵水味十足，而且肉質都仲好滑。豬紅未算煮到入哂味，但都可以接受既。粗麵都煮到啱啱口，仲有咬口。枱上面放左好多唔同既調味料同配菜，可以任加。我就加左少少辣蘿蔔，口感爽脆，不過都真係幾辣既。份量都真係相對地少，下次叫加底先！…查看更多

今日喺The one食晚飯，經過新開既gram竟然唔洗排隊，即刻黎個飯後甜品！之前其實都有係大阪心齋橋食過一次，無乜特別普通pancake。我地五個人叫左一份classic pancakes同French toast。French toast入口鬆化，配上奶油，加左$20要vanilla雪糕，呢個可以試下。至於個classic pancakes($88)都令人好失望，價錢亦都唔平。Pancakes 完全好似食緊麵粉咁，喺大阪食過唔係咁架啵。我寧願去麥記食熱香餅算啦。終於都明白點解無人排隊啦。…查看更多

今日去完sogo血拼，梗係要搵間餐廳醫肚啦。朋友想食日本野，睇完一輪就揀左喺利舞臺既餐廳啦。我地冇book枱，walk in等左四張枱，十五分鐘左右就到我地啦。野食方面我地叫左兩個定食加一個盤串燒。一個就係雜錦海鮮釜飯，另一個係鱈場蟹火鍋。鱈場蟹火鍋個湯底非常淡，得啲蟹腳本身帶鹹味，肉質都算爽口。個鍋點住火咁上，但個鍋到個火熄左，由始至終都無滾過，我地有少少擔心就問左waiter，佢話個鍋入面既食物本身係熟，我地先放心食。味道一般啦，勝在定食多配菜，有刺身，沙律，麵鼔湯。雜錦海鮮釜飯亦都係定食，個釜飯都幾多料，啲刺身舖滿左個飯面，撈埋啲飯一齊食，都好鮮味香口。我見其他人食都有得加湯食，但當日就無人講過或者俾過湯我地。串燒就不過不失啦，無乜特別。但其實樓面人手都比較少，想叫人問下野都成日話等等先，可能非繁忙時間去會比較好掛。…查看更多

今晚到灣仔試下呢間NINETYs，上黎打食評先發現原來係九十後開既，不禁感嘆，90後已經可以擁有自己既餐廳真係好。我地兩個人叫左Black Truffle Linguine，Grilled Black cod仲有Mini Donut toast。野食賣相一流，令人食慾大增！Black Truffle Linguine 扁意粉煮到較硬適中，黑菘露香氣撲鼻，加埋啲茹一齊食，真係好好味！Grilled Black cod 鱈魚真係好鮮味，切開仲有魚汁流出，好juicy，魚肉鮮嫩香滑，蕃薯蓉甜甜地，十分推薦！最後講到甜品mini donut toast，熱辣辣既甜甜圈加上芝麻雪糕，曲奇餅碎，真係最好既飯後甜品。其實本身都好想試下啲咖啡，但夜晚驚飲左訓唔著，下次可以食下午茶先再試！野食全部都令人好滿意，店員亦都好友善。有機會大家都去試下啦。Menu:…查看更多

香港咁多人，星期日想搵個地方好好傾下行程，去各大商場都無乜可能。一路都有去試下觀塘工廠區既樓上cafe，但原來好多星期日都休息，喺openrice上面搵到呢間廿一由八。Cafe食野既地方只有一部分，其他位置放滿左木做既傢俬，另一邊係木工studio，真係有人喺度整緊木工。Idea真係好創新，而且環境又寧靜又舒服。食物方面選擇唔算多，我地叫左軟殻蟹意粉同埋菠菜雞肉墨西哥餅。呢個係set lunch，包沙律同埋餐飲。意粉煮得剛剛好，係我鐘意仲有少少硬，有少少咬口既，配上一整隻炸軟殻蟹，賣相好吸引，但隻蟹食落有啲腥，有啲美中不足。菠菜雞肉墨西哥餅，餅皮焗到好脆好香口，入面既芝士溶化，連同菠菜雞肉，仲有蕃茄，一啖咬落口，好夾好配合，好味。飲品方面我地加錢叫左latte同cappuccino ，沖得都好好飲。另外佢仲有甜品蛋糕，下次再試啦。成日都好羨慕韓國呀台灣呀既cafe好靚，所以超級支持香港都可以開多啲高質既cafe！！…查看更多

見到好多人都討論既Dear lilly，話餐廳環境好靚。星期日就一於去試下啦。打過去原來無book枱服務，諗住5點幾去希望唔洗排隊，食個early dinner 。原來六點前有afternoon menu。去到又真係唔洗排隊，仲有幾多空位。餐廳佈置到好靚，天花吊滿乾花，充滿住薰衣草既香味。服務員全部都係外國人，服務無話有咩特別，無話特別熱情，你叫佢咪黎囉。野食方面叫左牛肉漢堡配薯條。牛肉漢堡上碟已經幫你切開左一半，茄汁亦預備好哂，好貼心。牛肉我地叫左五成熟，外面烤到有少少濃濃地，入面充滿肉汁，牛肉仲見有粉紅色，麵包亦都有烤過，外脆內軟。幼薯條炸到金黃色，熱氣之選！另外叫左buffalo wings。雞翼好細隻，buffalo wings個醬咁濃味，但雞翼無乜肉，好似淨係食到醬，咁食法好鹹，唔洗試。飲品方面叫左一杯cocktail Mademoiselle Lilly. 酒味唔濃，都幾甜，幾昜入口既。另外再叫左杯cafe latte。我見好多人都寫食到一肚氣，食個tea平平地都可以一試！…查看更多

韓風吹到香港都成街炸雞餐廳，我自己都食唔少，今次就去左呢間喺銅鑼灣利舞臺既Dodam chicken啦！地點非常方便，食完飯仲可以落去商場行下街。餐廳都幾寬敞，一部電視播韓國綜藝，一部電視播MV，再播埋kpop，真係好似去左韓國咁。炸雞方面選擇好多，但我地又怕熱氣，見到有焗雞即叫左半半，一半白雪芝士，一半香蒜。上枱熱辣辣，熱到揸唔到上手，真係新鮮出爐！啲雞肉好嫩，超juicy，火喉係啱啱好。芝士味主要係靠落左一堆芝士粉，呢啲芝士粉真係令人上癮，好味到手套都想舔埋。另一邊既香蒜味真係蒜味十足，雖然眼係見唔到蒜頭，但個醬汁肯定用左好多蒜頭去整，同焗雞亦都好夾，齒甲留香蒜。我地叫左香辣卡邦尼炒年糕，個menu話有少少辣，食落辣度適中，年糕彈牙，爽口洋蔥，魚糕好入味，搭配卡邦尼汁好醒胃！芝士雞蛋卷賣相一流，冒哂煙，一切開就見到仲有少少蛋汁同芝士流出黎，睇到都覺得好味。啲蛋煎得好好，真係剛剛好，加埋流心芝士同個蟹籽醬，係一流既配搭。飲品方面我地揀左一杯藍莓沙冰，絕無藥水味，食完辣野，啜返啖，即時解渴又解辣。云云炸雞店，我自己都幾推薦呢間，坐得舒服，每道菜都有水準，值得一試。…查看更多