xkxblog的个人专页

之前跑步經過深旺道舊舖，成日都話要搵機會幫襯，但結果都係無咗回事，呢次終於去利奧坊新店試試。星期日將近一點去到，剛好有最後一張二人枱。那個滷排骨便當（$76）炸豬扒超大塊，又厚切，炸衣夠脆唔油膩，表面淋上特製醬汁，咸香惹味，豬扒肉質爽口有質感，完全唔嚡唔韌，好滿意的一塊炸豬扒。如果想再提升味道層次，枱上有三樽調味粉，麻辣（唔算好辣）、鹽酥（因為已經有醬汁嘅咸味，所以唔突出）、海苔（個人覺得好夾），自行洒上豬扒增味。便當會有三款配菜，炒蛋（炒得不錯，唔老身，亦少許滑）、粉絲（調味不錯）、炒香菇椰菜（有蒜香味）。秘製嘉義雞肉便當（$66）呢個加咗$2由白飯轉黑米（其實係紅米糙飯）。秘製醬汁應該係黑蒜油，味道係幾好，再配咗啲炸乾蔥片，十分惹味，而且好啱撈飯。雞肉份量適中，味道就相對普通，係手撕雞肉，肉質有咬口，偏淡味，靠個秘製醬汁吊味。便當同樣有炒蛋、粉絲、炒香菇椰菜三款配菜。黑米口感豐富，唔算好硬。香酥臺南蝦卷（+$18）套餐加配小食，有兩條。呢個好食，腐皮包住蝦膠，炸得香口，但稍稍多油（“鯨”吓啲油或用索油紙索下啲油會更好），再加枱上嘅調味粉一齊食，更加好味。花壇蜂蜜翠玉（+$6）套餐加錢。其實唔知咩係翠玉所以叫嚟試吓，但結果即係蜂蜜綠茶嘅味道。正常，普通。檸檬冬瓜愛玉（+$9）套餐加錢。雙檸檬（鮮檸、咸青檸），酸酸甜甜少少鹹，幾得意，唔錯。…查看更多

葵廣呢間上海菜小店，成日都經過，好多時都有一班食客，但一直都無諗過幫襯。是日去開葵芳，經過幾間餐廳都無乜意慾，去到呢間門口，不如就試吓你啦。精美麵餐（$66）六選一麵食要咗炸醬麵，三選一肉類要咗上海排骨，二選一小食要咗鍋貼，送豆漿。炸醬麵有一咋醬汁冬菇豬肉碎，調味還可以。上海麵份量足，唔算好糊丁丁咬口。湯底接近清水無咩味。上海排骨有四件，即炸夠熱，頗厚身，無骨啖啖肉，肉質偏實，味道一般。鍋貼（2隻）係熱爐拎出嚟，但唔太熱，所以唔夠香口，皮偏糊口，餡料滿滿的豬肉碎。豆漿，味道偏甜。推薦套餐（$67）擔擔雲吞麵，擔擔醬唔得，淨係得花生醬味，仲要唔夠濃郁。湯底同樣清淡無味。四隻雲吞大隻，餃皮正常，餡料滿滿的菜及豬肉碎。呢碗嘅上海麵可能煮耐咗，所以口感糊咗啲。小籠包（4個），唔係平時食開嗰款，皮薄，肉餡超多超滿，但無肉汁，似食緊粒大版嘅乾蒸燒賣。豆漿，味道偏甜。PS：今日食嘅鍋貼、雲吞、小籠包，餡料都係同一隻味道嘅豬肉碎，估計生煎包、紅油抄手應該都一樣。老實講，唔難食但絕對唔係好食。份量足，夠哂飽肚，價錢公道，但味道一般，可惜應該沒有下次。…查看更多

上網見到呢間南非餐廳有鴕鳥扒食，印象中好似未食過，所以去試試，點知貨源問題，未能提供，殘念。午市套餐（$139）有前菜、主菜、甜品/咖啡，另可加錢（+$10）要配菜，另收加一服務費。前菜：奶油卡宴焗蝦配香蒜包醬汁好味，味道有啲似帶辣味嘅濃版蘑菇湯，點香蒜包食非常夾，三隻蝦都大隻，有彈性兼且有蝦味，好食。前菜：牛油果沙律牛油果軟熟，沙律菜爽脆，洒係面嘅黑胡椒亦香。主菜：南非烤雞肉串即燒，雞肉外層微微焦香，內裡仍軟嫩。調味醬汁十分惹味，有孜然、紅甜椒、霹靂椒、乳酪，微酸少辣。配菜沙律菜正常。主菜：香煎鱸魚柳即煎，煎得好靚，係用牛油慢慢煎香，魚柳表面微微焦香，所以少少脆，魚肉肉質紮實，有魚味。配菜青豆同樣用牛油煮，無好重嘅草青味。配菜：黃薑飯份量唔算多，過口癮還可以，味道亦普通。甜品：南非傳統焦糖布丁蛋糕中間有杏桃醬，表面淋上吉士椰棗醬，口感鬆軟濕潤，味道不錯。咖啡：Americano正常普通的即磨咖啡。…查看更多

椰子珍珠奶茶 700ml（$34）勁差勁失望，椰子味接近零，成杯嘢味道淡而無味，同清水無咩分別（雖然要求咗少甜，但都唔係淡味到咁吖）。珍珠份量一般，但極之軟pat pat，無咩口感。招牌珍珠奶茶 700ml（$24）呢一杯同樣唔掂，味道偏淡，茶味欠缺層次，珍珠無口感。老實講，本人絕對唔會再幫襯。好明顯賣得呢個價錢，深水埗一定大把台式飲品店好過佢，而且售價可能仲平啲，我諗到佢唯一取勝嘅理由應該只係位置比較方便。…查看更多

牛腩肥腸幼麵（$40）牛腩及肥竹腸各有五舊，份量大小適中。牛腩近崩沙腩位，有筋膜，彈牙gel口，牛腩肉質軟腍但有咬口，亦有肉味，不錯。肥竹腸夠哂肥，腸衣有𡁻口但唔黐牙，肥膏肥而不膩，牛脂甘香，正，大愛。湯底雖然偏清淡，但味道足（飲咗大半碗，事後沒有勁口渴感覺），附上蔥花、芫茜、乾蒜，增加味道層次。幼麵爽口彈牙，但鹼水味偏重（個人覺得問題不大）。另外仲有一片生菜。牛雜河粉（$32）有4片金錢肚，4舊肺，3舊粉腸，1件膀。金錢肚大片有𡁻口，肺唔夠彈性，粉腸夠粉好味，膀偏細件味道正常。河粉味道亦正常。另外仲有一片生菜。凍檸檬茶（+$8）單點$15，三片檸檬，茶味一般，味道正常。…查看更多

沙嗲王嘅白咖喱可以話係佢嘅主打，但都有一段長時間無食，之前行新都會見到佢嘅副線「白咖喱公司」開咗，今次就走去回味一吓。白咖喱香茅豬扒飯（$68）三塊香茅豬扒，兩塊正常厚度，有一「片」好薄，香茅味醃得幾香，煎得亦不錯。白咖喱已經唔記得係咩味了，但食返都幾好食，香、濃、微辣，而且唔孤寒，足夠撈哂啲飯。白咖喱厚切吉列豬扒飯（$74）一大塊厚切吉豬，都真係幾厚，炸衣厚薄適中，脆口唔油膩，厚切豬扒有咬口，唔嚡唔乾身，口感不錯。呢碟啲白咖喱同樣俾得夠，唔錯。5：30前落單，送無糖綠茶或咖啡。自助落單，送餐機械人上菜，自助埋單俾錢，不收加一。…查看更多

上次去鄰近 Gate 35 嗰間「環亞機場貴賓室」無魚蛋粉，今次去鄰近 Gate 60 呢間。其實 Gate 60 呢間比 Gate 35 只係行前少少再上一層就到。去到門口無人排隊（可以太早，因為未夠6點），搞好手續，即入勁快脆。呢間同樣唔多人，有室內同室外兩個區域，但室內位置冷氣唔多夠比較悶熱。食物選擇OK咁啦（一般早餐嘢，魚肉燒賣、腸粉、腸仔、炒麵、茄汁豆、滷蛋、蘿蔔糕...），但終於試到魚蛋粉（要早上6點後才會供應）。另外有啤酒、粟米片、果仁提供，食哂早餐，坐係度慢慢 hea 到夠鐘。…查看更多

食完燒雞，又食埋甜品，尾站斬料今晚做餸。點解專登嚟呢度斬料？因為前排睇谷導嘅「消失的味道」，其中有一集講金錢雞（回想最後食呢味嘢已經係廿幾年喺旺角食過，但間燒臘舖亦已經執咗N年了）。另外節目中亦介紹另一款懷舊菜：鴨腳札，於是記低有機會搵日去買嚟回憶一吓。既然去開紅磡，當然順道去買啦。金錢雞（$98/斤），買咗一份；鴨腳札（$98/斤），買咗兩札，接近兩斤，總共$190。金錢雞，有冰肉（2件）、叉燒（2件）、鵝肝（1個）。冰肉，即係肥膏，爽口，但只可淺嚐一小口。叉燒，瘦叉，乾身。鵝肝，一大個，粉嫩軟滑。鴨腳札，比想像中大舊，份量比一個成年男子嘅拳頭還要大。材料有數條鵝腸札住鴨腳（1隻）、叉燒（4件）、燒排骨/燒腩肉（1件）、燒鴨（2件）、燒雞（2件）、鵝肝（1個）、火腿（1件）、芋頭（2舊）。老實講，味道全部都係一種味，就係蜜汁叉燒嘅味，裡面啲材料嘅質素都極之普通，係個鵝肝OK啲，同金錢雞嗰件一樣，粉嫩軟滑。食完今次，之後會唔會再（想）食？機會應該低啲嘞。因為呢類食品，味道及口感真係唔算好食，況且年紀再大啲的話，接受呢味嘢（膽固醇）嘅能力又再低啲。兒時回憶的味道，有時候保留在記憶中不失為一個好嘅選擇。…查看更多

食完燒雞，行前幾步「啟岸巷子」上一樓，食甜品。呢間小店又係「空肚講宵夜」其中有一集講，見到雪糕糖蔥餅幾特別，就上網搵吓記低佢。雪糕糖蔥餅（$46）雪糕有咸蛋黃或鐵觀音可選，揀咗前者，因為感覺有啲特別（之前仲有椰子雪糕配芒果，但最新餐牌無咗，可惜）。一件糖蔥餅，灑上椰絲，舖上咸蛋黃雪糕，再用餅皮包住。糖蔥餅應該都有廿年以上無食，甚至其實連咩味都已經唔係好記得，脆身甜甜哋；咸蛋黃雪糕好得意，有咸蛋黃味但唔太咸又有少少甜。糖蔥餅嘅甜脆+咸蛋黃雪糕嘅咸軟，不同味道不同口感，一齊食又幾夾幾特別。陀地鬼佬鬼佬陀地西多（$66）呢個需時約20分鐘。一件厚切麵包浸滿牛奶蛋漿香煎，外層微脆，內裡鬆軟，口感有少少似蛋糕；西多士面層搽上士多啤梨醬，酸酸甜甜；最後加上 peanut butter parfait（Google translate 花生醬凍糕）、花生硬糖碎、椰絲，凍糕好香好濃嘅花生醬味，口感係密度好高嘅雪糕。呢個甜品又係好有心機，好特別。其實小店並唔係得甜品，其實仲有好多主食（steak、burger、意粉）同嘢飲（咖啡、啤酒、特飲），但只係我主要想食甜品啫。…查看更多

金牌脆皮燒雞（$68）加茄汁意粉（+$10）加凍七喜（+$8）門口 kiosk 自助買飛（只收電子支付），然後入店內搵位，等嗌號，拎餐+餐具（有手套）。燒雞有半隻，份量足（餐牌標榜採用三斤重嘅三黃雞），賣相唔錯，金黃色嘅皮，撕開雞油同肉汁唧哂出嚟，香噴噴熱辣辣。即刻咬一啖雞髀位，皮脆肉嫩，淡淡咸香味（如果覺得唔夠味，枱面有樽淮鹽可自行添加提味），之後試埋胸位，當然無得同髀位比，但一啲都唔嚡。整體嚟講，好食，好味道，推薦。茄汁意粉，份量適中，少許茄汁味，意粉口感一般。凍七喜，其實係雪碧，高罐裝，有一杯冰底。…查看更多

$138 一位，任飲任食，不限時，仲要免加一，免茶芥，真係好抵食。雞煲有三款可以揀：麻辣雞煲、白胡椒豬肚雞煲、濃湯雲吞鮮雞煲，唔想食麻辣，所以要咗白胡椒豬肚雞煲。雞煲一上枱，個鍋已經好大個，用筷子撩吓啲料，勁多雞，應該至少有一隻雞嘅份量。雞肉肉質算唔錯，啲肉有質感，唔會好梅好爛，味道亦可以，白胡椒味濃，豬肚份量就相對少咗啲（約得四件）。火鍋配料唔係咩貴價食材，都係啲一般普遍嘢。大部份都係要自己出去拎（如丸類、菇類、菜類、瓜類、粉麵類），亦有小部份就剔紙仔入單（如肥牛、牛柏葉、水魷、鵝腸、熟蝦、粉腸、響鈴）。飲品包罐裝汽水、盒裝維他奶及盒裝果茶，啤酒（獅威）就$15三罐。總括嚟講，收費激抵，食物質素符合預期，住附近得閒都可以幫襯吓。…查看更多

輕型（$68）酸種麵包，有一片，微微烘過，塗上少量牛油，有咬口。煙肉，有一片，唔太咸。腸，有一條，脆皮，有彈性。雞蛋，可選炒蛋、太陽蛋、煎熟蛋，有兩隻，要咗煎熟蛋，正常。另外附送三粒車厘茄，微微烤過。曬冷（$128）自家製千層薯，有一件，外層微脆，薯味足酸種麵包，有四片。煙肉，有兩片，呢兩片就乾啲所以有啲硬。腸，有一條。哈羅米芝士，有一片，兩面煎香，芝士味淡。燒烤菇，有一個，仍 juicy。車厘茄，有五粒。牛油果，布半個，切片，洒上少量黑胡椒，軟身夠熟。雞蛋，可選炒蛋、太陽蛋、煎熟蛋，要咗炒蛋，炒得唔錯，無過老。Dirty（$30）第一次試，味道可以，夠滑，咖啡味不錯。Iced Mocha（$35）朱古力味一般，味道可以。總括嚟講，食物製作用心，味道可以，室內環境及裝修普通，收費不便宜，地點不方便。主要做區內生意，小店要加倍努力。…查看更多

生滾花膠雞（$68）米線湯底金黃色，清甜唔油膩，淡淡雞味，味道溫和。花膠有三件，軟身唔太腍亦唔太硬，沒有魚腥味。雞件約有八件，係整隻雞斬件，有不同部位，雞肉嫩滑，就算胸位都唔會太嚡。配料仲有蟲草花、雲耳、腐竹、杞子。米線份量足，口感有彈性。黃酒藥膳雞（$55）米粉湯底同樣金黃色，比起純雞湯，多一重黃酒味，層次再豐富啲。雞件同樣約八件，肉質嫩滑。配料除咗蟲草花、雲耳、腐竹、杞子，仲有北芪、當歸、紅棗、黨參。米粉份量足。王子炸豬扒（$24）新鮮即炸，醃味不錯，微甜咸香帶少少薑味。炸嘅時間剛好，外層脆口，裡面肉質仍軟腍，唔會乾身。加配黑豆漿（+$8）支裝黑豆漿，香港製造，唔太甜，少少豆味。…查看更多

星期日差少少十二點去到門口，等兩張枱，好快就有位。蝦餃（$36），餃皮夠彈性，夾起唔易穿，蝦肉餡一般，唔算太爽口。燒賣（$32），豬肉餡紮實，有彈性，不錯。鳳爪（$25），醬汁夠濃味，鳳爪有咬口唔會太腍身，不錯。潮州粉粿（$22），一般，梗係好似差啲嘢咁，但又講唔出。蔗糖馬拉糕（$30），鬆軟，微甜，可以。龍蝦湯鮮竹卷（$33），個汁真係唔錯，將脆卜卜嘅鮮竹卷浸滿湯汁一齊食，味道更豐富，推薦。紫薯流沙煎堆仔（$32），即炸，外層脆脆米，中層紫薯糯米皮，最入面流沙蛋黃，三重口感，而且味道亦不錯，推薦。京蔥香煎菜肉包（$26），即煎，油咗少少但可接受。包底微脆，餡料京蔥味欠奉，一般。茶錢每位$6，免收加一服務費。整體食物質素可以，收費合理，但座位較逼。…查看更多

少有哋一早去鑽石山，轉車前係附近快快趣食個早餐先，地鐵A2出口一出，入啟鑽商場即刻見到。醒神早餐B（$42）秘製沙爹牛肉公仔麵，沙爹味一般，香濃味唔算好重。牛肉約有五片，正常梳打牛唔韌。公仔麵合格，淥得剛好唔淋。牛油厚多士，已飛邊，香脆度麻麻。火腿奄列，炒蛋唔老仍有少少蛋汁，火腿絲份量適中。紅豆冰（+$3），紅豆唔算好淋，未起沙。早晨包餐：自選雙拼三文治（$35）咸牛肉+雞蛋三文治，咸牛蛋夠厚身，份量適中。熱奶茶，茶味可以，口感亦算滑，合格以上。…查看更多