member_5123的个人专页

睇YouTube見到有人介紹呢間壽司放題， $399任食，只做星期六日，menu 選擇唔多，但youtuber話係高質壽司，心諗雖然價錢唔平，但如果真係高質，又值得試下喎。上網勁難卜位，要卜到一個月之後，真係咁好食？好期待呀，因為我啲崇日嘅勁鍾意食壽司，幾千蚊嗰啲Omakase就食唔起，食下呢啲高質放題都唔錯啊。等到頸都長，終於等到預約日子，餐廳喺鐵皮檔後面，無窗，門也是關上的，”準備中”的木牌掛在門口。離預約時間不遠，外面又有毛毛雨，我諗就算未可以落單，入店舖先坐下也可以吧。於是，我推門，餐廳一遍漆黑，未見服務員，但正在準備壽司食材的師傅看到我們了，他似乎在叫服務員出來迎接我們。可是，服務員說「我們的營業時間由12:30開始。」，我說「好的」，低頭看一看手錶，12時28分，喔…真的很堅持啊…對開店的時間，希望他們對食物的品質都有這樣的堅持啊…數分鐘後終於可以進入餐廳，餐廳面積很小，只有大約7張四人枱，我們2個人還好，因為疫情關係，2個人在4人枱，但如果是4人或是更多人聚餐，就會比較迫，餐廳平均$150-$200一個午餐，我會希望坐得舒服啲。亦因為舖位細，餐廳瞬間坐滿，容易令人有「餐廳很受歡迎」的錯覺。選了$399的任食放題，另有$499的放題，都是限時90分鐘，分別在於$499可多選擇3款壽司（魚子、海膽和吞拿魚腩）。在確定餐廳的食物質素之前，不宜選貴的一個，畢竟，香港伏店多的是。本來以為多數客人都會選擇放題，但算我們在內也只有2-3枱選擇放題，大部份客人都吃定食。服務員為我們換上放題的點餐紙和餐牌，只要是點放題，餐廳就會先送上8件一套的壽司拼盤，分別是吞拿魚、吞拿魚腩、三文魚、油甘魚、鯖魚、鰻魚、三文魚子和海膽。👇🏼8件壽司平均來說味道一般，比較出色的只有鰻魚，但要注意的是，鰻魚不會在任何放題的點餐紙上出現，如果想encore就要自己另外order了。在$499的餐紙才會出現的魚子、海膽和吞拿魚腩質量一般，選$399是明智之舉。 好，自選時間開始，右上角的油甘魚腩鮮度十足，肥美非常，令人禁不住要合眼品嘗，心想：「這個質素，放題來說真的很值得」，可惜，可一不可再，之後再encore的油甘魚腩，不論是外表，或是內在，都完全不同。下方的帆立貝，新鮮肥大厚肉，之後追加的，品質一致，是回本位。👇🏼八爪魚、墨魚，水準中下，出現一般香港壽司店都會有的問題：好似一塊膠咁，咬唔開，無味。松葉蟹，同樣是中下水平，無味之餘，蟹同飯嘅比例大約係1：3，其實同淨係食舊飯無咩分別。其餘的吞拿魚、熟蝦、鯛魚、甜蝦，都毫無特別，踏出餐廳門口已不記得味道如何。之於炸物呢，因為我們是來食壽司的，所以對炸物沒有太大的要求，事實上也沒有驚喜，餐廳本身也沒有放太大心思在炸物上，我們叫了4款食物，每款食物都用不同的炸粉或炸漿，我想如果是自家製應該不可能每款食物都用不同的材料，所以我估計應該是「叫貨」的，炸物只是在餐單上充撐一下場面，大家不要太認真。👇🏼 右上方的就是可一不可再的油甘魚腩，明顯切割的位置不同，味道也強差人意。👇🏼 其實之後我們還點了蟹子沙律和甜點，但吃到最後，感覺餐廳整體質素不如預期，興致被消減了不少，相也放棄拍了。讓我們來個總結，餐廳主力是吃壽司的，但壽司質量參差，比較出色的鰻魚和油甘魚腩都會被餐廳用各種方式令客人不輕易吃到，能回本的只有帆立貝，但你又可以食到多少件帆立貝呢？另外，點餐紙上可選有wasabi和無wasabi，wasabi會由師傅放入壽司中，但同樣都是點有wasabi，各碟壽司wasabi的多少都有差別，雖然未至於辣到標眼水，但感覺上就不太專業了。再來是服務，其實也沒什麼服務可言，2名服務女生會說日語，其中一位是日本人，但2人都是經典的皮笑肉不笑，給你的感覺就是「我們只是打份工，唔好咁高要求喇」，服務態度甚至比不上一些壽司連鎖店。 所以我們最後得出來嘅結論是：唔好喺鮨政食放題，因為你可能只會點帆立貝。唔好喺香港食放題，因為香港唔會有食物高質嘅放題。唔好睇介紹鮨政嘅youtuber，因為佢同我嘅口味差太遠。以上…查看更多

長沙灣、荔枝角呢一區好多小店食肆, 因為附近多商廈, LUNCH放飯時間周圍都迫滿人, 一啲CP值高嘅店舖門口更是人山人海, 真係諗起都怕怕, 睇到都想掉頭走(´-ω-｀)香港物價指數高企, 在呢個工商業區食餐LUNCH平均$60, 有時搵到啲較平嘅茶餐廳, 大約$4X都有個碟頭飯, 但舖頭嘅衛生情況令人卻步, 而且女仔人家, 真係唔想同啲大汗淋漓嘅男子漢迫埋一齊🥶今日走出中心位置, 向較偏僻的角度出發, 尋找隱世美味🤫行過呢間在明愛醫院旁的肥MO車仔麵, 我無睇錯, 3個餸1個麵都係$36, 而且舖頭乾淨企理, 雖然FULL FULL地, 但有位, 感覺係家庭式經營, 裝修簡潔, 可能開咗無幾耐,枱枱凳凳, 到點菜紙同筆都好新淨, 座位亦寬落。服務方面, 與其說侍應有禮貌, 不如說呢種家庭式嘅餐廳充滿人情味, 服務唔會令你有距離感, 而係貼地的親切, 有個姐仔食碗麵食到一半, 突然同侍應講:「我頭先無點要辣, 可以現在加嗎?」, 侍應哥哥欣然說: 「當然可以, 想要大辣定小辣? 」如果是其他茶餐廳, 那位姐姐應該要食猫麵吧。我叫咗沙爹牛肚, 響鈴,通菜和河粉 $36 另外, 我同朋友仲加咗餸, 蘿蔔, 豬紅, 豬皮, 牛根腩$28 沙爹牛肚有咬口, 響鈴細細隻勁CUTE, 河粉屬於比較幼身的, 煮嘅時間剛剛好, 一條條分明容易夾起, 甚至好過一啲粉麵專門店, 我真係試過啲河粉一夾就散再夾再散, 係要用匙羹食架囉。至於加嘅餸呢, 蘿蔔, 豬紅, 豬皮, 牛根腩又淋又入味喎(⁎⁍̴̛ᴗ⁍̴̛⁎) 呢餐飯雖然唔係啲咩驚世美食, 但一餐飯唔洗加一都只係$36, 對我來說真係超抵, 而且質素唔錯, 想成為我日後嘅飯堂，最緊要俾到安全感我, 呢度我俾滿分💯為咗維持香港嘅餐廳多樣性, 我地好應該支持💪🏼一啲用心嘅良心小店, 你都唔想你嘅下一代餐餐都食大家樂同M記架~ …查看更多

早係幾個月前就知道燒肉品牌<牛角>會在香港開設<牛角次男坊>, 以燒肉丼飯為主打, 在日本同台灣都有分店, 開店之前已經有大大個廣告圍版在舖位, 令人期待萬分。香港人喜歡排隊, 為打咭, 為追潮流也好, 一有新的熱店開幕, 就必然有人龍, 本來諗住等熱潮過後先去試, 但和朋友剛巧路過, 大家都想試呢間熱店, 於是抱住「時間尚早應該唔會好多人掛」嘅心態, 走到舖頭嘅前面……好多人……😑最後等咗大約45分鐘終於叫我地喇, 入座前要先在前台收銀處點菜和付款, 我們分別點了2 個丼飯, 一個牛一個豬, 跟丼飯有一碗面豉湯, 醬汁可選次男坊燒肉汁和經典牛角飯燒汁。次男坊丼 $88次男坊丼就係店舖嘅王牌燒牛肉丼飯, 傳媒渲染, 強調將牛肉堆砌成16CM之高, 又話啱哂食肉獸, 好似好勁咁, 但佢嗰16CM係包括個碗同啲飯, 個碗底仲有個好高嘅”踭”喺度, 啲肉唔算少嘅, 但亦都唔係多到要強調囉, 加上16CM其實一啲都唔高, 食肉獸食完應該會好失望囉🤔至於牛肉質素呢, 我覺得唔算好差, 亦都唔係好, 肉味雖然不足, 有筋, 但牛肉都淋嘅,因為醬汁出色, 所以個飯都幾好食,插喺碗嗰幾塊紫菜唔知做咩事, 淋哂咁, 不如唔好放好過啦。 升級版熊本豚肉丼 $138 普通豚肉丼加$60就可以升級做熊本豚肉, 但其實我覺得……都無咩特別姐, 啲肉都係有筋嘅, 我想像唔到唔升級嘅豚肉會係有幾普通😬同樣地, 經典牛角飯醬汁為碗丼飯救回不少分數。2碗飯細細碗咁，食完夠飽嘅，但唔太滿足，以咁嘅質素，咁嘅份量，座位又迫枱又窄，要成$100一個人，我相信大部分嘅收費都去咗啲舖租度，所以我決定下次都係將啲錢放喺其他唔洗我幫手交租嘅店舖上面，我諗食物質素可能仲好。另外，有樣野想一提嘅☝🏼個飯碗同個托盤好似有生命咁，你一舀飯，佢就移位，個碗成日移來移去，喺度溜冰🙄呢個咩設計來架 …查看更多

話說剛剛搬OFFICE來荔枝角, 人生路不熟, 上OPEN RICE睇下荔枝角有咩好食, 發現呢間炸雞店環境不錯, 食物賣相也吸引, 一次AEON超級星期三令我初嘗呢間日式炸雞店。東京淺草炸雞專門店來自日本神奈川, 在日本全國有多間分店, 以大大件炸雞配白飯為主打,價錢相宜, 深受日本人歡迎。香港有3間分店, 分別在黃大仙, 柴灣和荔枝角, 選址皆為住宅區, 如果要和日本一樣提供相宜的價格, 自然不能捱商業區的貴租, 放棄人流, 忠於自己, 是明智之選。我搬咗來荔枝角只有數月, 已經光顧咗好幾次, 不只放工食埋晚餐先返屋企, 還會將餐廳推廌給朋友, 全因CP值極高, 主打的炸雞脾肉外皮脆卜卜, 大大件, 咬落去肉質嫩滑勁JUICE, 簡直會食上癮, 一碗丼飯未計加一最平都係$39, 呢個咁嘅價錢, 去邊度搵呀, 而且仲要坐得舒舒服服,每張木製枱凳都有射燈打落來, 裝修簡潔, 坐位寬敞, 齋看餐廳外觀話係高級食府都有人信。好!我地一齊回顧下呢幾個月我食咗啲咩先~ 28 DEC 18 兩人套餐館$129個套餐分別有8件炸雞, 2人份量有多嘅白飯, 沙律菜一大盆, 2 個小食, 3款自選醬汁, 好多野, 好飽19 DEC 18 滑蛋雞扒丼$4914 DEC 18黑醋炸雞丼$6523 NOV 18 南蠻他他醬炸雞丼$39KARAYAMA定食$59定食可自選2款醬汁16 OCT 18秘製芝麻蒜蓉炸雞丼$4918 SEP 18秘製芝麻蒜蓉炸雞飯配沙律$65在餐廳用餐加$12就可以享受自助飲品BAR放題, 飲品超過11款, 客人可以睇下汽水機有啲咩先決定加唔加錢, 唔加錢都無所謂, 侍應會自動送上暖水。其實每個飯嘅配搭都大同小異, 只要有炸雞嘅飯我都想試, 暫時未試過雞翼, 因為每次想試嘅時候都被炸雞沖昏頭腦, 最後都係點咗炸雞😂除咗炸雞, 其他配菜都麻麻地, 沙律唔太新鮮, 醬汁偏鹹, 仲會落味精TIM, 但炸雞嘅美味可以令我包容呢啲缺點, 一個星期食一次都唔係好過分姐( ˃᷄˶˶̫˶˂᷅ )為咗令顧客保持新鮮感, 餐牌會定期加入新元素,例如炸魚, 蝦, 或者火鍋, 其實加咩都無所謂，只要炸雞保持水準，我就會支持架啦(❁´ω`❁) …查看更多

GU 剛喺鑽石山開咗分店, 呢日放工要去潮聖一下。印象鑽石山無咩好野食, 穩穩陣陣可以選擇連鎖食肆, 但又想試下新野…打開Open rice見到呢間餐排第一行, 幾多讚好的食評, 雖然知道廣告成份居多,但又無另外更好的選擇, 而且我見到有我喜愛嘅炸雞丼食,所以最後同朋友就決定一試了。去到大約19:00, 星期五嘅關係, 人多, 不過都係等一張枱就到, 大約15分鐘喇。等緊嘅其間, 見到張張枱都食燒肉, 我地無諗過食燒肉架喎,入到去唔食燒肉會唔會被人歧視架…果然, 我地一坐低, 侍應就乒乒乓乓幫我地SET 好哂食燒肉嘅用具,到我地點完餐, 侍應又問一次, 你地唔食燒肉?我地尷尷尬尬話唔食後, 佢又乒乒乓乓收返起啲燒肉SETTING,除咗氣氛尷尬, 我仲會諗, 其實係咪除咗燒肉, 其他有製作過程嘅野都唔好食架呢?但佢明明熟食嘅選擇都唔少喎…...頭盤嘅泡菜, 青瓜, 味道普通, 唔算好食, 3款我地都無食哂。炭燒半熟韓牛$108呢碟韓牛好似用來燒烤咁, 但侍應姐姐話係就咁食架,係咪好靚呢, 但係佢成碟野都未溶雪架,咬落去會食到一粒粒嘅雪, 又多根喎,基本上, 你見到白色一條條嗰啲雪花都係咬唔開架,1塊有大半塊要𦧲返出來, 我食咗2, 3塊, 食又唔係, 唔食又唔係,未計加一要成$108, 一塊要$13.5, 𦧲都𦧲咗$10,如果有負分我想俾負分呀唔該。 第一碟餸來完之後, 等咗好耐都未有第2樣野食,有個侍應姐姐行過幾次, 眼望望咁,之後佢竟然過來問”LAST ORDER了, 你地仲有無野叫?”我話”無啦”我心諗”我地坐低咗都係30分鐘，咁快就LAST ORDER?”之後佢又問”啲野食來齊未?”我話”未呀”我心諗”其實你係咪想趕我地走姐?”金仔炸雞飯 $88個飯外表好靚, 炸粉薄, 擔擔肉, 熱辣辣, 分量多, 醬汁亦出色。唯一我想一提嘅係佢件炸雞嘅皮淋坺坺咁,同平時食開嘅有啲唔同, 不過都可以算係佢舖頭嘅特色。江南UFO $78個薄餅其實無咩特別，無咩味嘅拉絲芝士，無咩味嘅肉醬，但分量足夠塞飽你個胃，呢個喺唯一我諗到嘅優點，外貌亦唔美觀。焦糖爆谷白朱古力沙冰 $58當我同朋友就來渴死嘅時候，我地用盡最後一口氣追問侍應我地杯野飲嘅下落，問完真係好快有喎，朋友話佢見到其實2杯野一早已經放咁喺出菜位，無人攞之嘛，早知一早問啦😑杯沙冰來到時雖然溶溶地咁款，不過飲落去都尚算ok，係甜咗啲，爆谷同白朱古力嘅配搭幾特別，但唔知點解杯野無匙羹，佢suppose我點樣食啲爆谷呢，用飲筒啜，支筒個口又唔夠大，用飲筒舀，杯野又太高，一舀啲沙冰就會塌。🤨懸案一宗呢度嘅食物質數參差, 有好的也有極差的, 雖然我今次無食燒肉, 但我都唔敢試多次。其實如果佢燒肉係好食嘅話, 不如專心做好燒肉, 唔好做熟食,咁起碼唔會吸引到我呢啲俾負評嘅人來,又或者專心做熟食, 唔做燒肉,我個人覺得金仔炸雞嘅potential幾高, 可以繼續鑽研下。假若周身刀張張利當然好, 但如果自己應付唔黎, 最後返而整親自己就無為啦。除咗食物質素, 整體嘅用餐體驗亦不佳,餐廳嘅安排唔夠貼心, 節奏又CHUR喎,放咗工都係想食返餐安茶飯姐…..…查看更多

適逢農夫十八歲生日，喺麥花臣開演唱會，要去一轉平時好少去嘅旺角，開show之前去食餐飯先，揀呢度係因為被佢嘅龍蝦包吸引，雖然被佢嘅價錢嚇親，但同朋友都覺得，如果真係超級好食，都可以一試呀～就係咁我地就衝咗上去，因為係樓上舖嘅關係，我以為地方會比較大，始終上樓會平啲租嘛⋯⋯我諗⋯裝修都幾有心思嘅，牆上面啲graphic都整得幾靚，白色底黑色畫，好有現代感，又有啲龍蝦公仔俾你打咭用，但整體感覺好陳舊，你唔會想摸落隻公仔度囉…而且地方好細，啲餐枱逼得好貼，食呢餐飯時，隔離枱嘅2位姐姐去咗邊度旅行，對男朋友有咩不滿，我地完全聽到哂🙄所以呢餐飯我同朋友比較靜，一來唔想其他人聽到我地嘅偉論，二來我地要專心聽下佢個男友有幾衰😂啲嘢食來到更覺得張枱細，叫咗3樣野，基本上3碟野食已經用哂張枱嘅所有空間，張枱個設計應該唔係俾你攞來用餐, 係俾你攞來display食物🙄最後來嗰個石鍋熱辣辣咁, 個侍應見無位擺,放咗喺我個餐碟隔離我低頭食野都驚驚地佢辣親我塊面，朋友見我坐得唔自在,快快手食完一碟,諗住叫佢收走啲野可以空返個位出來，個侍應真係淨係收走個碟，完全無諗過我喺度蒸緊面，幫忙移動食物到返中間位置，呢啲茶記哥仔都做到嘅位，呢度呢啲偽高級餐廳做唔到喎🤔好～我地講下野食質量先，三重芝士雞肉烤餅$75個烤餅普普通通，芝味唔算出眾，熱食都尚算可以，但凍咗就唔係太好食喇，質素似係出面叫貨多過自己整，沙拉菜唔算新鮮，呢個小食感覺無咩誠意。龍蝦包$188龍蝦包呢～有啲失望，佢唔算係難食，但又唔算係好食🤨唔會話驚喜到想食第2次囉，麵包有搽牛油加烘底，而且切開2件，方便客人入口，稍見細心位，龍蝦肉份量喺香港地來講算係適中。至於個薯條呢，有普通薯條同甜薯條2種，唔講你唔知，佢哋喺一樣味架，呢單野真係好神奇，唔明點解2種唔同啲薯仔可以做到同1種嘅味道囉😳龍蝦濃湯安格斯牛柳粒燴飯$103最後呢個石鍋燴飯堅喇, 龍蝦濃湯幾惹味, 應該落咗唔少味精,啲飯煮到一舊舊, 我都唔認得係珍珠米定用普通米,不過最令人反眼嘅係啲安格斯牛柳粒, 佢係同擦膠無分別架,牛柳粒份量幾多, 食剩嘅都唔少,呢碗咁嘅野竟然索價$100, 真係想大叫回水🥶好! 我地來一個總結, 食物質素我會俾佢average 嘅, 未至於難食,但點解我會俾負評呢?呢度嘅食物全無誠意, 但我地埋單要成$400, 每個人平均要成$200, CP值超級低。唔講食物, 環境又迫又嘈, 坐得唔舒服之餘, 連水都無杯,我明嘅, 唔俾水你, 食物味精又多,焗你叫嗰啲懶靚但又唔好飲、五顏六色嘅水,咁佢就可以再鋸多你$60,聽落咁似周星馳啲戲嗰啲無良食肆嘅,無錯, 佢俾我嘅感覺就係咁,話時話, 雖然CP值極低, 但佢竟然有限用餐時間,來食野嘅人絡繹不絕, 我地嗰日去得早, 所以先有位咋,走嘅時候真係全場爆滿架, 又多好評喎,所以話呢, Marketing 對一間公司係好重要架,Marketing 做到極致可以指鹿為馬,幾百個好評裡面有幾多係真幾多係假, 應該無人會去深究,但做咗一次羊牯, 我唔會做第二次。…查看更多

平時成日會經過楊屋道街市，都唔發現有間食店save低咗好耐，原來就係附近，上到去大約7pm，人少，柔和木製枱凳，光猛燈光，日系感覺濃厚，餐廳主打丼飯，牆上有介紹丼飯的由來。餐牌上的丼飯有魚生、豚肉、牛肉、鰻魚、天婦羅，連咖哩飯都有，種類都幾多，同日本專注做一款食物嘅風格唔同，但我諗咁先可以迎合香港人重量唔重質嘅消費模式。餐廳喺街市樓上，衛生好似唔係咁好，所以唔敢叫魚生...其實可能無關係(˶‾᷄ ⁻̫ ‾᷅˵)總之，我就叫咗張相好吸引嘅燒豚丼，丼飯跟沙拉和麵豉湯，都係$69，仲要免加一。丼飯來到，我望一望碗飯，再望一望張相，簡直係神還原，但食野要有次序，我按捺住興奮嘅心情，趕快消滅個沙拉，沙拉菜尚算新鮮，但沙拉醋落得太多，太濃味，食到尾仲有好多醋喺底🙄我用筷子🥢夾開個蛋黃，佢慢慢地向义燒同飯嘅方向漫延開去，呢個畫面超療癒（人´∀`*）濃郁嘅蛋黃加上秘製甜甜嘅义燒汁，仲有粒粒豐滿嘅珍珠米，他們相愛相戀，然後相擁，呢段3角戀在我口裹爆發嘅美味，超乎想像，8片义燒又大又厚，肥瘦相間，肥嘅部份偏多，所以入口即溶，食到後段其實已經好膩好滯，但我實在唔捨得放棄任何一粒飯，最後，我食哂(❁´ω`❁)好飽好滿足下次我會試下將個沙拉放喺中間食，食一半丼飯，食沙拉，再食埋個飯☝🏼可能會好啲。飲埋個麵豉湯先…好鹹🤢麵鼓落得太多了吧…整體來說，個沙拉同麵豉湯將個平衡分拉低咗不少，但我會為個丼飯再幫襯，仲會期待試下其他丼飯㖭(•‾⌣‾•)y另外，剛開始時覺得呢度嘅店員好茶餐廳feel，無論係態度或制服都好似，但係佢地會好留意客人嘅需要，斟水、枱面清潔、埋單，都好主動幫忙，要讚一讚👍🏼…查看更多

寶成美食店最出名嘅就係炸雞脾，因為要到附近睇牙嘅關係，就慕名而來試一下呢個隱世美食。之所以為隱世，係因為佢唔似其他餐廳咁，賣廣告，開分店，接訪問，寶成美食店，只此一家，做街坊生意，位於紅磡廣場呢個舊式嘅商場，商場裏面大部分都係小店，毫不起眼。6:45來到寶成，只有一枱客人，但聽說午飯時間人很多，頗受學生同工人們歡迎，佢係一間舊港式快餐店，門口大大個餐牌，在門口的收銀枱點餐後，店員俾個牌仔我，叫我去搵個位坐，點嘅係炸雞脾配沙律，主角係雞脾，其實併咩都無所謂，併沙律好似無咁熱氣。雞脾即叫即炸，上枱時熱辣辣，炸到剛剛熟，雞皮脆卜卜，雞肉又嫩又多汁，超juice，調味不多，不同其他快餐店的死鹹，而且食完後感覺不會太熱氣，沙律就中中挺挺，下次可能只叫炸雞脾就可以了。紅磡美食多，寶成炸雞脾絕對係其中重要嘅一員…查看更多

曾經立志成為雞翼師的我，今日行開紅磡，就去試下呢間雞翼專門店，說是用無激素雞翼， 大大隻，$38有4隻，要成10蚊一隻，唔平架☝🏼平日嘅關係，人唔多，有2個人喺我前面等外賣，因為係叫完即整即炸，所以等咗都約耐，我諗大約10至15分鐘啦，呢日又熱又濕，都咪話唔辛苦。第一次就試下佢嘅皇牌玫瑰雞翼先，個盒好精緻，有支旗仔寫住「不要儀態…只想吃雞翼」，為咗貫徹啲個宗旨，佢附送一對手套，讓你捨棄儀態之餘，也可以食得乾乾淨淨，開頭我同朋友唔知嗰包細細pack嘅係手套，以為係濕紙巾😑好彩我行咗去望一望個counter，店員以為我唔夠手套，俾多pack我話係手套，如果唔係我地會食完先知囉😂counter 旁邊有個企位可以堂食，行埋去諗住開餐，但啲雞翼好熱，熱到我即刻掉返落個盒度(☉д⊙)果然係即炸…本來好怕玫瑰味係嗰啲好假嘅香油味，但食落去主要係甜味多，好似蜜糖咁，有少少嘅玫瑰香，雞翼上面嘅玫瑰花瓣除咗靚之外也可以食落肚，醬汁調味剛好，而且緊緊包住每一隻雞翼，朋友唔鐘意食玫瑰味都覺得呢個好味👍🏼臨走掉垃圾時發現原來店員俾咗外賣盒我地，其實佢有堂食用嘅盒，下次堂食都係同佢講堂食，因為用堂食盒會方便啲，啲雞翼會散熱快啲，容易入口啲。…查看更多

今次係我第3次來cheesecake factory, 每次來都好期待，因為野食啱口味之餘，食物貫徹高水準，所以雖然價錢唔平，但依然一試再試，menu 有成30款以上嘅菜色，有排先試得哂。點知呢次就有不愉快經歷…食物我就唔多講，因為貫徹高水準，今次主要想講一講令我不愉快嘅源頭：服務。第一次來嘅時候覺得佢地嘅服務唔錯，每個區域都有負責嘅服務員，我地嘅服務員係外國人，平易近人，俾人嘅感覺好smart, 成件事做得乾脆俐落，因為呢一次嘅經驗，我仲為佢地喺open rice 寫咗非常高嘅評價。今次來到係lunch嘅繁忙時間，之前要齊人才可入席，現在改咗限定用餐時間為2小時，安排比之前有效率得多。被安排到右手面直行最入嘅圓枱，負責我們區域嘅係一個略為肥胖嘅外國女服務員，佢過來自我介紹完，就同我地講，佢係負責我地張枱嘅，如果要下單就要搵佢落，唔好搵其他人。佢講到明唔俾我地叫其他服務員幫忙係有啲奇怪，在我嘅角度來睇，其實我舉手叫人，邊個應我就叫邊個架啦，係唔係負責我張枱都無所謂架嘛( 〃 ˙꒫˙ 〃 )我地7個人，叫咗5碟野食，其中2碟意粉，呢2碟意粉就出事。佢個menu分2個chapter, 1個係lunch size, 價錢平啲，份量少啲，1個係full portion, 價錢貴啲，份量多啲。我地咁多人就叫2個full portion吧☝🏼2碟意粉都喺同一頁menu 度，因為母語唔係英文嘅關係，我選擇在menu上指出想要嘅小餐館炸蝦意大利幼麵Bistro shrimp pasta $216 和 意式肉腸及蝦粗管通粉pasta with shrimp and sausage $204，好似去旅行咁，一隻手指走天涯😂過咗一陣，服務員攞咗2碟pasta過來，一碟係Bistro shrimp pasta，另一碟係…咦？係天使麵來嘅。我叫咗嗰個負責我地枱嘅女侍應過來，同佢講我地唔係order呢個，我再指一指menu上嘅粗管通粉，同佢講我地要嘅係呢個，但佢堅持我叫嘅係shrimp with angel hair $216，仲話佢落order嘅時候有repeat到我要咩，點解我唔出聲？話我需要聽清楚佢覆單。我當堂呆咗，我無諗過呢度嘅侍應會好似茶餐廳嘅侍應咁答我，心諗唔通我指錯咗？但2個意粉喺menu度一個南一個北，無理由指錯架喎⋯⋯咁我事實上真係無聽佢覆單嘅，嗰度又嘈，佢講得又快，我無諗過用手指指都會出錯(ŎдŎ；)同埋佢咁講即係將所有責任推喺我身上，呢啲咁卸膊嘅人，喺office真係見慣見熟，原來老外都鐘意跳卸膊操(⑉･̆⌓･̆⑉)Dead air 咗一陣，我仲諗緊點同佢講嘅時候，佢好悔氣咁話今次就換俾我地，攞走咗碟天使麵，嗯( ‾᷄ ‾ )咁佢肯換俾我就得啦。過咗一陣佢又返來，今次佢攞走埋我碟Bistro shrimp pasta，我望住佢 눈‸눈佢話碟野係第2張枱嘅，我地嘅係full portion，呢碟係lunch size。等咗一陣之後，又有一碟上我地枱，係比之前細碟啲lunch size Bistro shrimp pasta，呢個時候我終於要爆(ʘ言ʘ╬)我叫停咗個上緊餐嘅男服務員，問佢可唔可以幫我confirm 下我地落咗咩單？嗰個人落單落到錯哂٩(๑`н´๑)۶我同佢講哂事情嘅來龍去脈，最後同佢講佢可以收走枱面上嘅lunch size Bistro shrimp pasta，因為唔係我地嘅。點知佢拍一拍我膊頭，同我講：唔緊要，你地食住先，我再幫你跟埋其他野。本來爆發緊嘅我就好似見到天使一樣(⸝⸝⸝ᵒ̴̶̷̥́ ⌑ ᵒ̴̶̷̣̥̀⸝⸝⸝)，即該笑返哂。最後，我地order嘅野到齊，full portion 嘅Bistro shrimp pasta變咗2碟lunch size，事情完滿結束，但心裡仍是悶悶不樂，連甜品都無叫就走咗。其實去食一餐飯，半個鐘至一個鐘，坐得舒服啲嘅2個鐘，可以要求啲咩服務唧，帶位、落單、遞餐、結賬、執枱，客人見服務員嘅時間可以有幾長？食完走3秒後都唔記得個服務員咩樣啦，我明白做樓面辛苦，每日返工時間長，又要企成日，但我只係想食到我想食嘅野姐，都唔講得上係對服務嘅要求啦，叫咩來咩係基本來架喎。或者嗰個老外睇唔起我地講英文唔係嘞嘞聲，以為自己講英文就自視高人一等，做錯野聲大夾惡，有人追究就一句言語不通推得一乾二淨，但講溝通，講服務，言語從來都是次要，有無用心去做去為對方設想先係最重要。無論再好嘅地方都會有害群之馬，雖然今次有天使幫佢解圍，但我諗佢都唔知得罪過幾多客人，有幾多客人因爲佢而唔再幫襯，我嘅負評全部都係俾呢個老外。…查看更多

平時成日食豚骨豚肉做嘅拉麵，用雞來做湯底嘅今次係第一次，之前喺open rice嘅焦點食評中，見一篇大讚雞肉拉麵嘅文章，印象深刻，由主食到湯頭都係用雞來做嘅拉麵，好似真係未試過，所以今次來到霸嗎，就試下雞肉拉麵喇:: ೖ(⑅σ̑ᴗσ̑)ೖ ::平時行過都見有不少人排隊，所以我一放lunch 就狗衝過去，都係要排隊😑，好彩1個人比較容易有位，等咗大約15分鐘就可以入去了，但喺出面無遮無掩，太陽直射15分鐘，都幾難受。傳統日式拉麵店裝修，牆上面掛咗好多食物畫，加上又大又粗線條嘅字樣，感覺豪邁，我諗就係那種要你大大聲「𠽌」啲麵入口嘅設定。因為喺排隊嘅時候，店員已經俾張order紙我落單，比較特別嘅係張order紙上可選少油，健康第一，揀少油先，埋位一陣，拉麵已經來了。碗麵嘅2片雞义燒令到我超興奮，超級厚✪ω✪，將雞脾肉好似普通豚肉义燒咁卷埋，定形後切開，就會圓形一片咁，雞义燒嫩滑入味，真係唔捨得食哂佢。湯頭清甜，比起豚骨嘅湯頭，雞湯係比較清淡，無豚湯嘅濃郁感，可能就係因為咁，比較少拉麵店用雞來做拉麵，但霸嗎嘅雞义燒拉麵並唔係淡而無味架，只係無咁濃郁，雞嘅精華依然係度，事實上，我地都無理由將雞拉麵同豚拉麵來作比較，就等於無理由攞雞翼同豬手來比較，係2樣唔同嘅野來架嘛。至於麵同蛋呢，都好味嘅，但唔算好特別，所以就唔講喇。店內有播放日本歌，有意營造氣氛，令客人有置身於日本食肆嘅感覺，當我聽到佢播「食戟之靈」主題曲嘅時候，發現原來個playlist有精心挑選過，搞到我食碗拉麵都勁熱血咁😂…查看更多

食過幾間以北京填鴨為主菜嘅餐廳，那些好評不少的烤鴨店都會令我失望而回，今次試下呢間美心集團的北京樓，期望不大，但見價錢合理，一試無妨。舖位算係幾細，一眼望哂，2人位同隔離貼到好近，中間只夠半個身位出入，直程可以夾隔離枱啲嘢食😂裝修新淨，新潮中菜館的裝修，設開放式廚房，由炒菜到切燒鴨都一目了然，服務員有禮，攞放碗筷和餸菜細緻優雅，令人感覺置身於高級食府，事實上，價錢都唔平啊。前菜青瓜、豆腐乾、雲耳、花生，仲有一隻綠色嘅豆，調味出色，鹹中帶麻，越食越好味，停唔到✪ω✪莧菜黃魚羹$50雖然$50一碗湯，但好足料，莧菜同黃魚均為主角，各自發揮而又不搶大家的風頭，係好夾嘅一個湯羹高郵鹹蛋蝦球$150今期興鹹蛋，叫個鹹蛋蝦球先，蝦球超大粒，一粒要咬3、4口先食得哂，上枱時熱辣辣，好多鹹蛋，如果有碗飯真係一流。南翔生煎包$68又係熱辣辣，注意唔好咁快就放落口，咬落去啲熱湯爆出來唔係講笑，我真係好白痴咁熝親個嘴😑，但好好味喎（人´∀`*）包同餡嘅比例平均，恰到好處。北京烤填鴨$160萬眾期待之填鴨，但佢又要令我失望了，呢隻鴨來到時已經見到佢毫無光澤，display同切功係幾靚嘅，但放入口好似食緊皮帶咁，無味之餘一口都係油，用薄餅包住食會唔會好啲？係會好啲嘅，起碼無咁油囉，加醬有啲甜味囉。個薄餅都係現成的，而且一啲都唔薄…總括來講，除咗烤鴨其他食物都中等以上，就連前菜都令人眼前一亮，會再幫襯試下其他野食，避開烤鴨就可以了😂…查看更多

三八婦女節係需要約啲3姑6婆嘻嘻哈哈一下，其中一個啊姑偏好深水埗區嘅廉價美食，佢今次嘅推介位於長沙灣街市嘅熟食中心，個人來說，對熟食中心感覺不太良好，因為衛生情況惡劣，幾好食都假，坐得周身唔舒服，又唔知會唔會食到肚仔痛( ･᷄ὢ･᷅ )但5個人得我一個反對，咁我都係收聲跟大隊啦( ‾᷄꒫‾᷅ )出咗長沙灣地鐵站要行一段路先到，坐電梯上到3樓，熟食中心來說，衛生情況還可以，起碼地下無濕漉漉，成層熟食中心都好光猛，枱凳亦算乾淨。因為我比較遲來，啲啊姑已經叫哂野食，佢地差不多成個menu叫哂囉😑食唔食得哂架…叫個椰青先🤤清甜啊～飲完又有椰青肉食下好過癮～生蝦$887隻蝦要$88…有啲貴，但佢係我食泰國菜嘅目的，不可不食，生蝦上面啲配料好辣，建議撥開少少配料先食，會比較容易入口。串燒沙爹$65串燒分別有牛、雞、豬，全部都風味十足，馬拉盞蝦乾炒椰菜苗$55第一次食呢種叫椰菜苗嘅東西，大厨煮到剛熟，爽口非常，馬拉盞蝦乾炒埋一齊超野味，呢個菜滿分👍🏼肉碎生菜包$58又係一道受歡迎嘅泰國菜，基本上好少會有餐廳整得唔好食，呢度都整得唔錯，生菜新鮮，肉碎有淡淡嘅冬陰公味，幾特別。泰式燒豬頸肉$58嫩嫩滑滑的肉(❁´ω`❁)泰式炒金邊粉$55外表不討好的金邊粉，但裡頭有海鮮加上多種香料炒成，食落口甜甜地，好好味架喎泰式菠蘿海鮮炒飯$78熟食中心都用新鮮菠蘿製作炒飯，心思誠意十足，食材新鮮，味道當然good啦(ღ˘⌣˘ღ)炸蝦餅$58好熱ᏊꈍꈊꈍᏊ✧Ꮚˊ͈ꈊˋ͈Ꮚ✧好彈燜豬手（無睇價錢㖭…）豬手好淋好入味，但呢碟餸嘅亮點係豬手下面嘅菜心，大厨切走咗菜心外表嗰啲鞋口嘅部份，剩底嘅只有菜心最嫩嘅部分，啲菜心吸收咗豬手嘅油同汁，好味到停唔到口囉(⑉･̆⌓･̆⑉)椒鹽九肚魚炸漿厚而無味，食落去好似淨食到啲炸漿咁，又厚又硬冬陰公湯味道很好，但可以食嘅湯料很少，唔食得嘅香料就好多😔差不多每碟餸都有獨有嘅醬汁，刺激客人嘅味蕾，淨係口味嘅配製，都見老闆下了一番工夫。做侍應嘅係一個上咗年紀嘅婆婆，我地同佢落單，佢轉頭就唔記得咗😂但之後有個年輕女仔就走過來問返我地叫咗咩，態度有禮，每次落單都多謝一次，睇得出佢地唔係本地人，應該係一家人喺泰國來香港開店吧，婆婆雖然年紀不輕，但好有活力，雖然只係喺街市嘅熟食中心，但都會化哂妝咁招呼客人，間唔時又會有啲街坊同佢地打招呼，呢種地方就係有人情味。最令我驚訝嘅係，當我地行去厨房旁邊埋單嘅時候，發現為我地出面成10枱人煮野食嘅只係得一個人，唔怪得啲野食來得越來越慢啦，但一個人可煮出咁多款，而且每碟都咁出色嘅泰國菜，真係好利害(//°ꈊ°//)客人多但佢地對食物都咁堅持，呢個熟食中心真係唔可以睇少…查看更多

又到一個人午飯時間，要去金馬倫道買啲嘢，睇下有咩餐廳喺附近先～潮丸係今次openrice 最優秀開飯熱店嘅粥粉麵提名店舖，當然要試一試😆平日午餐時間12:45去到，剛開舖不久，已坐8、9成滿，好彩仲有位(˶‾᷄ ⁻̫ ‾᷅˵)唔洗等店舖一個長方形，坐位不多，但座位與座位之間仍留有空間，讓客人坐得舒舒服服，不是有位就攝枱攝凳賺到你盡嘅無良食肆。裝修簡樸，選用幾款不同的枱凳，有白色雲石，有木製，都貫徹簡約，潮洲食店來說，很前衛啊ฅ՞•ﻌ•՞ฅ點菜紙係一張過咗膠嘅A3紙，用紅色marker喺上面✅低需要嘅食物，點菜紙用後可循環再用，實用又環保。揀咗評價高嘅自家製牛三鮮河粉，牛三鮮分別係崩沙腩、牛肚和牛筋，一碗好嘅河粉，喺需要成功夾得起啲河粉，唔會一夾就散，粉與粉之間唔會痴埋一舊，潮丸呢碗河粉完全做到以上2點之餘，入口滑滑溜，做得非常出色👍🏼湯底清甜，崩沙腩肥瘦相間，入口即溶，牛肚嫩而不靭，如果合埋眼食，應該估唔到自己食緊嘅係牛肚，牛筋有淋的，有富咬口的，2款牛筋都入味得很，成碗麵實在無可挑剔。如果喜歡辣嘅朋友，推薦枱上嘅三款辣椒醬：黃燈籠椒、紅燈籠椒和自家製辣椒醬，三款各自都有微妙嘅不同，建議先放在小碟上試味，試味時不要取太多，因為都幾辣架，試啱先撈落碗麵度。除了辣椒醬，枱上仲有魚露和醋可選擇，醬料嘅配搭可見店主嘅心思同誠意。幫我結賬嘅應該係老闆吧，是個年輕的男仕，佢一面講電話一面為我結賬，臨走時仍不忘放下電話，跟我說句多謝，$55，無加一服務費，話說，服務業應有嘅服務係需要加一才有嗎？市面上有幾多食肆嘅服務對得住呢個加一？如果我需要俾加一，但又得不到應有嘅服務，咁我俾加一嘅意義何在？我喺潮丸食咗碗出色嘅麵，得到唔洗加一都有嘅服務，仲唔係又食又拎？…查看更多

難得可以同寶貝晚餐，唔想去太遠，近近地喺yoho食算了，金田家喺我嘅bookmark 度有一段日子，聞說是福岡人氣嘅拉麵店，之前去九州時無試，今次試下香港版先(๑￣ ̫ ￣๑)大約18:45來到店舖門口，有條排隊嘅小龍，等咗10分鐘就可以入座了。舖面光猛，加上木製枱凳，感覺柔和，座位闊落舒適，天花裝飾大方得體，環境不錯啊(｡’▽’｡)♡因為太肚餓嘅關係，無咩心機睇個menu😂反正未食過，就叫咗menu上面最前嗰2碗拉麵，分別係黑豚拉麵和豚骨mix拉麵，點菜紙上可選麵嘅硬度和蔥嘅多少我叫嘅係豚骨mix拉麵，mix嘅意思係豚骨湯和雞湯嘅mix，感覺上湯底應該很濃郁吧，有2個湯頭喎，但事實上不論是麵或是湯，就算是豚肉，味道都好平凡，平凡到…覺得浪費咗一次食好野嘅機會，而且整體來說味道偏淡，淡到…我食完即刻就唔記得咗咩味( ･᷄ὢ･᷅ )寶貝叫嘅係黑豚拉麵，其實視覺上黑豚拉麵已經吸睛好多，我試過個湯底，味道濃郁，好味好多喎，再試下個麵，寶貝要咗硬麵，我要普通，而佢地嘅分別係…無嘅😂，至於肉呢，味道算是不過不失啦，佢哋啲共通點係大家都好薄囉，但當然黑豚份量就多好多。寶貝話開頭覺得麻麻地，但試過我嘅豚骨mix之後，覺得自己嗰個好好味😂，所以大家如果都想試呢間金田家，叫黑豚拉麵好了，豚骨mix可以不試。拉麵無蛋就好似big band 無咗G dragon, 食KFC唔食雞一樣，但呢間金田家真係無蛋，要蛋的話要加$14，如果要一碗黑豚拉麵$98，再加一隻蛋，呢一碗麵要過百，但呢碗唔係一碗值過百嘅拉麵，市面上，有質素嘅拉麵店成千上萬，呢間試過一次就夠，或者下次再去九州嘅時候，會試下當地嘅風味，畢竟，同一間分店，香港同日本嘅味道不同嘅例子屢見不鮮😌…查看更多