Ooooodi的个人专页

外脆內嫰係咩滋味？食口口口嘅炸雞扒就試到喇。炸雞扒（$40）可配飯/烏冬/薯條連罐裝汽水/紙包茶（＋$15）。炸雞扒有三大件，連埋腸仔同魚餅，填滿左成個盒。雖然係食緊熱氣野，但有個餐有少少椰菜中和番。另外勁鍾意食菜嘅朋友，想一次過滿足晒邪惡同健康嘅感覺，可＋$25揀加配健康煮雜菜。雖然今次冇揀，但老闆介紹每日雜菜有6-7款，例如紅蘿蔔、白蘿蔔、青瓜、翠肉瓜、南瓜、椰菜花、西蘭花、粟米、車厘茄。其實佢仲有啲更健康嘅選擇，就係慢煮雞胸同慢煮雞扒（$35），下次要加埋菜底試下健康一餐先。…查看更多

一點放飯，D2 Place 好多餐廳都要排隊，呢間都唔例外，不過等左十分鐘左右都好快有位。餐廳環境闊落，餐牌選擇亦好多。我今日掙扎喺叉燒煎蛋飯同乳豬卡邦尼意粉。最後揀左後者。等緊出餐之際，見附近好多人都食burger。噉burger應該有佢一定嘅吸引力。好快都有得食喇，意粉賣相唔錯，醬汁亦掛滿喺意粉上，乳豬都算肉厚，但如果脆皮啲同多一兩舊就更正喇😅😅。整體唔錯，下次會係叉燒煎蛋飯burger之爭。好快會再黎試。😋😋…查看更多

難得今日出葵芳睇舞台劇，又忍唔住去新都會廣場嘅雞翼山食野頂下肚先。見到黑糖珍珠係新口味，都想試下，但朋友堅持要食咸檸七，噉我就奉陪一下。😎雞翼大大隻，每隻都沾滿醬汁，堂食熱辣辣，啖啖肉，咬開仲好juicy，咸檸味好足，因為見到真係有用咸檸果肉去煮，但七喜味道就唔太突出，不過甜甜地，依然惹味。😋😋😋老闆話係繼檸檬茶雞翼之後，另一食得嘅飲品。食完雞翼仲飲左佢地嘅山渣蘋果茶，比橙茶更好味，真係有少少山渣同蘋果蓉，仲可以揀少甜少冰，感覺真係健康啲。😆…查看更多

大部份人黎新香園都食麻辣蛋牛治，但我反而鍾情佢碗炸醬麵，次次黎都必食。平時食撈麵要加錢，但呢度碗炸醬撈粗只係廿零蚊咋。睇落碗麵唔係好大碗，但當肉絲，麵同醬一齊撈起時，感覺上大碗左，當宵夜食份量啱啱好。佢嘅炸醬好惹味，但又唔會太咸，食完唔會感覺口渴，應該冇乜味精。佢仲有碗細細碗嘅胡椒湯，辣辣地，好想添多碗呀。加埋杯濃滑奶茶，圓滿的一餐。如果下次再黎，等我都試下佢個蛋牛治，睇下有幾吸引先得。當然我會繼續encore 炸醬麵啦。…查看更多

去新都會，最鍾意飲天仁茗茶，順路去埋隔離舖雞翼山食雞翼。食完炸雞翼再歎番杯凍飲，正！噉啱見到雞翼山老闆，佢話遲啲會轉口味，心大心細諗噉食咩味好呢，會唔會之後冇得再試架。。。等我揀仲未試嘅味道先，花醬麻香同埋柚子。要食柚子先，因為避免麻醬搶晒啲味。柚子個味好似韓國柚子茶，柚子味好香，仲加左啲糖喺上面，甜甜的好開胃。但相比上次食玫瑰蜜糖味，都係鍾意蜜糖多啲，加埋淡淡的玫瑰香，果然係招牌好味。另外呢個花醬麻香，似擔擔麵個麻醬，如果冇咁咸同埋辣味再多啲就正喇，突然好想加個撈麵添😂。佢加$18有凍飲，有橙茶同水蜜桃茶，下次考慮下喺度買埋先。…查看更多

近日好多時都叫外賣，有時外賣質素未必好，但去呢間雞翼山外賣，就算行左十幾分鐘番屋企先食，啲雞翼都仲keep 到脆，入面都仲算juicy。用openrice叫外賣自取，預定時間幾點去拎，真係準時整好，唔需要再等，超方便。今日買左文青玫瑰味🌹🌹，$38/4隻，外賣盒賣相好靚，一打開個盒已聞到陣陣香味。雞翼面上舖滿食用玫瑰花，食落雖然冇堂食咁熱辣辣，但依然外脆內嫰。蜜糖味唔會過甜，而且仲有淡淡玫瑰香。老闆推介如果下次外賣加餸，可以揀味噌雞翼，個醬汁送飯一流。下次要試下先。😋😋…查看更多

受疫情影響，而家外賣自取七折。揀左湯麵套餐（$53），招牌魚腐豬軟骨魚湯米線，仲可選一款小食同埋飲品，七折後$37咋。外賣自取最着重保温同保質，拎到番去十分鐘左右個湯仲熱嘅，麵同湯分開上，確保個麵唔會變淋。俾左折扣，但餸方面冇少到，仲有五件魚腐，豬軟骨仲腍到就黎冇牙嘅都食到😆。小食有魚皮，炆冬菇，生菜同魚湯蘿蔔供選擇，最後我揀左生菜，以套餐呢個價錢黎講份量都算多。杯奶茶就正常啦，都係嗰句，呢個價錢就唔會太多要求了。…查看更多

今日宵夜想食雞翼，九點幾即刻飛奔去雞翼山買，好彩趕得切last order，註定今日有口福。😋係喎，雞翼山唔止有雞翼，仲有雞槌個喎，噉今日試下雞槌先，揀左原味脆香。一啲都冇失望呀，個面真係超脆，加上啖啖肉，好正呀！剛剛炸好的雞槌外脆內軟，內裡仲好juicy架。初時以為原味冇乜特別，但原來有好香嘅香草味。繼檸茶同原味之後，我要快啲試埋其餘嗰八款咪先得。😜冇得去日本旅行，唯有暫時對住個富士山牆打下卡，滿足下先啦。提外話，鍾意呢間雞翼山，當然佢地除左雞翼外，而且仲有好多富士山精品，如果佢有得賣就正喇。😅😅…查看更多

番工食車仔麵食到悶，今日轉下食餃子先。有湯餃同煎餃揀，湯餃餃子$38/8隻，$42/10隻，可選單拼或雙拼，煎餃就貴兩蚊。餃子款式多，共有八款口味選擇。今次試椰菜冬菇雲耳豬肉餃，同香芹芫茜豬肉餃。除左鮮雞湯外，仲有我最鍾意嘅番茄薯仔魚湯添。下晝一點幾叫外賣，等左6-7分鐘就有了。啲餃子勁大隻，每隻都好足料，包得好實淨，好包滿。唔似其他餃子店得好少料，一咬落去會散晒。椰菜雲耳同豬肉的比例啱啱好，不過略嫌少左啲冬菇味，如果多啲就更香喇。但雲耳好爽口，令豬肉餃唔會太飽滯。芫茜控一定要揀香芹芫茜餃，個芫茜味好勁，越食越香。個湯有好多粒薯仔，如果有多啲番茄就真係perfect 喇。初時以為十隻餃會唔夠飽，但原來都幾飽，因為啲餃大大隻。下次要試晒其他款同試下麵先。…查看更多

今日番工忙到癲，冇時間出街食lunch，唯有叫外賣啦。揀左雪山冰廳嘅檳城特餐（$52外賣＋$1）。外賣聽電話的店員好有禮貌。👍不過由於成一點先order，要等半個鐘先送到。個檳城特餐有丹麥多士、櫻花蝦炒蛋同叻沙摻摻。因為外賣原故，個丹麥多士送到黎已經凍左，冇去堂食時咁好味了。炒蛋上有唔少櫻花蝦，幾香喎，仲要係滑蛋添。碗叻沙摻摻，湯同麵分開上，啲麵唔會浸到淋晒，加分，同埋個湯竟然都仲暖喎。摻摻即係米粉加油麵，呢個配搭好正，啲米粉吸晒啲叻沙湯味，碗麵仲有蝦同魚片，以呢個價錢食到碗東南亞口味嘅粉麵，正啦。😋😋👍呢個餐仲包埋杯飲品，揀左奶茶，唔。。呢個價錢加上外賣，對杯奶茶冇要求啦😅😅…查看更多

路過葵芳，想快食常餐，見呢間常餐比其他茶餐廳平，就揀佢啦。佢仲有五香肉丁同鮮牛肉揀，有啲餐廳呢兩樣餸係要額外加錢，呢間就唔需要，個餐$35。呢個常餐有牛油方飽，仲可以揀多士添。平時多士要加幾錢而佢又唔洗喎，噉當然要多士啦。多士新鮮夠脆，仲搽滿左幾多牛油，可惜得半片，不過好味。叫左五香肉丁米加煎蛋，熱奶茶。碗米粉好大碗，仲有菜添，正喎，都俾唔少肉丁架 個煎蛋仲要係我至愛嘅流心呀😍。奶茶就不過不失啦，茶味唔夠香。伙記都好有禮貌，同啲食客（我諗係街坊）都有講有笑。佢地仲成日拖地，唔知係咪驚近日肺炎呢。…查看更多

成日經過葵廣，都想試下呢間格仔餅，有好多款唔同味道，格仔餅有6款唔同味道，雞蛋仔仲多，有成20款味道。見到有客啱啱買左份朱古力格仔餅，啲朱古力醬多到漏晒出黎，極邪惡，但食嘅時候應該會有啲論盡，一定變污糟貓，要企定定食完先好走喇。我略嫌朱古力普通左啲，所以揀左肉桂蘋果味。個格仔餅焗起上黎好香呀，跟住店員加左勁多勁香肉桂味嘅蘋果俾我，多到跌晒出黎，個格仔餅根本就包唔晒啲蘋果😝，超正呀！😍肉桂嘅香味真係冇得彈，鍾意肉桂嘅朋友仔絕對唔可以錯過。下次試下佢啲咸味雞蛋仔先，唔知會唔會都有驚喜呢！😋😋…查看更多

今日放假，試下蘇媽蘇媽，晏晝唔會好似夜晚噉咁多人排隊卦。結果等左兩張檯就有位喇。地方比較細同逼，要搭檯。揀左肉骨茶（捧捧骨）、檳城福建蝦麵、椰漿飯，咖央多同熱嘅馬來西亞拉茶。每人都會有一碗肉骨茶，店員用大大個熱水煲即刻喺客人面前斟，聞到好香的藥材味。捧捧骨有三枝啖啖肉嘅骨，啲肉煮得好腍，名符其實「骨肉分離」呀😅，仲有金菇、豆腐卜，吸晒啲湯，原窩上應該熱辣辣嘅，可惜天氣凍加上舖內開晒風扇，啲食物好快凍左。碗蝦麵好多料，當然唔少得有蝦🦐，仲有炸魚片、腩肉、芽菜、少少菜同半隻蛋。加埋少少生蒜同辣醬，好惹味。可惜碗麵好快凍左，令個麵啲梘水味重左，影響左少少味道。綠色嘅椰漿飯🍚，唔太特別，只有少少椰香味，味道再濃少少就好喇。咖央多一上檯係好脆，咖央味都好香。攪到我想入廚房拎個醬搽多啲。下次要食晒啲咸點先再落單，否則擺耐左就冇咁脆喇。最後杯拉茶，見住店員在廚房拉，勁好手勢，成杯茶起晒泡。初時以為會好甜，但反而甜度啱啱好，仲好香茶味添。整體都唔錯，但下次可能要放假先再黎食喇🥢，夜晚真係太多人等位。…查看更多

之前都食過呢間餐廳，貪佢夠多選擇，飯、意粉、pizza、小食、甜品乜都有。不過今日黎食，有啲失望。每次黎都必叫呢個多利亞，今次都唔例外，果然不負眾望，好多芝士加埋肉醬，撈飯一流。仲加埋我最鍾意嘅溫泉蛋，呢個配搭真係冇得彈。👍之後仲有番茄海鮮意粉。有青口，蝦，魷魚，都算多料，上檯好夠熱，味道都唔錯。可惜食食下有貝殼嘅碎，可能係炒海鮮時碎左嘅殼，呢度扣左少少分。濃厚芝士漢堡用鐵板上，一層厚厚而又溶緊嘅芝士覆蓋晒塊漢堡。上面仲有隻煎蛋，可惜已經熟晒，唔啱鍾意流心蛋嘅我。側邊仲有少少粟米同薯角，出奇地個粟米好甜喎。如果個薯角再脆啲就非常好喇。等左勁耐，點解個煙肉菠菜仲未到架呢。正想問店員之際碟食物就到了。好明顯個菜係煮過龍，唔記得出餐，因為一望就知啲菜係煮到黃晒。呢方面餐廳真係要留意下喇。整體黎講，都會再俾機會呢間公司餐廳嘅。因為真係平，兩個人食四碟都係$115。…查看更多

今日約朋友到葵芳睇戲，睇戲之前原本想去天仁買杯野飲，竟然俾我地發現開左間雞翼山喺隔離。好耐之前朋友喺旺角店買過外賣，覺得文青玫瑰好好味，唔係死甜，外賣拎左十幾分鐘先食都仲暖仲脆。難得喺葵芳開左，當然趁睇戲前食啦。原來有成10款口味選擇，選擇困難症又病發喇，最後決定叫2款口味同一杯飲品，揀左檸檬茶同柚子雞翼，飲品就叫左橙綠茶。店員介紹個檸檬茶雞翼係先用左茶葉醃嘅，所以只有雞翼冇雞膇。食落真係好似飲緊檸檬茶噉，估唔到檸檬茶同雞翼係夾個喎。柚子味雞翼真係好似韓國柚子蜜嘅味道，朋友覺得甜左啲，可能因為上面仲加左啲糖。我覺得都好味，不過可能唔落糖會更加好。橙綠茶就反而唔太甜，飲落好清新，最啱食完雞翼時飲，中和番食雞翼熱氣嘅感覺。下次要再試埋其他味先得。😋…查看更多