雨申的个人专页

疫情之下好耐都冇打邊爐，今日一於同朋友一齊食個100分鐘午餐自助放題！大家都鍾意食牛，所以就揀咗$178特選安格斯set b，鍾意食牛嘅朋友仔唔好錯過，呢個餐性價比高，有幾款唔同嘅靚牛食！湯底我哋就揀咗好滋補嘅沙參玉竹鯊魚骨湯，真係有成條鯊魚骨，味道香醇，材料豐富，豬骨湯香噴噴，又唔會有色粉，所以食完唔會好頸渴。我哋當然主攻牛肉同豬肉，安格斯牛、封門柳入口即溶，肥瘦均勻，而牛坂腱牛肉味就最濃，牛脷心托較為爽口。呢度啲牛真係好高質素，食幾碟都返本！除咗牛肉，豬肉都好出色，必食西班牙豬肉，有少少脂肪，但又唔會太肥，切得夠薄，肉質軟林。另外有幾款火鍋配料都係呢度獨有，好似手作珍寶蝦丸，好足料，夠晒彈牙！蝦膠釀冬菇、手打麻辣豬肉餃、手打孜然雞肉丸全部都好特別同好味，放題來講都可以提供到更多特別嘅配料，真係用心經營！除咗火鍋配料，出面仲有好多熟食同前菜才可以任拎任食，試咗南乳齋菜，南乳味好香，啲齋菜索晒啲南乳汁，好高質！…查看更多

今日超大雨，經過誠品書店睇咗陣書，就決定喺誠品入面呢間八方台式麵買兩個外賣返屋企食。套餐有好多選擇，今次叫咗台式肉燥麵拼師大香酥豬扒，肉燥入口即溶，肥瘦均勻，唔會覺得好油膩。最驚喜係豬扒好大塊，有手掌咁大，炸得香脆，醃得好入味，一啲都唔乾身，咬落去好Juicy。另外一個餐我就叫咗花枝丸蕃茄麵，可以免費轉新竹米粉，同埋配煎餃子。我鍾意佢外賣會將啲湯同麵分開，返到屋企食啲麵都唔會俾啲湯浸林曬。蕃茄湯夠濃郁，酸酸甜甜好開胃，花枝丸好彈牙爽口，至於餃子個皮夠薄，咬落仲有肉汁！套餐仲有杯嘢飲，推介金青茶王，味道好清新，食完濃味嘢飲就啱啱好！總體來講呢間餐廳性價比好高！…查看更多

呢間台灣餐廳原來啱啱開咗兩個月左右，咁岩行過中港城，就入咗嚟試吓，間餐廳裝修得幾靚幾有特色，座位寬敞。食台灣嘢就一定要叫牛肉麵，推介呢度嘅紅燒腱心牛肉麵，牛肉麵湯底好濃，一啲都唔油膩，幾塊牛肉煮得非常軟林身，入口即溶，又有牛味。我最鍾意食佢台灣麵嘅麵質，軟硬適中， 好有口感，啲面索晒牛肉濃湯嘅精華。牛肉麵賣相都十分精美，有蘿蔔、小棠菜作為伴菜，望到都覺得吸引。呢度除咗一般嘅粉麵飯之外，仲有好多選擇。冬天就最啱食暖粒粒嘅火鍋，試咗佢嘅冬暖酸菜魚鍋，魚片好新鮮，好滑而且又冇乜骨，酸菜湯底味道啱啱好，少少酸令到我更加開胃！除咗魚片之外，個鍋仲有好多唔同嘅配菜，有金菇、娃娃菜、鮑杏菇、豆腐等，清清地係健康之選，就算唔配飯麵就咁食個鍋都夠飽，食完呢個鍋真係成身暖晒。食台灣嘢就梗係必叫鹽酥雞扒做小食，雞扒即叫即炸，上到枱仲熱辣辣，雞扒好厚身好大塊，外皮炸到脆卜卜，但雞肉仲保持到嫩滑juicy, 而且個款又唔算太厚，好滋味!台式餐廳就一定唔少得台式飲品，我就簡單啲揀咗杯香濃台式奶茶，鍾意佢可以自己揀甜度同冰度，茶底夠濃，係正宗嘅台灣味道。…查看更多

呢度真係人世正宗泰國菜，樣樣嘢都好好食，性價比好高，份量又夠大啲，真係次次都唔知點揀好！小食就一定要叫泰式蝦餅，即叫即炸，外皮炸到金黃色，脆卜卜，熱辣辣，口感非常彈牙爽口，配上泰式酸辣汁，最佳配搭。我哋仲叫做炸軟殼蟹香芒沙律，軟殼蟹好大隻，炸到好脆身，香芒沙律酸甜爽口，識落有啲辣，酸酸甜甜非常開胃。主菜我今次就推介無骨滷水豬手，平時我唔點叫食豬手，但係呢度嘅滷水豬手，真係令我食過返尋味，下次一定要再食。滷水豬手煮得好入味，香濃嘅滷水搭配豬手炆到已經好軟林林，啲豬手皮真係入口即溶！仲要係無骨，而且切好晒一嚿嚿，真係一放入口就啖啖肉，呢個餸真係冇得輸，送飯必備！另外仲叫咗生菜肉碎包，肉碎新鮮熱辣，好香辣好惹味，包埋新鮮生菜，感覺好清新，一啲都唔油膩。嘢飲今次就叫咗特別啲嘅椰子開心果沙冰，賣相一流，飲落好有椰香，沙冰入面有細細粒嘅開心果肉，好有口感，椰子同開心果味道好夾，飲一啖成個人即刻涼透心。…查看更多

原來地庫呢度有間隱蔽日本居酒屋，之前行過幾次都好想試，今日一於同朋友過嚟試吓。呢度座位都幾多，同朋友傾偈飲酒，環境都幾舒服。食物種類有好多，有壽司、刺身、鍋物、串燒等，全部都QR code自己落單，十分方便。刺身我哋就叫咗牡丹蝦刺身同帆立貝刺身，兩款刺身都十分新鮮，牡丹蝦蝦肉鮮甜，肉質彈牙，而帆立貝非常新鮮同厚身大粒。壽司我哋就叫咗特選壽司盛，造型好精緻，八件壽司放喺呢個好似首飾盒入面，每件壽司都係即叫即整， 好新鮮，有我最鍾意嘅赤貝同三文魚，尤其是係赤貝，好新鮮好爽口，壽司大小啱啱好。另外必叫串燒，串燒全部即叫即燒，大力推介汁燒白鱔，白鱔好肥美新鮮，皮燒得有少少脆身，而入面d鱔肉好滑，一咬落去油脂滲滿成個口腔。芝麻雞翼炸得熱辣辣，咸到啱啱好，外脆肉嫩，好高質。最後係燒北海道花魚，好大條，冇咩骨，外皮燒得帶點焦香，配埋蘿蔔蓉醬汁食最好味，送酒一流！…查看更多

Lunch行過發現呢間新派fusion便當，主要做外賣，有便當、飯團、丼飯等，好岩中環上班族。便當外型包裝好高級好精緻，我揀咗烤三文魚便當，一打開就見到繽紛色彩嘅配搭，除咗煮食三文魚飯之外，每一格都有唔同顏色嘅配菜，有紫椰菜、蘿蔔絲等多款蔬菜，全部都非常新鮮爽口。不知不覺食多咗好多蔬菜，感覺好健康！重點嘅三文魚烤得十分香，生熟煮得啱啱好，唔會過熟，魚肉嫩滑新鮮，入口即溶，充滿魚油香。三文魚配上了傳統嘅日式飯，煙煙韌韌，入面都有唔同配料，有香菇、碗豆等，十分豐富。我另外仲買咗個三文魚飯團，細細個做下午茶啱啱好，飯團餡料豐富，有好多三文魚，口感軟糯，仲有啲黑芝麻同香蔥花，增加香氣。…查看更多

元朗出名嘢食多，尤其日本餐廳特別多，今次搵到呢間日本餐廳， CP值好高，午餐好抵食！叫咗個自家製豬軟骨濃湯烏冬，都係70幾蚊，仲要包嘢飲。個湯底好濃豬骨味，不知不覺飲咗好多湯，自家製嘅豬軟骨好入味，忟得夠腍身，入口即溶。烏冬煙煙靭靭有咬口，比起普通烏冬質地麵質夠滑，個烏冬仲有好多配料，有蟹柳、木耳、粟米、十分豐富。假期嚟嘅話有假日限定午餐，叫咗芝士牛角漢堡，塊漢堡扒好厚身，用咗牛肉豬肉雞肉一齊整，好特別，喺其他地方食唔到，牛角包都看到好脆，個餐仲要跟埋熱辣辣嘅薯條同蘋果沙律，又可以揀特飲，真係抵食！呢度啲炸物好高質，必點芝麻雞翼，即叫即炸，上枱熱辣辣，果皮炸到脆卜卜，但入面啲雞肉仲係好多汁好嫩滑，一啲都唔乾身。仲有芝士薯餅，同樣熱辣辣，一咬落去啲留心芝士流晒出嚟，好好味！呢度啲嘢飲選擇都好多，我揀咗可可阿華田芝士奶蓋，芝士奶蓋打得好滑，一啲都唔漏，配埋濃郁嘅阿華田，仲有少少脆脆，配搭得好好。…查看更多

心思思又想食酸菜魚，黎麻辣派對就最啱，呢度啲魚款式夠多！水煮系列有幾個味道可以揀，上次嚟就試咗水煮，今次就一於揀酸菜味！最鍾意呢度有好多唔同款魚可以揀，幾種魚其實都冇乜骨，侍應話江團魚油脂比較重、黑魚偏瘦啲。因為我未食過黑魚，今次就試吓。另外仲加左幾個輔菜，包括有機花菜、秀珍菇、金針菇。酸菜魚上枱熱辣辣，好大盆呀，賣相好吸引！先試湯底，酸度同辣度到調味得啱啱，因為我唔食得好辣，所以只係揀BB辣，不過對我來講原來都幾辣喎，不過就真係辣得好過癮好惹味，好有麻香！魚片好新鮮，真係冇乜骨，啖啖肉，黑魚真係比較瘦，但係都好嫩滑，魚片索曬麻辣湯汁，滋味無窮！除咗自己加嘅輔菜，本身酸菜魚有跟水晶粉、蒟蒻、大豆芽菜，分量十足！除咗酸菜魚之外，仲叫咗麻辣雞鍋半隻，同火爐一齊上，可以一路食一路加熱，賣相好吸引。醬汁非常濃郁，好惹味，雞件好入味，味道層次豐富。麻辣汁配上大量泡椒同剁椒，越食越辣，好過癮！…查看更多

行過樂道見到呢間好得意嘅小熊輕食及飲品店，見到廣告牌上面嘅肉鬆小方，即刻衝入去想買，點知太晏已經賣晒，店員介紹我鬆餅都好好味，所以就買咗盒試吓。一盒鬆餅有三件，賣相精美，我每個味道都揀咗一個，有龍眼紅棗、開心果及朱古力味。鬆餅質感鬆軟，唔會過軟或過硬，甜度啱啱好，唔會太漏。開心果味有細細粒嘅開心果粒，食落去好有口感，而且好有開心果香。最驚喜係龍眼紅棗味，本身唔係特別好龍眼紅棗，不過加入鬆餅入面原來個味道好夾喎！食完鬆餅梗係要飲杯嘢啦，我就揀咗白桃烏龍茶，淡淡的白桃甜味，加入烏龍茶，飲落好清新好解渴，而且入面仲有果肉， 十分有口感。至於朋友飲咗美祿惡魔，呢真係好正，鍾意飲美祿嘅朋友一定唔可以錯過，好濃郁嘅美祿香，而且入面有豆腐花，又有咖啡果凍，配搭十分好！…查看更多

特登黎朝聖，原來間舖比想像細，坐位唔多。叫左招牌咸蛋蒸肉餅同鹽焗手撕雞。賣相唔錯！肉餅山好吸晴，食落有口感，唔會太腍。鹽焗手撕雞份量比想像中多，調味就有少少咸，不過送白飯就啱啱好。呢度加$10有一個白飯，價錢都算合理。整體來講，中上質素，妨支持小店！…查看更多

之前嚟過食打冷，都知呢間野質素唔錯，今次食午餐，估唔到質素都幾好喎！好想食炒河粉，所以叫咗豉椒新鮮排骨炒河，炒河最緊要有鑊氣，賣相一流，即叫即炒，熱辣辣非常新鮮！河粉偏幼身，唔會出現痴埋一嚿嚿嘅情況，河粉索晒豆豉醬汁，夠晒濃郁， 加埋洋蔥同青椒，十分惹味。排骨份量夠多，啲肉果然係新鮮，唔會太鞋，醃得非常入味！至於朋友就大讚汕頭沙薑雞套餐十分抵食，$58又有雞又有滷水豆腐又有滷水蛋！雞件份量都好多，件件都啖啖肉，肉質嫩滑，即使係雞胸肉都唔會鞋口。雖然侍應有俾薑蔥油，但其實唔使沾都得，因為雞件已經有沙薑香味，配埋一口熱辣辣嘅雞汁蒸香飯，真係好滿足！我哋仲嗌左一碟淨牛雜，一上枱已經聞到五香汁嘅香氣，牛雜款式同份量都好多，有生菜墊底，一食就知個湯底好足料，味道調校得啱啱好，我最鍾意係食牛肚，煮得好腍好入味，入口即溶！…查看更多

Book咗好幾個月終於book到，地點有啲偏遠，好啱有揸車嘅人士嚟朝聖。午餐時段有lunch set，價錢正常，唔算太貴。整體食物都幾好味，卡邦尼意粉唔會太漏，幾creamy。 煎鱸魚好有驚喜，果皮剪得好趣，魚肉非常嫩滑。Lunch set包括沙律或者餐湯，如果加特別嘢飲就比較貴啲，咖啡一般，比較淡。我哋單點左一個黑松露薯條，給不推薦，薯條只係普通炸薯條，配上黑松露醬，好唔抵食, 成個薯條只係靠啲黑松露醬去支撐，非常單調。…查看更多

估唔到平日黎都幾多人，好彩訂咗位。我哋三個人叫咗細嘅蟹，因為有人唔食辣，所以揀咗薑蔥，雖然冇避風塘同黑胡椒咁惹味，但係味道都唔錯，好啱唔食辣嘅人，薑蔥味好重，炒得好香。而且蟹肉鮮甜，肉質肥美。整體來講嘢食質素幾好，種類略嫌少咗啲，同埋價錢都偏貴，員工服務態度好好，會主動過嚟收碟。…查看更多

搬咗新鋪，座位仲舒服，乾淨企理。最鍾意呢度夠多嘢食又定期有新湯底，今次就是期間限定同金寶合作嘅忌廉周打蜆湯，湯底濃濃又香滑嘅忌廉湯，入面仲有好多粒新鮮嘅蜆，蜆肉好肥美，啖啖肉，真材實料，立即將個湯底提鮮！火鍋配料就一定要食佢嘅牛肉，有好多款唔同種類嘅牛可以揀，我嘅套餐可以揀封門柳、美國安格斯牛肉、牛脷心托，款款都好新鮮，每款嘅油花都非常均勻，切得好薄，碌幾秒即食，入口即溶，牛肉味濃！除咗牛之外，幾款海鮮都係必食，新鮮海蝦大大隻，d肉夠彈牙。仲有帶子、花膠、白鱔片，新鮮爽脆，全部都係靚貨，食多幾碟都回本。呢度除咗火鍋配料，熟食都做得唔錯，又有多款可以揀，其中麻辣鴨血豆腐鍋最正，鴨血又香又滑，滲有麻辣香，辣得好過癮！嘢飲就一定要飲自家製飲品，推介薄荷烏龍茶，夠晒清新，又可以解油膩。至於冰糖燉檸檬，就夠晒滋潤，味道唔會太甜，好香檸檬味，食完打邊爐潤下個喉嚨真係啱晒！…查看更多

想來時代冰室好耐了，今日終於有機會。侍應服務好好，一坐低即刻短上兩碗熱辣辣嘅老火湯。原來呢度有好多唔同種類嘅食物，有扒餐、小菜、鐵板、湯飯等等，真係花多眼亂。最咪我哋叫咗巨人炸雞髀拼蔥油肉燥撈手工刀削麵，份量好多，炸雞髀真係不得了，好巨型，好厚肉，個皮炸到脆卜卜，奄得又入味，仲要上面有蔥油，食落更加香口。手工刀削麵， 十分煙韌，好有口感，我哋加$8要咗兩隻煎雙蛋，成個餐真係好豐富！另外薑蔥霸王雞，啲雞肉好嫩滑，豉油特製醬汁滲入雞肉入面，每一口要配埋香蔥食，送飯一流！至於藤條豬肉，個名夠晒特別，其實係類似椒鹽豬扒，不過就加咗炸蒜，豬扒唔會太乾身，食落仲有肉汁，係半肥瘦豬肉，個皮煎得好香脆。叫餐嘅話仲可以優惠價加小食，我哋加咗$24要白汁芝士焗西蘭花🥦，以為優惠價加配嘅小食通常都係細細碟，點知上枱係原價嘅大碟size, 好良心！食咗咁多肉都要食返啲菜嘅，呢個芝士焗西蘭花唔會太漏。野飲方面，我就推介火山華田脆脆冰，好濃郁嘅阿華田，唔會太甜，配埋脆脆，夏天飲真係透心涼。…查看更多