Artimiss's Profile

慶祝我哋拍拖8周年，喺Openrice度睇完一大輪，決定去食呢間中菜廚師發辦。其實我一直覺得好多高質中菜好精緻，唔止係擺盤，而係煮嘅時候已經係功夫菜，廚師發辦又好，N道菜又好，中菜絕對夠格。今次呢餐亦都冇令我失望，9道菜，仲做緊買一送一限時優惠（$1088），非常驚喜。第一道︰頭盤，藤椒墨魚、象拔蚌、梅酒赤貝啫喱（5/5分）一上菜就「仙氣飄飄」，現場效果好靚，但影相有難度。海鮮口感Q彈，醬料配搭適中，幾開胃，令人期待下一道菜，唯一係啫喱食落比較似甜品，覺得有啲格格不入。第二道︰龍蝦蟹油炒蛋（5/5分）用料足，龍蝦鮮甜彈牙，金黃嘅蛋口感濃稠有蟹油香，加上面頭嘅脆脆，入口層次更豐富。第三道︰酸菜松茸鯛魚湯包（5/5分）酸菜湯胡椒味辣得嚟唔會太刺激，松茸據介紹係煎過，以增加湯水香味，但食落作用不大，但整體配搭都係好嘅，個湯包餡料充足，剁碎咗嘅各式餡料，每一啖都好滿足。第四道（原菜單）︰A5仙台牛（5/5分）老公二話不說就摷亂咗，其實本身擺盤係靚啲嘅。由於我唔食牛，呢碟我冇食度，據介紹係紅酒烹煮，老公表示好食。點好食法呢，佢只係重複好食……第四道（轉換後的菜品）︰黑毛豬叉燒（5/5分）同餐廳講咗我唔食牛，佢哋好貼心地為我轉咗做豬。呢個叉燒厚而不柴，肥肉部分入口即化，肥而不膩，我呢啲平時拒絕肥肉嘅人都肯食。左邊黃色嘅醬係芥末醬，似平時燒味配搭，右邊係柚子芥辣醬，入口清新，配肉更加平衡，我更為鍾意，但偏好傳統口味嘅老公認為芥末醬好食啲。第五道︰鵪鶉鬆.琵琶烤豬（5/5分）曾經有廚師同我講過，鵪鶉鬆都係比輕經典嘅菜色，將鵪鶉買返嚟剁碎去煮，配上唔同爽脆蔬菜同雜菇，面頭烤到好脆嘅豬再加少許黑魚子，再加埋下低嘅脆片，成個菜口感豐富，味道鹹鮮。第六道︰金不換雜菇龍躉扣（5/5分）蒸籠底下個座有個發然包即時蒸煮加熱，令金不換嘅味道可以逼出嚟，加埋呢啲炒過嘅雜菇嘅香味，聞落已非常吸引。龍躉扣亦即係龍躉胃，非常彈牙有咬口，但一啲都唔韌，味道亦炆煮得好好，係一道濃味嘅菜。第七道︰大啡菇松露（4/5分）食到嚟呢度已有啲飽，相比之下大啡菇松露好平常，其實都好食嘅，熱辣辣加上雜菌嘅香味，所以即使平常，都係會食晒。食到嚟呢道菜，發現餐廳好鍾意煮菇，我老公都話覺得似菇宴。第八道︰鮑魚冷烏冬（5/5分）其實我唔鍾意漬蓮藕，喺呢道菜入面都覺得有少少多餘。飽魚三片咁堆疊，面頭嘅鹹菜有少少搶去成碟嘅味，令到味道較淡嘅鰹魚湯汁失色，對比下會覺得烏冬味道較淡。不過如果自己食嘅時候做好分配，其實都仲係會覺得幾好味嘅，同埋鮑魚都煮得啱啱好，而稻庭烏冬一向係質素保證。第九道︰燕窩哈密瓜奶凍（3/5分）張紙都係糖紙可以食，但味道就當然冇特別。食到呢度其實覺得超飽，仲要食奶凍真係太多了，寧願佢畀兩片哈密瓜我感覺仲清爽。同埋因為奶凍中有哈密瓜茸，口感唔順滑，失去咗奶凍嘅一大特色。所以呢道就較低分啦。整體嚟講，每道菜都好食嘅，但我覺得餐廳可以再諗下菜品之間嘅味道配搭，因為頭盤之後、烏冬之前咁多道菜都係濃味，食食下會有啲味覺疲勞，最後個奶凍亦感覺好厚，唔係一個完美嘅句號吖。不過喺日式廚師發辦大行其道，而好多其實都冇乜特別下，我強烈推薦大家試下獅房菜呢個中式廚師發辦，欣賞下用心製作嘅美食。餐廳環境都幾好，空間感十足，枱唔算多，要食最好都係Book位啦。吧枱，有時煮嘢會有少少油煙味。靠窗位置都唔錯。成個餐食咗2個鐘後餐廳開始少人，我先好意思拎手機影環境。望門口嘅位。餐牌供大家參考。…Read More

同娘親慶祝生日，揀咗呢間清新酒吧風嘅餐廳，帶住小朋友要早啲食飯，一行人6:15左右就嚟到，餐廳人唔多，仲可以打卡打餐飽。（今次先上食物，後上環境吧。）黑松露蘑菇湯（$78；5/5分）。小朋友鍾意飲湯，個湯一嚟已經儀式感滿滿，黑松露同蘑菇啲料睇得一清二楚，湯用個壼倒出嚟，入口熱辣辣，味道濃郁，稀稠度適中。　　蝦多士（$98；5/5分）。一碟六件，餡料飽滿彈牙，面包烘得酥脆，非常好食，小朋友都覺得好食，人仔細細話咁快就掃咗一件。　　墨西哥雞肉烤餅（$108；4/5分）。餡料有雞肉、橄欖、辣椒，係經典嘅口味，各項配料互相配搭，亦都唔會太辣。　　龍蝦生蠔海鮮拼盤（$428；5/5分）。全部都好新鮮，生蠔滑嫰鮮甜，蝦肉彈牙，龍蝦肉質又甜又爽，全部無可挑剔，雖然份量唔算多，但質素真係好好。　帶子蒜香墨魚汁意大利粉（$208；5/5）。帶子正反面有焦香，入面依然鮮嫰，調味適中。蒜香唔會喧賓奪主，介乎闊條麵同扁意粉之間嘅麵條煮得啱啱好，有手工意粉嗰種咬口。　軟殼蟹蟹肉蟹膏意大利飯（$228；5/5分）。一眼都睇到軟殼蟹好足料，粉唔會太厚，幾個大人分都唔會唔夠，蟹肉蟹膏嘅味點都唔會出錯，個飯偏硬少少，但我都覺得好食，睇大家喜好。　因為4個大人一個兩三歲bb女，以上咁樣都已經7分飽，但當然請娘親食生日飯，都想佢滿載而歸。本身仲叫咗碟卡邦尼意粉，但唔知係咪因為餐廳人開始多，搞好耐都未上，小朋友開始眼瞓，就唯有Cancel，但餐廳啲人都好nice冇炸型，仲講晒唔好意思，一路亦好殷勤換碟加水，服務都值5分吖！　點咗杯Mocktail畀佢，叫Lips of an Angel（$108；5/5分），混合咗桃蓉、柑橘、蘋果汁嘅有氣特飲，仲有玫瑰花香，打卡亦都一流，娘親笑逐顏開。　我自己飲另一杯叫Yuzu Sunshine ($98；5/5分）嘅Mocktail。我成日好驚呢類飲品太甜，但呢度調得啱啱好，混合咗柚子蜜、檸檬汁、蔓越莓汁，酸酸甜甜嘅味，再經梳打水一混合，感覺清新，顏色都真係有「日落感」。　另一位長輩叫咗Peach Ice Tea（$88；5/5分），都係桃蓉、蘋果汁、柚子汁再加黑茶，菠蘿咁嘅造型好可愛，長輩都話好飲。　朱古力心太軟配雲尼拿雪糕（$88；5/5分）。其實相比成餐，呢個甜品係最平凡嘅，正常我會畀4分，但因為我本身訂枱都冇講明慶生，臨時想加個甜品插蠟燭寫Happy Birthday，餐廳都冇托手踭，仲擺碟擺得咁有心機，好值得畀夠滿分啦。　睇完嘢食，都係時候上環境啦。雖然係下晝先BOOK位，但餐廳都比咗呢張咁靚嘅枱我哋（成間餐廳有2張）。不過要講明，其實到7點幾餐廳已經滿座，大家都係要記得BOOK位吖。（佢哋竟然都有BB櫈，但係係畀1-2歲嘅小朋友用，我哋屋企2歲幾都坐得落嘅。）　由於入座較早，見冇人帶BB坐一坐打卡，氛圍感滿滿吖。酒吧位又係唔同嘅氣氛，會暗少少，整體餐廳空間感都好足夠。整體嚟講，一家大細都對呢間餐廳好滿意，食物、服務、環境都一流。入座時間限2個鐘，比一般餐廳都要長，強烈推薦大家嚟呢度吖，我都一定會多啲幫襯！餐牌畀大家參考，如果多幾款嘢食會更好吖，不過呢個餐牌都滿足到我嘅。…Read More

工作日，我放假，佢返工，於是約咗佢喺蘭桂坊呢間餐廳食嘢，好在天氣未算太熱，行完個大斜路上去都仲頂得順。門面環境，一直想等冇人時影，結果影時有個侍應行出嚟，想避又想影咁最終張相朦咗XD入到去環境都好有FEEL覺得好似去返以前咁，餐廳啲食客都着得真正嘅西裝畢挺，我呢啲着住放假裝去嘅人，有啲格格不入。侍應會推車仔，刮一小塊芝士俾大家做餐前小食。整體餐前小食係咁，全部都唔錯，好鍾意佢隻花花碟。Lunch係家庭份量，所以2個人都係叫一份，同老公食就冇乜所謂啦，同其他朋友嘅話，疫情下應該唔叫lunch set了。侍應推介我哋食Spicy Rigatoni Vodka（香辣伏特加醬長通粉），果然冇介紹錯。我老公平時唔鍾意食通粉類，呢個佢都覺得好食。個通分煙韌有咬口，醬汁掛滿，辣度適中。主食揀咗Pork Chop and Peppers（豬扒青紅椒）個豬扒雖然好大件，但煮得一啲都唔柴，肉質嫩，有肉針，配埋青紅椒食一流。感覺係慢煮方式，肉仲有少少紅，我老公有啲介意，但我覺得OK。兩個人食真係超飽。甜品係呢個朱古力蛋糕同雪糕。咁講可能會拉低佢格調，但我覺得味道真係好似金莎朱古力，即刻覺得金莎不枉掛住意大利嘅標籤XD其實幾好食嘅，不過因為之前已經好飽，個甜品又真係甜，好快覺得好漏，無福消受落去嘞。間餐廳都唔平，但偶爾拍拖想食好啲，都係好去處。推薦大家特別日子同另一半或好朋友去吖。…Read More

6點未到決定hea低食飯，老公話之前已經想同我嚟呢間，今次終於有機會。嚟到見到木系文青feel，係幾有好感嘅，裝潢感覺唔錯，舒適和諧。5:45點入座，侍應告知用餐時間90分鐘，當時餐廳空空如也，但我哋都被安排坐細枱。其實人多我唔介意坐細枱嘅，但即然我哋7:15就會走，幫襯晚市之餘又冇食正佢晚市黃金時段，其實可以考慮安排我哋坐個好少少嘅位吖…當時嘅空曠情況，所以呢度服務分扣咗少少。　不過食物先係重點，整體而言都算係輕微高於平均，但同好食都冇乜關係。蒜蓉包烘過暖熱酥脆，蒜味香但唔會太勁。蘑菇湯都唔錯，拉高咗我對餐飯嘅期望值。　牛油香煎帶子鮮蠔汁意大利飯。睇張相都覺得齋，蠔汁味好出，出到有少少腥，揀多次應該唔會再嗌。　卡邦尼黑松露片意大利粉。黑松露片味道唔突出，有冇佢分別唔大。個汁都掛意粉嘅，煙肉都幾鹹香，不足之處係意粉偏硬，感覺可以煮多半分鐘至一分鐘，咁會更加好食。不過呢碟點都好過個牛油香煎帶子鮮蠔汁意大利飯。　檸檬茶上咗先，茶有少少濁，唔係我最鍾意嘅檸檬茶。抹茶芝士蛋糕。其實佢成個set dinner餐牌都係以creamy/肉類嘢為主，甜品再整個芝士蛋糕，其實都幾漏，我諗餐廳要再諗下自己甜品嘅配搭嘞。不過件蛋糕獨立而言，其實係幾好食嘅，入口順滑，唔會太甜，但因為之前已食咗個creamy嘅意粉，個蛋糕我真係食唔晒。我老公反而食晒，可能係碟意大利飯份量細咗啲掛。　我哋用餐時餐廳唔算太多人，但侍應都唔係好關注顧客需求，經常一堆喺餐廳較入位置，呢方面可以做好少少，但問題不大嘅。…Read More

作為旺角街坊，青花並唔係第一次去，今次本身想去食兼寫返篇食評介紹下，點知遇上咁失準嘅情況。青花平時畀我感覺都係中上嘅泰菜，唔知係人太多，定係疫情過後廚房人手有流失，今次啲嘢都唔太好食，而且賣相都比較樣衰……豬頸肉嚟到已經好亂，不過味道係唔錯嘅，油脂比例啱啱好，所以都值4分。　藍蝶花蟹肉菠蘿炒飯。嚟到已經係咁樣衰，明明啲嘢都擺啱位，但明顯就係冇心機擺咁。大家見碟豬頸肉都知，我唔係太介意賣相，味道絕對可以搭救，但啲飯係濕濕地嘅，犯咗我死忌，菠蘿都係求其燒，但頂燒焦咗，下低就唔太燒到。　手抓餅，基本上喺邊度點都會好食嘅一碟。　奶油咖哩雞。感覺好似連續煮咗幾個鐘，入面啲嘢都已經面目全非，口感都係非常之爛，似係食緊殘羮……剩低大半碟冇食到，差到已經唔識考慮味道。　白咖啡，正常味道。桂圓龍眼茶。應該係長輩最滿意嘅。鹹檸梳打，正常。餐廳環境都仲係靚嘅，但食物真係要做下QC……本身想嚟寫個好評，但同長輩食咗咁樣嘅一餐，真係只能以劣評回報。不過由於以前食過係唔錯嘅，我承諾之後會再去多次，如果好食，都一定會寫返好評。…Read More

旺角好似精緻嘅嘢食唔多，夜晚同自己阿媽食私房菜，中午同奶奶都要食好啲，最終去咗帝京酒店呢間日式嘢度食。原本想點蟹套餐，但結果奶奶冇興趣，咁就跟佢一齊點丼飯。先上前菜小女子，正常好食。奶奶鍾意三文魚，唔鍾意太多款刺身，所以叫咗北海道海鮮丼佢食，得三文魚、帶子、蝦同三文魚子，佢話好食。我同老公都叫咗一樣嘅特上刺身丼，都係經典配搭，質素當然比一般街邊嘅日式刺身丼飯好食啲，但又冇話食落口有驚喜，一切正正常常，甚至覺得有少少平凡。不過個飯底有啲唔同，係黏少少嘅飯，有少少糯米嘅口感。好多日式餐廳都會問要雪糕/咖啡，呢間竟然係和菓子，有啲意外。都好嘅，算係最有特色嘅一碟。枱面嘅小燈，幾靚。餐廳都有一半入座，所以再一次冇周圍影環境嚕。整體嚟講算係咁，以孝子食評而言，長輩會嫌環境暗咗啲，年輕人應該唔覺。如果喺旺角要約人去啲環境唔迫、高級少少嘅餐廳可以嚟呢度，但如果係為咗食物，呢度未必係首選嘞。不過啲員工態度都幾好嘅，雖然要我哋填問卷呢下有啲怪，不過因為態度好，所以都OK嘅。…Read More

疫情終於回穩，孝子食評又可以回歸啦，返嚟寫嘅第一篇，當然要寫最近嘅母親節。母親節book枱相對困難，終於揀咗呢間叫G Place嘅私房菜，雖然呢間餐廳對上一篇食評已經成一年前，但見佢一個劣評都冇，感覺都可以一試。更重要嘅，係個環境適合娘親打卡。先上環境。（冇錯，食咗環境先）打卡位。點解淨係畀娘親出鏡呢？因為我只想捧佢做網紅。咁點解呢張又冇呢，因為表情失咗手XD　間餐廳唔大，得3張枱，如果6人以上早啲Book，應該就可以坐呢個角落。當晚因為有另一枱客，所以費事周圍影，而呢個位我都已經好滿意。需要一提嘅係，間餐廳係極為偏僻嘅，但餐廳負責人喺你訂枱時會發個短片教你點行過去，所以其實都唔難搵嘅，地鐵站行過去， 10分鐘應該到。個負責人亦會同大家確認當晚食咩。上菜單。作為食量正常嘅女仔，感覺6道菜會唔夠食，因為每一碟都好精緻，但如果你飯後仲要切蛋糕，其實都ok。　終於到上菜嘞。第一道︰廚師精選小食係牛蒡醬油漬配24個月風乾火腿，呢度係3個人份量。兩樣都係鹹嘅嘢，感覺如果另一樣換返清爽啲嘅嘢，好似會合理啲。第二道︰頭盤1係澳洲紅菜頭他他配希臘乳酪，撈埋一齊幾好食，但我對紅菜頭一般麻麻，所以唔會高分，但切得都好工整嘅。　第三道︰頭盤2係龍蝦汁蒸蛋配北海道帶子，味道係好嘅，但蛋蒸得老咗少少，入面係蜂窩結構，唔係好光滑嘅蛋，自然有少少影響口感，但整體都係好食。　第四道︰南瓜湯，好creamy好好飲第四道另一個選擇︰深海魚清湯，屋企人飲話好清甜　第五道︰火炙西班牙紅蝦配薯蓉，味道唔錯，蝦嘅糕同汁可以倒落薯蓉度食，急凍蝦嘅肉質都算煮得唔錯，但點解會得3分呢？因為佢冇挑蝦腸，我覺得精緻嘅西餐唔挑蝦腸係唔合格嘅。　第六道︰松葉蟹膏蟹肉米型意粉，睇落似意大利飯，其實係意粉，煙煙韌韌有口感，味道都好好。　第七道︰法式雞肉卷配西蘭花蜆肉汁，我點咗呢款主菜，雞肉口感好好，入面仲釀咗少少豬肉，口感更豐富，味道鹹咗啲啲。第七道選擇2︰燉鮟康魚配苦白菜芥末汁，父母點咗呢款，話魚好好食，但娘親覺得個汁係真係有啲苦。第七道選擇3︰燴牛面肉配紅酒汁。我哥佢哋點咗呢款，影相角度已盡力……味道幾好嘅，但佢哋都係話鹹咗少少。　第八道甜品係士多啤梨果醬鮮奶布丁，唔記得影（不過都冇乜特別）。　整體嚟講，成餐飯體驗係唔錯嘅，係慶祝特別日子嘅好選擇，相信帶人去食，對方都會好驚奇你竟然搵到呢個地方。上菜係根據大家食飯速度嘅，我哋8點零開始食，食到近10點，娘親係好滿意嘅。唯一冇咁好嘅係餐廳會有少少油煙味，其實我自己係唔覺，但我屋企人有聞到。我諗我自己都會再去。…Read More

疫情嚴重，減少聚會，只能夠兩公婆自己撐枱腳。最後一餐，我哋揀咗星馬菜。餐廳行入去冇乜人，我哋都驚中伏，唔敢一下就叫蟹，於是就試咗以下菜式。首先係我哋點嚟扮餐包嘅斑蘭咖央多士，自製星式西餐。見到咁大塊牛油，就知已經唔錯，咬落口，個面微暖微酥，非常好食，雖然唔想俾麵包填飽個肚，但都絕對唔後悔一人食咗2塊。串燒都係人少少好值得叫嘅前菜。由於我唔食牛，老公亦陪我只係叫豬同雞，點埋隔離個沙嗲醬，最經典口味，串燒唔會太油，肉唔會太韌，無可挑剔。配埋啲青瓜粒食，仲感覺更清爽消滯。叫咗碟餸送飯，就係美極煎鮑魚。聽個名唔吸引，食落去真美極味，但竟然出奇地好食，主要係鮑魚煮得啱啱好，腍得嚟又有咬口。然後就係我哋嘅主食，Otak otak nasi lemak（荷葉烤魚餅椰漿飯）。打開荷葉又影一張先。餐牌上寫佢做「愛他愛他辣死你媽」，恕我真係講唔出口，可唔可以改返個正常啲嘅名？個飯正正常常，椰漿飯確有椰味。我永遠都會為有煎蛋嘅飯加分，簡單嘅一樣配菜，豐富成個飯嘅口感，蛋邊香口少脆，中間蛋汁撈飯潤滑。至於烤魚餅，其實係魚蓉整個餅，口感一般，但呢個純粹個人喜好。整體嚟講，全部菜式都滿意，決定下次要去食蟹！不過個商場而家十室九空，真係睇到市道艱難，新開冇耐又遇疫情，希望佢捱到落去，保持水準。…Read More

疫情又再變得嚴重，外出旅遊遙遙無期，困在香港也要苦中作樂，這天我們就到瑞士餐廳吃個午餐。在尖沙咀遊蕩多年，路過這間餐廳十萬次了，但好像從來都不覺得它是餐廳，這次終於進去一試。進入餐廳已見到不少外國人，餐廳布置裝飾，整個氣氛好像我們真的在外國旅行找了間餐廳吃飯一樣。在Openrice看到這餐廳有落場時間，不過最近又停晚市，可能餐廳就一直營業到6點了吧？我們下午2點才到，吃了一會之後，餐廳一些位置的食客已離開了。餐墊很復古，像舊香港時的西餐。點完餐後首先送上來是餐包，有好幾款供食客挑選，我揀了這款有果仁的，暖暖的麵包有嚼勁，果仁香口，還有他們特色的一大片牛油。不知吃什麼，我們點了似乎最特色的芝士火鍋配雞粒跟法包。一人份，先試一試。這芝士火鍋酒味頗濃，不能喝酒的老公沾了一下已開始面紅，所以我們決定讓它加熱一會再吃。正常法包，但覺得和芝士火鍋沒有特別配合。配菜有西蘭花、椰菜花、薯仔等，沒特別。雞粒有煮過調味的，忘了拍照。整體而言就真的像在外國餐廳吃東西，沒有覺得特別好吃……芝士火鍋吃着很容易膩，味道偏鹹，無味的配菜沾着，只覺得醬和食物並無融合在一起。另一樣點了豬肉腸配薯餅。豬肉腸肉味很濃，我有點受不了，薯餅倒是正正常常。兩個人吃完這兩份東西已覺得很飽，但感覺是很不平衡。再加兩杯飲品，這樣就一餐了。整體而言這次感覺不太滿意，但可能是自己選錯食物吧？可以再給一次機會試試其他。…Read More

和閨蜜約會，一頓飯總是聊不完，早有心理準備要找地方續攤，但沒想過真的又多吃了一頓，原本只是想喝杯東西啊……閨蜜一坐下就豪氣表示還想吃，點了個香腸拼盤，侍應哥哥都提醒我們有點大盤下，她又再多點一碟燒汁魷魚鬚。有福同享， 有難同當，吃就吃。每款腸2-4條，用類十足，薯角我是絕對吃不下了，酸青瓜吃一吃消消食就可以。外表不怎麼樣，但吃起來軟韌度適中，燒汁亦能掛在魷魚鬚上。我喝了Yellow bird (Signature cocktail)，是我喜歡易入口的味道，但亦非常飽肚。再跟朋友喝了杯Sparkling wine，她認為不錯，我還是不太懂得欣賞氣酒呢。酒吧而言，食物抵食，侍應友善，特飲種類亦都應有盡有，也是聊天的好地方，推薦。…Read More

好友遇上感情苦惱，當然要出來聚聚聽聽她訴苦，再給她一些最終也不會聽的衷心建議。每次身邊有人有感情困擾，然後一起去吃好喝好時，都會想起電影《失戀33天》的對白︰「失戀有什麼大不了，美酒美食不能停止供應。」好好享受當下，就是放下煩心事的最好方法。本來預訂了另一間餐廳，一去到環境潮濕，立即轉場，然後隨意在銀座38亂挑一間去試試，結果就來了Deep Sea Oyster & Steak。餐廳坐位不多，星期四晚walk in，我們以外只有另一枱客，環境安靜，適合聊天。看名字以為是西式菜，但打開餐牌卻發現是日式多於西式。進入聊天模式，當然先點個清酒，隨意點了枝小的，免得兩個女生不勝酒力。順口，沒有其他評價了。然後三文魚腩刺身亦上枱，感覺略低於一般水準，不夠鮮。燒帶子上枱，感覺這類小食很有質量保證，味道鹹淡得宜，只是份量略少，吃完亦不滿足。蘆筍炒鮑魚，有少許花瓣裝飾。吃下去蘆筍爽脆，鮑魚有咬口但不韌，有不同的口感，也是很好的佐酒小食。再少一點油份會更好食。黑松露炒意粉，原本看名字覺得很齋，吃下去倒覺得口感味道都豐富。整體來說食物不俗，服務一般，適合聊天，與朋友聚會可以一去。…Read More

同娘親食飯要食環境，同老竇食飯當然係惹味先行，廣華街呢間由泰國人經營嘅泰菜就最啱口味。已經唔係第一次同老豆嚟食，不過今次先醒起要寫食評（仲要食到一半先醒起），但都有啲參考價值嘅，所以照寫一寫。餐廳環境都算係咁，係枱同枱之間有少少迫，但嚟呢度食飯一啲都唔失禮。我同老公其實係呢間餐廳常客，有時中午嚟食個50蚊左右嘅雙拼湯河，同老竇食當然要認真點菜。上次同佢嚟食過泰式鳳爪、泰式烏頭等，都非常唔錯，今次就試下其他嘢。前菜係最常見嘅豬頸肉，烤得啱啱好，邊邊微微地焦更加香口，配上佢哋嘅醬料，又再惹味啲。（不過我食到一半先醒起要影）泰皇咖喱軟殼蟹。食親呢個都好驚炸得太過火，又驚炸粉好厚，但感覺呢間餐廳煮得用心，所以試一試，果然冇令我失望。炸粉唔會太厚，但又包得住隻軟殼蟹鎖住佢嘅精華，我第一下夾咗蟹箝食，啖啖肉，轉眼就俾我哋掃咗大半。本身擔心泰皇咖喱會好辣，但結果一啲都唔會，反而充滿椰香，啱晒我呢啲唔食辣又鍾意食泰菜嘅人食（人就係不停想滿足矛盾願望嘅生物）。（又係食到一半先記得影，其實啱啱上菜係好好睇嘅，都好足料）我哋仲叫咗個酥餅去點咖喱食。冬陰功海鮮椰青焗飯。食落少少甜辣，飯本身正正常常幾開胃，食落啲仲有啲椰青肉，焗過後好嫰滑，今人驚艷，即刻加咗唔少分。以二人分量，叫咗前面兩樣嘢食再加呢個飯就有啲太多，個飯起碼夠2個人食，蝦都好大隻，肉質亦彈牙。另外再一人叫咗一杯嘢飲，又係完美、飽腹又唔貴嘅一餐，誠意推介大家同家中男性嚟食。不得不提嘅係，餐廳嘅侍應都好友善，又好有耐性，但其實啲泰國侍應雖然識講廣東話，但唔識睇中文，所以如果大家畫菜單時要加啲少冰、走甜、走蔥等要求，唔使寫啦，直接同佢哋講就得。…Read More

聖誕節晚飯繼續同長輩過，本身諗住喺屋企蒸海鮮，但費事煩就決定出去食。上網搵咗下邊度好啲，見唔少人推介呢間，好評又多，於是都去試下。唔……一分錢一分貨吧。其實就幾平嘅，不過啲嘢都真係好一般。我哋揀咗蠔仔粥底蒸海鮮，加咗好似係每位四五十蚊嘅海鮮拼盤。入面有8款海鮮︰蟶子、鮑魚、蠔、蝦、蜆、魚、扇貝，寫寫下先發現餐廳原來冇畀到第8款我哋……侍應幫我哋較咗蒸7分鐘，但感覺火力唔係好夠，我哋自己蒸多一兩分鐘，先算係啱啱好。成堆海鮮拼盤入面，我覺得扇貝同粉絲最好食，係咪已經好說明到問題？任點任蒸嘅嘢入面，辣酒花螺唔好食，口感太腍……蜆亦有沙，魚頭長輩話唔錯。另外仲有白鱔，不過長輩唔食所以我哋都冇食。由於唔係好多嘢想蒸，個粥底自然都冇乜鮮味，係咁依食咗碗粥，就開始打邊爐。全部都係常規嘢，幾乎冇嘢想encore。值得讚嘅係海中蝦好新鮮，飲品選擇多，但雪糕唔好食。淨係影得一張相，都知我哋真係覺得成餐飯好一般。不過，真正令我哋決定唔返轉頭嘅，係啲餐具太污糟，匙羮、豉油碟、碟都有明顯污漬，攞出去換，一接到手嘅依然有漬……真係好唔開胃……其實大家食得唔盡興，但畢竟餐飯都平，所以又未致於覺得劣質，但有要求嘅、帶長輩嘅，可以考慮下去第二度。…Read More

聖誕節決定唔屈喺屋企，兩公婆下晝出去行下街，但行咗冇幾耐已決定坐低飲杯咖啡算啦……去過雅蘭中心食嘢好幾次，成日都路過呢間甲賀咖啡，見佢間舖以木色系為主，好似幾舒適，於是今次就去咗呢間度飲杯嘢。一向都鍾意奶啡，所以點返最當飲嘅Flat white，老公飲茉莉龍珠茶，兩個都係常規啦，拉花都係常規地靚。見到佢甜品有冬甩，本身真係諗住齋飲嘅我忍唔住點咗個朱古力味。攞到手時見到比常規細已經驚伏伏地，枝叉拮唔到落去時，正式知道瀨嘢，凍咗太耐、口感太實，浪費咗我食嘢quota……張枱仔有延伸板可以拉出嚟，不過都係唔好手多，一拉見到唔少牛角包碎……總括而言，飲杯嘢吹下水可以嘅，食冬甩真係不了，不過都未必有下次。門口有個圈係打咭位，見到個雪人覺得幾溫馨，但見到老公影出嚟張相，只可以話再好嘅打卡位都可以毀喺直男手上。…Read More

聖誕節覺得唔好隨便食，上Openrice碌咗下睇有咩特別嘢，最終去咗Wingman到食雞翼。其實本身係見到佢有火雞雞翼，頓覺好有節日氣氛，但去到現場先知要早兩日預訂，睇嚟要下年請早。去到真係好多款雞翼口味，不過人老咗唔太好放題，最終我哋2個揀咗個3款口味18隻雞翼嘅套餐嚟食。由於第一次嚟，隨意揀咗（11點鐘方向起）乾嘅咖啡香味，濕嘅新加坡辣蟹、日本蜂蜜芥辣。店家有提供一人一隻手套，方便落手食。逐項評，咖啡香味，不出所料唔係好夾，純粹老公想試，少少苦味。乾身嘅雞翼，咬開後都有肉汁同適當油份，雞肉嫰得嚟唔會有令人唔安心嘅血色，一切都好，只怪自己揀錯味。新加坡辣蟹，果然還原到新加坡嗰種甜多於辣嘅所謂辣味，雖然面到好多辣椒，但撇開後亦唔辣，唔食辣嘅人都唔使擔心。日本蜂蜜芥辣，最大路嘅選擇，但唔知點解一開始就自以為係蜂蜜芥抹，上到嚟真係見到粒芥辣有啲意外，最終都撇開咗冇加。我同老公都覺得呢隻最好食。呢個三款口味拼盤仲送一個配菜，我哋揀咗黑松露薯條，係好粗嘅薯條，係我鍾意嗰種，但因為食落好實在，好快就見飽，最終兩個人食完呢啲就飽嚕。店內環境方面，我哋被安排2人枱，張枱有少少細。而且Menu送上嚟好油，上面仲有漬……明顯冇清潔過，完全感受到上手食客嘅痕跡，比較扣分。「一齊叫雞」相信係唔少人嘅打卡位，聖誕節下仲裝飾咗一番，都幾搞笑。Wingman嘜頭整體嚟講係好食嘅，但都未必會再去，畢竟一次食咁多雞翼唔係咁健康，而餐廳其他嘢食嘅選擇好少，所以食過一次體驗過就算了。164…Read More