foodiemike的个人专页

上環區真係有好多靚cafe，比我搵到呢間又有得買下野，打下卡嘅靚cafe。鋪頭內有部份地方係一個少少賣雜貨嘅地方，有酒，零食，餐具等等，都幾特別，某啲產品出面都好少見，行下都幾有趣。今次去嘅主打係食呢個海膽，$168，呢個presentation，真係抵到爛！仲要都幾大一隻，直徑有差唔多10cm，海膽新鮮，鮮甜無腥味，好食！Cocktail一般般，sorry唔記得左係啦…另外叫咗個Sourdough加雜肉腸，雖然外貌一般般，但又幾好食。整體：我今次係食下午茶，所以冇叫到好多嘢食，但我睇到餐牌好多嘢食都吸引，而且價錢非常合理，要大讚海膽非常新鮮，鮮甜冇腥味，下次會再去試其他嘢！…查看更多

出名難book嘅任食Lunch鐵板燒，我食weekday，所以提前兩星期左右都book到位，當日唔full，隔離成排冇人坐。要留意而家book位要比deposit。是日食中午的任食鐵板燒，餐牌如下，要留意魚生及鴨肝不是任食的，每人只係有一客，飲品是任飲的，包括日本清酒。第一道就係三文魚刺身，得三片；老老實實，三文魚刺身真係啲好平嘅嘢，中午都成6舊水，已經唔係切得厚，仲要每人一客，感覺真係好孤寒。煎三文魚，無乜特別，個人覺得全熟嘅三文魚唔好食，呢隻就係，好食嘅煎三文魚，應該係煎到中間係粉紅色，嫩滑嘅，佢係屬於全熟乾身個隻。要留意呢個係鴨肝，唔係鵝肝，都係每人一客，其實食落都好油膩，其實俾你食多舊都食唔到。煎羊架加雞，羊架都煎得比較熟，唔腍，仲要佢冇比刀叉你，預你用對木筷子，好“難去”食：好難咬，一般般。牛肉質素大大下降，韌，有渣，好明顯來貨冇之前咁靚，呢個真心失望，我記得以前呢個我哋食幾碟，今次食完呢碟就冇加到…帶子煎得太熟，加嘅時候一次過比咁多，根本就搞到成件事唔好食。有個飯，好油，唔好食。之後有麵豉湯同埋抹茶雪糕，standard野，無乜好講。總結：食物質素大幅下降，侍應服務態度係好好嘅，廚師嘅服務都好好，值得讚嘅地方係佢清酒任飲，但野食真係唔掂，埋單每人都成六百幾蚊，整體就係失望，呢個價錢有更好嘅選擇，應該唔會再去。…查看更多

是次係食Restaurant week嘅Menu，未入正題之前，容我講句，其實呢類比較高級嘅餐廳食Restaurant Week真係唔太抵，加埋一成9xx，但feel到食物係將貨就價，而且Menu嘅其中一道starter同Restaurant week訂枱時所說明嘅唔同，所以大家訂Restaurant Week真係要睇清楚，未必一定抵左。門面我訂左Lunch Set ，826加一是咁的，個日我同朋友係第一對客人入餐廳，一開始經理問你要Still Water定 Sparkling，咁我又費時比錢買水啦，慳啲錢嘛，就叫佢比兩杯暖水，但竟然比水嘅時候，一位侍應在放水喺枱面嘅時候倒瀉咗杯水，咁我朋友條褲就濕咗，好彩都係濕左一邊，但老實講，以呢個價位嘅餐廳，真係唔應該返呢個錯，咁經理就過嚟，請咗我哋飲杯酒，就係咁。第一道先黎呢個類似蟹肉脆片嘅東西，ok，冇乜特別。然後嚟咗一碗雞湯，幾好飲，但又係無乜特別。三款嘅刺身，一開始又玩啲乾冰，係幾靚嘅，打卡一流！刺身都新鮮，幾好食！第一個頭盤，鹿兒島A4和牛配紫薯批，牛肉鮮嫩，medium rare 做得啱啱好，要讚，但老實講牛肉唔算好濃；紫薯批就ok，但我覺得襯呢個牛肉就偏甜，可能用返普通薯仔會更加好食。第二道頭盤，北奇貝蕃茄意大利飯，(唔記得係咪一定係北奇貝，但一定係貝類)，聲稱用咗日本嘅月光米做的，對唔住都要講句，個味有啲似我哋平時食開嘅Pizza薯片味，飯嘅口感就煮得perfect，就係咁。甜品：黑糖布甸，上面鋪咗莓味類似冰水嘅物體，口感好好，布甸都好滑，好味但賣相一般。最後，一個橙味嘅tart，本人唔鍾意食橙，所以覺得唔好食。整體：食物質素整體唔錯，唔計倒瀉水，服務都好，經理有好仔細咁同我哋介紹每一道菜用咗啲咩材料，用料係特別嘅，連細微嘅嘢佢都有介紹到，要讚，presentation 同餐具都靚，portion 細，正常人唔會飽，幾好食但真係偏貴。…查看更多

由上環總店搬到日出康城新商場嘅新勤記，帶着米之蓮推介嘅光環黎到將軍澳區，今次叫左外賣，滷水鵝片併鵝腎、鵝肝同鵝腸，承惠$468，老實講，一開始見呢個價錢，真係覺得有啲貴，但舖頭堅持用獅頭鵝，聽講來貨價都唔平，所以即管試一試。（發生咗一個小插曲，就係我喺落單嘅時候用app揀錯咗鵝脾，但其實我係想要鵝片，價錢是一樣的，我打返電話去舖頭，職員都好有禮貌咁幫我改返）成盒野有大概一張A4紙咁大盒，講真，比我想像中多！鵝片size切得適中，唔會太韌，仲有好香嘅鵝味，底下仲有另外一層，竟然係鵝脾，真係喜出望外，而鵝脾比起鵝片更加嫩滑，好味！另外，鵝腿滷得好入味，而且份量好多，正！腎同肝都好味，唔會太硬，但確實鵝腸比較出色整體：大推！康城有咁出色嘅滷水店真係幸福！未試過嘅一定要去試吓！真心好味！…查看更多

今日試間新開嘅日式小店，主要食日式魚生丼飯，亦有點熟食的丼飯。餐廳門面好靚，仲有個戶外位比人坐，秋天坐係外面一流！餐廳屬於自助型式，揀好自己攞去cashier比錢，魚生丼有樣睇，可以睇咗個樣先決定買邊樣，值得加分！丼飯包裝得好靚，用嘅即棄餐具亦都係高級嘅。呢個雜錦魚生丼，$80有9款刺生，魚生尚算新鮮，唔錯！呢個粒粒魚生丼，$75總結：性價比高，打卡靚，服務亦都好好，職員好細心，提一提熱茶係需要另外加錢買嘅，魚生尚算新鮮，呢個價錢來講算唔錯，但留意番佢成個當飯份量係比較少嘅，唔好俾啲相呃到，但整體是推的！…查看更多

今次晚餐是經Open Rice Book的，有一個小問題，根據OpenRice，餐廳有2小時的用餐時間，而我亦都收到F&M嘅確認電郵，用餐時間只有1.5小時，其實食3 course成千蚊一餐有乜可能用餐時間係1.5小時，好在餐廳當晚亦沒有限時，我係坐到自然離坐。餐廳位於K11 Musea停車位置旁邊，如坐車去的確好方便，我事前上餐廳的官方網頁見到星期一至五有Set Menu(包括 Beef Wellington)，但去到餐廳，侍應沒有主動將Set Menu餐牌俾我哋睇，要我主動問，呢個有一點扣分，如果唔上網做search，就要食貴價單點。先黎個麵包未見過咁瘦嘅麵包，真心唔掂，好硬頭盤叫咗帶子同埋Beef tartar，跟Beef tartar嘅麵包終於正常返d兩個頭盤都好味，帶子煎得啱啱好，beef tartar落單時，侍應都好細心問我哋食唔食生雞蛋，呢點可以加分。主角Beef Wellington，侍應會喺旁邊當場調教個醬汁，同將Beef Wellington 切件，咁嘅話切出黎嘅肉汁就唔會將酥皮浸得太耐，值得加分。牛肉有牛味，而且Seasoning岩岩好，醬汁亦調校得非常好味，同埋兩個配菜都好食！大推推！本應對甜品都有少少期待，可惜兩個都一般，第一個是南瓜cheesecake，第二個是雪糕，cheesecake 唔知點解係香蕉蛋糕味，雪糕就係普通雪糕，無特別。總結：人均加埋一約1100，set包一杯drink，可惜我book唔到卡位，我覺得我坐嘅位置唔算好舒服，有啲似坐嘅Pub食飯嘅感覺，建議如果大家去食，可以早一點book預留卡位，整體我覺得唔錯，雖然價錢唔算平，但Beef Wellington 絕對好食過 Gordon Ramsay 執左個間。…查看更多

事先聲明，我最後係冇入到呢間餐廳食嘢，話說佢哋呢排推緊個小王子Afternoon tea set，今日（weekday）約咗朋友未夠鐘，見佢個coffee art好靚，諗住入去坐下，飲杯咖啡食件蛋糕，但職員話下晝入座一定要叫小王子Tea set…其實好多餐廳都有最低消費，呢個我都明，依家經濟唔好，好多餐廳都想盡量賺多啲呢個我都理解，但我都可以飲杯咖啡同其他嘢食…做乜一定要逼人叫afternoon tea set ，呢個做生意嘅方法恕我不能認同。…查看更多

12月已經傳聞呢間美國過江龍Cinnabon會黎香港開店，等左個幾月，終於開鋪喇！餐牌如下：門面就擺左新鮮出爐嘅肉桂卷！😍細卷$29，大卷$38：仲有on the go嘅杯裝，店員可以幫你番熱即刻食，有埋叉供應，行住食都唔怕整污糟隻手！另外，仲有外賣盒裝，有大卷四個裝，大差兩個裝：同細卷兩個裝；我就買左大卷兩個外賣，同屋企人分享：目測呢款盒裝係未焗的，盒內有加熱指示，返到屋企加熱先食！另外買左一個細卷同On the go杯裝即食：好多cinnamon，好香，麵包好軟熟，好味！On the go明顯唔係新鮮出爐嘅，雖然都好多肉桂，但麵包就偏硬，唔軟熟，呢個杯就唔推薦。總結：要係香港食到好食嘅Cinnamon roll真係好難，尤其新鮮焗起個種，鐘意肉桂嘅朋友必定要去試下，呢間麵包軟熟，多肉桂，正！但各位都要有心理準備，美國野一向都偏甜，的確要配杯咖啡茶一齊食，咁就perfect! …查看更多

小弟已經係第二次去鮨文吃Omakase，始終廚師發板比較貴，如果對餐廳未有信心嘅話，第一次都會去試佢嘅lunch，而我吃完佢嘅lunch之後十分滿意，所以今次去咗食佢嘅Omakase晚餐。我地點左最貴嘅dinner set，盛惠$1980 plus 10。以下是前菜：三文魚子茶碗蒸，蒸蛋用好鮮味嘅上湯去蒸，好清甜。蟹蓋，蟹肉下邊鋪滿左拆咗肉嘅蟹肉同埋蟹膏，唔錯，但蟹肉唔算特別鮮味。秋刀魚刺身，超新鮮，鮮甜，超好味！而且睇得出師傅刀工一流。估唔到有個咁Heavy嘅前菜，炸帶子加大量Mayonnaise手卷，帶子炸到啱啱熟，仲有少少生嘅狀態，好滑，而且一啲都唔韌，perfectly cooked.燒白子，師傅詳細咁解釋左俾我哋知白子嘅資料，食落其實無乜特別味，不過叫做試過，我就覺得冇乜特別。拖羅海膽多士，賣相已經贏咗，其他唔使講。然後以下係壽司：每一件嘅賣相都好靚，可見師傅手勢一流，而且每一件都新鮮，好味！重點準備要來了！拖羅手卷，超肥美，鮮甜，入口即溶，一個字：正！北海道馬糞海膽軍艦：滿分！海膽鮮甜，而且呢個賣相又係冇得輸！！之後嚟咗一個海鮮湯同手卷，因為位置有限，所以冇upload上黎。最後上埋甜品：水果新鮮，鮮甜多汁！總結：omakase其中一個好玩之處，就係同師傅嘅互動，今次鮨文呢個師傅，真係十分之Nice，好詳細咁樣同我地介紹每一款嘅菜式，同我地有講有笑，成個dining experience非常之好，有好多人想試omakase，因為貴，所以好怕遇到伏店，而小弟亦都教過學費，而呢間鮨文，我食過兩次，兩次嘅experience都好滿意，有機會嘅話，我一定會revisit，推薦！…查看更多

攝時間情況下去咗呢間K11 musea新開嘅 Afternoon Tea，當日我去到嘅時候大概係下晝5:00左右，排隊排咗大概45分鐘，餐牌如下：目測大部份人都係叫嗰個$188，8選3加飲品嘅Tea Set，而我都係叫左呢個Set；我哋揀左Strawberry scones shortcake，Mont Blanc同 apple pie。做得afternoon tea，當然要講下presentation，講真，如果唔係佢有懶靚嘅籃擺着呢碟甜品，其實同我喺自助餐攞咗三款甜品冇乜分別，賣相的確普通；講食味，同佢個樣一樣咁普通，感覺係似連鎖西餅店買嘅西餅，水果茶就正常，冇特別。總結：$188 plus 10食呢個質素，性價比好低，而且仲要排隊排成45分鐘，仲要有限時坐個半鐘，有心食Tea嘅話，真係比貴d認真去搵間酒店食好過，不會revisit。…查看更多

朋友生日飯，當日餐廳打電話黎confirm Booking，我就問嗰位侍應切餅費係幾多錢，佢哋話$250蚊，其實我覺得勉強可以接受，但友人覺得唔值，所以我哋決定叫餐廳嘅甜品再寫Happy birthday名。去到餐廳，我八卦再問下侍應切餅費幾多錢，佢答我$350蚊，我真係O左咀，使唔使呃錢呃到咁盡！？問題係見到佢個餐牌嘅甜品，好多只係pudding 同Pie，冇蛋糕揀，超無奈。然後我話我地有位朋友生日，想喺甜品上面寫Happy birthday同朋友個名，佢地竟然話無！！？然後我又問另一個侍應，佢話只可以寫Happy Birthday，無得寫名！！真係一萬個問號，點解可以識寫Happy birthday但係唔識寫個名！？？都順便講下佢嘅正餐：Scotch Egg; 偏咸, 多士，太硬！主角：Beef Wellington 你哋見到佢甩晒皮都知道水準啦，牛肉唔算特別有肉味，友人comment 話味道偏淡。Fish and chips：幾好食，我哋幾個都好鍾意食薯條，問侍應可唔可以另外加一份薯條做side dish, 回覆話冇😅 ，真係黑人問號！？冇認真影到啲甜品，見到啲咁唔精美嘅甜品你話有咩心機影呢？總結: Beef Wellington係一樣高難度嘅菜式，好難master佢，其餘菜式只屬一般，除甜品寫生日名外，其他服務屬於正常。我未必同revisit。…查看更多

真心有被騙的感覺，話說朋友食過呢間中午omakase話好食又抵食，餐廳地點隔涉，由上環地鐵站行到荷里活道上邊，行到上去都身水身汗，但當支持下小店啦，想食好野當然要付出㗎啦叫左廚師發板omakase先來一個茶碗蒸，足料，好食！之後上咗三個前菜，冇乜特別，好普通的貨色，廚師係整嘅過程不停加青檸汁同檸檬汁，食嘅時候真係食唔到海鮮嘅鮮味，其實新鮮嘅海鮮又使乜加檸檬汁呢…之後上咗七件壽司，全部都冇乜特別，唔算新鮮，而所謂嘅大拖羅…我覺得連中拖羅都未去到，同想提一提影相睇唔出個size，實情係廚師整舊飯整得好細舊，比平時正常壽司size細約1/3，好奇怪…最後有個蕎麥面同雪糕（無影到），埋單935, 以呢個質素，無貝類（生蠔、蚌類、鮑魚），無熱食（一般都會包個天婦羅之類），無飯（好多最後都會整個細海膽杯或蝦膏飯之類），以呢個價錢，有大把好選擇…最諷刺嘅係，當我哋就嚟食完嘅時候，有另外一枱客人入咗嚟，佢叫左個魚生丼，跟住我哋見住個廚師用返同我哋食omakase一模一樣嘅魚生出嚟，切好鋪係飯上邊，但係嗰個set賣$200左右…嗰一刻真心有被騙的感覺…同埋侍應的服務非常一般，連茶都要自己斟，（擺個水壺喺枱旁邊嗰隻）omakase喎…不會revisit，不推薦。…查看更多

Lawrys搬咗新鋪後，第一次去，門口好靚餐牌如下，已中環呢個級別嘅餐廳，三百幾蚊可以食自助頭盤，一個signature嘅主菜，加甜品同咖啡茶，真係超值沙律吧有凍肉、煙三文魚、蝦同青口，再加各款沙律菜，不過可惜攞嘢食嘅位置有點窄（漏咗影，有蟹肉英倫周打蜆湯同麵包）要讚一讚前菜食物水準好高，煙三文魚好食，而且唔會太鹹，沙律菜非常新鮮！一如Lawrys一貫嘅做法，廚師哥哥會推架餐車過嚟係你枱面前切牛扒Signature嘅Prime rib，味道一如以往嘅好味！新鋪樓底好高，圓筒形，好特別好靚，喺餐廳用餐時有種高級嘅感覺，幾舒服！最後仲有甜品同咖啡茶。總結：以中環來講，加埋一唔洗$400食到呢個質素，加埋塊扒，真係幾抵食，recommended. …查看更多

其實明知都有伏味架喇，不過犯賤地去試左，真係唔會再去…中午lunch去，都知多人排隊，在排隊app攞了飛，12:04攞了飛，結果等左接近1小時，約1點才入坐，眼見店中的經理，每隔5分鐘就比排隊啲人鬧，真係難為了他，只怪餐廳座位設計不好，欠缺靈活性。坐低左就開始點餐食物約5至10分鐘就上枱，算快古早味冬瓜茶我叫咗榨菜肉絲拌麵，麵質有點林，唔夠彈牙，不過問題係成碗面過鹹，而且睇得出都係用啲好cheap嘅配料，成個餐小食拌麵連嘢飲埋單要$148，雖然在IFC，知道鋪租貴，但以呢個質素，性價比極低。總結：排隊時間太耐，食物質素中下，價錢又貴，唔會再去。不過有一樣野要讚，就係餐廳員工係keep住比客鬧嘅情況之下，仍然維持良好嘅服務態度，要俾個like啲員工。…查看更多

最近都流行黑糖珍珠鮮奶，其實有時都想清清地飲杯清茶，話哂黑糖珍珠鮮奶都真係幾肥，又固定左糖量，真係唔可以成日飲，朋友推介呢間comebuy tea，話茶味好出，住將軍澳的我，見坑口新開左間，咁即管試下啦！鋪頭都幾大幾開揚，而且裝修都幾靚！可以見到有多款茶葉比你選擇鋪頭仲有茶具同茶葉比你買走，送禮都唔錯！茶葉櫃用百子櫃的設計餐牌如上而我就揀左桂花烏龍加黑糖Q（半糖），而朋友揀左厚奶烏龍加黑糖Q（半糖），當日唔算好多人，大概10人排隊，約5分鐘已經可以落單，而落單姐姐都好有禮貌咁介紹佢地嘅茶品，有善又細心，值得一讚！呢間鋪頭其中一個特色就係用沖咖啡的方式沖茶，將茶葉放落一個茶殼，再放入部機到，茶就直接沖在下面的容器，可見真材實料，真係無呃你，係即沖的真茶，無用粉，無預先整定的，新鮮即沖，我都有懷疑咁即沖十幾秒，會唔會無茶味，不過唔洗擔心，見到圖中好多煙從機器頂部噴出，佢係用高溫高壓的方法用機器逼哂d茶味出黎，是一間有heart又落足本的鋪頭！職員有較多的活動空間，近年的珍珠奶茶店少見，對員工咁好，都值得一讚！等左大概10分鐘，茶到了！茶香又濃，真係值得一試！而半糖的甜度適中，唔錯！佢嘅黑糖Q唔係珍珠，而係似硬啫喱的東東，細細粒咁，有咬口但不是煙韌的那種，如鐘錶煙韌可試芋圓。整體：鐘意飲茶味濃的可以一試，佢沖茶的方式特別，比較少鋪頭做到，價錢平均約30蚊一杯，雖然唔平，不過佢每一杯都用一大殼茶葉去沖，真材實料，值得一試！…查看更多