祖高以的个人专页

天寒地凍，最適合打邊爐。奈何每次都好難約齊人去滾下！今次難得新年前食個團年飯，當然要去間舒適d啦！位於北角的滾得囍，主打宮廷火鍋，環境亦恍似置身于宮廷之中。另外不論鍋爐及餐具及菜式亦配合得很好。坐得當然要叫個象拔蚌刺身啦！新鮮又好食！之後當然唔小得牛牛！本地牛好有牛味！另外黃金響鈴，一班女士真係好愛，不過一舊起兩舊止好啦，好肥呀好飽呀真係，野食好味，服務環境都不錯，美中不足係刺身比較慢先黎，可能太忙吧，不過都值得體諒既。…查看更多

早排食得多肥膩野所以呢排想食得健康D,放工經過呢間野好似賣D健康野食咁於是就行左入去試下間餐廳係主要做外賣飯盒,但係都有堂食,每個飯盒都可以比客人揀飯既種類、菜、沙律菜、肉同埋配菜既飯盒一 (黃薑飯、咖哩雞、西蘭花、椰菜、青瓜、紫菜)首先個黃薑飯有一陣好濃既黃薑味,唔會好似平時食海南雞飯果D咁淡黃薑味,個飯唔會大軟,咬落去好有口感。個咖哩雞好入味,個汁唔會好辣同太油,少少辣咁好開胃。個青瓜, 西蘭花同椰菜好新鮮, 個椰菜配左D低脂既沙律醬,食落好清新而且覺得好健康。飯盒二 (黃薑飯、椰子飯、蕃茄牛腩、秋葵、雞脾茹、茄子、紫菜)個椰子飯好有既椰子味,甜甜地好好食。另外個蕃茄牛腩炆到入哂味,而且個牛腩好軟,個蕃茄汁甜甜地開胃得黎又唔會太肥膩。個秋葵就不過不失。雞脾茹個汁甜甜地幾開胃。羅宋湯:個人認為呢個湯係心機之作,飲落去絕對唔似係用罐頭煲出黎,個蕃茄味好濃。而且佢冇落辣椒油,令到成碗湯都冇咁肥膩,健康D。總結:如果你平時放LUNCH唔想排隊等好耐,但又成日要買外賣既人,仲想食得健康D,呢間餐廳極力推介。呢間餐廳睇得出用心煮同埋想D客人食得健康D,最重要係味道好好。…查看更多

自從上次係太古食完之後一真都念念不忘，見到原來銅鑼灣都有間就即刻入去，想試下上次冇食過既野。讚岐烏冬：叫得讚岐烏冬個精綷梗係係個烏冬度，但係估唔到個湯底一啲都唔輸蝕。湯底勁濃郁，個烏冬索哂湯底既味，配埋魚餅冇得輸。金目鯛魚定食：唔好見到個樣好似平平無其冇乜特別咁，一食落去就知道外表唔可代表一切。金目調魚既味道一啲都唔寡，味道好豐富，一下子就食哂成個定食。抹茶卷蛋：抹茶卷蛋入面既抹茶忌廉做得好幼滑，食得出係用心製作。卷蛋仲配埋抹茶雪糕同紅豆，滿足哂想食甜品既慾望。林屋抹茶芭菲：見佢寫住依個係全店最暢銷既甜品，忍唔住就叫左黎試下。果然冇令我失望，除左有厚厚既一層抹茶雪糕，仲有好多唔同既配料，好似抹茶蕨餅、小丸子咁，真係過足口癮。焙茶牛奶忌廉：試得多抹茶都想試下其他味既茶品，飲落有烘焙過既味道，比起抹茶多左一份新鮮感。而且口感非常幼滑，仲好香焙茶味添。京林屋所有食材都非常優質，而且服務態度好好，下次要再試下其他野食。…查看更多

同開個朋友係灣仔買野，佢話想食日本野，見到附近有依間日本野就上左去試下。牛肉稻庭烏冬(安格斯牛肉)：見到佢個牛肉烏冬標明用安格斯牛肉，即刻就叫左碗黎試。用安斯牛係唔同啲既，食落比平時既牛味重好多。三文魚茶漬飯(跟漬物)：茶味好香濃，而且啲飯食落好有咬感，唔會話好淋，配埋佢既三文魚好夾。軟殼蟹牛油果卷：牛油果加軟殼蟹既配搭好夾，食落有軟綿綿既牛油果，同時又有脆卜卜既軟殼蟹，真係好正。醬汁燒鰻魚：好推薦大家試下既串燒，食落有饅魚獨特既魚香味之餘，配埋佢個燒汁真係一絕。鹽燒豚肉露荀卷：鹽燒豚肉露荀卷就冇咩特別，不過值得一讚既係露荀完全冇渣，可以好盡興咁食哂成串串燒。安格斯牛肉炒野菜：同牛肉烏冬一樣都係採用左安格斯牛肉，野菜食落幾清甜，配埋個牛肉唔錯。COEDO 手工啤(白)：黎日本餐廳梗係試下日本既手工啤，本身諗住試下佢既黑啤點知佢埋哂，所以就試左白啤，飲落都幾重麥味，鐘意飲唔同啤酒既人可以試下。總括黎講食物質素幾好，環境唔錯，服務都唔差。…查看更多

本身約左朋友係山林道食韓燒，點知間野冇開到，就去左附近依間season plus食晚飯。愛爾蘭No.0生蠔生蠔雖然唔係好肥美，但係食落幾有海水味，而且好鮮甜，食落一啲都唔腥，即使唔食生蠔既人都可以一試。日本一口和牛粒就咁食落都幾重牛味，點埋佢個黑椒粒會更好食。最緊要係食落啖啖肉，過足口癮呀！芝士牛油焗日本元貝個元貝上面鋪滿左芝士，食落仲會拉絲架！個元貝好厚肉，食落好juicy。黑松露牛肝菌薄餅個薄餅一黎到已經聞到好香黑松露味，配埋芝士同牛肝菌好夾，加上脆卜卜既餅底真係好好食。意大利肉醬千層麵個賣相好靚，食落就同平時既肉醬千層麵分別唔大。鹹檸啤依枝啤酒飲落有淡淡既鹹檸味道，幾特別。而且包裝好有香港特色，鍾意飲啤酒既人可以一試。整體既用餐經歷唔錯，食物都唔差，有機會會再去食。…查看更多

晏晝係九龍灣food court食，見到佢個餐有幾多野食，個賣相又幾吸引就去試下。每個飯加6蚊會包埋沙律，餐飲同餐湯都幾抵食。芝士焗海鮮飯套餐：個飯係鋪滿芝士既，食落啖啖都有芝士。海鮮有蝦、蜆等等，不過海鮮略嫌少左啲，因為唔係每一啖都有海鮮食。茄醬雞扒奄列飯套餐：雞扒奄列飯就麻麻地好食，個茄醬好似茄汁加水咁好稀。而且塊雞扒一啲都唔嫩滑，好似食柴咁，希望佢可以改善下。食物既份量足夠，不過食物質素有待改善。…查看更多

約左friend係旺角買野，去到夜晚見到依間鋪既menu幾吸引就入左去試下。唔好睇間餐廳係中式裝潢就以為係食中菜，其實係食西式野架！玫瑰拿鐡：玫瑰乾花配埋拉花好靚！杯拿鐡淨係個賣相都已經攞哂分，一飲落去有淡淡既玫瑰花香，同咖啡味融合左一齊好夾。白菌巴拿馬火腿意大利飯：個意大利飯好creamy，食落同平時食開既意大利飯冇乜大分別，反而係個巴拿馬火腿幾突出，少少咸香味令到個飯既層次豐富左。蘑菇汁配烤黑毛豬扒：個黑毛豬食落沒平時食豬個種豬騷味，而且好嫩滑，即使唔沾蘑菇汁都已經好好食，好值得一試。整體既用餐感覺唔錯，野食有水準，有機會會試下其他野食。…查看更多

身為抹茶控既我，係太古行街見到京林屋，即刻就入左去試下。內部環境舒適，充滿日式風情。京式鰻魚飯配桃味焙茶：依度樣樣野食無論係甜品或者定食都會擺得靚靚咁上枱，令人未食都已經流唒口水。京式鰻魚飯面頭鋪左厚厚一層鰻魚，配蛋絲同紫菜絲食落去層次好豐富。桃味焙茶一黎到已經聞到好香桃味，估唔到飲落去桃味更香濃，即使沖到第三杯，茶香仍然好足夠。林屋和式料理：抵食之選！！依款定食有鯖魚、日式麵豉湯、帆立貝、八爪魚沙律等等。俾你一次過試哂唔同既野食。抹茶牛奶忌廉：黎到京林屋又點可以唔試下佢既抹茶產品呢？一試果然冇令我失望，茶味香濃之餘配埋牛奶忌廉又別有一番風味。秘製抹茶蕨餅：抹茶蕨餅一食落去有濃郁既抹茶味，加上甜甜既黑糖漿令佢既味道提升左去另一個層次，抹茶控必試！香港限定芭菲：因為見佢寫住香港限定，所以就叫左黎試下。一如其他食品既高質素，抹茶雪糕有抹茶味之餘仲有牛乳既味道，配埋紅豆、小丸子等配料好夾，令人一試難忘。京林屋既食物選擇好多，而且質素極高，下次要再試下其他野食。…查看更多

呢排想食啲野味既野,咁岩係灣仔行街經過呢間pho778係食越南野,於是就入左去試下。餐飲:咸檸七+咸檸梳打首先呢兩杯咸檸七同咸檸梳打落左半個咸檸檬,好足料!!! 而且個咸檸檬有咸咸酸酸好開胃!!!香茅豬扒飯:首先塊豬扒飯有成塊面咁大, 塊豬扒飯醃得好入味而且有好香既香茅味。個飯加埋D炸蒜頭送飯食一流!!!另外送埋D蘿蔔黎食即刻開胃左好多!!安格斯生牛肉湯河粉D牛肉食得出好新鮮,而且唔會有好多肥肉,脂肪比例岩岩好,咬落去好軟。另外D芽菜加埋D青檸汁成個感覺好FRESH,食果D唔會太過肥膩。個湯有好濃郁既牛肉味,而且個河粉夠哂爽滑彈牙,勁正!!香矛豬頸肉法包個包賣相唔錯,而且幾足料。D生菜、青瓜同蕃茄都好新鮮。另外個豬頸肉有好重既香茅味,好好食!個包烤得夠乾但口感又唔會太過硬。炸蝦餅個炸蝦餅口感外脆內軟,配埋佢個酸甜醬好好食呀!灼菜個灼菜加左D牛肉汁同炸蒜頭,食落果時唔會好寡,而且D菜好爽甜!!食物價錢唔貴,但係食材新鮮而且味道好好,鐘意食越南嘢既你唔好錯過呀!!…查看更多

親戚係外國番黎，諗住旺角搵埋CAFÉ可以坐耐少少又坐得舒服既CAFÉ諗住可以傾計傾耐D,咁岩行開女人街見到呢間CAFÉ所以就上黎試下。忌廉三文魚意粉首先碟意粉個賣相唔錯,仲有幾多三文魚添。個忌廉汁好重cream味但又唔會太油膩。另外D洋蔥同磨菇好新鮮,令碟三文魚意粉好食落有清新既感覺。芝士肉醬意粉呢個肉醬意粉個蕃茄汁好濃郁,而且個味道屬於偏酸,如果鐘意食酸茄味既你呢個芝士肉醬意粉你一定要試。另外個汁有鋪滿好多芝士粉,勁重芝士味,好正!!! 啲肉碎唔會有好多肥豬肉,而且食得出係新鮮既免治豬肉。榛子朱古力首先杯朱古力個拉花好靚,賣相一流。另外個朱古力味好濃郁,而且有陣陣既榛子味係入面,但又唔會搶左啲朱古力味,比例岩岩好。加上唔會太甜,成杯榛子朱古力個味道同比例都十分好,極度推薦。餐廳環境同氣氛都唔錯,而且有好多BOARDGAME比人玩,適合一家大細黎。另外食物質素唔錯,性價比高,值得一試!…查看更多

係觀塘行街行到夜晚肚餓，見到佢個menu幾吸引就入左去食，估唔到食落有驚喜。間餐廳格局都唔錯，俾人既感覺幾休閒。前菜及南瓜湯：前菜係雞肉沙律，佢落左啲麻醬係個沙律度好野味，簡直幫你開哂胃。個南瓜湯好甜，食得出食材好新鮮。慢煮．20oz美國安格斯肉眼．自製意大利羅勒汁．法式焗忌廉薯：首先塊扒好大塊，賣相好吸引，肉質鮮嫩好juicy，個意大利羅勒汁有少少酸甜，配埋佢塊牛扒好夾。我以前未試過依個汁覺得幾特別，鐘意食牛扒既你一定要試下。慢煮．迷迭香烤法國春雞．香脆薯角：隻雞足一隻，而且好大隻，最緊要係燒得好好食。個皮燒得好脆，肉質嫩滑，食。個薯條都好脆，配埋個沙律醬好match。個茄子就正正常常冇乜特別。夏日果茶：個果茶係桃味既，甜甜地好fresh，食完咁多肉飲番杯果茶個感覺真係好正。總括黎講，依間餐廳既食物質素唔錯，值得一試。…查看更多

身為食肉獸既我，一見到non kitchen推出左個任食澳洲穀飼肉眼扒既promotion, 忍唔住即刻要試下。每人都係二百幾蚊，仲包埋自助沙律吧、飲品同甜品，真係抵到估佢唔到。新鮮生蠔：去到有服務員同我講話只要係facebook like & share就有兩隻生蠔送，即刻二話不說就照佢說話做，唔好以為係送既就唔好食，估唔到食落又幾鮮甜仲幾重海水味，連我唔係好食生蠔既friend都食左隻。自助沙律吧：有好多唔同既選擇，望落好吸引，我自己都忍唔住夾左幾碟黎食。食得出佢啲食物有用心製作，唔係求求其其。澳洲穀飼肉眼扒：重頭戲就梗係佢個主菜澳洲穀飼肉眼扒啦！！！個肉眼扒好足料，塊扒仲大過我塊面呀！食落好嫩同好juicy，加上佢落左啲黑椒同鹽吊起左塊扒既鮮味。食完一塊唔夠喉即刻叫多塊黎食，真係過足口癮。戀愛世紀：食左咁多肉想叫杯酸酸甜甜既飲品，服務員就推介左依杯戀愛世紀俾我，係一杯士多啤梨既特飲，飲落好開胃，啱哂食左咁多肉既你。蜂蜜紅棗杞子茶：我個friend就揀左蜂蜜紅棗杞子茶黎飲，飲落清甜又潤喉，加埋紅棗同杞子夠哂健康，係一個唔錯既飲品選擇。奶油窩夫配雲呢拿雪糕：個餐包埋甜品，食落唔錯。個窩夫夠鬆化，仲有奶油夾心，食落好夾，配埋個雪糕一絕。仲有啲生果伴碟，夠哂賞心悦目。任食澳洲穀飼肉眼扒既promotion性價比極高，多野食之餘仲要高質素，好值得去食多幾次。…查看更多

岩岩去完日本旅行番到黎香港但仍然好想食拉麵,於是係灣仔打完波之後就同D朋友去左呢間幸屋試下。金武士:金武士係豬骨湯拉面。我簡左個麵質硬度係硬,個麵質好爽,另外個湯我簡左特濃,好重豬骨味而且佢仲加左少少黑蒜油,好香。我叫左御屋叉燒,係平時食開既拉麵叉燒,D叉燒肥肥地咬落好冧好好食,另外隻糖芯蛋好鮮,冇過熟。玄武王:我朋友本身想試黑蒜油拉麵,但係佢晏晝就賣哂,所以就叫左玄武王試下,玄武王係一個冷麵黎,食法係夾起D麵再浸係個冷麵黎汁食。玄武王有肉碎、雲耳、叉燒、蛋、紫菜等等。我朋友簡左個粗D既拉面,口感同味道同我既都差唔多, 麵質仍然唔錯好夠爽。D肉碎唔會有好多肥豬,好好食。呢碗我朋友簡左豚角煮叉燒,D叉燒大舊少少,咬落去有少少似豬軟骨。個冷麵汁落左麻油,好香而且同個拉麵好爽。個麵凍凍地好岩呢D咁熱既天氣去食。總結:拉麵店裝修同環境唔錯,食物性價比高,拉麵既種類都好多,值得一試。…查看更多

已經好耐冇食過大家樂啦,今日口痕痕想食下,點之真係失望到一個點。滑蛋粟米魚塊飯配大煲翅首先個魚塊勁厚炸粉,之後D魚得勁少又冇魚味,D魚塊得3舊咁大把仲要好細。個玻璃汁勁淡冇味,個滑蛋都算OK正正常常,但係西蘭花得果兩舊比多舊都冇。個大煲翅好少配料,得果幾條蟹柳同肉絲,粉絲都冇條。仲要咸到死,食完飲左幾杯水都仲覺得好口渴。總結:呢個飯晚餐都成5十幾蚊,份量少而且食物質素認真一般,估唔到大家樂質素差左咁多。…查看更多

同朋友慶祝畢業,想搵間格局唔錯既café又可以坐耐少少傾計。咁岩行開旺角於是就上左去試下呢間CAFÉ。Set dinner羅宋湯個羅宋湯蕃茄味幾濃郁,配料有蘿蔔、西芹同椰菜。而且辣椒油唔算好多,唔會太過辣。沙律沙律菜同蕃茄好新鮮,而且加左少少醋,係餐前食好開胃。黑松露龍蝦意大利飯個意大利飯口感岩岩好,唔會太軟而且帶少少煙韌。個汁有好重忌廉味,加埋D香草令到唔會太漏,感覺清新左。個飯有好多龍蝦肉,D龍蝦肉好新鮮,而且口感夠爽同彈牙。炭燒12安士美國安格斯肉眼扒配黑松露菌汁我叫左7成熟,個牛扒肉質同賣相唔錯而且幾新鮮,個黑松露菌汁同個牛扒好夾。青蘋果梳打個青蘋果梳打有清香既蘋果,而且味道唔會太甜。熱焦糖朱古力朱古力味好濃郁,而且有陣陣既焦糖味好香好夾。總結:餐廳地點唔錯,食物質素唔錯,價性比高,值得一試。…查看更多