黃口無飽期的个人专页

20070101呢間小小的快餐店，應該都有十幾年咁耐歷史喇（顯徑村有幾耐佢就有幾耐），記得店裡大約有三份一的面積都係好耐年前租埋旁邊舖位擴充而成。擴充後面積雖然都唔係大，環境無錯係暗左D，但我呢個食左十幾年（由十歲食到廿幾歲）的老街坊同佢咁有感情又點會介意。不過，大約係兩年前左右，其中一個老細帶埋幾個員工一齊係村內自己開過間（都係聽D街坊講），冇幾耐，呢間顯徑快餐店就比人接左手來做。而名字亦由「顯徑快餐店」改為「顯徑快餐」。易手後，店內光猛左好多，而廚房師父都冇變動。所以我一直都冇停過幫趁。由細到大我都只係鍾意食佢地個常餐。點解？因為佢地個沙爹牛肉麵好食囉！佢地個沙爹汁好香，味重，又夠杰，個湯往往都會被D汁染成深啡色。而麵，唔係出前一丁，冇記錯應該係用伊麵（記錯的話，就係大光麵實冇錯）。成個麵食落好豐富，因為每一啖都可以食到重重沙爹味。（有經驗人士都知，街外有好多食店的沙爹牛肉麵其實只係清湯上加幾片牛肉，莫說會見到啡色的沙爹汁，就連丁點沙爹味都冇）而奶茶就一直都係穩穩陣陣的，你唔會有突然一日飲到奶味重到嘔的奶茶，亦唔會有突然一日飲到茶味苦0急的奶茶。不過今日遇著個新手，我杯奶茶好淡=="好老實，我人生裡仍然未食到比此店更令我滿意的沙爹牛肉麵。不過，或者只係我呢個老街坊的情意結罷了。…查看更多

20061227因為懶煮飯，所以去大家樂買外賣。裝修後，環境同氣紛都好左好多。我要了：（1）焗豬扒飯+餐湯一開蓋，即刻聞到一股茄香。次次食親都希望會有多少少汁夠撈到成盒飯，指定動作都係先撥開兩塊豬扒上面D汁用來撈飯，可惜今次都唔係好夠撈。而豬肉肉質都係一貫的淋滋滋，用叉輕力一按就可以張豬扒分開。茄汁好香，少酸較甜。配上唔算少的鳳梨粒真係好好味。唔肚餓都食曬成盒飯，皆因佢酸酸甜甜，開胃首選啦。而大熊則要了：（2）咖哩雞飯+汽水一開蓋，見到成層油。次次食親大家樂的咖哩都係「油光滿面」今次呢層油差不多有成寸厚，好恐怖！薯仔粒粒都索曬油，因為唔想咁快死所以都冇食到。而雞肉都係一貫肉質：一咬就離骨，唔係新鮮貨係咁上下啦。咖哩唔香，味偏辣。另外配菜裡的豆豆有炸過下，外層有少少脆，都幾好味。…查看更多

20061216和大熊跟朋友甘聚會，三人叫了：（1）自選雙配湯（墨西哥粟米湯+青豆意米茸湯）$48墨西哥粟米湯味道就同去超市買到的墨西哥片零食差不多，但味更重，質地較杰身。配上一絲絲的簿脆片一齊放入口，一流！青豆意米茸湯係由青豆、意米、菜及香料制成。質地都係比較杰身，飲落除了青豆味還是青豆味。我地都唔習慣呢種太青菜的味道，所以只好交由愛好青菜的大熊飲清曬。（2）凱撒沙律$42半份材料有羅馬生菜、蒜茸包粒配凱撒沙律汁及拍爾馬芝士。生菜都幾新鮮脆口，不過冇乜沙律汁，芝士帶有少少咸味，配合埋一齊幾好味道。（3）米蘭薄餅（MilanPizza）$108餐牌上說明這是意大利的傳統薄餅，比較一般Pizza來得薄及脆。材料有意大利香腸及甜香腸、抄磨菇、仿天那芝士、莫沙華那芝士及拍爾馬芝士，面層撒左D香草。拎上手，真的薄，不過咬落唔係真係脆的，食落去材料同芝士味道非常相配，有好豐富的口感。諗想都想再食。（4）馬沙那甜酒蕃茄燴磨菇幼麵+配雞肉及蝦$108外表同肉醬意粉差不多，不過少了肉醬，但多了巴馬臣芝士片，食落其實都同肉醬意粉相差無幾，不過當然係好味個種啦。（5）朱古力及草莓奶式忘記價錢，約$25-30一杯埋單：$407總括係無論環境、服務及食物整體質素我都好滿意。侍應哥哥好客有禮，會關心食客食後感而且同其他食客都有講有笑。食物質素又唔差，我地三個人都食得非常開心！…查看更多

20061219由於此店初開張時食過兩次覺得唔錯，加上有位長頭髮的肥哥哥侍應好好禮貌同招呼的緣故，印象好好，所以晚上選擇到此。今次唔見肥哥哥，但係就有一位穿西裝似係經理的男仕企門口招呼，佢都幾有禮貌同笑容的，一家四口連大熊五個人，被領到較角落的位置，叫了：（1）南瓜雞湯阿蘇見到南瓜二字，就指定要點此湯。有南瓜味的雞湯？其實呢個配搭在我來講都幾奇怪下。上桌時湯的顏色好橙好靚，會令人誤會係南瓜湯，但可能因為始終係以雞湯為主，所以個湯好希的，而味道，有南瓜的甜又有雞湯的咸，好怪。（2）雞肉串燒（一碟四串）問侍應可唔可以要唔同款，佢話唔得，只可清一式（可能見我地人多想呃我地叫多碟）於是叫了雞肉，都幾好食而且D沙爹醬真係好夠香濃。（但原來接住落去我叫個印尼抄飯D串燒都係跟雞肉，侍應唔主動提番客人呢度扣分）（3）椰汁抄雜菜份量少到不得了的硬雜菜跟一灘顏色曖昧所謂的椰汁溝埋一齊。滾唔透的雜菜與椰水竟然夠膽標成約$50-60一碟？！當下除了嬲我仲可以點？！（4）巴東牛肉每次來都會叫的超好味的一道菜式。肉抆得好淋，醬汁又香又濃，配薄餅或飯都一流！（5）咖哩燒羊架羊架有數隻，不過除了第一隻好厚肉夠大隻之外，其他羊架都似條骨區多！配菜的薯仔好食，但係個咖哩汁好咸喎。（6）印尼抄飯（跟蝦片煎蛋及雞肉串個款）味道跟分量適中，唔錯，穩陣之選。（7）印尼薄餅三客（一客兩件）本來叫了共四客，不過上左三客之後唔知點解第四客冇來到，追左一次都唔來所以有一客除消。（8）特飲三杯（買二送一）埋單約：$650※Check單時我見到有兩項不知名食物名列出，於是抬頭問女侍應，但係佢望都唔望下張單就應我。依家我懷疑你地收多錢都唔認真幫我睇睇，喂！錢黎嫁！你打工搵錢唔辛苦嫁？！唔嬲就假啦！※一直都覺得D女侍應遊緊雲，叫親佢地都仿似如夢初醒咁。當時佢地唔見得好忙喎，咁唔幫得手，兩個嬲！※食物差唔緊要，試問有邊間食店真係樣樣菜式都迎合到所有客人口味先？呢點我明白，但係依家呢度差起上來真係好差好差喎！尤其是諗起個碟雜菜，不知所謂！三個嬲！※我唔介意比錢食貴野，特別係同家人食時更加唔會計較。服務唔好，算！但係我完全接受唔到呢度如此底質素的食物竟然收取如此高質的價錢！實太搵笨！四個嬲！※我咁大個人都係第一次食完一間餐廳然後埋怨足三日，五個嬲！※而且係第一次離開間餐廳時仲擔心緊比人收多左錢。（又冇比番列出食物同價錢的賬單我）六個嬲！※計埋其餘家人的評價，仲唔係嬲到爆燈呀？！補充1：食的途中，留意到收銀機位置有一對著西裝，好似孖仔的男仕，唔知道佢地係唔係老細呢？離開餐廳時其中一位向我地點頭講多謝，其實我真係好想走過去話比佢知呢間餐廳真係好有問題，要大大力改進廚房師父的質素、食物質素同服務先可以維持落去囉。補充2：如果唔係食左巴東牛肉拎番多少分數，味道（Taste）有2分已經比多你。…查看更多

20060908十次經過呢度十次都排曬超長人龍，加上望到門口頂部有數張好似係法國藍帶的廚藝證書，心想：「好好食咁喎！」成日心思思想試但次次都被人龍嚇怕。今次趁臨近生日就先訂位再去，不過去到都要等約五分鐘先入得。一家四口連大熊，五個人叫了：（1）擔擔麵咦…又話有好濃花生味，冇喎…不過大致上都Ok，但個人認為唔屬於好好味個隻。（2）忘記名稱，湯一個阿蘇去到京川滬菜館都一定會叫的湯，阿蘇話如果有期望去飲的話呢個湯就係失望之作喎。個人就認為似清湯，冇咩特別。（3）忘記名稱，薄餅包牛肉絲牛肉絲D汁好好味道。個人認為用薄餅包住食有點多餘，就咁用來撈飯已經好正啦。（4）芝麻雞賣相幾靚，因為隻雞排得靚，上面又有好多芝麻，底下就用豉油浸住，味道唔錯。（5）松子桂花魚好多人都讚好食的一款菜。但係我覺得唔好食，可能因為個人比較喜歡食新鮮魚的關係。此魚賣相係好靚，魚身唔油好乾身。但係個炸漿好厚好粉。魚已經冇味，D魚肉又梅。醬汁方面係甜酸汁加上一堆松子及三色雜豆以及幾粒蝦仁。點解呢道菜可以標價標到咁唔合理？我真係唔識欣賞。（6）忘記名稱，抄飯一個唔係睇番相片都唔記得有食過。總括食物好普通姐，雖然唔係差但亦唔係好喎。除了廂房及卡位之外，座位非常之擠迫。侍應嘛…見到佢地咁忙都唔期望會有笑容與服務。所以整體來講，經過見到有位咪入去食囉，根本唔需要特登去、同埋排住長龍等食。…查看更多

20061105陪爸媽參加一百蚊有找的一日遊，下午到此食團餐，本來諗住唔方好食（團餐嘛），但味道真係意料之外，唔錯喎。食物有豆腐湯、白卓蝦、雞、醬油骨等等…一共十二款菜式。特別要一提係個豆腐湯。聽侍應講此店豆腐湯（印象中豆腐好似話係自家制）每日係有限定數量，當日賣曬就唔會供應咁話。豆腐湯色水透明帶點奶白色，好香，飲落味道真係一流，要同團友爭住飲。雖然我唔記得所有食物，但係整體都係好食。環境都幾闊落，侍應係阿叔阿嬸好好笑容同服侍。有機會再遊鯉魚門一定會再幫趁。…查看更多

20061121火鍋一出就同大熊去食，剛好收銀姐姐告知九時已過有特價，抵左些少。我倆每人一鍋：（1）基本火鍋配蝦+生蠔+青口及汽水火鍋份量唔講得少，都幾大份。不過D蝦又黑又梅好核突，睇見到都唔想食。蠔就梗係唔新鮮啦。D青口全陪都係BB，細隻過你手指公隻甲，滾完變細粒到差D搵唔番。（2）基本火鍋配芝士腸+四寶丸及汽水冇野好講，大件夾抵食。…查看更多

20061102事緣琴晚食過番尋味，所以買左一包返歸做早餐。雖然隔左一晚夜，但係飽的彈性依然。自行於中間加上厚厚的牛油，真係好正。…查看更多

20061101度度都好多人，經過見到呢度人少少、靜靜地又未試過，於是就同大熊一人一個SetDinner：（1）軟麵包+沙律吧+忌廉湯+紅酒汁燒羊架長形如三隻手指般粗幼的軟麵包，咬落去好軟熟，個包好有彈性，因為咬完會自動彭脹番。唔點湯就咁食都好正。（事後去左旁邊的麵包店買一包返歸食，印象中$10有5個）沙律吧款式選擇不多，放於死角位，令到去取沙律D人有點迫來迫去好似要爭食的感覺，好樣衰。亦因為迫，有位女仕碟沙律的醬汁差D惦到我件衫，好彩冇事。忌廉湯賣相Ok喎，湯的顏色有點透明，上面加左劃到一圈圈的Cream，但味道就冇乜特別。到主菜羊架，幾大件，又厚肉。雖然個紅酒汁係冇紅酒味，但係兩樣夾埋都幾好食。（2）軟麵包+沙律吧+忌廉湯+薯菜肉眼扒頭三項同上見到份肉眼扒上桌時又好嬲又好笑，因為草民從來都未見過扒類係一片片簿片好似火腿咁上，又唔好食。（3）意粉加錢叫的意粉，味道唔洗講啦，咪意粉咁味囉（笑）總括食物整體都唔算差。服務方面，侍應大多係後生仔女，面對客人時有笑容，服務勤又快。只可惜，侍應們一空閒就泊埋一齊傾計，仲要企到同我好近距離，我能夠一清二楚地聽到佢地D八卦談話內容。我相信冇人會鍾意食野比人望住…之餘仲要聽到外人的閒話聲囉，呢度要扣分呀！…查看更多

20060807久不久都鍾意去陳根記食小菜，因為地方夠大，十足的大排檔風味之餘尚算清潔，而食物就又平又好食。同大熊兩個人，正值劇集時段，同大熊選個電視靚位就叫：（1）粉絲中蝦煲中蝦好大隻，啖啖肉！而數量都唔少，好好味！（2）薑蔥抄蟹一座小蟹山，份量比其他食店多（可能係其他食店少），蟹件劈得都幾細，易咬，不過味道略咸。（3）豉汁蒸鱔鱔片好薄，而且油實在太多。連汽水x3 埋單：二百有找食物味道或份量一向都唔會令我失望，即使間唔中都會有一次半次的「太油」，但整體都係令人滿意。而以大排檔的服務來講，呢度算好好啦。…查看更多

20060211 7pm訂了位，一家四口同大熊共五人準時入坐，開餐前有工夫茶送。叫了：（1）鹵水拼盤鹵水拼盤用湯碗上，味道唔及街邊打冷檔好食。（2）忘記名稱，類似炸子雞的脆皮雞皮脆肉多汁，好好食。（3）芋茸香酥鴨兒時情意結，有熱熱的芋茸就係好食。（4）蠔仔粥蠔仔脹卜卜，多料，幾好味。（5）魚翅撈飯印象中要成百元，所以都幾期望。賣相懶靚，魚翅份量多，但係就細梳過我媽咪用來煲湯個D。忘記價錢總括食物味道都唔錯，不過所定的價錢大部份都係比左去環境方面，而服務就普普通通。…查看更多

時間冇記錯應該係：20060524同大熊收工後逛到呢度，因為未試過食韓式食物，於是入去試試。樓底高不過環境細，餐牌選擇唔係好多，兩個人叫了：（1）牛肉石頭飯套餐：個石頭窩熱到滋滋聲咁上桌，賣相好吸引。食落味道都唔錯（比較上和民的石頭飯好食好多）。記得附設的湯較淡，而超小杯的紅棗甜茶則好好味道。（2）人參雞湯套餐：隻雞好梅而且湯亦無味，呢個餐價錢唔係平，所以大熊食到好激氣。埋單：過百總括：冇乜特別，不過唔會再幫趁。…查看更多

20050611 8pm同大熊打萛去大快活食個咖哩飯就去睇戲,途經見到越南灣晚市套餐都有咖哩飯,就入去試下,睇下邊度好食D.﹙1﹚咖哩雞飯+南乳炸雞+ 青檸梳打﹙忘記價錢,約$35-45﹚咖哩汁較多油,亦唔香,雞肉又霉.而放飯個隻碟竟然有好多好明顯係之前洗唔乾淨的茄汁污漬!!!呢D污漬仲係有些微隆起的立體感.污漬可以去到咁高景介,咁絕!問你死未?!飯就唔夠熱,又硬.南乳炸雞只係普通炸雞.食唔到有南乳味.附送的一小杯酸辣醬汁竟然被冷氣風乾至果凍狀,再絕!大驚!!!去換過一杯都係一樣.真係...青檸梳打無特別,但好夠凍.﹙2﹚黑糯米﹙+$5﹚唔差,幾好食.質地唔會過杰.食完成碗都唔覺漏.此快餐店有兩趕客絕招,本人已被徹底擊倒.唔洗講,差過大快活多多聲.…查看更多

20050608 12pm雖然同蘇記一早食過早餐但仲未覺肚餓.之不過經過大阪王將就口痕痕,就叫了一客餃子同蘇記共享.今次餃子反轉放,所以睇得好清楚煎至泛金黃色的底部.今次絕無難分難解,亦無甩皮甩骨.食落去底部脆卜卜,皮依然薄,餡依然靚.…查看更多

20050502 6pm間唔中都有去和民,一向都覺得唔差.終於今次,我體驗到原來和民都有好難食、令人好失望的一面.同大熊到此晚餐,叫了:﹙1﹚和民沙律$38每次到和民必食的前菜,賣相一樣係好吸引.當我灑過醬油再夾入口,礙於儀態問題,並未即時吐番出來!如果我從來都未食過而係第一次食的話,我一定誤會呢個係一個鹹味沙律,呃...唔應該用鹹來形容,應該係超級鹹至夠貼切.本人深深相信超級鹹問題一定唔係出於灑光全部醬油引至的,因為一向食法如此亦無問題.並估計問題係出於調校醬油味道個位人兄所為/醬油已變質第第啦...總而言之,呢個非常特別的鹹味沙律,係我呢生人食過最難食的其中一項食物.好失望,食慾下降至60%﹙2﹚辣辣泡菜炒飯$38來和民每兩次總愛食一次的泡菜飯.賣相少了一向都有的光澤.食落好乾好乾,口感奇差.唉...又一個"大驚喜"極失望,食慾再急降至30%﹙3﹚煙鮭魚卷$28魚卷食落口感外軟內脆,幾特別.卷內係三文魚+菜絲+乳酪.另附的沙律醬好滑好滑,點埋一齊食就係錦上添花.慶幸呢個煙鮭魚卷唔難食.就剛剛好佔據胃內餘下不多的空間.﹙4﹚Cookie & Ice-cream $30好好飲.但如果張杯面上的cream混埋飲品中的話就太過漏兼且會變得好杰.所以,還是張cream拿掉較好.埋單$142總括以我食開的和民一貫質素,唔洗講,今次一定係劣! 劣!同埋劣!服務方面,唔洗再講大家都知已大不如前.好普通的服務.…查看更多