k9527的个人专页

前身在大角咀的 Lost Star Live House 享負盛名，經過這一段時間後竟然在尖沙咀的 k11 開店，當然要來朝聖一下，餐廳逢星期五、六、日還設有現場音樂演出，有關節目詳情可參閱官方 Instagram。WE FOUND LOVE，真愛嘅五味分陳全數表現喺呢杯 cocktail 入面，以 Vodka 為主軸，有荔枝、檸檬、接骨木花與及淡淡嘅橙香，尾韻令人回味。Soup of the day，今日嘅精選湯品係南瓜湯，南瓜味道濃郁，口感相當 creamy，屬真材實料。埃及風沙雞翼，廚師細心將雞翼切成單骨 lollipop，食得非常方便，雞翼炸得脆身之餘唔會有太多多餘嘅油份，連埋風沙辣椒同蒜片等等一齊食，更為出色。法式熱融蜂蜜芝士 + 法式麵包，芝士嘅味道極富層次，應該係以幾隻唔同嘅芝士混合而成，芝士、紅車厘茄以及法包係絕配，用咗小鐵鍋嚟 serve，食到尾段都保持溫熱，讚。炙烤雜錦香腸併盤，見呢個香腸拼盤咁特別竟然有其中一款腸係糯米腸，即刻嗌一個嚟試下，除咗糯米腸之外仲有兩款腸，偏橙色嗰個係德國腸，偏紅色嗰條嘅感覺就有啲似我哋中式嘅臘腸再加少少 chorizo 嘅感覺，配埋襯底嘅酸椰菜，fusion 之餘又帶有半點傳統。Tenute Neirano Bonimur DOC 2016 (Nebbiolo)，就嚟上牛扒之前侍應送上跟餐嘅 House red，嚟自意大利嘅呢款紅酒入口帶有漿果同煙燻味道，果香濃郁，有少少櫻桃、玫瑰同淡淡嘅甘草香氣，酸度細膩，單寧柔和乾爽。Ribeye Set Dinner 烤新西蘭肉眼 8oz ，牛扒口感軟嫩，入口散發應有令人滿意的牛肉味道，肉汁濃稠，配菜當中仲有比較罕有嘅南瓜，牛扒加上紅酒，感覺美妙。…查看更多

猶記得當年蘇媽喺深水埗開第一間舖嘅時候經已一試難忘，知道佢喺旺角開咗分店好耐，今日卒之有機會嚟試下，旺角店環境更加寬敞，加上特色玩味嘅牆身擺設，配合極高嘅樓底，環境舒適之餘又有餐廳特色。桔仔話梅水，不嬲對桔仔同埋話梅呢兩個味道都唔係話十分之鍾意，但係呢一杯嘢飲將兩樣嘢夾埋竟然咁有驚喜，桔仔同埋話梅配搭喺上嚟嗰個清爽味道，令我對呢兩樣嘢重新審視。馬拉沙嗲串，沙爹串燒得相當有風味，我哋豬牛雞各揀咗兩串，牛同雞都令人有記憶點，前者有意想不到嘅牛味，而後者就盛載住嫩滑嘅口感，隨附嘅沙爹醬係比較重花生味而且有粒粒花生碎嘅版本，鍾意食花生嘅朋友大愛。高佬麵配仁當牛肉，仁當牛肉口感軟嫩，味道層次豐富，特別鍾意佢嘅筋位好多，致使口感得到極大嘅滿足；高佬麵有啲似韓式嗰隻辣雞麵，不過口感就更為彈牙，每一條都撈滿甜豉油，本身已經相當好食，食到半路撈埋仁當牛肉個汁，再加上銀魚仔、花生同埋溫泉蛋嘅加持，簡直如虎添翼，直呼點解我咁遲先發現。…查看更多

由大埔開到出老蘭嘅 L’amour，老蘭店同樣走法式精緻 Fine Dining 路線，店裏面嘅水晶三角琴同水晶大吊燈，氣派十足，吧枱以熱情嘅火紅色做主調，格調高雅。餐前麵包上枱嘅時候仲係暖暖地，隨附嘅香草牛油同埋肝醬用嚟搽麵包都非常出色。季節時令法國生蠔，法國生蠔肉身飽滿，海水味濃，同白酒係絕配。焦糖法國鵝肝撻，將鵝肝攞嚟造成撻都係第一次試，撻皮嘅口感係介乎曲奇皮同酥皮之間，焦糖鵝肝同撻皮嘅牛油味估唔到咁夾，創新之餘亦都相當好味。是日餐湯，是日餐湯係法式海鮮湯，入口濃稠而富有海鮮嘅味道，湯入面有大大隻嘅海蝦同埋青口，認真真材實料。自家製手工意大利鮮蝦雲吞，雲吞皮極富麵粉味，好有手做皮嘅感覺，醬汁帶濃郁菇菌嘅味道，整體味道層次豐富。乾式熟成澳洲 Black Opal M9 和牛小排，和牛小排賣相非常精緻，廚師將牛排嘅熟度掌握得剛剛好，橫切面係誘人嘅粉紅色，入口軟嫩而富牛味，隔離係炸得香脆嘅薯仔千層，好耐無食過咁有心機同質素嘅牛排伴菜。Cream brulee，經典甜品拿捏準確，為是晚劃上一個完滿嘅句號。…查看更多

今日同同事喺上環開完會之後搵食，佢介紹咗我嚟呢一間上環嘅上樓川菜館，餐廳嘅格調相當高雅，以咁嘅價錢享受到咁嘅環境，未食都已經贏咗一半。吉祥套餐，揀咗個吉祥套餐，68 蚊碗麵可以揀六個餸，認真超值。山楂蘋果洛神花 / 烏龍茶酸梅青檸，兩支都係好豐富嘅配搭，全部材料都好啱一陣解辣。涼拌土豆絲，土豆絲酸酸辣辣，非常開胃，難得嘅係佢真係喺雪櫃度攞出嚟，係少有嘅涼拌溫度，比起坊間大部分嘅室溫涼拌優勝。秘製香辣湯粟米麵線，材料揀咗潮汕蒜香墨魚丸、美國肥牛、冰豆腐、豆腐串、娃娃菜同芫茜，蒜香墨魚丸爽口彈牙，帶有微微嘅大蒜味道，仲食到細粒嘅墨魚粒喺入面，非常出色；粟米麵線嘅口感有啲似上海粗麵，芫茜山就滿足哂同行嘅茜朋友。黃金酸菜湯土豆粉，材料揀咗潮汕手打牛丸、潮汕蒜香墨魚丸、魚腐、金菇、蘿蔔片、貴州丁家脆哨，土豆粉有少少似米線，不過就再彈牙少少；黃金酸菜湯嘅麻度、辣度同酸道都相當平衡，極富層次，手打牛丸牛味極濃，貴州丁家脆哨風味獨特，有少少似豬油渣，但係就無咗嗰陣酥味同油益味，加上炸得夠脆，餸麵一流。桂花蜜烏梅冰粉，經過一輪辣椒衝擊之後食番一個冰粉，桂花蜜同烏梅嘅味道同個辣味嘅餘韻互相抗衡，真係爽歪。…查看更多

Yau pale ale，香氣同回甘平衡得恰到好處，配方揉合咗美國同紐西蘭嘅啤酒花，經過冷泡法處理，入口散發住獨特嘅熱帶果香，同一陣嘅各樣美食都係絕配。是日餐湯，是日餐湯係甘筍忌廉湯，甘筍味道濃郁，一睇就知道係真材實料，配合 creamy 嘅忌廉口感，不俗。Mano meatball 自家製意式肉丸，肉丸口感鬆軟，帶有脂肪獨有嘅騷香，配合濃濃嘅番茄、洋蔥、大蒜同埋羅勒，以及面頭嘅 parmesan 芝士，味道很讚。Carbonara，入口係滿滿嘅芝士同蛋黃味道，味道濃郁得嚟相當豐富，在味道方面攞咗好高嘅分數，唯獨意粉嘅口感再 al dente 一啲相信會更加好。意式脆皮燒豬腩卷配辣肉腸蘭度豆，豬腩卷外皮香脆，脆皮裏面包裹著嘅豬肉口感軟嫩，油脂及豬味令人滿足，配菜有以橄欖油輕輕調味嘅皇帝菜同車厘茄，夾著豬腩肉同吃，相當配襯，我會選呢一道為今晚之最。Panna cotta，口感紮實，面頭草莓醬嘅酸甜挽回分數不少。…查看更多

餐廳位於銅鑼灣百得新街嘅黃金地段，外面仲有一大棚歐多牙位置，感覺蘇豪。匈牙利牛肉濃湯，蕃茄味道香濃，內裏嘅材料非常豐富，啲菜燉得好腍，非常好味。羽衣甘藍柚子芒果藜麥沙律，沙律嘅材料有羽衣甘藍、藜麥、芒果、柚子、車厘茄同埋大蝦，廚師細心將有咬口嘅羽衣甘藍切到細碎，令到整個沙律食起上嚟口感極佳，廚師實在應記一功。香煎紐倫堡豬肉腸酸椰菜薯蓉，襯底嘅薯蓉非常 creamy，德國腸同酸菜從來都係絕配，點少少英式芥辣一齊食，又係另一種風味。…查看更多

置身呢個城市景仲要呢個價錢任食真係無敵，餐廳環境企理，乾淨舒服，同以前去過旺角嗰啲天台燒烤真係無得比，偶爾有一陣涼風，呢個天氣上嚟玩，係舒服嘅。燒烤食物種類繁多，有廚師腸、芝士腸、牛丸、芝心丸、貢丸、龍蝦丸、豬肉丸、魚蛋、魚片頭、雞翼、豬扒、牛扒、雞扒同豬頸肉等等，我正常一個男人胃每個款式食一啖都已經夠哂飽；佢呢度啲醃肉係自家醃製，特別鍾意佢個咸度拿捏得好好，比起出面嘅自助燒烤無咁鹹，將燒嘢食嘅罪惡感降至最低。燒完嘢食之後我哋就入返酒吧聽逢星期四先至有嘅 live band 演出，演出者們都有啲卡士，結他手係尹光 Dear Myself 嘅作詞人，演唱者係曾經參加過全民造星3嘅candy，唱功一流，聽出耳油。店內 Bartander 係國際調酒師協會會員，并且曾獲得獎盃，佢推介咗我哋呢杯藍莓益力多，益力多同酒精嘅味道相輔相成，輕輕鬆鬆聽住 candy 嘅歌聲，又一個晚上。…查看更多

呢間隱世蠔吧位於天后同砲台山交界，喺銅鑼灣街市向海皮行第一個街口轉左就係，位置旺中帶靜，一入到去就有熱情嘅老闆招呼我哋，佢除咗向我哋介紹餐廳嘅招牌菜之外，仲介紹咗我哋識佢哋獨特嘅生蠔保存方法，就係用呢一個 set 咗0.2至0.5度嘅恆溫生蠔保存櫃，用呢個溫度嚟保存成個食蠔嘅體驗又截然不同。Ackerman chardonnay，帶有清新嘅花果香，唔算好 dry，未配食物淨飲都已經幾好飲。老闆介紹咗兩隻蠔種俾我地，分別係 Irish WSB 同埋法國 Gillardeau，建議我地先食 Irish WSB，嚟自愛爾蘭嘅 WSB 口感柔軟，帶有少少海水同 creamy 嘅奶油味，蠔肉特別肥厚。而法國嘅 Gillardeau 本身已經係生蠔界中嘅勞斯萊斯，蠔肉肥美香甜而且帶有淡淡嘅榛果香，蠔味唔會過分爆發，有層次得嚟又細膩。So crispy roll，春捲釀入飽滿嘅香菇，春捲皮薄之餘仲炸得相當香脆而不帶半點多餘油分，係一個非常出色嘅春捲。Caesar salad，沙律菜新鮮，同其他餐廳啲 caesar 唔同嘅係佢呢度加咗蟹子，除咗吊到個鮮味之外，脆卜卜嘅蟹子仲增強咗唔少口感，將水波蛋一刀切開，睇住蛋漿慢慢流出嚟呢個感覺相當治愈。Grilled Angus US Filet Tenderloin，牛柳切開係惹人垂涎嘅粉紅色，口感極到軟嫩，入口散發住令人滿意嘅牛味，配菜有粟米、紅蘿蔔、紅椒同埋焗蒜頭，蒜頭焗得極度軟腍，鍾意蒜味嘅我大愛。Semifreddo，Semifreddo 係一種類似雪糕，但係唔洗經過雪糕機製作嘅甜點，佢口感蓬鬆，以少量嘅鮮奶油提供滑順感，係類似冷凍慕斯同雪糕嘅混合體，十分獨特，絕對值得一試。…查看更多

餐廳位於燈籠街 V point 嘅 27 樓，有幸安排到窗邊座位俯瞰住銅鑼灣嘅繁華市景，淨係食個景都已經贏咗一半。竹蔗茅根，青甜潤喉，係打邊爐嗰陣啤酒以外嘅最佳選擇。醉火入鍋，呢個醉火入鍋包括咗五種湯底，中間嘅係醉蝦木瓜鍋，飲醉哂嘅鮮蝦送到上嚟嘅時候依然生蝦咁跳，侍應喺我哋面前點火將醉蝦整暈之後就開始落湯底打邊爐，經燃燒後湯底嘅木瓜味道遠比起酒味濃厚，酒味反而入哂落啲醉蝦度，出色。四川麻辣鍋，麻辣鍋帶有香濃嘅辣椒同埋花椒嘅香氣，湯底裏頭嘅豆卜、豬皮、大豆牙同埋雲耳索進麻辣嘅香味，又係淨係食湯底都夠做嘅一道。清湯蘿蔔牛腩鍋，內裏有炆得腍身嘅蘿蔔同埋牛腩，為數不少。馬來肉骨茶鍋，鍋底裏面搵藏豬手，有夠誠意。蕃茄波士頓龍蝦鍋，龍蝦有大大半隻，最正係佢個蕃茄湯，攞嚟淥面無敵。各款鍋底都真才實料，淨係食啲鍋底都已經飽咗五成。頂級安格斯牛小排，賣相不俗，底下冰塊有助牛肉保持新鮮，安格斯牛油花豐富而均勻，牛肉味道無容置疑。三色鮮製生麵，鮮製生麵麵質異常爽彈，配襯埋個蕃茄湯底更加係如虎添翼，係我少有打邊爐嚟講食麵仲多過食肉嘅一次。手打芝士蝦丸，蝦丸新鮮彈牙，帶有微微嘅芝士味，同個蝦味相輔相成。…查看更多

麒麟一番搾啤酒，燒肉襯啤酒，是常識吧，特別欣賞佢呢度有冰杯，令到冰凍啤酒嘅生命得以延長。生菜 SET，25 蚊嘅生菜 set 就包咗生菜、泡菜同埋一大碟韓式燒肉醬，係抵嗌嘅。志盛 (2人前)，呢個豐盛嘅 2 人前包括葱鹽味雞腿肉，黑毛豚無骨小排，鹽燒牛舌，汁燒腹前牛小排以及極上厚切牛胸腹柳，全部肉類同時上枱好有氣勢。葱鹽味雞腿肉，雞腿肉有咬口，燒香後加上隨付嘅京蔥花一齊食，好味。黑毛豚無骨小排，薄切嘅黑毛豬排散發住令人滿意嘅豬味。鹽燒牛舌，牛舌帶有獨特嘅騷香，薄薄一片，加埋雞腿肉嘅京蔥花風味更佳。汁燒腹前牛小排，薄薄一片，燒香後肉汁四溢。極上厚切牛胸腹柳，估唔到咁厚切嘅牛胸腹柳入口係咁軟嫩，加上醃肉味道帶有微甜，夾埋生菜 kimichi 一齊食，我十分之喜歡。…查看更多

餐廳位於科學園向海嘅一列餐廳，印象中以前呢一列餐廳只得西餐，今次有中餐飲茶，就帶咗外父外母嚟試吓，今日溫度相宜又有少少陽光，就坐歐多牙對住個海景歎茶。蟹子蝦多士，蝦多士炸得鬆脆而不帶半點油份，面頭蝦膠比例豐富，蝦膠嘅份量比起多士有過之而無不及，面頭有蟹子吊出鮮味，係其他地方所沒有的。牛油果鰻魚春捲，日式鰻魚同港式茶樓春捲呢個配搭非常創新，兩者同屬高質，不帶半點違和感。欖角蒸排骨，由於點菜我無參與，初時以為排骨上面嗰啲係豆豉，點知原來係欖角，味道配襯得嚟亦帶半點驚喜。柚子鮮蝦餃，蝦餃飽滿，用少許柚子入饌，又係創新嘅一道。妃子笑咸水角，呢個鹹水角真係顛覆咗去飲茶食鹹水角嘅固有印象，造型獨特，成粒荔枝咁，因而冠名妃子笑，賣相好睇又好食。京滬千秋小籠包，小籠包裏面嘅湯汁極多，整體令人非常滿意。呢一間八方盞所有點心嘅出品都會喺傳統上面加多少少新意，正正係坊間難得嘅態度。…查看更多

餐廳位於尖沙咀的 i square 六樓，門口的吧枱令整體環境檔次提高了不少，待應安排了我們坐在吧枱位置，正中下懷。串茄核桃沙律，將新鮮串茄切開再喺裏面讓入核桃同埋沙律醬，酸甜開胃，感覺創新。普寧炸豆腐，豆腐炸得外脆內軟，豆味香濃。酒香凍鮑魚，凍鮑魚賣相不俗，酒香入味得嚟不帶半點苦澀，鮑魚肉身煙韌，咀嚼嘅過程酒味緩緩滲出，相當出色。鹹菜胡椒豬肚湯，豬肚新鮮，胡椒味香，鹹菜清爽得嚟一啲都唔鹹，最欣賞嘅係佢原盅上之餘下面仲有個火燉住，飲到最尾一啖都係咁溫熱。日本蕉仔炒嫩牛，牛肉一如其名入口軟嫩，個味道帶少少中式之餘又有啲日式嘅甜甜地，青椒仔有齊三色，賣相好睇之餘又健康。碧綠川椒雞，川椒雞非常惹味，伴隨住底下炸得香脆嘅菜葉同吃，就係最佳嘅組合。燕麥一口薯，紫薯蒸熟後將表面蘸滿燕麥，係非常特別嘅一度甜品。…查看更多

一向都好鍾意灣仔 QRE 裏面嘅餐廳，鍾意佢哋除咗裝潢舒適之外，食物嘅質素亦有一定嘅保證，今日過開嚟呢頭，又上嚟開飯。至尊拼盤，揀咗做緊暖冬窩心 promotion 嘅至尊拼盤，併盤一共有五款，相當抵食，醉雞酒味夠，雞肉亦都相當嫩滑；烤麩味道不俗，如果甜味再提升多啲相信會更加出色；雞絲粉皮個麻醬味道層次豐富，絕對令人有驚喜；我至愛嘅鎮江淆肉表現出色，點埋個鎮江醋食，認真無敵。北京填鴨半隻，作為古琴雅苑嘅招牌菜，呢度個填鴨係師承北京「全聚德」，選用上乘北京填鴨，以傳統掛爐烤製，師傅連肉一齊片埋出嚟，會比起坊間嘅特別多鴨肉，厚肉嘅口感更好，真正做到皮脆肉嫩，除咗一般嘅京蔥青瓜片皮鴨醬之外，呢度仲有蜜瓜同秘製嘅蜂蜜黃梅醬做配菜，可以拼湊出多幾種口味。金銀炒鱔糊，鱔肉新鮮爽彈，芽菜同韭黃都炒得啱啱好，夠哂爽身，配合埋經典上海嘅濃油赤醬，真係想嗌碗白飯爬下。小籠包，每一粒小籠包入面都充斥住大量湯汁，上枱時新鮮滾熱辣，係要攤一陣先食到咁熱，皮薄，餡更靚。高力豆沙香蕉，高力豆沙口感軟熟，恰到好處嘅糖霜加埋香蕉內餡嘅甜味，為今晚畫上一個圓滿嘅句號。…查看更多

Suntory，三得利啤酒，無論同串燒或者炸物都係最好嘅朋友。煙三文魚沙律，沙律菜新鮮，醬汁豐富，沙律醬同麻醬令人相當開胃。炸物拼盤，分別有炸豆腐、炸雞軟骨同埋炸魷魚鬚，豆腐外脆內軟，雞軟骨爽脆，魷魚鬚彈牙，三種炸物都俾到唔同嘅口感，拼埋一齊相當之有層次。明太子雞翼，師傅將雞翼嘅熟度掌握得恰到好處，雞肉嫩滑，配合啖啖嘅明太子，非常出色。豬頸肉串，口感紮實，散發住令人滿意嘅豬味。日本岩手雞皮，雞皮燒得極之香脆，燒製過後雞油被悉數逼出，非常美味。鹽燒三文魚頭，嚟到鍾意食魚嘅我最愛嘅鹽燒三文魚頭，三文魚頭油脂豐富，燒過後嘅魚油香氣令人著迷，加上嫩滑嘅魚肉，係我嘅是夜之最。最中餅雪糕北海道牛乳，最中餅係日本常見嘅和菓子，係由一塊米做成，有如威化餅咁樣嘅外皮，喺和菓子嘅世界，會喺兩塊餅皮中夾住不同的甜餡，例如紅豆蓉或者栗子蓉等。最中餅同雪糕呢個組合亦都不輸傳統，兩者配合得天衣無縫。…查看更多

前排路過發現老蘭有一間咁抵食嘅串燒酒吧，環境仲要咁有格調，今日卒之有機會嚟試吓。Kirin Ichiban Frozen Beer，口感層次豐富清爽，有好重嘅小麥香氣，餸串燒一流。燒三文魚鰭，三文魚鰭油脂豐富，28蚊有三件真係物超所值。自家製和牛棒，月見雞串就食得多，呢一個自家製嘅和牛棒版本嘅月見牛真係非常獨特，以新鮮和牛攪碎而成，入口軟淋而富有和牛嘅香味。炭燒豬頸肉，豬頸肉醃得相當入味，配合頸肉獨有嘅豐厚脂肪，滋味非常。Barton & Guestier，呢一隻嚟自法國波爾多，擁有300年歷史嘅老字號，有土壤、礦物同皮革嘅複雜度，單寧中等，非常之 food friendly。鹽燒燒白鱔串，白鱔肥美，串燒過後將魚油悉數迫出，加上燒到脆身嘅魚皮，非常出色。極品即燒乳豬，燒乳豬外皮非常香脆，豬味濃郁，特別鍾意佢幾十蚊都有交易，細細一段，餸酒一流。汁燒牛小腸，牛小腸好少地方有得食，見到餐牌有就即刻嗌番一串嚟試下，牛小腸口感軟嫩，牛味同油脂嘅嘅香氣相輔相成，從來都覺得牛腸係帶有牛味嘅豬腸，整體食感極富層次。鳯梨燒，經過一輪肉肉油脂嘅纏綿過後，食番個酸甜多汁嘅鳳梨燒，正好解膩。燒棉花糖，廚師將簡單嘅燒棉花糖放喺 cocktail 酒杯之上，賣相精美。…查看更多