蘇媽.蘇媽馬來西亞茶餐室

营业中

休息中

猶記得當年蘇媽喺深水埗開第一間舖嘅時候經已一試難忘，知道佢喺旺角開咗分店好耐，今日卒之有機會嚟試下，旺角店環境更加寬敞，加上特色玩味嘅牆身擺設，配合極高嘅樓底，環境舒適之餘又有餐廳特色。桔仔話梅水，不嬲對桔仔同埋話梅呢兩個味道都唔係話十分之鍾意，但係呢一杯嘢飲將兩樣嘢夾埋竟然咁有驚喜，桔仔同埋話梅配搭喺上嚟嗰個清爽味道，令我對呢兩樣嘢重新審視。馬拉沙嗲串，沙爹串燒得相當有風味，我哋豬牛雞各揀咗兩串，牛同雞都令人有記憶點，前者有意想不到嘅牛味，而後者就盛載住嫩滑嘅口感，隨附嘅沙爹醬係比較重花生味而且有粒粒花生碎嘅版本，鍾意食花生嘅朋友大愛。高佬麵配仁當牛肉，仁當牛肉口感軟嫩，味道層次豐富，特別鍾意佢嘅筋位好多，致使口感得到極大嘅滿足；高佬麵有啲似韓式嗰隻辣雞麵，不過口感就更為彈牙，每一條都撈滿甜豉油，本身已經相當好食，食到半路撈埋仁當牛肉個汁，再加上銀魚仔、花生同埋溫泉蛋嘅加持，簡直如虎添翼，直呼點解我咁遲先發現。