東尼東尼索柏的个人专页

又好耐冇食食評，今次就同朋友兩個人走左去尖沙咀食放題。第一次去呢間叫金田日式放題，入到去等左兩分鐘就已經有位，真係好好彩。一坐低就好快手咁睇下有咩野好食，呢間食物選擇都唔算少，可以比我盡情食返夠本。我諗我用左五分鐘既時間就已經畫左想食既野，之後就係等食。最先上枱既食物就係呢個忌廉粟米焗蠔，個賣相唔錯，食落既口感唔錯，值得一叫。之後就到呢兩款，我覺得係值得推介比各位一試，芝士年糕同埋一口芝士魚餅。兩款都係一食落口就有啖啖的芝士味，好食之餘又唔會覺得太過膩，而且口感非常好。之後就輪到刺身上場，賣相好，刺身好新鮮，食落口唔會有雪藏味，每一種刺身都好食，食多D都唔會覺得膩。要推介既話就會推介三文魚、希靈魚、油甘魚同象拔蚌。另外，我地仲叫左呢幾款，蒜片牛柳粒、牛油帆立貝同埋香草燒羊架。呢幾款都係唔錯既。呢度既牛油帆立貝比較唔同既就係佢會用鐵板上菜，咁就會keep到食物熱D。而羊架咬落口幾淋，幾容易食，同埋唔會有一大陣羊蘇味，岩哂D想試羊又怕太蘇既朋友仔。我地之後仲叫左好多野食，太多就不能盡錄。最後都再叫左一輪刺身，一樣新鮮一樣好食。呢度既刺身真係唔錯。整體唔錯，食物好食之餘，職員既服務態度又好，而且價錢又唔算太貴。所以今餐飯都覺得抵食。…查看更多

平時出街食飯，要諗食咩既時候，拉麵都會係其中一個選擇。今日朋友話想食拉麵，身處係銅鑼灣就緊係要去登龍街既拉麵集中營。去到登龍街，就見到呢一間新開的拉麵店 – 金田家。店舖的外觀同傳統的日本拉麵店差不多。見到用黑版寫住「九州第一」，睇落好似好利害，就決定入去試一試。一進門就比佢既購票機吸引住，因為跟日本的格式係一樣，令人有種係日本的錯覺。一入到內坐低，望到周圍都掛住優勝的獎項，令人對呢度既拉麵充滿期待。之後，好快就有店員招呼我地。店員將一張點餐的紙同一張簡介放係我既面前。金田家的拉麵只有三款，而且只有豬骨湯底。証明金田家對自己既湯底有很大的信心。我毫不猶豫就選擇左芽菜叉燒拉麵，之後仲加左溏心蛋。而麵的軟硬度就選擇左硬。叫完一陣就好快有得食，靜係睇個賣相，未食都知味道一定有水準。首先就試一試湯底，聞的時候已傳出陣陣香味，第一啖入口就覺得有好濃郁的豬骨味，濃味之餘又唔會太咸。雖然湯比平時既拉麵 “杰” ，但咁就可以証明真係用大量既豬骨去製作而成。之後就試一試麵，因為我就選擇左硬的麵，所以當我食既時候就覺得硬度岩岩好。麵質爽口，容易咬斷，食落好順口。麵很完整，唔會碎碎散散。到試下叉燒先，平時食到既通常都係圓形一大片，而金田家的叉燒係長方形一片片，有D似五花腩，食落口既味道係好香，好爽口，可能係因為切得薄的關係，所以食落去既口感好好。金田家的叉燒算係我食過既拉麵店中最好。再黎就試下溏心蛋，呢度既溏心蛋係全碗拉麵中的精選。蛋的軟硬度適中，中間的蛋黃係半生熟的，食落去的時候會流出陣陣的蛋汁，味道非常之好。再配埋豬骨湯一齊食，味道就更加好。整體黎講，「九州第一」的名號絕非浪得虛名。這裡既拉麵係值得一試。下次再黎一定會去試下至尊叉燒拉麵，期待下次再來。…查看更多

又隔左好耐先有時間寫下食評，今次要寫既就係一個充滿童真既餐廳----查理布朗咖啡專門店平時行街既時候都會經過見到，不過都係冇入去一試。今次就終於去左試一試呢間餐廳。一入去就要行幾層既樓梯，沿住樓梯行都有唔同既史路比擺設，好特別。上到去，周圍都係史路比同查理布朗既公仔擺設，真係好似走入左佢地既世界。而且，個環境比你既感覺好舒服。令人既心情都會好D。而且，佢仲有一個投射既螢幕，會不停播放史路比既卡通片，連我自己都掛住睇卡通片睇到唔願走。呢度真係好岩一家大細黎開開心心食餐飯。好啦，都係入返正題，講返D野食先。我同我女朋友首先搵左個地方坐低，之後就揀左幾樣野食同一杯野飲。佢係好似平時既快餐廳咁出去買野食再攞個牌返黎等佢地拎D食物同飲品。等左一陣就好快有得食LU，等我慢慢一個個介紹下先煙肉洋蔥忌廉蛋汁扁意粉呢個扁意粉既味道真係唔錯，味道適中。雖然有忌廉同蛋汁，但係完全唔會覺得膩，再配其他既材料，整個既感覺唔錯，不過就覺得份量比較少，如果多一點會比較好。查理布朗至尊三文治呢個三文治應該係我平時食過以來最豐富既三文治，睇落個三文治好似好少材料咁，原來係好多既。佢包括有雞肉、煙肉、火腿、蛋、生菜、芝士、青瓜同蕃茄，再配埋沙律醬，食落口既感覺好豐富。同平時食到既好唔同，而且佢既材料好新鮮，用既蔬菜咬落口都好甜，仲有佢既雞肉係有另外調味過，所以食落口都係有唔同。另外佢既薯角都好好食，可能係即炸的關係，食起上黎特別香。史路比雞翼呢個雞翼一定同平時食到既唔同，因為佢應該自己用香料調味過之後再炸。而且佢食起黎非常方便，因為佢會將雞翼拆開，我諗應該係想方便小朋友用手拎起黎食。一食落口，好香脆既聲音。味道好好，唔會太咸。再配埋個凍既蛋沙律，少少既甜味，可以幫你中和返炸雞翼既油膩感。而且佢既份量都算多，值得一食。草莓菲巴冰呢杯飲品既草莓味好夠，唔會太淡味。因為呢種既飲品最怕係味道太過淡，即係冰太過多。而呢杯就冇呢個既問題，冰既份量岩岩好，飲落好舒服，因為佢酸酸甜甜，可能解一解油膩既感覺。整體黎講，我幾鍾意呢間餐廳。因為食物好之餘環境都好，所以下次都會再黎食，再試下其他唔同既野食。…查看更多

行完街就同女朋友去左食甜品，因為知女朋友鍾意食士多啤梨，就帶左去呢間食，因為見佢有期間限定既草莓甜品。入到去坐低就好快叫左一個草莓糯米糍同一個草莓豆腐花。等左一陣就有得食，個賣相真係唔錯，幾靚。首先講下個糯米糍，皮有少少厚，不過勝在夠軟，而皮入面就有一粒草莓同豆沙。草莓就夠甜，唔太酸，配上豆沙都唔會太過膩。而個草莓豆腐花就更加好食，草莓夠多夠甜，再配上草莓雪糕，口感一流。豆腐花味道剛剛好，唔會太過甜，成個甜品既感覺好清爽，唔會食完就覺得好飽既感覺。如果下次得閒既話都會再食多一次，因為真係幾唔錯。而且價錢又唔算貴。…查看更多

星期日晚同女朋友諗住去搭天星小輪去尖沙咀，行到個邊就比我地見到呢間鋪頭。可能因為有d肚餓既關係，就忍唔住行左過去買黎食。我地就叫左一個芝士煙肉牛肉漢堡套餐。呢間係會即叫即整，所以係需要少少時間等。不過我地等五分鐘多d就有得食啦。我地拎左去中環碼頭搵個地方坐低食，一打開個袋，真係好大個burger，佢個套餐仲會有一個薯條同埋一杯汽水。雖然個burger咬落去有d辛苦，不過味道真係唔錯。可能係因為即整既關係，所以夠哂熱，特別好味。芝士配上煙肉，味道濃得黎又唔會太咸。牛肉肉汁好夠，不過就覺得有點兒唔夠味。薯條好香好脆，佢既薯條係連皮既薯條，感覺同平時食既口感有d唔同。而汽水就係平時既汽水，所以冇咩感想。總括黎講，算係一個抵食既漢堡餐，因為佢個包真係好大，所以都真係唔錯。…查看更多

又隔左成半個月先有時間寫食評。今次同女朋友去左食呢間咖哩店。入去到唔洗等位，可能係因為係食lunch既關係就唔洗等掛。入去坐低，個環境真係幾日式既感覺。之後就叫左兩個lunch set。一個係漢堡扒咖哩飯，另一個就係吉列雞扒咖哩飯。仲包埋飲品同沙律。首先講下個漢堡扒咖哩飯先，漢堡扒做得好夠味，味道濃郁，夠肉汁夠淋，咬落去既口感好厚實。而咖哩又唔會太辣，適中既辣度，再配埋軟硬適中既飯，成個感覺好夾。而個吉列雞扒就炸得岩岩好，炸出黎既皮唔會好厚，因為係即刻炸，咬落去既口感好脆，有肉汁，唔會因為炸過而太乾。沙律就同平時既日式沙律差唔多，冇乜太大特別。而橙汁就同平時既餐飲差唔多，就係好飲。下次想再食咖哩就係黎呢度試下其他既野食。…查看更多

前兩日下午既時間，同女朋友走左去食譚仔。因為太耐冇食，所以又去左食啦。入到去唔洗等位，真好彩，因為平時最少點都要等返幾分鐘先入得。坐入到去坐低，就即刻叫野食。由於平時食黎食去都係個款，所以都係食返一樣既野，我就叫左酸菜腩肉米線中辣，而我女朋友就叫左炸醬米線酸辣，之後仲叫左一個皮蛋同一個口水雞，仲有兩杯涷檸茶。隔左成個月再黎食，味道冇差到，份量又夠大碗，辣味夠之餘又唔會太咸，真係食得好過癮。皮蛋夠香夠滑，我食唔停。而口水雞就夠哂辣，岩哂d食辣人仕。其實我已經食過好多間譚仔，始終都係呢間比較好食同埋抵食。我諗我好快又會再食lu，因為我太鍾意食辣lu…查看更多

今次打個簡單D既食評先今日放工，約左女朋友係銅鑼灣等。行開經過呢個野就入左去食啦。因為之前想尖沙咀個間食，不過因為太多人冇去到。今次見唔洗等咁耐就去試下食。佢既形式係買完再坐低等佢拎黎。我地坐低左就等食，等左兩個字就有得食啦。我地叫一個泡菜湯同一個雞肉拌飯。首先講一講雞肉拌飯先，佢既拌飯同韓國食既基本上係似既，味道都有d似。佢有一枝辣醬比你加落個拌飯度，因應自己想食幾辣就落幾多。味道不錯，雞肉不會太老，飯的軟硬適中，唔會太咸。之後就到泡菜湯，本身賣相一般，睇落去好辣，食落就冇想像中咁辣，泡菜同湯既咸度適中，豆腐很滑，湯裡面既有少許豬肉，味道不錯，肉質唔會太老。整體上唔錯，不過食完有少少趕住走既感覺。食物方面算係經濟又好食。如果唔洗點等既話都會再食。…查看更多

前幾日收工，同女朋友食完飯。突然間好想食甜品，就走左去朋友之前提過既聰嫂食甜品。去到等左5分鐘度就入得，好難得唔洗等咁耐。因為平時去親既甜品鋪都最少等返十幾分鐘。入到去坐低，我地好快就揀好左要食咩啦。因為我鍾意食蜜瓜，所以就揀左蜜瓜西米露。而我女朋友就勁鍾意食士多啤梨，所以就揀左士多啤梨豆腐花。甜品到左之後就發現同平時既甜品好唔同。因為d甜品好似食緊雪芭咁。又覺得好似食緊沙冰咁。兩款甜品就好夠果味，唔會太淡。另外，蜜瓜西米露係蜜瓜同西米露分開，好有趣。可以因應自己想食幾多就落幾多。而女朋友個款士多啤梨豆腐花，豆腐花既豆味適中，唔會太甜，同士多啤梨既酸甜味很夾。呢間甜品鋪，朋友真係冇介紹錯。而我都會推介比人去食。因為價錢適中之餘，甜品味道又不錯。得閒都會再去食。最後附上相片兩張(≧3≦)…查看更多

上星期六接女朋友放工，咁就諗住係附近搵下有咩野好食。因為女朋友鍾意食韓國菜，所以就優先搵韓國菜。行行下就比我搵到呢間小型既店舖。入到去雖然地方細，不過感覺好舒服。好快就已經諗好要食咩野。我地就點左吞拿魚沙律紫菜卷，泡菜泡麵同辣年糕。係等食既同時，有電視可以睇，裏面播既全部都係韓國既音樂同MV。感覺真係好似去左韓國咁。因為我女朋友有去過韓國，連佢都話同係韓國既店係差唔多。就連老闆娘都係韓國人黎。同埋我發現有好多韓國人黎食。等左一陣，野食黎lu.首先試左紫菜卷，味道不錯。用料很足，紫菜唔會因為包住飯而太軟。咬下去好煙un，但又唔會好痴牙。到泡菜泡麵，味道很濃，但不會太咸。裏面仲有一隻煎蛋。雖然係一個好普通既泡麵，就係唔明點解自己係屋企係煮唔到既。到辣年糕啦，呢個我真係覺得味道好好。同其他既比較，我覺得這間既味道很好。裏面唔單止有年糕，仲有一些韓式既魚片。真係好食到停唔到口。…查看更多

前幾日放工，之後同女朋友去吃飯。兩個人一路行一路在想要吃什麼，當煩惱要吃什麼的時候，就停在這間紅椒力量門前。反正未吃過，肚又餓，就入去試一試。入到內坐下，就發現是一間以泰國菜為主的餐廳，而且價錢比想像中的便宜。因為我本身比較喜歡吃辣，所以泰國菜很適合我吃。之後我跟女朋友就隨意選了幾個東西來吃什錦拼盤因為想一次過吃幾種小食，所以就叫了這個什錦拼盤。每一種小食都很好吃，而且又有幾款醬汁，所以每一種小食因應不同既醬汁而令味道有所不同。要我選擇當中最好吃的，應該就是雞翼和蝦餅。雞翼和蝦餅外皮脆肉質滑，炸得剛剛好。吃下去的口感很好，蝦餅因為炸得剛剛好，所以咬下去的口感十分彈牙。冬蔭海鮮湯這個冬蔭海鮮湯在我個人而言，我十分喜歡。因為我喜歡吃辣，所以這個很適合我。而且這個湯內的材料很多，用料十足，又有足夠的香料，所以香味很夠，而且味道非常好。湯的材料包括好幾種的海鮮，令湯更加鮮味。雖然有點辣，但會令人停不了口。這個湯給我的感覺很地道。泰式鳳爪這個菜對一些喜歡酸酸辣辣的人最適合不過，因為酸辣適中，唔會辣得太過火。這個會令人吃到不能停口，因為十分開胃。很貼心的地方是這些鳳爪是沒有骨的，應該是事先拿走了當中的骨，所以吃下來的時候很方便。印尼炒飯因為我最怕吃到很”淋”炒飯，覺得吃下去感覺不好。但是這裡的炒飯做得很好，飯的賣相很好，份量十足。飯的味道很夠，炒得很乾身，所以吃起來的時候口感很好。什果冰和奶茶紅豆冰什果冰的什果非常多，比平常飲的多。味道不會太甜，飲下的時候很冰涼很舒服。而那杯奶茶紅豆冰令人很意想不到，因為沒想過奶茶可以配紅豆冰，飲下的感覺很特別，唔會有太甜的感覺，紅豆都不會太甜，而且出奇地配合。整體而言，紅椒力量的食物不錯，而且份量十足，又是大眾化的價錢。令人吃到好吃的東西又不會太花錢，感覺良好，有空會再去試一試其他的食物。…查看更多

跟女朋友逛完街，在想晚飯吃什麼好，發覺很久沒有吃過上海菜，就決定去上海婆婆食晚飯。一進入去坐下就發覺這間上海婆婆的裝潢很有香港的懷舊氣息，感覺很舒服，跟平時的裝潢很不同。牆上的圖案很有趣，應該是六七十年代的香港的兒時玩意的感覺。由於太久沒有吃上海菜，而且逛完街肚子比較餓，所以就很隨意的點了很多的東西吃。婆婆小籠包這個給兩個人吃就剛剛好，如果人數多的話就需要多叫幾個。在味道方面，小籠包的湯汁適量，不多不少。而小籠包的皮很薄，裡面的肉很多，吃起來口感很好。即使等一會冷了再吃，小籠包的皮亦沒有太乾和變硬。而且上海婆婆的小籠包的底下會有一片蘿蔔片，這樣會方便夾起小籠包又不會黏住蒸籠內的紙，跟平時吃到的不同，這樣感覺比較貼心。青花椒湯小雲吞賣相跟平時吃到的普通雲吞一樣，不過這裡是做成一口雲吞，吃起上來會比較方便。看上去感覺不是辣的雲吞，但是吃下的時候就會感到有點辣，有一點小刺激，味道剛剛好，不會太咸太辣。湯喝完後也不會感到口渴，這個菜很適合吃辣的朋友。奶湯滑津白跟平時的津白有少許不同，平時吃到的津白都是一大棵的，這樣吃起來比較不方便，而且大棵的比較難入味。而這裡的津白是一小棵一小棵的，這樣津白會比較入味，吃起來也比較方便。奶湯不會太咸，沒有蓋過津白本身的味道。再加上金華火腿碎，一起吃的時候味道更好。鎮江小排骨上海婆婆的鎮江小排骨不太甜又不太酸，味道岩岩好，肉質嫩口，其中還有軟骨部分。份量有點少，那麼好食，應該要多一點嘛！！吃不慣上海菜的人都會怕鎮江小排骨太酸或太甜，而上海婆婆的小排骨就比較迎合香港人的口味。酸辣湯拉麵酸辣湯的味道適中，不會太酸太辣。而拉麵的麵質吃起來很爽口，麵很易夾起來也不易斷，吃起來感覺很好。而且麵的份量很足夠，價錢又不會太貴。麻辣燻蹄賣相吸引，喜歡吃辣的朋友會喜歡這個。雖然味道沒有想像中的辣，但依然有足夠的辣味，汁雖然多，但吃起來也不會太咸。份量也很多，價錢都不會太貴。這一餐吃得很豐富，很滿足。食物的味道不錯，份量方面也很足夠。而且價錢方面也算經濟。簡單來形容就是好吃和滿足。原本想試其中一道甜品，不過因為沒有了，所以不能吃。下次有機會一定要叫到那道甜品，同時也會試一下其他的菜色。…查看更多

銀都冰室係中學時代已經開始食，到左依家出左黎工作已經好少機會去食。前日有時間有機會再去回味一下，發覺事隔多年味道一樣沒有什麼變化一樣咁好食。當日係中午的時候，可能都係因為星期六，人比較少，一入去就已經有位坐。同女朋友坐底後就叫左2個特餐，特餐有一個沙嗲牛肉麵，一個火腿奄列再加一個牛油方包，另外仲有叫左杯熱奶茶。沙嗲牛肉麵味道十分好，麵很爽口，唔會有「淋」的感覺。湯的味道比一般的茶餐廳濃，就算飲左幾啖都唔會覺得喉嚨渴。火腿奄列煎得啱啱好，唔會太乾。火腿絲十分多。牛油方包比較多牛油，感覺有點油膩。而那杯熱奶茶，飲落口幾滑，味道濃郁。整體上味道唔錯，同我以前中學時代既味道沒有什麼大差別，保持到以前的水準。價錢同以前食既時候差不多，沒有太多的調整。2個人食了60蚊。感覺算經濟。…查看更多