Donaldpun1的個人專頁

估唔到係跑馬地呢d高尚住宅區都有d呢d價錢相宜，質素亦唔錯既上海小菜館。餐廳裝潢簡僕清潔，令人感覺好舒服。佢d套餐都幾多選擇，唔洗叫得一大碟餸，所以就算我地兩個人食，都可以試到好多唔同既菜色。我最鐘意係個鱔糊同煎餃。鱔糊炒得香，鱔身亦爽甜，加埋清新既芽菜絲，絕配。煎餃size 比我想像中大，煎到皮脆金黃，咬落去仲有濃厚既肉汁，爽呀！最後值得一讚既係侍應姐姐好欣勤有禮，好有小店既人情味，欣賞！有機會會再黎食…查看更多

香港要搵一間好食嘅拉麵店一啲都唔易。呢間拉麵係我屋企附近新開，有一晚肚餓就走落去試吓，點知係喜出望外！我叫咗一份四國香蔥油拉麵、一個鰻魚丼同一份煎餃子。三樣我都非常滿意，實在係難得。麵質有啲特別，唔喺香港一般食到個種，佢幼得來都好彈牙，掛麵能力亦都唔錯。湯底有非常之香蔥味同埋豚骨香。鰻魚飯係令我最有驚喜嘅，因為一般嘅日本餐廳鰻魚飯都係好腥同埋就咁叮熱d鰻魚就算。但係呢度嗰個就一啲都唔腥，係有蒲燒既味道同埋舊鰻魚幾厚肉！最後就係個餃子，望落就有少少平平無奇，但係食落就非常精彩，佢勁香脆同多肉汁。係我近期食過最好食嘅餃子！…查看更多

之前上網見到有個本地名廚介紹，好似幾好食，所以同老婆試下呢間主打成吉思汗燒烤既餐廳。我本身就係一個羊肉嘅愛好者，叫咗一碟羊頸柳，羊味超濃郁，又唔會有好勁嘅羊騷味，加埋佢嘅醬汁、洋蔥同孜然粉，簡直係無敵！之後仲叫咗一個雞皮炒支豆，非常惹味，送酒一流。同埋叫左一個豚肉大盤拼盤，分量十足，而我最鍾意就係入邊嘅豬頸肉，油花非常之豐富，好好食。而另外一樣嘢令我對餐廳印象非常之好就係佢嘅抽煙系統做得好好，唔會好似一般燒烤店咁食完之後成身煙味。推介！…查看更多

疫情終於完結啦!可以夜晚出返去食嘢。呢間餐廳係之前朋友介紹，話好正但係一路都冇機會試，而家終於試到啦！7點幾入到去都差唔多滿晒座，好彩仲有吧枱位坐。入到去見到一個好似七仔自由酙嘅清酒機好得意，有好多選擇，不過今日揸車唔飲得。叫咗塊西冷，雪花紋超靚同分佈得好平均。呢度d職員仲會幫我哋燒，幾細心。之後仲叫左時日推介既喜之次一夜干同埋聖子，喜之次肉質嫩滑彈牙，鹹得來仍然保留到鮮味。聖子就超甜，好好食。之後唔夠喉叫多咗一份牛三角胸小排同埋豬肋條。胸小排既雪花都好靚冇失望。另外豬肋條就好香脆。最後叫埋個甜品，個芝士蛋糕都唔嬉場，有驚喜。…查看更多

最近因為限聚令都攪到我地少左出去食飯。難得出去食就梗係揀間好少少既扒房。呢間扒房入到去俾我既第一印象係好有情調，暗暗地，又唔會好迫，幾舒服。沙律我叫左Cesar salad, 沙律菜新鮮爽脆，加埋香口既芝士，幾開胃。原本想叫招牌既ribeye steak, 但係因為另一半唔食牛，費事食唔哂，叫左pork ribs。點知有驚喜，呢度既ribs煮到好淋好入味，唔會有出面好多餐廳個種擦膠感覺，加埋甜甜地既惹味燒烤醬，真係勁邪惡。就算係大大份我地都清哂。呢餐幾滿意，仲有一個亮點係佢把刀好得意，想買番把番屋企。…查看更多

係香港搵間好既居酒屋真係唔太容易，一係就限時食，一係就環境好嘈吵同迫夾，成日都係想食完就快d走，但係今次食呢間真係有日本既居酒屋感覺。早排唔知食咩，求其搵左間居酒屋，點知又好滿意喎。佢食物選擇都幾多元化，除左燒物，小食，仲有d飯麵類。我最欣賞佢地既燒物。處理得岩岩好，燒白鱔表面香脆，內裡肉質鮮嫩肥美，攪到我都再叫多幾串。免治雞軟骨棒又好高質，應該係自己整，唔似買番黎解凍再燒，有誠意。燒帶子水準亦好高，唔會燒到乾哂，size 又大。烏冬既分量十足，鰹魚湯好清甜，麵質爽口彈牙。環境唔係好華麗但係好舒服，唔會好迫又唔會好嘈，翻食指數100%啦，應該會成日約朋友黎😂…查看更多

之前朋友推介過呢間野，因為地點唔多就腳最後無食到，今次咁岩過黎呢邊咪試，後悔無早d黎。呢度真係有情調、抵食、好食夾大件。波士頓龍蝦：以為係龍蝦一定貴？佢賣78蚊但係好好食，焗得好香口，肉質都唔錯。煙燻豬仔骨：呢個我都好喜歡，BBQ醬夠惹味，但係又唔會多到好膩口，豬仔骨肉質鬆軟又入味。滿蜆肉蝴蝶粉：呢個係重點推介，因為d蜆肉真係多到滿瀉哂，又鮮甜。蝴蝶粉口感又唔會太厚身，食到我Lamlam脷，兩樣野配合得好好呀。呢度食野真係好食夾大件，最緊要係囡囡黎到又有得打下卡。…查看更多

近年登龍街多左好多正野食，朋友帶我黎呢間hungry monkey 就又係新開既鐵板燒。入到去裝修就唔多似傳統日本鐵板燒店，比較新潮，而家日本都有唔少呢d美式日式fusion 既餐廳。先食個蕃茄沙律，好新鮮，蕃茄亦juicy。我地叫左個餐廳推介——海膽溶岩魚餅。外表就平平無奇，但係一咬落去就爆哂d海膽出黎，好正！必食！另外，燒聖子非常鮮甜，又唔會燒到乾哂，相當出色。一夜干雞扒又係其中一個亮點，佢風乾左先燒，令到雞皮同雞肉燒出黎香脆，幾特別。最後既重點係蟹盛御好燒，佢係大阪燒上面加左大量蟹羔蟹肉同蟹子。一野食落去，真係非常甘香，餅底又有少少糯，食到我同我朋友停唔到口。呢餐好滿意，佢唔比傳統鐵板燒既食材差，但係佢就多左一分創新，價錢亦唔算離地，我極力推介！…查看更多

同老婆無煮飯，要出街食，友人話金百利樓上有間野食「煮家菜」，所以即管試下。一入到去，人唔多，但係店員都幾熱情。望到menu，主打烤魚，對我地兩個魚既愛好者黎講，梗係揀番條茄醬烤黃立倉試下，另外就叫左一個客家茄子肉絲。黃立倉非常好食，烤到有少少焦香，但係一d都唔乾唔柴，加埋酸酸既開胃茄醬，真係兩三碗飯都食得落。另外客家茄子肉絲都唔錯，熱辣辣，都幾惹味。佢仲要好食得黎，無咩落味精，食完唔好口乾。我地仲叫左兩杯野食，蘋果茶同冬瓜茶，幾好飲，又唔會太甜。呢度食物質素好，裝修簡單，服務又親切，真係幾有家既感覺。…查看更多

心血來潮想食泰國菜，食泰菜咁梗係去九龍城，求其搵左間OpenRice 評分高既試下，並無令我失望。兩個男人食飯唔想諗食咩，叫左個套餐。先黎左個生蝦同沙律。兩個都好新鮮，生蝦爽口鮮甜，加埋佢放左d涼瓜伴碟俾人解辣用，幾細心。生菜包好惹味，小小辣多多趣，生菜亦新鮮，不過可以再俾多少少生菜就好啦😚炒芥蘭鑊氣十足，同大排檔有得fight!明爐烏頭處理得好好，肉質嫩滑，香料又唔會過多遮蓋左魚既油香。最後最抵讚係芒果糯米飯，椰漿又熱又香，白糯米煙韌，黑糯米爽口，芒果清甜，2個字：完美。另外，值得一讚店員同老板都好有禮貌，令我食得好開心。…查看更多

講真，唔係人地帶黎，都唔知觀塘區內有間咁正既打冷。老實講佢似一間中菜館多過打冷，因為佢除左潮州菜仲有好多唔同既小菜都做得好出色。打冷就一定唔小得蠔仔粥，非常足料，蠔仔又大仔又多，大大碗，好味道！呢度d蠔真係好正，唔止蠔仔好食，連桶蠔都同樣出色，我地叫左個砵酒桶蠔，d蠔大隻到呢，又鮮甜，加埋砵酒既香味，真係不得了呀。燒汁鱔球又係令我好深刻，外面脆皮，內面乾身，燒汁惹味。最最令我吃驚居然係呢飲招牌檸蜜梳打，聽落去平平無奇，飲落去新奇刺激！佢味道好似益力多，好特別，加埋有汽，超爽！一路以黎我以為工廠區既食肆都係粗製濫造，但係估唔到搵到間同大排檔有一樣水準既中菜館，無得彈呀！…查看更多

愛人要食燒味但係又要Ot,焗住要買外賣，呢間棋哥係銅鑼灣開左無耐，朋友介紹話幾好食。見到外賣menu 都幾多野揀，價錢又唔貴。佢叫棋哥燒鵝就梗係試燒鵝髀啦。先讚讚佢d外賣包裝先，保溫做得幾好，我半個鐘後先番到屋企，都仲熱。一打開，真係有嘩左一聲，好耐無見過咁大隻鵝髀，夠哂足料，美中不足既係切左，如果無切就完美（係我唔記得講要免切😅）肉質嫰滑，肥瘦亦非常適中，鵝肉好香，肥而不膩，咬落去仲好juicy，因為外賣，皮唔算趣但係都夠皮薄，如果堂食應該會梗加正，近年食過最好既燒鵝髀。飯既濕度剛剛好，唔好乾爭爭，加埋香甜既醬汁同鵝油，無得頂。另外想講佢例湯都唔係交行貨，足料夠火喉，好鐘意！下次一定要堂食佢個鵝髀飯免切先得！好味！…查看更多

我打食評通常都係讚，但係呢間真係差到要我打一篇，提醒大家唔好中伏。中伏位1: 師傅大陸人聲稱係日本人。同我講野就用日文同英文，入到廚房傾電話就講普通話？中伏位2: 唔俾人叫最平既set。我媽媽年時已高唔想食咁多咪叫個499既set囉，佢話唔得，最少要叫699既set。佢menu 淨係remark 星期五六日暫停供應499set，但係我當日係星期三喎。又係有欺騙成分。不過我都算，好食既話699又有咩所謂。中伏位3: 茶碗蒸好差。一上菜，成個觀感已經好差，周圍都係水漬，茶餐廳都無咁誇下話？蛋蒸得又老又淡，失敗！中伏位4:壽司畫蛇添足。刺身質素其實唔差，但係都要加d奇怪野落去。舊赤身原本幾好食，上面加d芥末醬做咩？失敗！中伏位5: 居然無俾酸薑我地，第一日出黎做omakase? 要我提先笑笑口拿出黎，仲要超凍。中伏位6: d飯係熱架！我係咪食緊明將？中伏位7: 呢舊咩黎？toro? 爛布咁樣。中伏位8: 海膽都算數一數二難食，無鮮味，好重藍凡味，劣質貨。我真係估唔到omakase都可以咁差，無料到就唔好收呢個價錢啦。…查看更多

中環雖然好多野食，但係對於我地呢d星斗市民黎講lunch選擇真係唔多，但係最近有一間食鵝肉飯既餐廳開左，見佢價錢唔太貴，所以咪試下。格局就普通餐廳一間，但係座位都算闊落，係中環黎講真係好好架啦，寸金尺土呀。我同朋友一人叫左一個飯，我食鵝皇飯，佢就鵝脾飯，再加左一個鵝腸。鵝皇飯：size 適中，我一個男仔食都夠飽既，鵝肉幼嫩，上盛貨色，鹵水汁香濃，鵝雜爽口，無雪味，正，可惜今日無鵝肝，無得試埋😭最後要讚既係佢既鹹酸菜，加埋d飯一齊食，好惹味，有錦上添花既感覺而鵝腸又係出色既，因為鵝腸最緊要係夠肥，佢完全做到，非常香口，無得彈呀！如果唔係怕膽固醇過高真係想叫多碟。我朋友既鵝脾飯我就無試，不過佢都話好好食。埋單都係100蚊位左右，我諗我搵到我既中環新飯堂啦！…查看更多

第一次係香港食鐵板燒，本身都無咩期望，可能呢排心情麻麻地啦。點知呢間野令我喜出望外，抵讚！咩都無諗就叫左個set, 但係因為入面有和牛而我又戒左牛，員工都好有禮貌咁幫我轉左豬。蟹肉沙律幾足料，蟹肉亦鮮甜。海膽黑松露蒸蛋好清新，海膽新鮮，蒸蛋半生熟，好滑。火焰北寄貝肉質爽脆，佢用栢葉燒，有獨特既香味，北寄貝雖然用黎燒但係我諗都係刺身既級數，加埋佢有個鰹魚湯，真係鮮上加鮮。鮑魚爽口彈牙，味道好好，就算肉厚都夠哂入味，加埋蟹肉海苔味，鮮甜清爽！成餐飯我最鐘意係呢個活龍蝦伴海膽汁，蝦肉爽甜，唔會梅，夠哂新鮮，海水味唔算重，好好食。如果點埋海膽汁就將鮮味更上一層樓。最後一樣要讚既係個三文魚子海膽杯炒飯，d海膽多到滿瀉咁濟，唔似出面d海膽炒飯得兩片海膽，海膽無d「藍凡」味，質素唔錯，飯得亦炒得好，粒粒分明。近排黎講，最滿意真係呢餐！…查看更多