iamnotkolfoodie的个人专页

約左朋友食飯，大家都係住屯馬沿線，見到耐無去過鑽石山，今日就去鑽石山搵食。  朋友搵到 間叫WM Cafe， 雖然我哋都無食過，但我見有Pizza食，咁就啱啦，我都想食Pizza。  去到7點多，見到餐廳都有唔少人喎， 但餐廳都安排左個半卡位俾我哋坐，位闊落(4人位)唔使攬住個袋食飯。  因為我哋唔想食咁多，所以今次無餐，揀左散叫。  法包薄餅(餐廳送) 食物未到，先黎左個包，原來係餐廳送的薄餅，佢其實係半個法包整成0既薄餅。雖然係送，但係材料都好足，而且法包焗得好脆，作為餐前小食都好合格。  法式蟹肉忌廉龍蝦湯($68) 我好鍾意飲龍蝦湯，見到散叫都只係$68都幾抵，開頭以為係一般餐廳一小碗分量，點知黎到係好大碗，2個人都足足分到每人一大碗。龍蝦湯味濃，呢個價可以飲到咁大碗龍蝦湯真係超抵。  WM炸物併盤($108) 炸物併盤有幾樣炸物，分別係炸薯條，雞亦、雞柳、洋蔥圈同埋一口芝士，每款的炸物都只係得幾舊，分量啱啱好，炸物唔會油夠香脆。  菠蘿煙火腿薄餅($118) 意大利人見到呢個薄餅一定會嬲，好彩我哋都係香港人，而且我係菠蘿控(笑!)。薄餅厚薄適中， 最喜歡個邊夠脆，芝士夠多做到拉絲效果。  焦糖爆谷拿鐵($48) +橙汁($22) 呢杯應該係餐廳最特色0既飲品，，滿滿0既焦糖爆谷喺面，爆谷焦糖味濃，拿鐵咖啡味唔太濃，夜晚唔驚瞓唔著。…查看更多

喺黃色暴雨下嘅下午，喺灣仔唔知食咩好，見到呢一間細細個就食過嘅新森林。記得以前新森林嘅焗嘢又好味又大碟，所以同朋友決定再試吓，睇吓係咪同以前一樣咁好食。見到有茶餐，茶餐係主食加小食，仲要有飲品都只係三十零蚊，連茶餐茶餐廳都做唔到呢個價錢。咁我哋就決定好豪咁樣叫做四個下午茶餐，買單都唔使$200真係好crazy！芝士焗肉醬意粉+小食雜菜春卷（$39）我最鍾意食芝士焗肉醬意粉㗎啦，因為下午茶嘅關係所以佢係Mini版。意粉即焗熱辣辣份量亦都啱啱好。雜菜春卷夠晒香脆，有啲蔬菜感覺健康啲，加埋甜甜酸酸嘅醬汁好惹味。紅油餃子抄手+羅宋湯（$35）紅油抄手用雲吞做就試得多，今次係用餃子做都幾特別，加埋佢嘅辣椒醬就更加惹味好食。羅宋湯材料足，唔會因為係下午茶嘅關係就會少左料。煎餃子四件+羅宋湯（$35）餃子煎到好香脆，加埋醬汁味道啱啱好。焗咖喱牛腩飯馬來咖喱汁（$56）呢一個茶餐雖然係貴一啲，而且無小食，但係佢個飯係比意粉更加大碟，而且牛腩數量非常多，牛腩半肥瘦咁絕對唔會鞋，配埋馬來咖喱，香濃咖喱再加埋少少辣味就非常惹味，貴少少絕對都得嘅。所有下午茶都有配嘢飲，我哋就叫左特飲仙草奶茶，仙草份量都幾多，奶茶亦夠味濃，所以要加$6都值得嘅。…查看更多

朋友喺港島區返工，搭車經過筲箕灣見到新開嘅潮發魚仔店，一睇個名就知店舖住打潮州菜，今日佢帶我去試下。我哋6點半去到，見到餐廳已經坐滿人要等位。好彩我哋只係等左一陣已經被安排到坐位，仲要係卡位，好開心，坐得舒服對我黎講係好重要。可能因為店係新開，所以店內所有嘢都好新淨，亦都好光猛唔會暗暗沉沉。我哋叫咗蠔仔肉碎粥、鵝片三併、普寧炸豆腐、豆醬炒通菜。蠔仔肉碎粥（一碗）（$68）開頭以為一碗一人嘅份量，點知係一個小窩。2個人每人分到2碗，蠔仔分量多，每碗都分到唔少粒蠔，蠔鮮甜、粥夠味唔會稀。鵝片三併（$238）我哋叫左鵝片、紅腸、墨魚。潮州菜唔可以少啲菜式。呢碟菜由擺盤到味道都好得。菜一上，見到閃令令，好有光澤，唔會乾淨淨。墨魚雖然唔係平時見到橙色邊，但比平時食的更彈牙，鵝片夠味，所有嘢份量好足。普寧炸豆腐（$88）豆腐炸得香脆，一啲都唔油。豆腐夠滑有豆味，我最愛炸嘢唔油而且香脆。要俾個like佢！豆醬炒通菜（$88）通菜炒得夠鑊氣，加埋豆醬夠曬嘢味。食左咁多嘢都唔使$500真係好抵，而且無收加一茶介，非常抵食。…查看更多

今晚無人煮飯要岀街食，近近地喺樓下食。本身想叫拉麵食，點知發現天使麵仲平少少，我又鍾意食加上好耐無食，所以決定叫香草野菌忌廉天使麵。天使麵夠軟硬剛好，野菌夠多足料，忌廉汁亦都夠，唔會乾淨淨！可惜呢個唔係餐，無湯無嘢飲，要加的話，湯加$9，嘢飲半價，我加左咖啡，要走甜少冰，濃啲，都算對我要求跟得幾足。以集團式嘅屋苑餐廳黎講，呢間算係幾好味，合格以上。…查看更多

星期五同朋友岀旺角，之前佢一直想試下瀨尿蝦生煎包，所以就同佢去劉興記。因為接近午飯時間，又知劉興記都多人食，去到已見有人喺門口等都驚要等好耐，好彩都只係等左一陣，識員好快安排到入坐。去過幾間劉興記嘅分店，旺角呢間嘅裝修都幾有特色，坐都算舒服。點餐係用QR code 可惜瀨尿蝦生煎包已經售罄無得食，咁我哋決定豪豪哋食蟹黃拌麵，當然唔少得朋友最鍾意食嘅生煎包，同埋比我最鍾意嘅酸辣湯。蟹黃拌麵（$150）蟹黃麵係分開上，蟹黃份量超多，足足有一碗，面嘅份量都大。蟹黃一上枱就有蟹嘅香味，將蟹黃倒落去面嗰度撈勻，每一條面都可以沾到蟹黃，蟹黃夠多夠香，加埋蟹肉大滿足。生煎包（4隻$35）劉興記最出名嘅就係生煎包嚟到點可以唔食呢？咁啱我哋坐咗冇幾耐呢就有個客人大叫話點解啲生煎包唔熱嘅？職員冇多問好快幫佢換過一碟，呢個服務態度真係難得一見。而我哋食嘅時候呢新鮮包依然係熱辣辣，亦都一如以往咁爆汁，個包底亦都係好脆。雞絲酸辣湯（大$45）$45一碗大大碗，兩個人可以分到每人兩碗。材料好足㗎，雞絲又唔好韌，喺出邊好難飲到啲咁平又足料嘅酸辣湯。豆漿（免費）一坐低職員就首先俾咗兩杯豆漿，豆漿係唔使錢㗎！職員仲會為你無限添飲，絕對冇手軟。雖然只係食咗三樣嘢，但係都勁飽。而呢一個價錢食到咁高質嘅嘢真係好難得。希望下次可以食到瀨尿蝦生煎包啦。旺角分店無論環境同埋服務態度都非常出色，值得一讚！…查看更多

疫情前搵食，搵到呢間以$88龍蝦喇沙做招徠嘅餐廳，今日朋友又想食，所以再去。$88龍蝦喇沙原隻龍蝦上，夠大碗，淨係龍蝦都已經值回票！Cp值爆燈！粉就係油麵加米粉。泰式春卷有6舊咁多，又係CP值爆燈！點埋個醬勁好味。蒜蓉包蒜蓉勁多，包夠脆，好正！我要黎點喇沙湯，如果點咖喱應該仲正！馬拉盞炒通菜夠鑊氣，一上枱熱辣辣，唔會油過多。Cool爆鮮芒果冰冰呢個真係好堅，$48勁大杯，而且夾雜唔少嘅果肉，未上枱已滿瀉，黎到要即刻飲幾啖先得。不過唔知係咪特登，佢有啲冰係好大粒，所以到食完飯都未溶曬。MT Cinder Energy 呢個係朋友飲，我偷飲左2啖，可能係啲酒未落曬，滿滿嘅果汁味，勁易入口。重點係，呢到無收加一，食咗咁多嘢都唔使$400，而且服務態度都好好，喺銅鑼灣（其實係全港）真係好難得。…查看更多

想同朋友食得好少少，想坐得舒服，又唔想有時間限制。朋友就介紹咗呢一間蟹仙，佢知我鍾意食海鮮，而佢話呢一間嘅蒸海鮮種類較多又新鮮，所以就試吓。我哋去咗尖沙咀天文台圍嘅分店，可能我哋平日去人唔算多，而且本身座位都算係好舒適唔會好迫嘅。食物方面，佢哋主打蒸新鮮嘅海鮮，我哋揀咗尊貴海鮮套餐。職員會幫我哋蒸海鮮，會set咗鬧鐘，夠鐘職員會幫我哋將海鮮上碟，各款海鮮都會分開嚟蒸，保證每一樣都蒸到啱啱好。鮑魚冬菇前菜係鮑魚冬菇，鮑魚同冬菇炆得好入味。加拿大野生海虎蝦海蝦夠大隻，蒸完嘅蝦肉鮮甜，肉夠爽。聖子職員強調唔需要落太多調味料本身已經夠鮮甜，我照跟果然係好鮮甜。韓國釜山珍珠蠔蠔夠大隻size一啲都唔珍珠，蒸出嚟好鮮甜一啲腥味都冇。蟹黃大元貝帶子唔食得個部份已經完全去除，可以放心食用，加咗蟹膏嘅帶子蒸出嚟更加鮮甜。太平洋饅頭蟹第一次食饅頭蟹，雖然佢唔夠多肉，但夠多膏。奄仔蟹奄仔蟹同我平時食嘅一樣，滿滿嘅蟹膏再加埋鮮甜嘅蟹肉，啱晒鍾意食蟹嘅我。澳洲青年龍蝦一睇就見到龍蝦啲膏，龍蝦夠鮮夠爽。大西洋野生青口一向好怕青口腥味，呢一隻就唔會有啦。有機蔬菜籃蒸蔬菜更能帶出菜嘅鮮甜。粥底粥底吸收晒之前海鮮嘅精華，非常好味。椰汁雪燕椰汁唔會太甜，加埋呢樣嘢雪燕令到呢一餐更加完美。最值得一讚就係男嘅服務員係非常細心專業咁樣解釋每一款海鮮嘅特色，佢服務態度非常好。🥗食物：😍😍😍😍😍🏯環境：😍😍😍😍😍🤵‍♀️服務：😍😍😍😍😍地址:蟹仙海鮮私房．蒸氣石碢 尖沙咀天文台圍2號環海大廈2期地舖…查看更多

荃灣呢間甜品吸引到我，係因為有次經過見到有隻貓喺裏面，可惜當時無諗住食甜品。今次再去到荃灣，又想食甜品朋友就諗起呢到，決定去試下，而且睇下會唔會偶遇到貓貓。店內都有貓的裝飾，可惜無見到貓貓。我哋試左2款甜品。芋圓海底椰豆腐花（$35）芋圓份量幾多，煙煙韌韌。海底椰爽甜，估唔到嘅係豆腐花份量好多，加埋芒果雪糕，食完非常滿足。椰汁紫米芋圓（$32）朋友食，好特別係佢有幾粒湯圓，椰汁夠香，同樣，份量都好大。以呢個價錢有咁大份量嘅甜品好少見，下次有機會再試下其他。…查看更多

上次喺新城市搵食搵到呢一間新開嘅小野人@koka.asia.hk，去主打台式串燒嘅。上次食嘅感覺都幾好，所以今次喺沙田搵食又諗起返佢，就再嚟食啦。餐廳以台灣簡約嘅佈置為主，今次同上次一樣我哋都可以坐到卡位感覺好舒服。今次我哋嗌咗好多嘢食，感覺選擇比上次多。小野人沙茶粉絲煮蜆沙茶醬味濃，蜆夠多粒粒都好飽滿，加埋粉絲朔晒啲沙茶醬汁，勁好味。小野人黑松露蘑菇烤飯黑松露醬放咗喺面頭絕對唔會少，飯裏面嘅蘑菇份量亦都非常足夠，佢哋仲會預備咗幾塊嘅紫菜俾你嚟包飯食，呢個真係好驚喜。黑松露蘑菇飯用紫菜包住，口感更好。蒜蓉粉絲烤扇貝扇貝非常新鮮，每一隻上面都有蒜蓉同埋少少辣椒，加埋非常香口，撈埋粉絲食一流。扇貝唔會燒得過火非常多汁。Q彈大魷魚佢嘅魷魚係非常新鮮嘅，就好似喺台灣食嗰啲咁新鮮，燒到啱啱好一啲都唔會韌，就好似佢個名咁Q彈。烤西班牙黑豚五花肉五花肉燒完之後，冇晒油膩感，加埋又香又辣嘅特製調味粉，少少脆又惹味，朋友忍唔住encore要多串。大漠烤羊肉香料同羊肉嘅配合啱啱好，唔會搶走羊肉嘅味道。烤脆雞皮食串燒唔可以唔食燒雞皮，雞皮燒到脆卜卜，好正。金正菇牛五花肉丸用牛肉包住金菇嚟燒，啲肉汁就可以滲晒落去金菇非常好味。台灣小香腸+烤花枝墨魚丸食台灣小香腸就好似去咗台灣咁呀，台灣嘅花枝墨丸，我本身都已經好鍾意食，加埋香料落去燒就更加惹味。Q彈墨魚串墨魚同佢個名一樣，燒得啱啱好，墨魚肉非常Q彈。夏威夷烤菠蘿菠蘿控嘅我又點可以少咗菠蘿呢？部份呢？最鍾意小野人係佢有菠蘿沙冰同埋烤菠蘿可以滿足晒我嘅要求夏威夷烤菠蘿一上枱仲有煙出好熱辣辣，但係佢絕對唔會敲到乾晒仲有好多汁，而且佢個菠蘿大嘅程度係可以大過你嘅手掌。菠蘿沙冰食完咁多濃味嘅嘢，最好就係飲杯清新嘅沙冰去清吓口腔。佢哋嘅最特別嘅地方就係你可以選擇甜度而我哋就選擇走甜。咁樣就可以保留到菠蘿本身獨有嘅甜味，唔會過甜。用嚟飯後青青味蕾，同消滯最啱啦。今次要讚吓服務員，今次我見到大部份嘅服務員都係男性，佢哋嘅服務態度非常好，非常加分。…查看更多

好耐都無食過元氣都應該超過10年無食過元氣，突然想食壽司，朋友提議去食，咁又試下。炸竹輪薯仔沙律卷口感得意，薯仔沙律中和左熱氣感。我食嗰時已經凍左，有少少硬。趁熱食會更好味。海膽軍艦有一片仔海膽，唔會一pat pat同碎，無腥味。貝三點螺片有輕微腥味，其他2款正常。蝦天婦羅壽司朋友話ok。炙燒脆蒜赤海蝦少少特別，都係正常味道。酥脆魷魚鬚唔會好油，我食嗰陣時又係凍左有啲硬。不過竹輪同魷魚鬚，無醬點就差左少少。記得N年前食，覺得元氣又貴又無乜款，但今次覺得都ok。…查看更多

上次去澳門已經食過呢間好有特色嘅餐廳，朋友喜歡佢有set lunch ，幾好食而且又唔貴。因為唔太清楚佢幾時有set食，今次我哋再黎到澳門，決定有set lunch 食就入去。咁啱有set lunch 同上次個餐牌又一樣，咁我哋就入去食lu。我哋揀左低溫慢煮裏脊肉排配煎蛋薯條同墨汁海鮮天使麵。首先黎到就係蔬菜湯，佢係西式嘅做法，蔬菜攪碎煮，飲落好creamy。蒜蓉包亦好好味，一睇就知蒜蓉味濃，包亦好脆。低溫慢煮裏脊肉排配煎蛋薯條見細細舊驚唔夠飽，點知又幾ok。肉排我哋揀左medium ，唔知係咪太熟？所以有啲un 。墨汁海鮮天使麵同上次一樣好食，海鮮份量多，天使麵好幼，好食！最後有個少少嘅奶凍作結，作為呢餐完美作結。澳門有set嘅餐廳唔多，而佢哋每個set都唔過百，真係好扺。…查看更多

朋友茶癮起又想去老馮茶居，今日可能係平日嘅關係，等位唔使等太耐，大概等左15分鐘，而且我哋2位都俾咗張圓枱我哋。XO醬蘿蔔糕係每次去都必叫嘅食物，今次感覺細碟左，但仍然好味。老馮金沙米腸皇係腸粉包住炸米網蝦春卷，外軟內脆，好味。蠔皇鮮竹卷基本嘅鮮竹卷，夠味。蟹籽燒賣皇正常味道，今次賣相有點打風嘅感覺。古法千層糕一籠只有3舊奇怪左啲好似俾人偷食左一舊咁，不過真係好好味。雖然係咸加甜（我最怕）但味道好夾。…查看更多

又喺尖沙咀放飯，想慳錢可又點？就係食粉麵。不過喺尖沙咀呢啲遊客區，想平又談可容易呢？有日同事話佢食過樂園都ok ，咁我又試下啦。$37一碗粉，話平唔平，話貴唔貴。不過驚喜位係，佢個魚蛋係四四方方潮州魚蛋呀！而家真係好少見，通常就算講明係潮州魚蛋，最後都係圓型嘅普通魚蛋。講返個粉，河粉量足，魚蛋魚片夠彈牙，不過有少少實，加左腩汁個粉都夠味，唔使落辣都夠味，不過啲湯略厭油左啲！服務方面，就唔好有要求，坐低即刻問你食乜，唔夠1分鐘，四個阿姐車輪咁行過黎問你食乜。而我見有個位痴住牆，諗住都無人坐到就放左少少嘢落去，我食到中間，有個阿姐叫我還返張櫈俾佢。但當時係有勁多位，到我走嘅時候嗰張櫈都無人坐過。其實如果多客要櫈，我無乜所謂，但，明明就有好多位，點解你要騷擾個客？…查看更多

朋友好鍾意食生煎包，去到荃灣又點可以錯過去岀名爆汁生煎包嘅劉興記。今日12點幾去到應該未到放飯時間，所以無乜人。坐低職員會先俾2杯豆漿，而呢杯豆漿係無限添飲，職員會主動添加好正！朋友話杯豆漿唔太甜，好啱口味。招牌生煎包（$35/4隻）去劉興記又點可以唔叫佢哋岀名爆汁嘅生煎包呢。一如以往包夠熱，咬一啖啲汁就湧岀黎，我習慣會飲曬啲汁然後先食包。就算飲左啲汁，包嘅肉都唔會乾，連埋脆脆嘅包低一齊食啱啱好！蟹粉小籠包（$80/4隻）小籠包一黎到已經知道皮夠薄，因為就咁望已經睇到滿滿嘅湯汁喺小籠包裏面。當我好驚一夾起會漏汁嘅時候，點知點埋醋放落碗都無事，以幾十蚊黎講的確高質。而蟹粉亦好足，咬開已見到滿滿嘅蟹黃，絶對滿足到愛蟹嘅我。素麻醬青瓜粉皮（$24）朋友大愛麻醬，所以佢一定會叫。今次亦如以往多麻醬，有青瓜絲中和唔覺膩，粉皮亦夠爽滑，份量亦夠曬大，岀面$24應該只有一小碟，呢到有一大碗！排骨葱油拌麵（$42）呢個拌麵有驚喜，因為我好怕炸嘢好油，但呢個似豬扒嘅排骨一啲都唔油，而且好脆厚薄剛好易咬。撈麵亦好夠味。價錢平，CP高，下次會再試其他嘢。…查看更多

食完濃味嘅沙爹麵，好想食返啲甜品黎平衡返。暖心芝作岀名即磨黑芝麻，之前只有喺太子有舖頭，而家喺荃灣都有分店啦。當同朋友試過一次之後，我哋每次喺荃灣食完飯都會忍唔住去食返個即磨黑芝麻軟雪糕。即磨黑芝麻味真係非一般地香濃，每一啖都好似食緊黑芝麻醬咁，軟雪糕亦唔會太甜，最啱我呢啲想食甜品又唔想食太甜嘅矛盾人。…查看更多