AlcoholicFoodie_HK的个人专页

最近同朋友去咗荃灣食韓式燒肉，成間餐廳裝修走韓式工業風，環境舒服，座位夠闊，最正係有專人幫手燒肉，唔使自己手忙腳亂，可以專心傾偈同食野，氣氛真係一流。😋 烤牛排骨 + 牛五花肉套餐 ~ 呢個套餐係主角，牛排骨切得厚薄適中，燒完之後外層微焦，入面仲保持嫩滑，啖啖肉汁，牛味濃郁。牛五花就係肥瘦相間，燒到微微焦邊，油脂滲出嚟，入口即溶，真係食唔停口。加上有專人燒得好好，唔會燶唔會生，食得好放心。😋 海鮮大醬湯 ~ 呢碗湯一上枱就聞到濃濃嘅大醬香味，湯底濃郁但唔會太鹹，入面有多款海鮮，啖啖都好足料。😋 泡菜煎餅 ~ 煎餅係薄身款，外皮煎到脆卜卜，口感偏乾，入面就有泡菜絲、蔥花、少少辣椒粒，食落去酸酸辣辣，幾開胃。😋 水冷麵 ~ 食完燒肉之後食返碗水冷麵就啱晒！麵條煙韌又冰凍，湯底係酸酸地嘅醋味，清新得嚟又解膩，係燒肉之後嘅完美收尾。…查看更多

好耐無食茶木，今次見佢轉咗新 menu，其實菜式都係差唔多，雖然設計上係靚咗，不過味道方面就未算出色，感覺係有心思但未夠火喉。紅燒牛肉麵 ~ 一上枱就聞到少少香料味，湯底係紅燒風味，偏甜，但無咩層次，飲落去有 d 似濃縮湯包煮出嚟咁。牛肉無乜牛味，咬落去有 d 柴。麵條係偏粗身，口感尚算彈牙。手撕雞拌麵 ~ 麵條係偏幼身，醬汁比較淡，味道唔夠香濃，而且手撕雞份量唔多。菜式睇落去幾清新，但整體味道偏淡。培茶米乳米麻糬 ~ 呢杯飲品睇落好似好有層次，入口係米乳底，帶少少米香，質地滑但唔算濃厚，培茶味唔算突出，有淡淡嘅培茶香，但唔夠搶。重點係入面嘅米麻糬粒，煙韌得嚟唔黐牙，口感幾特別，整體飲落去還可以的。…查看更多

「牧羊少年咖啡館」一貫裝修都係走文青風，呢度仲有戶外位，環境幾靚，天氣唔熱嘅時候坐出面真係幾 chill。今次試咗兩款 fusion 意粉，味道都唔錯！😋 避風塘炒蟹肉意大利粉 ~ 呢款意粉真係幾有創意，將港式避風塘風味同西式意粉結合。意粉係用橄欖油炒香，唔係 creamy 果種，口感乾身但唔會太硬。蟹肉份量唔算少，食落去有絲絲蟹肉，唔會太碎。重點係避風塘蒜香，炸蒜粒香脆，加埋少少辣椒碎，食落去香口又惹味，唔會太辣但夠醒胃。成碟意粉食落去有港式炒粉 feel，但又不失西餐格調。😋 拿破崙意式肉丸長通粉 ~ 呢款就偏向傳統意式風味，長通粉煮得啱啱好，唔會腍晒。醬汁係番茄底，酸甜平衡得好，唔會太膩。肉丸咬落去肉汁豐富，牛肉味濃郁，仲有少少香草味滲出嚟。…查看更多

喺奥海城逛完街搵食，無意中發現咗呢間拉麵店，原來係來自日本鹿兒島嘅過江龍，主打雞白湯拉麵，絕對啱晒我口味！😋 雞白湯拉麵 ~ 一上枱就聞到香味撲鼻，湯底係用雞骨慢煮出嚟，濃郁得嚟唔會太油膩，飲落口感順滑，帶少少骨膠質感，啱晒鍾意濃湯嘅朋友。麵條係偏幼身，口感彈牙，唔會煮到腍晒。配料有溏心蛋，蛋黃流心啱啱好，仲有幾片雞叉燒，肉質嫩滑，無雪味，滋味十足！😋 雞皮餃子 ~ 煎到金黃色，外皮脆卜卜，咬落去仲有少少油香。入面餡料係雞肉加少少蔬菜，調味唔算重，但啱啱好帶出雞肉鮮味。…查看更多

今日去咗尖沙咀呢間有米芝蓮加持嘅「Nara Thai Cuisine」，店內環境舒適，坐位夠闊落，唔會逼到膊頭貼膊頭，啱晒同朋友慢慢嘆。😋 泰式生蝦 ~ 蝦肉爽口彈牙，冇雪藏味，配埋店家自家製嘅辣醬汁，酸辣得嚟又有蒜香。😋 海鮮冬蔭功湯 ~ 酸辣平衡，香茅南薑味濃，入面有大蝦、青口、魷魚等等，每款海鮮都夠新鮮，酸辣得嚟有層次！😋 青咖喱雞 ~ 椰香濃郁，雞肉夠晒嫩滑同入味，唔會鞋口。😋 燒豬頸肉配青木瓜沙律 ~ 豬頸肉燒得啱啱好，外脆內嫩，咬落去有煙韌感，配埋青木瓜沙律，酸酸辣辣咁，食落好開胃！😋 泰式炒金邊粉 ~ 金邊粉炒得乾身唔油膩，條條分明，而且炒香味十足，每啖都食到泰式魚露嘅鹹香，唔會太重口味，啱晒香港人口味。…查看更多

喺跑馬地搵間舒服又有意式風味嘅餐廳都唔容易，去到呢間餐廳感覺環境好 chill，座位夠闊落，仲有戶外位，帶埋毛孩一齊嚟食飯就最開心！$298 一個 set dinner 好抵食，而且份量都好足夠~~😋 意式凍肉及芝士拼盤 ~ 呢個前菜好適合開胃，拼盤有三款意大利風乾肉，鹹香味濃，加兩款芝士，配埋橄欖，幾啱配杯白酒。😋 羅馬肉丸 ~ 羅馬風味嘅肉丸，用牛肉同豬肉混合整成，質感鬆軟但唔散，入面仲幾 juicy，加上濃郁嘅芝士同番茄醬，酸甜平衡得好好，帶少少香草味，味道好有層次。😋 大蝦蘆筍意大利燉飯 ~ 呢個 risotto 煮得好好，飯粒硬度適中有咬口，配上龍蝦忌廉醬，好夠 creamy，每一啖都滋味十足！😋 意式烤豬腩 ~ 豬腩外皮烤到脆卜卜，入面肉質嫩滑，食落去有油脂香但唔膩，配菜有薯蓉，滑得嚟有奶香，成碟好有意大利鄉村風味。🍰 Tiramisu ~ 原個迷你 tiramisu做得幾傳統，食落去滑到好似奶油咁，咖啡味濃但唔會苦，底層手指餅吸晒咖啡酒，食落有啲酒香但唔會搶味，啱晒鍾意經典口味嘅人。🍮 意式白朱古力奶凍~ 呢個奶凍好滑，入口即溶，旁邊配有莓果醬，酸酸甜甜咁又幾好食。…查看更多

呢度主打 omakase 同鐵板燒，入到去感覺環境好乾淨，完全 feel 唔到有油煙。店內裝修簡約但有格調，坐位夠闊，而且有 cushion 挨住好舒服，好啱同朋友慢慢食慢慢傾。揀咗 omakase 套餐「焰月」，一共有 20 品料理，由前菜、刺身、壽司、手卷到甜品，每道菜都好驚喜！加上食材新鮮，擺盤又精緻，每一啖都幸福感滿滿 ❤️😋 日本產象拔蚌 ~ 師傳將部分刺身片用火槍炙燒過表面，令到入口帶有火炙香但內裡保持到鮮甜，口感爽脆。😋 北海道產嘅厚岸蠔  ~ 師傳喺面前即場處理，一打開蠔蓋，蠔嘅鮮味就一湧而出。生蠔肉身厚實，鮮甜十足，再配上醋啫喱，層次豐富。😋 秋刀魚刺身 ~ 肉質極新鮮，完全無細骨，顯示挑除魚刺十分認真。師傳亦都物盡其用，將魚骨油炸，入口香脆，配清酒一絕！另外叫咗個炸豬扒定食都好出色，豬扒炸得香脆唔油，外脆內嫩，搭配醬汁啱啱好！下次會再嚟試下個鐵板燒 😋😋…查看更多

灣仔合和三樓有一間人氣居酒屋，店內採用木系風格，而且座位寬敞，間唔中 lunch time 都會過嚟食，幾鍾意呢度好有日式居酒屋嘅感覺，但一直都未試過呢度嘅晚餐，今晚終於約到朋友過嚟飲下清酒暢聚下。😋 刺身盛合 5 點 + 壽司 10 貫 ~ 每款刺身都好，而且壽司師傅手勢俐落，飯嘅溫度啱啱好，唔會搶走魚嘅風頭。😋 野菜天婦羅盛合 ~ 天婦羅嘅外皮炸到好薄同香脆，有南瓜、甜薯、茄子、香蔥、青椒等等，可以品嚐到各種野菜嘅天然風味！😋 柚子豚肉石頭湯 ~ 柚子風味湯底幾特別，有淡淡嘅柚子香，味道清新，配搭嫩滑嘅豬肉更加滋味！😋 生姜豚肉石燒飯 + 牛肉泡菜石燒飯 ~ 兩個石燒飯一上枱已經聞到香氣撲鼻，加上飯底微焦，正！另外仲叫咗幾款串燒~ 牛舌、雞翼、雞肉京蔥串，燒得啱啱好，唔會太韌，保持外脆內嫩。🍶 神龍純米大吟釀 ~ 有好香熱帶果味，入口清爽無負擔，配刺身一流！…查看更多

除咗食泰菜要嚟九龍城之外，而家知道食高質刺身同打邊爐都要嚟呢度！餐廳有兩層，樓下有提供小朋友玩樂嘅 area，好適合一家大細嚟聚餐。樓上有多間特色主題嘅 VIP 房，分別可以容納 4-12 人，唯獨有兩間房可以打通就最多坐滿 25 人，開 party 啱晒！而家做緊十五週年慶，堂食每位贈送南非冰鎮鮑魚一隻！😋 加拿大象拔蚌刺身 ~ 師傳處理得好乾淨，肉質爽口鮮甜，一食就知係高質貨！😋 海花金古刺身 ~ 有好甘香嘅魚油味，味道鮮甜得嚟好獨特，簡直回味無窮！😋 菜膽鮮魚湯窩 ~ 每日只限量供應兩煲，皆因處理工序複雜，所以一定要提早預約留定！我地先品嚐個湯，充滿濃濃嘅魚香味，鮮甜無腥味，真材實料無味精無添加，湯入面有白菜、鱈雪豆腐、豆腐，全部吸收晒個湯嘅精華，真心讚不絕口！😋 手打黑白墨魚丸 ~ 都係自家製，入口軟腍腍食落好彈牙，入面仲有 d 墨魚碎粒增加口感，同時又有滿滿嘅墨魚味！😋 水餃皇 ~ 同樣都係自家製，皮非常薄，同時入面好足料，名符其實皮薄餡靚，蝦亦都好大隻同爽口，比起一般市面食到嘅大隻好多，重點推介！！😋 手切本地A級肥牛 ~充滿濃郁嘅牛味，加上師傅起雙飛嘅切法好有刀功，又可以增強口感，絕對係啱晒我口味！…查看更多

是日 happy hour 完飲多幾杯之後就好肚餓要搵野食，沿住灣仔酒吧街行見到呢間好有傳統美式漢堡包店嘅感覺，仲要買一杯啤酒送兩件雞翼，好吸引！呢度越夜越熱鬧，好有氣氛 🥳😋 雜菌蘑菇芝士漢堡 ~ 呢排食得太多牛，所以想試下專為素食人士而設嘅 “素食漢堡”。煎香嘅蘑菇扒有好濃郁嘅菇香味，風味獨特，多汁有口感，搭配埋芝士真係好正！😋 魚柳漢堡 ~ 魚柳好厚身，炸到外脆內軟，而且肉質好夠 juicy，有驚喜！Upgrade 做套餐有半杯啤酒 + 黑松露薯條，好邪惡呀 😈😈 另外再加咗份經典水牛城雞翼，香口又惹味！…查看更多

原來 The Grill Room 星期一至日午餐時段都有半自助餐，每位由 $98 起，價錢係非常之吸引！有自助沙律吧、薯仔沙律、長通粉、炸雞粒、薯條、迷你蛋糕，呢 d 前菜同甜品都係任食，至於主菜就有九款選擇，包餐湯同飲品一杯。店內燈光昏暗好有情調，環境同座位都好舒適，而且佈置有格調，適合情侶約會 / 商務聚餐。😋 香煎三文魚柳伴意大利飯 ~ 三文魚柳好夠厚身，外皮煎到金黃色十分香脆，魚肉亦保持嫩滑，而且意大利飯又濃郁又 creamy，硬度適中，加上充滿粒粒枝豆，令口感更加滋味豐富！😋 是日精選炭燒牛肉 ~ 叫咗三成熟，燒得剛剛好，肉質鮮嫩粉紅，仲有好香炭燒嘅煙燻味 😍 …查看更多

之前見呢間壽喜燒喺網上嘅討論度都幾高，位於太子又好方便，所以一早 bookmark 咗要嚟試下，見今日心情唔錯，一於下晝就食個豐富壽喜燒開心吓先 😌😌店內採用木系裝潢，牆上佈滿和風嘅圖案，感覺好似入咗一間日式小酒館咁~ 每款牛肉都好吸引，想食飛驒牛但油花比較重，怕 lunch 食會太 heavy，所以最後揀咗肉味比較濃嘅「近江牛盛二人餐」！~ 近江牛 ~ 被稱爲日本三大最優質和牛之一，果然名符其實有好香好濃郁嘅牛味，肉質細膩，油花分佈均勻，帶少少香甜嘅風味，而且入口即融，好有驚喜 😋😋另外仲有澳洲全血M9+和牛，都係有好香濃嘅牛肉甜味，口感軟嫩，越食越滋味！二人餐除咗包括以上兩碟和牛外，仲有野菜拼盤同一支細清酒，真係大滿足呀！…查看更多

繼續發掘香港嘅日式居酒屋~ 之前經過灣仔小巷偶然見到間幾有特色嘅餐廳，上網一 search 原來係由日本人親自主理嘅東京過江龍居酒屋！店內環境舒適，充滿濃厚嘅日本風情，氣氛一流 ❤️ 呢度主打沖繩料理，無論食物或飲品都有好多選擇，好適合收工後同朋友過嚟 chill 下！前菜係每人一份日式蘿蔔炆牛腩，好淋身好入味 😋😋 沖繩苦瓜釀免治雞肉 ~ 一向都幾鍾意沖繩苦瓜，口感爽脆，味道唔會太苦澀，係慢慢滲出苦瓜嘅甘苦味，釀入免治雞肉又幾香口！😋 吉列芝士火腿三文治 ~ 好邪惡嘅三文治！炸至金黃色嘅外皮，中間夾住流心芝士同火腿又濃郁又惹味，滋味無窮！叫咗多款串燒如雞皮、雞屁股、雞軟骨、雞肝，另外仲有明太子薯仔沙律、燒明太子、獅子唐青椒、雜錦天婦羅等等，每款菜式都係咁出色！…查看更多

原來喺香港都可以用親民嘅價錢食到高質法國菜！位於灣仔小巷嘅 Odelice! 由法國人主理，店內裝潢採用法式小酒館風格，店員親切友善，有一種家庭式嘅溫馨感覺 ❤️今晚叫咗個二人套餐，有餐湯、兩款小碟 (頭盤/甜品)、兩份主菜。是日餐湯係南瓜湯，味道香甜濃郁，充滿天然嘅南瓜香味，口感綿密順滑，味道唔需要太複雜已經好好味！😋 蟹肉牛油果他他 ~ 牛油果上面鋪滿鮮甜嘅蟹肉，配搭最底層嘅蕃茄蓉，味道好 refreshing，又清新又開胃！😋 法式烤黃雞 ~ 一上菜已經隱約聞到誘人嘅香烤氣味，雞肉皮脆肉嫩又多汁，伴隨特製松露野菌醬汁，野菌味道好香濃，加上香滑綿密嘅薯蓉，令層次更加豐富！😋 阿根廷安格斯肉眼牛扒 ~ 三成熟煎到剛剛好，外焦內嫩，仍然呈現嫩粉色，而且肉味超濃，滋味感十足！😋 火焰橙酒可麗餅 ~ 上菜嘅時候會將橙酒淋喺可麗餅上面，燒出火焰令視覺同味覺都有雙重享受，儀式感滿滿的~ 有陣陣嘅橙酒香同焦糖嘅香甜，配上雲呢拿雪糕，每一啖都充滿甜蜜滋味，絕對係必點嘅法式經典甜品！叫咗兩杯都係以 white rum 做基酒底嘅 cocktails，有酒精感得嚟好好飲~ 🍹 Blackcurrant Colada ~ 係 Pina Colada 嘅變奏版，配搭黑醋栗果酒、椰奶、菠蘿，豐富果香味啱晒女士飲用。🍹 Green Apple Mojito ~ 青蘋果果蓉帶來酸酸甜甜嘅味道，口感好 fresh~~…查看更多

位於 SOHO 區竟然有間咁抵食嘅西班牙餐廳！仲要星期一至日 12pm-7pm都係 happy hour 時段，對鍾意飲酒嘅朋友嚟講絕對係好消息！呢度有 outdoor 座位，不過今日咁熱都係坐返入室內先 🤣😋 蒜蓉鮮蕃茄水晶包 ~ 西班牙水晶包外脆內軟，配上酸酸甜甜嘅新鮮蕃茄蓉，清新開胃又非常香口！😋 煎無骨雞腿配黑松露沙律醬 ~ 雞腿外皮煎得好酥脆，而且保持到肉質軟嫩多汁，配搭醬汁更加風味十足！😋 蕃茄蓉煮西班牙腸及鷹嘴豆 ~ 帶點鹹香嘅辣肉腸好夠香辣惹味，加埋新鮮嘅蕃茄蓉同鬆軟嘅鷹嘴豆，味道濃郁又有口感！😋 西班牙炒飯 ~ 有 16cm 或者 26cm pan size 可以揀，兩個人食 16cm 啱啱好，有新鮮嘅青口、大大粒蝦、魷魚、豬腩肉，真係勁足料！甜品點少得酥脆香甜嘅 Churros，配埋 Nutella 榛子朱古力醬，成件事好邪惡 🤤🤤…查看更多