月巴藤藤子的个人专页

聽聞土瓜灣有一間人氣特色咖啡店，咁啱又經過，時間尚早，不如試下。果然未見其店先見其「龍」，攞左張飛喺門口等位，等左一陣，服務員好貼心咁攞左啲花茶俾等候嘅人。門口有個富電影感嘅「Nutsgazine」大玻璃窗，喺窗前影相成為客人指定嘅動作。水吧枱伸延至餐桌，上面仲放左幾個冰滴咖啡壺，沖調師即席沖調各式飲品，與客人成一片。店內播住柔和嘅音樂，氣氛輕鬆。我地點左意式特濃咖啡，用ESPRESSO 小杯盛著香噴噴，香濃口味，略帶苦味，最適合與甜品同吃，感覺諧和。甜品方面，我地點左綠茶棉花糖法式奶凍，棉花糖甜絲喚起童年回憶，綠茶奶凍上面放滿紅豆蓉同朱古力粒，口感豐富，惟奶凍嘅綠茶味可以再濃啲，咁就PERFECT哂。來到呢度又點可以錯過窩夫呢，果然名不虛傳。呢個芒果窩夫配芒果雪糕個窩夫熱辣辣，外層脆卜卜裏面軟充滿蛋香，配芒果同朱古力醬，香香甜甜，冷中又有暖，口感多樣，正。咖啡嘅甘苦與甜品嘅香甜，棉花糖嘅輕軟跟奶凍嘅濃厚，窩夫嘅暖同雪糕嘅冷，香脆與軟滑，百感交集，就是等一個人咖啡的滋味。…查看更多

韓國食物唔單止平民化嘅炸雞同啤酒，仲有韓國燒烤一直廣受香港嘅飲食男女喜愛。如何在芸芸韓國燒烤店中跑出，相信只有在環境食物同服務方面著手。嗰日我就去在一間用心經營嘅韓燒店，環境方面裝修精緻，座位寬敞舒適，通風良好;食物方面就用上高級食材，帶出地道風味;服務殷勤細心，好到有啲唔意思。我地點左一個A套餐，包括一個韓式沙律、泡菜、烤特級牛肋骨、烤雞肉、秘制燒豬頸肉、什錦石頭飯、鮮盆及雪糕，價值638大元。韓式沙律同泡菜辣辣地好開胃。韓燒緊係唔少得前菜，有我最愛嘅甜味薯仔同麻醬菠菜，正呀。到主角出場嘞，服務員會即席將原件牛肋骨喺你面去骨分體，切成小塊。佢地仲適時出現替我地服務，添茶同清理枱面，態度殷勤上等牛肋骨用特製醬汁醃過，十分入味，燒起來香甜之中帶淡淡油香，肉嫩多汁，滋味難忘。秘製烤豬頸肉，十分惹味，秘製汁醬令味道得以提升，而且份量頗多。服務員會即席將呢窩材料豐富嘅石頭飯拌勻呢間韓燒店可愛之處，就係其他配菜方面一絲不苟。佢地除左前菜之外，仲會附上青辣椒、蒜頭同韓式燒烤醬，食出地道風味。客人仲可以加錢加個蔬菜籃，裏面有羅馬生菜、青瓜、紅蘿蔔同紫蘇葉，用傳統方式細味韓燒，清新調和不油不膩。來之前以為呢間韓燒店做團購，食物同服務都"打折"奉上，點知食品同服務都絶不欺場。今次真係物超所值，實是一次愉快嘅韓食之旅。…查看更多

喺一個星期三既下午，由於一啲公事去左鰂魚涌，卒之可以抖一抖，雨下了一整日，心中總係納悶。正在盤算去邊度好，行呀行去到海澤街，見到有間小小既餅店，設有座位，仲有好多款甜點選擇，不如入去歇一歇。店員服務週到，見我狼狽地忙住收遮，她連忙同我接過水溜溜既遮並放好，又慢慢解釋每種產品既口感，富耐性。我坐低喺靠牆一邊既吧枱，都可座上幾個人。甜品櫃裏面放左十多款甜點，色彩繽紛，款款都咁靚，都唔知點揀。上次朋友已經外賣過鎮店之寶Mont Blanc俾我試過，不錯，相信其他款式都同樣出色，等我今次試下其他先 。我要左一個Cake Set，可選一款甜點同一款式飲品，盛惠60大元。Pink Lady (單點$42)，外層係Rasberry味皮，酸酸地韌韌地，內層係白朱古力同Raspberry味慕絲，酸中帶甜又有點朱古力既香，好似初戀既感覺咁，口感多樣。仲配埋清新既熱玫瑰綠茶，早將心裏屈悶一刷而空。走既時候，我仲外買左件Lemon Tart (單點$40)俾我男友， 撻皮酥化唔油膩，面層lemon醬西檸夾雜青檸香，下層薄薄一層朱古力中和酸味，口感平衡，十分清新，最啱悶熱既季節食嘞，食完之後心情即刻好番哂。店員仲特登加多個手抽，以防雨水沾濕甜點，真細心。…查看更多

喺同事嘅介紹之下搵到呢間位置方便，座位寛闊，又適合大班人聚會嘅清靜地方。坐落喺集成中心對面，一幢商廈嘅二樓，好易搵。步入餐廳即時感覺一種古雅秀氣，裝修以翠玉為主題，地板門框都透出微微綠光，賞心悅目。設有兩間貴賓房及兩張獨立圓枱，夠唒私隱；普通枱同樣闊落，用上絲絨梳化，夠哂舒服。打開餐牌琳琅滿目，心大心細，全部都係新派菜式。我地緊係聽同事講訂位時，訂定招牌菜冰鎮咕嚕肉，果然名不虛傳，外脆內軟，脆皮帶傳統拔絲效果，肉嫩無骨，冷暖交雜，令人回味。隔離枱叫左升級版咕嚕肉，分別在於多左脆糖裝飾同増量水果，影相效果一流。另一代表作與別不同灌湯脆皮墨魚丸，亦相當出色，香脆外皮配彈牙墨魚肉，丸中間灌以鮮味湯汁，juicy茶香燻雞值得一讚，茶香四逸，外皮燻得脆脆嘅，成隻雞都冇乜肥肉，雞肉出奇咁嫩，正正層層疊係食得架，疊疊煎藕餅甚具鄉村風味，鮮味豬肉碎加爽口蓮藕粒煎得脆卜卜，不錯。玉桂蘋果安格斯牛柳粒，玉桂蘋果粒清新可口，惟獨牛柳粒帶梳打粉味，略為失色。石鍋紅燒野菌金磚豆腐，剛送上枱以為係魚塊，細看那薄薄一層灰黑部分原來係特別鋪滿紫菜絲嘅豆腐塊，就是這一層紫菜令平淡嘅豆腐帶來甘香，見廚師心思。海鮮什菜煲大大盤的，但玻璃獻厚左啲，水準一般。小食方面，我地叫左八味魷魚鬚，脆皮薄不油膩，魷魚肉好似做過按摩咁，彈牙而不韌；芥香木耳伴海蜇，wasabi 風味加上木耳海蜇爽口， 刺激食慾。椒鹽豆腐椒鹽脆皮很薄，豆腐香滑，一啖一粒正。甜品係脆皮薑汁炸鮮奶，外皮薄薄又脆卜卜，軟滑牛奶薑味濃郁，為豐富盛宴作完美句號。十人慶生飯，十一道菜，每人都唔駛百七，實在物超所值。最緊要就係一班人齊齊整整談天說地，有美食又有舒適環境，一樂也。…查看更多

病病地又冇乜胃口，最好食啲有營養又零負擔嘅食物。呢間食店用料十足，又平平地，呢次係我第二次幫襯。位於食階之中，坐位不算多，但勝在實際。我地叫左兩個超值套餐，餐包括一個足料湯品、一個中日韓丼飯同一個和風小吃，每個都只係$45。番茄雜菜海鮮湯，濃湯茄味爆燈好開胃，仲有吸滿湯汁嘅薯仔同雜菜，有大蝦同帶子，一碗熱湯令我不適嘅鼻同喉平服過來。另一碗係忌廉雜菜雞肉粟米湯，用料同樣出色，雞肉大大塊，淡淡粟米味。主食方面有和風五目飯，有高纖牛蒡同紅蘿蔔，有咬口；用上珍珠米，煙煙靭靭，全是天然味道。另外一個係甘栗番薯飯，栗子番薯香甜軟糯，微甜嘅丼飯，最適合女仔食。小食方面，我地揀左香脆煎餃子同魚片炒蛋，普普通通。兩人晚餐消費共$90，係性價比高嘅健康食店。…查看更多

打完羽毛球累累地又冇乜胃口，食啲light light地又平平地，就最好嘞。隱沒喺馬頭圍道地鐵工程地盤旁邊，一間低調小舖，一直為街坊們提供地道又住家嘅口味，只需付出廿幾三十蚊就食得飽飽嘞。我聽過朋友仔介紹之後，一直想試下。舖仔細細坐到廿人，我嘅精明眼俾個$29麵餐吸引住，我地要左個淨菜肉雲呑餐，包豆漿同時菜。淨雲吞有八隻架，皮薄餡多，有菜味但冇乜味精味，住家風味，不錯。另外仲叫左擔擔麵，仲可以要唔辣版本，真䀡心。花生湯汁夠香，肉碎炒過更香，麵底又多又彈牙，夠地道。晚飯點可以冇甜品，我地仲叫左豆沙煎餅，係改良版嘅，四小件唔散口，豆沙全部喺脆皮入面，不油不膩。二人吃晚飯，埋單只需$70，大滿足。…查看更多

香港嘅台式食店成行成市，每間店都不斷改進食物素質及增加款式，改善服務水平，但只有呢間連鎖店，卻令人愈來愈失望。早前喺網上見到有呢間連鎖店嘅團購外賣下午茶餐券賣，諗住支持吓，去左農圃道分店。入到舖內員工態度散慢，我地在沒有招呼之下自己搵位坐低。由於行到有啲累，於是問侍應我地可唔可以加啲堂食嘅食物，並將團購外賣茶餐轉堂食，答案係「唔得嘅」，何等僵化。我地只好要左個抹茶吐司堂食，坐一陣，之後再歸家吃外賣。抹茶吐司不錯，外脆內軟，抹茶味奶味兼備，值$19大元。團購外賣下午茶餐包一杯$24蚊以下飲品一杯，及$29蚊以下台式小食一份。我地揀左抹酸點子、蜜柚點綠、花枝丸同大塊雞。大塊雞肉好薄，夠脆但冇乜味。花枝丸好啲，有啲花枝肉，3大粒但唔夠鮮味。抹酸點子味道有啲怪，仲有啲膠味。只有蜜柚點子keep到水準，酸酸甜甜，質地似沙冰，點子份量足。…查看更多

熊貓熱潮襲捲香港，我都唔執輸去元創方探熊貓，順便試新野。行到熱辣辣，最好搵個地方食個lunch，一行入去係花店同時裝店，田園風格裝飾賞心悅目，Cafe 就設喺一角。餐廳設室內及室外區，室外雖然有玻璃頂同風扇，相信冬天時用餐會較適合，今次都係坐室內嘞。堂座雖然數量不多，但坐椅舒適，設計特別，等一陣都值。食物方面，柯打左期間限定Panda Suzette，熊貓造型Kawaii, 柑柚味道嘅果醬同雪葩，清新可口。可麗餅煎得很香脆，內餡充滿甜橙肉同香脆杏仁粗粒，酸甜軟脆口感多樣，果然好似熊貓咁純真可愛。什菌意大利粉午餐配伯爵茶，意粉彈牙，什菌新鮮，香草忌廉汁恰到好處不油不膩，不會黏口，正。伯爵茶用上Twinings 茶包，一整壼慢慢歎。食物提示器，讓客人可以喺坐位舒舒服服等食物，埋單$166，收費尚算合理。…查看更多

行完街街肚仔餓，荷包乾乾地，要慳住食。喺銅鑼灣要平平地食一餐，無八九十蚊都落唔到樓，呢間食店係其中一間可以用50蚊食得飽飽嘅。喺堅拿道天橋附近嘅小店，舖面細細都坐到二十多位，係舊式開放式廚房，有種特別嘅親切感。座位空間尚算寛敞，不算太迫。柯打左牛腩雲吞米，柱侯醬汁入唒牛腩裏面，又淋又夠味。雲呑大大隻，用四隻鮮蝦同鮮肉包成，又爽又鮮，皮薄餿靚。米粉軟硬度恰到好處，不錯。大大碗雙併都只係30大元。我一向奉行有營飲食，要左碟通菜，腐乳醬不會太多，大大碟只需$13。埋單只需$43，就有一餐平民級美食，只要識得搵，總會喺鬧市搵到食。…查看更多

「日航」酒店再見鳥，喺改名之前，總想懷緬一下，於是喺最後一日嚟呢度飲下野。柔和昏暗嘅燈光襯托五彩星光，仲有pop music，輕鬆舒服。預訂時講左要窗邊位置，我就可以舒舒服服坐低，其餘窗邊位已於八點前坐滿。夜幕低垂，寛大嘅落地大玻璃窗讓維港景色盡收眼底，好浪漫呀。晚上5-8 Happy hour 買一送一，我地要左世盃特色雞尾酒The Samba，菠蘿果香、薑啤及羅勒香辛刺激，香甜清新，富熱帶風情。食物方面，安排左牛肉漢堡包配薯條及沙律，牛肉厚厚嘅，鮮嫩味美，同半溶車打芝士及酸瓜碎，口感豐富好滿足呀。Fish and chips 厚魚柳鮮嫩幼滑，用薄薄脆皮包著，恰到好處，薯條脆卜卜，正。美味食物配醉人夜景，過了一個好愉快的晚上。希望酒店易手之後，可以保留呢個好地方，一個城市嘅綠洲。…查看更多

未到餐廳先見等待嘅人，我都即刻攞飛先。原來以為要等好耐，點知等左10分鐘就有位嘞。舖內以彩色繽紛嘅塗鴉裝飾，柔和燈光襯，氣氛輕鬆。仲有小量卡位同梳化位，適合幾個人用餐。點左一個蛋白牛肉蛋包飯，蛋白嫩滑，牛肉份量頗多，汁底濃郁香口，配以茄汁飯嘅酸甜清新，互相補足我地仲點左三文魚水煮蛋多士。對於我呢個芝士迷嚟講，呢味菜真係正，就算等15分鐘都值得。水煮蛋蛋黃汁充沛，面頭仲有一層溶溶地嘅芝士，下層脆脆多士，多重口感，大滿足。仲有兩件薯餅，一杯焗豆同沙律，份量十足。食完之後，原本想坐多陣，不過見外面有人等，都唔好意思坐，盛惠$217。…查看更多

大熱天時總喜歡食濕濕地嘅嘢，喺鬧市之中要食啲特色嘅嘢洗費就起碼過百嘞。不過經過我嘅精明眼留意到佐敦廟街有間低調嘅小舖，兩個人食晚餐唔駛$150。 呢間麵店日式舖面設計，裏面設計透出日本小舖風情。座位舒適，空間充足，都算靜靜地。招牌橫濱醬油拉麵$58大大碗，叉燒肥瘦均勻，醬油湯底濃郁唔油膩，溏心蛋夠流心正醬油魚介拉麵湯底有淡淡魚鮮味自家製煎餃子，皮脆餡多，不錯價廉物美，所費無幾，免收加一，$150有找，性價比值爆燈。…查看更多

下午茶食多左，到晩飯時間想食啲清清地嘅嘢，於是諗起佢舖內裝修簡單樸實，冷氣充足，大熱天時入到嚟都好涼爽。水餃款式樣多，有韭菜、三鮮、菜肉、牛肉同白菜冬菇餃，仲可以香煎同上湯煮，我有啲心大心細。我問店主嬸嬸可唔可以雙拼，佢都特別整俾我，實在太好了。最後我地點左上湯三鮮餃拼牛肉餃、担担麵同時菜。三鮮餃啲蝦肉大大粒，應該係用鮮蝦做嘅，加埋肉碎同韭黃真係鮮。牛肉餃料足，自然味美，沒有其他店的味精味，餃子皮厚薄恰到好處，充滿家的味道。担担麵麵底彈牙，麵醬冶味帶層次富花生同豆味，感覺自然舒服，味道不錯。用心經營的小舖，用最好嘅材料，發揮天然嘅味道，才是家嘅味道。…查看更多