心之回憶的个人专页

之前叫過一次外賣，啲雞係ok嘅但今日再嗌呢，就出晒事喇：搵啲下欄部位拼湊成一盒，骨位又多肥膏又厚，雞翼啲毛長長幾條都唔清，咁嘅質素話自己專賣雞？ 定覺得外賣客唔係客所以先畀啲咁肉酸嘅雞我？！大陸是但搵間食雞嘅都好過呢間！…查看更多

料唔新鮮，用料下乘，個盆菜喺雪櫃拎出嚟嘅。鮑魚係罐頭鮑，鮑魚同蠔豉都好細隻。蝦唔係海蝦，只係基圍蝦；花菇亦食唔出係日本菇，冇花菇應有口感，只係普通貨。西蘭花好難食，唔知雪咗幾耐；超多黃芽白，連菜頭都冇切。最好食係芋頭，連蘿蔔都唔索味，淨返大半盤蘿蔔同菜。我記得係舊年堂食串燒，個老細吹到個盆菜好好食先幫襯，結果竟然係咁，真係好失望。寧願你收我貴啲，好過俾垃圾我食，一年先食一次，唉！同埋2022年呢間嘢先話自己啲盆菜日日新鮮整唔留過夜，點解去到2024年變咗冰鮮盆菜，賣嘅時候有冇同個客講聲？ 咁樣算唔算違反商品說明條例同存心欺騙顧客？…查看更多

自問都算餃子達人，出名嘅，誇區嘅，都食過。見長沙灣開咗間新嘢，專程揸車出去會一會。餃子款式不多，得5-6款，而且冇得雙拼，所以要兼賣串燒幫補。我叫咗椰菜餃，男友叫咗芫茜餃，另外再加兩串串燒。本來係冇諗住出食評，但真係想俾啲意見呢間小店，所以張相都係食食吓先影。湯底好出色，我淨係見到湯渣有粟米，應該仲有其他配料，所以成個感覺非常清甜，令人有衝動飲晒。餃子分兩parts講： 1. 餃子皮，略厚。個皮似美味餃子店，但本人鍾意甜記/餃掂嗰隻質地，個皮厚雖然會增加飽肚感，但當同個餡唔match時，就好似皮還皮，餡還餡。特別係食到後段，可能湯熱浸得耐，有兩隻穿咗。2. 餡，唯一值得讚係椰菜非常幼細，唔似甜記咁食到勁大舊椰菜。但！！！成隻餃子係冇味，我唔知係成個廚房嘅人味覺出現問題定點，係好明顯食得出冇任何調味！（男友嘅芫荽餃都話好淡，但比我好少少）咁同店員反映，佢話之前食過無問題，仲話食得出椰菜同豬肉味😂食材天然味道同seasoning係兩回事呀好嗎？😅如果改善返呢個問題，我諗呢間嘢都可以encore, 否則個湯再好飲都係假。而串燒係好食的，比較細串，但新鮮燒，肉同調味都ok…查看更多

之前幫襯過大埔堂食，幾好味，係貴咗少少。今日經外賣平台第二次幫襯，兩款共12隻餃子連運送費要$145首先講個湯：蕃茄薯仔魚湯，湯夠熱，但好重胡椒味，魚唔新鮮多腥先要落咁重手辟味，呢度扣晒分。我諗應該冇人飲揀蕃茄薯仔湯想飲到胡椒味？咁不如我飲胡椒豬肚湯仲好？白菜豬肉餃正常，但多肉少菜，比例失衡；最失望係個所謂招牌「黑松露鮮肉餃」，唔覺有肉，就係一堆菇拼湊而成，餡唔飽滿，有酸味，餃子破皮。水準差成咁，真係唔會再幫襯！…查看更多

唔知係咪唔會有人專登上嚟為章魚燒寫食評，但真係好想喺度表達我嘅高興同讚嘆。今晚剛好路經登打士街，見呢間鋪新開，憑強烈感覺覺得會好食，叫咗原味章魚燒，卒之等咗20分鐘，夠晒新鮮。雖然唔係巨型章魚燒，但賣相好好，深啡色表皮燒得恰到好處。最驚喜係冇大量粉漿包住，每舊裡面都有2-3粒大章魚，比例分配平均，既完全食到章魚嘅煙韌，又食到外皮嘅焦脆，滿分之作。因為好快食晒冇影到相，希望呢間鋪keep it up, 下次嚟都食到咁好食嘅章魚燒💪🏻…查看更多

呢間cafe走西餐廳路線。星期日晚，人客唔多，環境光潔明亮，人少適合靜靜用餐。叫咗：龍蝦湯+38海鹽焦糖咖啡千層麵心太軟龍蝦湯好明顯飲得出係罐頭開，因為有啲texture未溶；咖啡飲唔出有海鹽味，個拉花ok因為唔係好多餐廳有千層麵，所以有啲驚喜。賣相好吸引，用料都好正宗，裡面有茄子同肉碎，呢道菜基本上無得挑剔。唔知廚房係咪趕收工，呢道甜點嘅decoration係冇嘅，我見人地啲相又藍莓又薄荷葉又玫瑰花瓣，成件事唔夠專業，不過個心太軟係正常嘅。服務方面，侍應姐姐態度好好，用餐過程舒服，唯獨冇主動幫客人加水（如果要收加一呢樣嘢唔可以忘記）。廚房佬真係完全放工mode，大大聲講粗口連樓面都聽到。總結：$230包晒咁多嘢性價比其實可以，不過細節位要再多加留意改進，先吸引到回頭客。…查看更多

話說某日見到社交平台有個沙嗲牛肉麵關注組，裡面差唔多每日都有人推薦濃姐茶餐廳，講到唔食唔安樂，結果我真係專登去新蒲崗試。首先想講衛生真係麻麻，枱邊有明顯污漬，應該好耐冇清潔。環境一般，不過最緊要啲嘢好食。其實下午茶先去到，人客唔多，理應出品比較用心，可惜剛好相反。除咗腸仔之外，其他都整得好求其。-蛋白唔熟，落唔夠油煎，個底大部分啡色，賣相完全唔討好。-牛肉冇沙嗲味-個麵硬嘅，唔爽唔彈食落冇味37蚊的確好平，我寧收貴少少比返啲好食嘅嘢我，重點唔明點解有人推薦。…查看更多

平日下午茶時段嚟到，冇乜人，清雅恬靜，所有裝潢擺設都有中世紀外國餐館之感，有用心機。叫咗杯比較特別嘅飲品，賣相唔錯，味道正常。收$158，帶子唔係珍寶size, 有啲失望。最大問題係個意粉，接近完全冇味，本身烚嘅時候冇落鹽，然後青醬落得好少，成個sauce好稀，係我喺餐廳食過最難食嘅意粉。成灘水，意粉水太多，醬太少。雖然超市一瓶青醬唔係平，但都唔使慳成咁。環境係好好，如果有下次，只會試蛋糕唔會叫主食。…查看更多

知道呢間點心店新開，見到OP幾篇食評都有讚，咁啱屋企有事出唔到街，於是經FP叫外賣。圖中有樣嘅呢幾樣點心都係有問題嘅1. 先食蝦餃，通常蝦餃唔得其他都唔會好得去邊🌝蝦餃啲皮勁厚，啲餡又唔飽滿，蝦肉偏韌，唔夠新鮮。2. 燒賣有浸奇怪味道，都係餡唔新鮮，仲要有勁大舊肥膏喺面。3. 雞扎好唔正宗，未見過用粟米芯做餡，雞肉嚡口，味道偏淡。4. 叫叉包變菜肉包，初頭仲諗點解叉包咁細個。呢個菜肉包都係超古怪，裡面勁多薑，一聞好大陣薑味，當然唔會好食啦。其實咁嘅質素學咩人開店呢？我相信今次唔關堂食定外賣事，希望師傅練好手勢先，同時希望食客唔好昧著良心讚好。…查看更多

上次同朋友嚟完，整體幾好，但今次好明顯差咗。最明顯唔得係粉絲蝦煲嘅蝦，就咁睇落有芫茜遮住好似冇乜嘢，一夾隻蝦竟然成隻蝦肉同殼係完全分離。明燈下睇得好清楚，蝦殼黑色，蝦鬚唔剪，究竟啲蝦放咗幾耐呢？雪貨之中用品質最差嘅，隻蝦仲要一開二，錢唔係咁賺的。幾道菜中得粉絲味道係幾好，其他都唔會想再食。其實啲蝦咁嘅樣係可以當場投訴，不過諗住冇下次就慳返啖口水算啦。聽朋友講呢間餐廳因為某種顏色所以開咗年幾就超多人識，而且愈嚟愈旺，要提前好多book位，雖然香港人好多都唔識食，但咁嘅質素對唔對得住你班支持者呀？…查看更多

一場嚟到平日下午3點都仲有人龍排隊，因趕返工最終外賣，買咗豬豬出前一丁（豬膶+肉片）、一份細醉雞卷、一杯跟餐涼茶，盛惠10X大元首先唔知兩位男老闆去晒邊，煮麵同樓面都係女仔，唔知係咪咁影響水準。個麵一打開已經見到個湯好稀，連帶個麵都係冇味嘅，只有好淡嘅薑味，我叫出前一丁連味粉都唔落。麵煮得淋，豬膶又少少韌，完全唔係漢記嗰種爽口彈牙，而且醃唔夠味。醉雞卷係好淡偏甜嘅酒味，冇乜特別。涼茶係好飲嘅，真係少甜。因為太失望，冇影到相，但愈諗愈覺唔值先上嚟打食評，如果食物質素係平平無奇真係唔使專登去。…查看更多

本來一心想去隔籬間西餐，但人地早收，唯有試吓呢間。首先唔知點解，落埋單都冇人比水我，望住佢地喺我面前行嚟行去，就係冇呢個sense 有個唔知係咪第一日返工嘅炒散，上龍蝦湯唔識比餐具人，我叫佢埋嚟仲係唔知發生咩事。然後望住個senior, 亦唔發現我冇餐具飲湯，到開始嘈之後先話頭先好忙。大佬，你得幾枱客，請問忙乜嘢？無論侍應及廚師，都在水準以下，真係請都唔會再幫襯！…查看更多

見到呢間點心店一個負評都冇，又係新開，今日專登過嚟試。一個人叫咗5個點心一個燉湯，總數206，性價比唔係高，不過如果好食都唔會太理價錢。姐姐入咗機後放低張單，話夠98蚊有2隻鮑魚燒賣送（206即係4隻），當刻係有小小驚喜。然後我根據點心送嚟嘅先後次序逐一點評皮蛋瘦肉粥：好多料，但粥係飯粒狀，一啲都唔綿，而且唔熱燉湯：正常，但好細碗酥炸蘿蔔糕配千島醬：諗住係新整法就試下，點知佢只係將一塊厚切蘿蔔分開3條，厚漿炸完再配重口味千島醬根本唔知自己食緊乜，咁樣收三十幾蚊！黑松露蝦餃：4隻有2隻皮爛，偏細隻，蝦唔夠飽滿結實，餡料與皮之間明顯有空位，基本上食完蝦餃都知呢間嘢師傅唔掂。薑蔥牛柏葉：最正常，份量合理黑金流沙包：說好的流沙？3個包全部冇流沙！食物質素差不在話下，差唔多食完同姐姐講我啲鮑魚燒賣未嚟，佢望完我張單好疑惑，又走咗去問佢阿頭，佢阿頭答佢「好似上咗」，返嚟咁覆我，又問返我轉頭。我即刻反問佢：咁你即係覺得我屈你地啦？可以開閉路電視睇返。佢地見我咁大反應，即刻補蒸比我。（我唔明呢度啲人點做嘢，廚房出過啲咩自己冇記錄嘅咩？）喺呢件事之前，已經有對面枱投訴，話睇見海報寫住「下午茶68折」先入嚟，但佢冇為意係下午3點先開始，因為行字好細，結果佢落咗單先發現差三分鐘，啲職員提都冇提。我作為第一次幫襯嘅客，更加唔會知啦，埋單時先望自己張單，發現寫住14:58:58。差一分鐘零兩秒嘅時間，我要比多六十幾蚊茶錢，職員又係零提示。咁樣做生意法，真係祝你長做長有！…查看更多

多次經過，看見人氣旺盛，及後知道是黃店，無論如何都想光顧。4點半左右去到，要等位，最後被帶至2樓，完全是普通cafe的格局，感受不到文青風。一心想試意粉和飯，疫情關係不做晚市沒有飯，意粉也竟然賣光（想問意粉很難重新預備嗎？）只剩下三文治、漢堡等選擇，最後迫於無奈叫了all day breakfast+咖啡。不需要技巧的all day breakfast, 炒蛋無味，司華力腸及煙肉微溫，唯有沙律和牛角包好吃，咖啡也是小杯得可憐，兩三口就喝完。吃完也不飽的一餐，竟要178大圓，走時見到兩三位店員坐在鄰桌玩手機，這也配收加一嗎？最值得讚是負責入座的店員，十分殷勤，笑容可掬，除此之外真的沒什麼特別。其實還有很多小店值得光顧，這種只有名氣沒有實力的店試過一次便算了。…查看更多

打著石磨的旗號，著實教人期待。可是，出來的效果卻是本人吃過最難吃的腸粉。粉皮本身沒問題，但餡少，不新鮮、口感差，影響了整碟腸粉的配搭。最敗筆是那個不倫不類的豉油，稀如水，且味道古怪，相信擁有正常味蕾的人不會再選擇光顧。…查看更多