le1123的个人专页

好耐無約過好友堂食，咁啱有人生日打算去慶祝，之前食過，環境又靚，食物又 ok ，唔知係咪轉咗手差咗好多!因為有買生日蛋糕，一坐低就已經要俾 $50切餅費，我未享用過任何服務已經叫人俾，ok 算，咁俾啦。 好快嘢食已經到，蛋捲味道不過不失，豬腳份量好多，但味道好似我阿爸煮咗幾日嘅隔夜餸咁。到切蛋糕先好笑，店員攞咗2次都唔係我地買個個蛋糕，一句話雪櫃無喇喎，但真係唔係我地個蛋糕，點食啫。然後店員黑口黑面咁入去再搵過，話放咗入廚房喎，咁啫係無雪過成餐飯都，真心第一次慶生食到咁無癮，奉獻各位慶生千奇唔好去!…查看更多

阿嫂生日，每次家人生日都總係想買 1 d 特別嘅蛋糕，今次都唔另外，成日經過朗豪坊，都見到呢間餅鋪，今次一於試下啦。買咗原個開心果戚風蛋糕，屋企人好好評，因為唔多 cream 之餘，又食到淡淡嘅開心果味，d cream 又唔會太漏。 蛋糕入面仲有細細嘅開心果碎，仲保持得幾濕潤，而且topping嘅紅桑子又唔會太酸，平時食蛋糕好怕食到面個 d 生果，因為驚好酸。$400/ 一磅，如果再平 dd 會更吸引，不過都夠一家6個食。 下次會再試其他口味架呢。…查看更多

星期日游完水經過九龍城，好想食1 d 甜嘢，個肚又餓，個時5點幾，唔多人，又唔洗等位，所以即刻衝入去食啦。次次去到都會叫蓮子百合清心丸，今次都唔例外。 不過好多時清心丸都會無貨或者買晒，但好好彩個日有。 清心丸好爽，蓮子浸過好甜，天氣好熱，叫咗凍，但唔想有d 冰粒係面，老闆話可以加 d 馬蹄沙或者腐竹，我鍾意馬蹄沙多d 就加咗喇，不過加加下就貴咗要 $45。 黎到 d 料好多，食完好飽，水準依舊，狂我無特登行過去食，一定會再去食 😋😋…查看更多

男友去咗灣仔上堂，我 open rice睇下有乜想食，見到呢間有任食沙律吧，好似幾吸引，公司又賣緊佢嘅優惠券 ，用$80就買到 $100。 先軟後奏，買咗2張卷再說服男友食呢間啦 (因為佢覺得係 gimmick 嘢，唔抵食)我地6點幾到咗，係第二枱客。 沙律吧仲係原封不動無人食過。 有甜品/ 生果/ 沙律同凍盤，我地叫咗2個主菜，分別係豬肋骨同黑松露野菌意大利麵。沙律吧嘅青口好大隻，不過好咸，食開重口味嘅我食咗1件都夠。 煙三文魚反而ok 唔咸，其他菜沙律就一般啦，甜品都幾好，不過都偏甜。出去夾咗2轉主菜都到，豬肋骨真係好乾，overcooked 咗，伴碟薯條好熱似係啱啱炸起。 意大利麵就好食d , 個汁煮得啱啱好，不過食得多會漏，個麵嘅硬度適中。試一次就好，應該唔會翻食了。(P.S. 食個日啱啱洗手間無廁所水，要食客自己"不" 水沖廁有少許不便。)…查看更多

地方係闊，選擇係多。 可以用 whatsapp 訂枱超方便，個場幾大，唔洗坐得好迫。 個場中間有得自助拎凍海鮮/ 前菜/ 生果係好，但勁漏單呢。漏單問題幾嚴重，寫咗3次羊架，先上得一次，仲要 overcooked 好似食擦膠咁，咬極都咬唔開。 點咗幾次翠玉瓜串燒，最後食飽都無上過，失望。 本身都寫咗1 d 火灸壽司，到最後都係無黎過。剌身好新鮮，清酒煮蜆唔會縮晒水，仲可以任食 haagen dazs 同 movenpick 雪糕係開心嘅。 飲品嘅選擇都好多，有酒精無酒精都一應俱全。價錢唔平，2個人食咗5百幾，不過會唔會再黎食真係要諗諗先。 …查看更多

唔係同事推介都唔知 lunch推出 主菜加semi buffet任食都係 $8x 至 $1xx 不等，好抵食。semi buffet有好多唔同種類嘅蔬菜，仲可以任食薯條同炸雞，真係食前菜都食飽，未到主菜都飽咗7成。 仲有兩款湯，蘑菇湯睇落好稀，但飲落好濃，正啊。叫咗4個主菜，分別係海膽明太子意粉，卡邦尼焗飯，炸軟殼蟹焗飯同鮮茄焗黑豚肉飯。 明太子意粉最好食，其餘個d 太漏喇。 又或者因為食咗 semi buffet bar 都食唔落。 如果係女士嘅可以叫少個主菜淨係叫沙律吧 share 黎食，都已經好夠飽。又抵食又好食，一定會再黎。…查看更多

生日壽星想食粥底邊爐，本身想訂另一間，個間d 時段唔啱，1係太早6點，1係就太夜8半，見到呢間食評幾好，一於試下，仲可以用 openrice 訂枱，夠晒方便。我地自選咗牛肉片，豚肉片，手打蝦丸，花膠仔同雞肉。 用計時器食晒d 海鮮再慢慢食自選配料，d 海鮮好新鮮，食到 lam lam 脷。份量都好多，食到尾再放南瓜同芋泥蓉落去煲，另外再加碟油炸鬼，真係飽到棒住個肚走。P.S 鋪頭有d 細，如果多人要坐迫少少。 同埋唔收切餅費，可以坐底同壽星切埋蛋糕影下相先走。美中不足係坐咗係風口位，成晚吹住個頭。…查看更多

尋日同男友行完山，又攰又餓，本身諗住食陳_記，但又係多人到爆。 去到禾輋商場，見到呢間，有鐵板燒，望落ok 入咗去食。 坐底叫咗嘢食先再 open rice下，發現喊多過笑，心感不妙。 不過都坐底又叫咗嘢食，都照食架要，都唔係咁差啫。幾位侍應都好後生。 坐低無耐，我將d 刀叉擺晒落一杯熱水到浸一浸，點知重得濟，將成杯水倒瀉咗。 無發生要自己出去拎布抹嘅情景，侍應都好幫手咁拎布黎抹，都無黑我面，之後都有再"針" 多杯水俾我地。嘢食都好快黎，我叫咗雜扒餐加蒜蓉汁，正正常常啦，不過d 菜配料係凍架，d 汁睇落唔吸引，好似d 嘔吐物咁，不過食落 ok架。…查看更多

讀中學時間唔中 lunch 會走黎食，好難得約返4個中學好友平日放工黎一齊食，食嘅唔止佢嘅味道，仲帶住一絲絲回憶。叫咗南乳雞球米線/ 炸豬扒米線/ 椒鹽肉排撈麵 同墨丸撈麵。 4樣嘢入面有3樣都係炸，熱氣到爆，雞球同豬扒份量好多，配埋撈麵就好乾，米線份量都好多，不過撈麵份量得好少，兩啖就食晒。 價錢都越黎越貴，以前廿幾蚊，宜家要三十幾，不過食嘅係回憶，讀書時 d 畫面乜都返晒黎。(P.S. 食完之後成晚都好口乾，第二日即刻喉嚨痛，回憶呢d 嘢都係間唔中好喇😂)…查看更多

平日晚約咗閨蜜行街睇衫，而佢仲有10日生日，想俾個 surprise 佢，靜悄悄咁同佢慶生，好好彩即日打去 book 有19:45呢個時段嘅一張枱，當然book 定先。19:30去到，係唔可以先入去，係出面門口有櫈坐咗陣，等到20:00 先入得。 鋪頭入面都少少迫，枱同枱之間無乜位剩，不過裝修好日本，好似去咗日本咁。 係門口等咗好耐，係出面都聞到好香，所以快快手睇 menu嗌嘢食!!!!兩個女仔，叫咗一個蟹蓋、 一個魚生飯、一個泡菜豚肉鍋追加一個烏冬、一份燒魷魚同埋一份蜆。先係蟹蓋 ($5x)同魷魚($8x)黎到，會有職員幫手燒，不過佢地係好忙，放低呢碟就好快走咗，又要等另一個先黎開火幫手燒，之後想麻煩佢拎杯水黎，好快又無咗回事。覺得最好食係呢個燒魷魚，燒得好嫩，唔會好乾，覺得佢燒到啱啱熟，放落口都只係微暖。好快魚生飯 ($15x)都送到，最好食係帶子，其他魚刺生無乜味，靠食個豉油，下次未必再叫魚生飯了，寧願加多份海鮮用黎燒。泡菜豚肉鍋都 ($15x) 黎到，呢個正正常常啦，份量普通。加多份蜆 ($50) ，睇住佢燒個過程好得意，由未熟到開口，不過中間發生小意外，就係佢開口時爆汁彈到少少落我塊面到，無彩無彈到眼，燒呢個時要小心，職員燒嘅時侯加好多清酒落去，結果得好重清酒味，隻蜆本身都係無乜味嘅。同閨蜜食完都覺得成晚好口渴，可能係個泡菜鍋太重口味啦。 兩個人食咗五百幾，希望閨蜜鍾意今餐啦。…查看更多

唔知老闆係咪1988年出世，又或者1988對佢地有d 乜特別意義，所以餐廳以此命名呢。上星期同幾位好友食飯做冬同慶生，揀咗呢間1988，地址少少難搵，係觀塘工廈入面。 好彩事先約埋朋友一齊去，由觀塘行過去要d時間。壽星女未咁快到，我地先叫住 d 嘢食。叫咗:1. 串燒 雞豬串各二 (每人分到一小件，點埋醬好食d ，都幾入味)2. 肉碎炒飯 (有少少辣，份量幾多，5個女仔一人分d ，都分到兩細碗)3. 小食拼盤 (有蝦餅，春卷，乜都有d , 每樣都試到件，趁熱食好d)4. 炸軟殼蟹青芒果沙律 (好開胃，軟殼蟹好大隻，酸酸甜甜，份量都唔少)壽星女黎到，追加:5. 咖哩牛柳條 (好味丫，咖哩唔係太辣，牛柳條好冧，但又唔會煲到無晒味，我因為有濕疹戒食牛肉好耐都試咗，牛柳份量唔多，一人一件架咋)6. 炒金邊粉 (普通啦，茄汁底，少少油)7. 蒜蓉包 (要等一陣先有得食，幾香蒜味，啱啱焗起好香脆)8. 因為買咗蛋糕，要叫一樣甜品先可以唔洗收切餅費，叫咗西柚蒟蒻配蜜糖撻 (記住要兩樣一齊食，就咁食其中一樣會過酸/過甜😌)呢晚食得好開心，臨走侍應係門口擔心我地唔識路仲"教路" 添。 P.S. 觀塘工業區夜晚有d 靜，如果係女仔嘅，建議幾個一齊行。 …查看更多

二哥生日，佢係pizza express 會員，話生日月份去食有免費甜品送，於是上網即日訂位。 記得有次係沙田分店食過碟扁意粉，口感好潺，對佢印象麻麻，不過今次二哥話想食，無所謂啦。三個人叫咗一碟清酒蟹肉意粉，一個小食拼盤同埋一個肉醬 pizza。個清酒蟹肉意粉食到真. 蟹肉，撈匀食好正，媽媽食到停唔到口。 pizza個面有d 脆脆，同埋有提子乾，少少甜，幾特別。小食拼盤有 parama ham ，芝士粒，煙三文魚，細塊印度薄餅，味道偏咸。係食到7788時想叫侍應上埋甜品，但佢叫我 speak in English喎，hmmmm 我唔係唔識英文，但如果真係有d 英文唔太好嘅黎，咁叫佢地點算。-_-算啦，唔理咁多，甜品又靚又好食，為今餐帶黎完美句號。…查看更多

放工黎到，時間尚早，又唔洗等位，係門口見到餐牌，價錢相宜，就去試下。叫咗滑蛋鰻魚丼飯，無記錯係 $55 ，男友叫咗五色魚生丼飯，好似 $7x，仲叫多咗個小食芝士年糕。每個丼飯包熱茶，麵豉湯同前菜 (胡麻醬菜沙律)。嘢食好快送到，等咗只係5分鐘，麵豉湯好濃味，啱晒重口味嘅我。滑蛋鰻魚丼飯，d蛋好滑，仲有金菇，鰻魚份量都唔少，個汁甜甜地，d飯都幾多，整體好好味。芝士年糕啱啱炸起就上枱，好熱辣辣，d芝士"必"晒出黎，不過食一件就夠，有少少漏。最後埋單三樣嘢加埋 $200 到，係附近好難搵到咁抵食喇宜家👍…查看更多

天氣漸涼，同中學老友好耐無見，係各大社交平台都見到唔少醉翁亭嘅報導，好似幾吸引，星期五晚 happy Friday 一行四個女仔去咗試。朋友於早一日訂枱，去到個場幾滿，職員帶我地左穿右插，穿過大堂d 大枱/ 卡位，帶我地去到較隱蔽嘅角落位置，自成一角都 ok。去到揀湯底先，怕熱氣嘅我地揀咗冬瓜瑤柱湯底，唔洗一陣湯底送到，真係好足料，有一絲絲嘅瑤柱絲浸底。 再過多陣限定花膠炆冬菇送到，睇落好靚，但食落花膠炆得唔夠淋，無乜味。 限定水餃真係好足料好大粒，入面有4粒蝦超爽口。之後刺身同海鮮拼盤都送到，刺身厚切，食落幾新鮮，海鮮拼盤都好多，幾吸睛。 我地另外仲加咗其他嘢食，都好快送到。 食物選擇幾多，味道唔錯，見到成枱美食，好滿足。食咗大約四分一後，可怕嘅事發生咗 😱😱😱😵😖 我係枱面角落發現一隻大約三分一手指尾大細嘅曱甴，我同佢只隔一隻手掌位，好驚佢會爬咗去我到😰😱😵 有圖有真相，佢先係圖片右下角，係食物隔離爬過，再爬上牆，我地覺得好唔對路，即刻想搵侍應，但因為坐隱蔽位，侍應好少行過。我地提心吊膽咁等，一方面好驚隻曱甴會跌落d 食物到，一方面又好驚佢會爬咗過黎有親密接觸。好辛苦先有侍應走過黎，隻曱甴都唔知爬咗去邊，緊係快d同佢講有曱甴啦，點知佢第一個反應係: 下，我地啱啱先噴咗藥。 但宜家唔係我屈你，真係有隻曱甴係到爬來爬去架嘛。 佢無再做d 跟進行動，亦無諗過殺咗隻曱甴。 由於坐係到太不安，又唔知仲有無其他曱甴，我地要求調枱，但佢竟然話個場好爆拒絕咗，然後就出咗去。我地好忐忑不安咁企咗係到，係真係企咗係到，見住隻曱甴爬黎爬去😱😱😱 再過多陣，又有侍應姐姐送食物俾其他枱。 咁再同佢講有曱甴啦，佢竟然仲驚過我地: 丫，我都好驚曱甴架，唔好叫我，我出去搵人。最後竟然係由隔離枱勇敢嘅男食客走黎拍死咗隻曱甴，相信佢都睇唔過眼啦。再等多陣，經理黎咗，表示出面終於有枱可以俾我地調過去，咁都好d 。食物質素係 ok，但環境就太差喇😖…查看更多

同好友相聚，好耐無食壽司好想食下，見呢間入咗 open rice 10大，搵晚放工打電話 book 定枱去試，點知好普通啫。 去到都坐唔滿，有好多吉位，櫈下有個籃可以放袋，設計幾好。 三色丼係幾好食，有蟹肉，海膽同吞命魚蓉，份量唔算多，2個女仔 share 黎食都勉強夠嘅，蟹肉同海膽都好新鮮，不過價錢偏貴 ($168), 另跟麵豉湯同茶碗蒸。 茶碗蒸好有水準，好豐富，入面有冬菇，蟹柳同白果，仲好滑添。 (小插曲: 一開始茶碗蒸個碗出面有條頭髮痴住咗，同侍應講換過另一碗，感覺先好少少)另外仲叫咗特選壽司拼盤，嘩，呢個出晒事。隻蝦個蝦頭流咗d 汁出黎，好腥，整到附近d 壽司，尤其係隔離件玉子壽司都好腥，好唔新鮮嘅感覺，即刻唔想食😰😵下次唔會再叫壽司了。…查看更多