yuyuleeeee的个人专页

啱啱去完旅行兩個月，想食返啲香港地道嘅食物，所以就特登嚟大壹燒鵝食燒味。大壹燒鵝有別於一般燒味舖，裝修更有心思，更以Tiffany blue為主色～大壹燒鵝滋味全餐 （$78）單拼同雙拼同價，我哋就揀咗貴妃雞同䗼蹄。套餐仲包括一碟油菜，一碗絲苗白飯同埋老火靚湯。老火湯冇乜味精，飲完都唔會口渴。油菜份量適中。䗼蹄微酸開胃，啱晒夏天食。貴妃雞雞髀肉嫩滑，滿意！燒味三拼（$108）我哋叫咗油雞、叉燒，仲加咗$30轉燒鵝。油雞一樣係雞髀，而且鹹淡適中。叉燒燒得啱啱好，有少少燶邊，肉質軟腍，鹹中帶甜，正！我地仲額外叫左碗河粉（$20），麵質微韌，一d都唔軟爛，期待以上！…查看更多

餐廳位於K11，位置方便，裝修風格少女得黎又熱帶，一入到餐廳已經比中間以玫瑰金同植物為主嘅bar枱吸引住，唔怪得平日晚餐時間都有唔少人排隊~泰式冬陰功湯粉（$128）金邊粉幼得黎好有咬口，麵質值得一讚! 冬陰功湯入面有蝦，蜆同魷魚，飲落幾惹味但係幾辣，加椰漿就可以中和翻啲辣味～炸原條盲曹配酸辣醬青（$188）條盲曹幾大條，份量夠三個人食！啖啖魚肉配埋上面醃到微酸嘅生果同酸辣醬青一齊食夠晒開胃，又唔會太Heavy。係我哋成餐最滿意嘅一個餸～香紅咖喱鴨胸（$168）+ 印度薄餅（$28）咖喱加鴨胸呢個組合我之前未試過，都幾夾~紅咖喱比想像中辣，唔食得辣嘅朋友要注意啦…查看更多

Burger joys 雖然鋪面細細，但食物有水準，每星期有一日有特價雞翼！仲會播體育賽事～芝士牛肉漢堡($110) + 藍芝士 ($13)漢堡包唔會太厚食到好唔方便，牛肉味濃，配埋有獨特香氣同偏鹹嘅藍芝士，正！套餐（+$42 ） 套餐包嘢飲同薯條。我哋仲額外加咗錢upgrade 做Cookies and cream 奶昔（+$32)同熱熔芝士味薯條（+$12）。雖然兩樣都都好邪惡，但同burger一齊食係perfect match！佢呢度嘅薯條偏幼，個人更加鍾意粗身嘅薯條~蒜香雞翼（$60）外皮微脆，肉質嫩滑，配埋甜辣醬，幾惹味～好啱睇波送酒😚…查看更多

屋企人生日話想食潮州菜，見咁啱搭車順路經過，所以就喺土瓜灣嘅「洪記潮州滷味」度買外賣。滷水獅頭鵝 (一斤) - $128師傅叫我哋買下庄，話包保啖啖肉！鵝肉本身一啲都唔嚡，而且都幾入味，再蘸埋醬汁咁食真係perfect match! 鵝腸 (二両) - $30本身屋企人都唔太鍾意食鵝腸，不過食落又唔太重內臟味，所以都可以接受嘅。墨魚 (二両) - $40墨魚都幾彈牙~健康豆腐 - $10估唔到呢舊豆腐都幾高質，重豆香，亦都好入味，可以嗌多啲都無妨！滷水蛋 - $5…查看更多

今晚約咗兩個朋友食飯，見好耐冇食過茶記，所以就決定去時代冰室食晚餐。二人餐 - $128蜜椒排骨炒菜心韭黃大蝦叉燒炒蛋呢個二人餐份量好大，足夠我哋3個人食。「蜜椒排骨炒菜心」味道偏甜，排骨肉質幾腍，菜心亦都唔會煮到好老。「韭黃大蝦叉燒炒蛋」相比之下就冇咁重口味，啱晒唔想食得咁肥膩嘅人。韭黃都算嫩身，炒蛋生熟程度都唔錯，不過蝦仁再入味d就好啦！海陸空·三拼·鐵板扒 - $106呢個海陸空鐵板餐分別有海(焗芝士煙肉虎蝦)，陸(牛仔骨)，空(乳鴿)，呢個組合都幾特別。巨峰·提子啫喱冰 (+$8)芒椰·蜜桃冰 (+$8)另外仲嗌咗兩杯特飲share! 啫喱冰真係好有童年回憶，好少見到餐廳有賣。不過兩杯嘢飲味道真係幾甜，唔飲得咁甜嘅一定要嗌少甜先得!…查看更多

呢間新開係銅鑼灣嘅Binlo店有唔少特色食品，我最欣賞佢嘅肉類，包括海帶清酒浸滑牛肉同宮廷格格肉，特別得黎又真係好食！佢嘅擺盤亦幾有心思，instagramable! 霸氣藏嬌鍋（$268）霸氣藏嬌鍋入面有黃油雞，花膠，竹笙，南瓜，同埋桃膠。黃油雞份量都幾多，不過最好煮到咁上下就自己拎出黎，費時老曬～入面仲有我最愛嘅竹笙，爽口得黎仲要索曬湯，仲要比三哥嗰d大條，正！湯底入面仲有好養生嘅桃膠同花膠，打Binlo嘅罪惡感都小d～海帶清酒浸滑牛肉（$98）牛肉厚身得黎又好滑，仲要有陣陣酒味滲出來，好特別！推介！宮廷格格肉（$88）豬肉厚薄肥瘦適中，意外地一d都唔韌，反而有啲爽。估唔到豬肉都可以用爽黎形容。有驚喜！娃娃菜（$48）份量比想像中多，但原來湯底入面本身已經有娃娃菜，重覆左Tim😂頑皮蘇蝦仔（$108）頑皮蘇蝦仔其實係墨魚滑包住爽口嘅鳳尾蝦，上面仲有d脆口嘅蟹籽～脆炸響鈴（$68）響鈴係新鮮炸嘅，黎到嘅時候仲要微熱同脆卜卜～…查看更多

餐廳環境好寧靜，座位間亦好闊落，坐得好舒服，啱晒放工chill下或者拍拖！所以，今次我就同咗同事嚟咗happy Friday喇～ 意大利海鮮湯（二人份）（$168）海鮮湯味道幾重蕃茄醬味，入面有有青口、蜆、蝦同埋魷魚。 龍蝦汁蟹肉天使麵（$148）龍蝦味好香好濃，而且估唔到佢仲啖啖蟹肉，值得一讚！另外，天使麵偏向幼身，夠晒掛汁～ 芝士菠菜意大利雲吞（$138）好耐冇食過意大利雲吞，所以就點咗佢～ 雖然佢好重芝士味，但食落creamy得黎又唔會好膩。而且雲吞皮亦唔會太厚。 餐包（free）反而最值得一提嘅係餐包！餐包除咗熱辣辣之外，餐廳仲會用蠟燭「座」熱橄欖油同埋蒜頭。每一啖麵包都夾住香噴噴又微熱嘅蒜片，配埋充滿蒜香嘅橄欖油，令麵包食落既唔乾，又唔會好單調！ …查看更多

Firebird位於邊寧頓街，唔會太人來人往但位置又好方便！餐廳氣氛有格調得黎又chill，好啱放工嚟同朋友傾吓計食吓好嘢！Special drink and seafood set (For 2 - $388) 呢個2人set包以下五樣野:i. Suntory the Premium Malt’s 50/50其實係Premium Malt’s同Premium Malt’s Black各一半。黑啤味道較突出，甘醇濃郁，適合配搭串燒。ii.Tiffany Sour 入面有Blue liqueur, Sake, 益力多, 菠蘿汁。Refreshing得黎又容易入口～iii.前菜 – 豆腐牛舌煮（2客）牛舌煮得好腍，豆腐亦唔會一夾就爛，豆腐同蘿蔔都幾入味，呢個配搭都幾唔錯，有日式家庭料理感覺。iv.中拖羅刺身 - 五片（原價：$198）中拖羅魚香持久又甘香～v.蟹味噌甲羅燒（一客）味噌甲羅燒食落好惹味，配埋圓碌碌嘅飯糰，啱晒打卡！雞肉串燒盛合（$138）i. 燒秋葵串唔會好似平時食到嗰啲咁滑潺潺~ii. 雞胸串 x2原本盛合會有一串「七里香串」，不過侍應話冇晒貨，所以就話轉多一串「雞胸串」俾我哋。iii. 雞腿串肉質都算滑，而且都好入味，唔錯。iv. 自家製免治雞肉棒（配鮮蛋黃）雞肉棒燒得好香脆，入面除咗有好多肉汁之外，仲幾有口感，係比較出色嘅一款串燒！脆炸日本產超甜有機蕃薯粒（$68）原本只係當係一個解膩嘅食物，但估唔到又幾好食。蕃薯粒炸粉唔係好重，入面嘅蕃薯好綿。蕃薯粒本身都幾甜，仲可以蘸一啲玫瑰鹽嚟食，令味道更豐富。不過記住趁熱食嘅味道會好好多！日本產霜降A4和牛壽喜燒連鮮雞蛋及烏冬（$278+$8+$28）估唔到食串燒嘅鋪頭都可以食到咁高質嘅壽喜燒！霜降和牛油花好靚好均勻，輕輕煮一煮已經好鮮甜嫩滑，入口即溶！呢個絕對值得一試～…查看更多

今次去咗喺觀塘海濱附近嘅西餐廳－Flames食晚餐。雖然喺牛頭角地鐵站行過嚟都要差唔多15分鐘，不過7點幾去到已經差唔多full house咁濟，所以或者book定會好啲！ 眼見餐廳都有唔少外國人食飯，所以餐牌都好貼心咁附上中英版本。有部分侍應只係用英文溝通，不過服務就好殷勤同貼心！餐牌唔算太多選擇，但係「貴精不貴多」嘛！ 餐廳有少量bar枱位，可以望住bartender調酒，特別係啲好靚嘅cocktail。餐廳仲有幾款本土啤酒可以揀，值得支持！ 避風塘雞翼 ($88)雖然鋪咗勁大量辣椒碎同埋炸蒜，但又唔會好辣，反而仲好惹味！雞翼炸得好脆同juicy，好食！ ½ 葡式香辣燒春雞配薯條 ($168)半隻嘅葡式燒春雞都好大隻，雞皮燒得好脆，肉質亦唔會好嚡，蘸埋醬汁就再入味啲。至於配菜－粗薯條，因為我本身鍾意粗身薯條，所以就啱晒我喇！糝喺面嘅辣粉好惹味，但薯條份量實在太多，真係食唔晒⋯⋯ 蟹肉香草忌廉扁意粉 ($158)蟹肉份量超級多，差唔多啖啖都係鮮甜嘅蟹肉！扁意粉幾掛汁，唔錯！ Hungry Donut ($88)佢係其中一款「香港製造」嘅啤酒，飲落好香麥味同埋花味，好好飲！…查看更多

疫情前成日經過都見到好多人排隊，一直都好想試，終於搵到一日放工同朋友一齊去試😋😋 餐廳都係以一個自助形式去經營，點餐都係自己喺門口既點餐機度㩒，不過見你唔識員工都好熱心會幫你，仲有亦會主動提出幫你換熱既鐵板！依日我地六點半食，可能因為時間早，店舖都唔多人。同朋友兩個人嗌左一個A5佐賀和牛二人前dinner set。個set既分量十足，除左有A5和牛，仲有美國黑豚、羊扒仲有安格斯牛膈肌。每款肉既肉質都十分嫩滑，真係做到入口即溶🤤🤤🤤 而我最鍾意就係黑豚，一啲都冇豬展既腥味！仲有個餐包埋兩粒帶子同埋清酒煮蜆，帶子不過不失，蜆就有少少沙。每餐既上方都會有個醬油架，入面放左基本既調味同醬汁，可以自己選擇。出面有一個自助小食吧，可以俾你任添沙律、湯、飯，絕對唔使驚食唔飽😬 最貼心嘅係仲有圍巾，啱晒我依啲食野容易整污糟件衫嘅人😅 今次係第一次試呢間餐廳，但啲肉實在太好味，已經有預感自己會encore😋😋😋…查看更多

同另一半放工之後去咗呢間喺旺角，叫「美滋鍋」嘅火鍋店。裏面嘅裝飾以「粉紅色」為主，座位好寬鬆同埋闊落，我諗就算full house都唔會覺得太逼。出面仲有個「小孩遊樂區」，啱晒小朋友放下電。 醬料區有好多款唔同嘅醬料可以配搭，比較特別嘅就有泰式酸辣醬、牛肉碎辣醬、雜菌醬等，有興趣都可以試下。另外，仲有幾款開胃小食可以任食，有雞腳、木耳、花生等，亦有幾款飯後水果可以食！ 鴛鴦鍋（$186）- 滋補養生香辣鍋＋清涼解熱雪耳椰子鍋原本以為小辣嘅香辣鍋都會好油好辣，但結果係麻香為主，平時唔嗜辣嘅都可以一試。不過我哋更加鍾意椰子湯，因為佢夠晒清甜，就咁飲都飲咗好多⋯⋯ 不得不提嘅係，呢個餐廳好甜心咁寫低咗每樣食物要淥幾耐，枱邊更加有幾個漏斗俾你計時。雖然會有啲麻煩，但至少唔會令啲食物overcooked！ 花鵰甘榜雞（半份）（$49）雞件都算幾滑同埋大件~美國安格斯牛小排（半份）（$139）半份牛小排都有大約10零件，肉味都幾濃，油脂分布都好平均，食落一啲都唔韌，值得order！ 豬頸肉（半份）（$34）豬頸肉大大塊，淥完之後都係咁彈牙爽口，正～ 軟骨爽肉丸（半份）（$29）豬肉丸入面釀咗啲豬軟骨，令肉丸嘅咬口有多啲唔同嘅層次。 炸響鈴（半份）（$29）呢度嘅響鈴好大條好長，亦好有咬口，甚至比出面買嘅響鈴更加索汁，非常推薦！ 老豆腐（半份）（$19）呢度有三款豆腐可以揀，然後我哋就揀咗呢款豆腐，食落去都幾重豆香，亦都幾索汁！ 竹笙（半份）（$34）仲嗌咗另一伴最鍾意嘅竹笙，不過有啲幾腍，有啲就有啲硬，所以索汁嘅程度就有唔同喇。 娃娃菜（半份）（$14）西洋菜（半份）（$19）冇諗過呢度嘅蔬菜嘅份量會咁大份，所以蔬菜同出面嘅火鍋店比較都算抵食！…查看更多

今晚同朋友去左食一間想試好耐嘅餐廳，Grill Room😋😋 我地都算食得早，但係餐廳已經full house，職員安排左我同朋友坐bar枱，可以睇到廚房嘅製作過程，睇住佢地煎扒、燒雞，都唔錯🤣 1. 是日餐湯 - 黑松露蘑菇忌廉湯 ($58)黑松露香味都幾岀，飲落唔會太杰。 2. 香草白酒煮青口配黑松露薯條 (1/2kg $238)先講下個青口先，隻隻都大隻多肉，味道鮮甜。另外嘅黑松露薯條好正！食得岀係即炸嘅，而且唔會炸到好乾，我同朋友都食到停唔到😆 3. 忌廉牛油蒜香雜菌 ($48)雖然呢個只係side dish，但係我地對佢真係有讚冇彈。菇嘅份量好多，煮得好creamy但又唔會太漏，配埋法包食好夾，值得一試👍🏻👍🏻 4. 燒安格斯肉眼扒配黑松露薯蓉 ($368)黎到主菜啦，食之前見到賣相好ok，一格格嘅燒網紋令佢賣相增加唔少分。我地叫左5成熟，熟度岩岩好，咬落肉嫩多汁，不過凍左之後就略嫌韌身。而伴碟嘅黑松露薯蓉好creamy好滑身，食每一啖都有黑松露嘅味😍 5. 香煎北海道帶子龍蝦汁扁意粉配三文魚子 ($198)帶子兩邊煎到金黃色，但係肉質依然好滑好新鮮；意粉軟中帶點咬口，係我鐘意嘅口感。相較之下，龍蝦汁就係正常水準。 總括黎講，所有菜式份量都好足夠，味道屬於中上水平，上菜速度都好快。坐bar枱見到其他人點嘅燒腩仔，好juicy，望落好吸引，下次再黎一定要試下😍…查看更多

Wingman雖然鋪面較細，但樓底高，裝修亦幾有feel，啱晒收工同朋友黎飲番杯chill下，食下雞翼放題！我哋驚食唔落太多雞翼，所以就選擇咗單點三款我哋最想食嘅味道～雞翼嘅口味主要分做「乾身」同埋「濕身」，姐係只係有醬同冇醬嘅分別。不過，重點係每隻雞翼都好大隻，食肉獸一定好滿足！ 咖啡香味雞翼 - 乾身（ $69: 6隻) 咖啡味嘅雞翼真係比較少見，所以就決定試吓～ 外皮烤得好脆，聞落去亦都幾香咖啡味。最令人驚艷嘅係，雖然呢款係乾身嘅雞翼，但一咬落去仲有好多肉汁，完全唔會乾過龍！而且，佢話會用「Fair trade」咖啡，咁都值得鼓勵嘅水牛城醬雞翼 - 濕身（ $69: 6隻)水牛城雞翼都可以講係雞翼界嘅經典角色，所以都要試一試佢。濕身雞翼本身都有醬，再配埋勁多雞翼肉汁，真係好正！不過，個人覺得呢度嘅水牛城雞翼比坊間偏辣少少，但就更加惹味，所以要自己衡量下「耐辣度」喇～
P.S. Menu上仲有一款「Spicy Buffalo」口味，聽聞係餐廳推薦嘅特別版本，不過我哋怕太辣所以冇試。黑芝麻海鮮蜂蜜雞翼 - 濕身（ $69: 6隻)
雞翼表面差唔多灑滿黑芝麻，好重手！醬汁因為係海鮮醬同蜜糖嘅緣故，所以味道偏甜。估唔到平時用嚟蘸北京填鴨嘅海鮮醬會用喺雞翼身上，雖然愈食愈覺得似腸粉嘅甜醬，不過本身好juicy嘅雞翼加上好惹味嘅醬汁，所以都仲係好食嘅～炸蓮藕片（ $35 ）蓮藕片好薄身，食落就好似薯片咁 ～墨西哥風薯球（ $65 ）墨西哥風薯球係成餐飯入面最impress到我哋嘅食物！估唔到有咁大盤！食落嘅口感就好似一粒粒嘅薯餅咁！可以點牛油果醬，食落就light d～ 亦都可以連埋芝士咁食，又邪惡又好味仲可以拉絲！用嚟送啤酒真係一流！…查看更多

餐廳環境頗寧靜，坐喺咁大個玻璃窗前面，好舒服。我哋叫咗兩個lunch set，包括湯，主菜同飲品，另外再叫多咗個甜品。酥皮龍蝦湯(+20)龍蝦湯又點可以唔配埋酥皮呢～ 龍蝦湯真係好濃郁，仲有好香嘅龍蝦味，唔會得死鹹味。匙羹「𢳂」到底仲有粒粒龍蝦肉，肉質都幾爽口彈牙～法式芝士浮台洋蔥湯 (+20)初頭唔知「浮台」係咩，純粹係想飲洋蔥湯先點。原來浮台就係洋蔥湯必有嘅法包，上面仲有啲熱溶芝士添！湯底好濃，配合埋超級索湯嘅法包，真係幾好飲～ 卡邦尼蛋汁意粉 ($128)Carbonara差唔多間間西餐廳都有，不過未必間間都好食⋯⋯ 呢間嘅味道就真係幾好食！佢好重蛋汁香味，意粉亦都好掛汁，所以每條意粉都好濃郁。煙肉亦煎得好香好脆，唔會燶晒。整體嚟講，佢係一碟好香嘅carbonara，都幾好食！墨西哥煙鴨胸薄餅 ($118)餐廳好大方，pizza上面有好多塊煙鴨胸！Pizza好香同好脆，不過可能我哋一開始低估咗佢嘅辣度，所以一開始都食得有啲辛苦⋯⋯ 不過，慢慢適應咗之後，反而愈食愈過癮，愈食愈好食～ 鍾意辣嘅人，絕對值得一試！蜂蜜檸檬嗌咗杯熱飲，味道清清哋，而且蜂蜜味好香甜，整體唔錯。烏龍奶茶另外就嗌咗杯凍飲，聞落去都幾香茶味，飲落好濃！芝士蛋糕 (+$25)蛋糕上面同中間都有berry醬，酸甜又冇咁膩！…查看更多

蔵鳶居酒屋嘅特別之處在於個環境。光線較暗，中間有幾盞綠色嘅日系吊燈。裝海鮮同食材嘅魚缸，水池，同埋雪櫃都擺晒喺餐廳中間，廚師亦會即場喺你面前處理食材，一目了然，食都食得安心啲。濱燒南非鮑魚 （$68）鮑魚肉質好飽滿，食落真係啖啖肉～而且燒得唔會太乾同埋煙韌，再配搭埋咸香嘅豉油同炭香，唔洗多餘嘅調味料已經好食。厚燒牛舌芯（$68）牛舌芯係牛舌最軟腍嘅位置，全條可能只係得20-30%㗎咋！牛舌芯都真係幾厚身，咬落去嘅口感好好!東風螺醬油煮（$52）我哋點咗個冷盤嘅東風螺，肉質爽口彈牙。以往都係食開辣酒煮螺，但呢度嘅醬汁甜甜哋，都幾夾！海鮮茶碗蒸（$58）茶碗蒸好滑身，完全唔會蒸得好老，味道都正常發揮。三文魚刺身（三切）（$48）坐喺bar枱嘅好處就係可以睇住廚師處理食材～雖然只係得三切，但真係每一塊都好厚身，色澤都幾好，亦都好有鮮味，推薦！燒甘薯（迷你）（$26）迷你甘薯細細粒好得意，微甜又飽肚，好啱用用嚟送酒！黑蒜燒日本腩肉（$28）腩肉肥瘦適中，油脂香同黑蒜味令到佢食落好惹味～白咖喱吉列黑豚烏冬（$98 ）份量一啲都唔細。烏冬彈牙，白咖喱掛咗喺烏冬上面令烏冬口感更加滑身！…查看更多