foodiegu的个人专页

很久沒有到台灣去了，因此我拉住朋友去吃這一家新開的台灣菜。點了筍子、蔥油撈麵、滷水拼盤、鴨舌和炸物拼盤。筍子是台灣菜的特色，爽爽脆脆的。拌麵有點偏軟身，但是蔥油很香口，蛋入味而且呈半熟微融的狀態。兩個拼盤的種類也不少，有葷有素，我最喜歡是炸物有帶蒜片，馬上能回味台灣時吃鹹酥雞的味道。香腸油香，地瓜球有點驚喜，裡面是帶餡的。飲品則是點了蘋果西打和黑糖珍珠鮮奶，回味一下台灣的飲品。珍珠十分的彈牙，不會太甜。最後加點了一份豬手，皮香不會太硬太軟，十分入味，份量也剛好。…查看更多

前幾日搵既時候已經覺得呢間名字好可愛 😂呢晚好高興同朋友們係尖沙咀共進晚餐～大廈既入口有小小tricky 一唔小心就好易Miss 左但經過微窄樓梯後上到黎會有重別有洞天既感覺！講到烤魚當然要叫酸菜湯底！除左酸菜當然仲有其他配菜，有芽菜 豆腐 等等。酸菜底好足味 魚肉烤過後仍然夠嫩！我地都叫左其他配菜 有木耳 烏冬 仲有啲蔬菜各樣食材都幾新鮮 舖頭既衞生情況都好好。我地都叫左呢個八爪魚腳 XD一炒好就拎比我地！外脆內軟就係咁解！叫左呢啲小食當然都要啤啤佢～…查看更多

食過幾次一鍋堂都係咁高水準，抵食又多款式。今次我哋嗌咗藥饍湯，好濃郁又有藥材淡香，豉油都唔洗落。之前都冇乜食到前菜，今次試左涼拌雲耳、咸蛋魚皮同泡茶蘿蔔，最中意蘿蔔，好好食又爽口，微辣非常過癮。嘢飲都好多選擇，洛神花茶都好濃郁，微酸，罐裝茶解膩。我地急不及待咁食左菜先，油麥菜好靚，淥下就食得，之後食左娃娃菜同唐生菜，一樣咁甜。我地基本上拎素菜同海鮮多，鮮腐竹配依個湯底係絕配，菇好新鮮，仲有好好好好味嘅萵筍。韭菜水餃出色，多菜少肉得黎個皮又QQ。今次有兩種貝類，細花甲同沙白，唔會太細隻。鯪魚滑同墨魚滑一樣咁高質，最重要係個蝦，生猛彈牙，同埋自製魚腐，係順德魚腐類型，好甜。環境乾淨，上菜快，又唔貴，連水都咁講究，真係抵佢咁多人又抵咁難訂枱。…查看更多

粥座火鍋食唔少，大部分都係九龍港島，難得見到元朗有得食，就約咗朋友去試下，地點方便，加上冰室格局，坐得好舒服。套餐包兩款固定海鮮，五款自選海鮮，同埋八款自選配料，最後就煮粥。非常豐富，食到我地好飽。海鮮有蟹、沙白、象拔蚌仔、蝦、蟶子、鮑魚等等，一個詞語形容就係新鮮。蜆肉係脹卜卜，食落冇沙有海水鹹鮮又有口感，唔會乾扁嘅口感，好好食。象拔蚌仔好甜，彈牙但係咬落又爽脆，同佢一樣嘅就係蟶子，唔係大隻，但勝在新鮮。佢海鮮全部都十分高質量，我地已經幻想到個粥可以有幾甜。之後嘅配料都唔差，花膠仔都有口感，墨魚滑非常爽彈，加上魚肚夾埋一齊係個新嘗試。朋友中意個薑汁皮蛋貢丸，彈牙又特別。另外嘅菇類同菜類都甘甜，配嘅生菜加埋粥到就更開心。佢比咗南瓜同芋頭份量非常的多，最尾嘅粥香甜可口。…查看更多

依間嘅酒好得，佢係本地品牌，有幾多口味可以揀，位於堅尼地城，地點都認真好chill，加上食物款式都唔少，唔只係飲酒。我地嗌咗一個啤酒set，有六款精選，由左邊飲到右邊，由淡口到濃味，佢有張紙仔寫返有咩特別同埋係咩口味，我地就偏愛第四款，之後就再點多咗杯。牛油果蓉同脆片，一向嘅牛油果香，食埋就有少少飽。我地主菜點咗牛扒，牛扒油脂厚香，煎得剛好，加上薯仔嘅皮都非常香口，我地都覺得係香港難得好食嘅牛排。雞肉配上牛油果蓉嘅墨西哥餅，配上沙律汁同菜，醬汁唔會好厚，食落好清爽。雞肉份量都唔少，加上唔會太乾，整體好味。最後我地點咗brownie配雪糕同單點咗一份柚子雪芭，brownie會淋上巧克力漿，形成一層脆皮，口感更加豐富。柚子雪芭清新解膩，整體食物同酒水都唔差✌🏻…查看更多

依間係外賣店，主打韓式料理，有飯捲、便當、芝士條同腐皮壽司，環境乾淨企理，地理位置又非常方便。本身都想食拌飯，但想食個款已經賣哂，同同事望望下就決定食依個韓式腐皮壽司。嗌咗兩個set，另外配咗飲品。佢都幾多嘢揀，有柚子茶、生薑茶、紅棗茶同青橘子茶，如果啱飲仲可以買一樽樽嘅返去沖。腐皮壽司出爐熱辣辣，我最中意係辣魷魚同辣泡菜豬肉，兩個配上傳統腐皮都好惹味，加上裡面嘅飯都有調味過，一啲都唔會單調。另外沙律就比較清新，粟米有甜味，沙律醬唔會太稠，食落唔好滯。醬燒牛肉同魚乾小仔都比較甜口，餡料豐富。成個食落都好特別新奇，帶走又方便，包裝又幾好睇。…查看更多

不嬲都鍾意食火鍋，特別係粥底火鍋可以完全食到海鮮既鮮味，最後個個海鮮粥又香。依間橋底辣蟹既新店，除左有小菜，就有火鍋食。有蟹有沙白，再揀多五樣海鮮，朋友唔食魚，所以就揀咗淨低個五樣，成盤海鮮咁上，睇落好豐富。蝦同鮑魚最為突出，鮑魚處理好咗非常容易擺入口。沙白同花甲嘅份量都唔少，心急肚餓嘅我地就分咗兩三次就放哂佢地入去煲入面，睇落去超級澎湃。我地嗌咗肥牛、豬紅、海鮮菇，後面兩樣都唔係平時成日食到嘅配料，海鮮菇特別好食同入味。再嗌咗個蘿蔔同蒿荀，溶入粥好甜。墨魚丸彈牙，娃娃菜同粟米都夠甜，加落南瓜同芋頭，冬菜、豬油渣粒等配菜，粥嘅口感更多層次。我中意佢會加嘅脆片，多咗種口感。整體都新鮮，加上地點就腳又抵食🤓可以一試…查看更多

依間喺銅鑼灣旺區登龍街嘅素食自助餐，唔淨係食素，仲係一間社企，好有心。款式都好多，晚餐有分中餐區同西餐區。西餐有pizza、班㦸、薯餅等等。我最中意就係個蘇格蘭炸蛋，用紫薯代替肉品，包住雞蛋再炸，比平時食嘅冇咁膩又健康。另外佢沙律吧都好豐富，除咗生菜等等，都有幾款水果。值得一提係自家製果乾，夠哂心思。中餐就更多元化，有薑醋蛋，唔會太硬啱哂我，唔算好濃易入口。有酸辣紅薯粉，我夾咗幾次，少少辣好惹味。另外仲有娃娃菜蒸粉絲、南瓜炆芋頭等等。佢嘅涼拌青瓜有落到蘋果醋，味道更多層次。我最中意係個炒花菜，爽口鮮甜，又係夾咗幾次。有煎堆同炸饅頭，香口滿足感大。最後糖水有南瓜芋頭西米露，椰香，加上一齊煲過，唔會話味道分離，值得一吃🤘🏻…查看更多

今日去搵新餐廳食，見到依間係玩具街再入既新冰室，見幾得意就去食下。餐單都好特別，用之前既小學生作文簿做封面，餐廳淨係做早市到下午茶，同灣仔一般食肆一樣。我嗌左鹽酥炸雞肉燥飯，換左個滑蛋食，再加左一份小食腐皮炸魚肉。炸雞熱辣辣，真係外脆內嫩，份量都唔少，肉燥唔會好稠，唔使驚好多啲汁，飯量都唔少，滑蛋都幾出色。腐皮炸魚肉好彈牙，配上泰式甜辣醬，外面都係脆卜卜。食到停唔到口🤤最後我點埋個柚子梳打，消暑解渴。…查看更多

今日忙到甩曬轆，晚餐就去附近漢堡店買咗個外賣同同事分享。奇津薯條，飽肚之選～依隻辣粉又香又唔會太辣，薯條香脆，內裡軟糯。而美式炸雞就配上左特製醬汁，炸雞皮香脆，肉質鮮嫩，配上醬汁，非常惹味。下次要再嗌呢份！再嗌咗個奇津雞翼，雞翼就人人都中意食，熱辣辣，咬落去仲有肉汁，好味！之後太忙，臨走先食到我嘅素食炸蘑菇漢堡，香脆嘅菇堡帶有焦香，配上生菜蕃茄，清爽解膩。麵包帶有特殊嘅香氣，咬落鬆軟綿密。真係快靚正！…查看更多

蒸氣海鮮近年好似冇咁興，不過依排黃埔就開咗間韓式料理crossover九重塔，我同朋友忍唔住好奇就去試下。蒸氣海鮮有幾款，最上個層係象拔蚌同肥牛，之後係元貝同海蝦，再落一層就係龍蝦，然後係花蛤、沙白同龍躉，最後係蔬菜拼盤同鮑魚。海鮮基本上都新鮮，最好味就係龍蝦同鮑魚，夠彈牙，肉質爽嫩，最爽就係貝類，份量夠多。除咗海鮮塔，出面仲有唔同小食。特別啲嘅有炸雞、辣年糕、醬油漬嘅蝦同鮑魚等等，最出色係個配菜蘿蔔，爽口帶有醬油香氣。加十二蚊就有任飲酒水，除咗罐裝飲品之外，仲有自家煲嘅竹蔗矛根同薏米水，唔會太甜，清熱解毒。…查看更多

粥底火鍋依家越開越多，又越來越多唔同款式，但係我最中意都係食有粥膽個款，落海鮮入粥水度煮熟，最後落配料同粥膽，最為鮮甜。依間喺九龍灣工廠區，有一番卧虎藏龍嘅感覺。除咗粥底火鍋，佢仲包咗一啲前菜小食。泡椒雞爪同拍青瓜，泡椒味濃，雞爪皮爽，青瓜入味。另外仲有一盅燉雞湯，加人瘦肉燉，入口鮮甜。仲有一道蒜蓉泰醬焗青口，依個口味唔常見，但係好有新鮮感，鹹香得嚟又夠乾身，唔會好笠。食煮海鮮之前仲有鮑魚食，我哋就揀咗冰鎮鮑魚，肉質爽嫩彈牙，加上處理得宜，配上胡麻醬，又係一個新嘗試。之後粥底嘅海鮮都非常豐富，有龍蝦一隻，仲要有膏，肉質鮮甜；海蝦都夠彈牙，而且又大隻；蟶子爽口，大過手掌，一樣清甜；貝類有大有細；魚件嫩滑，入口即化。仲有牛肩肉，味道唔差，唔馬虎。配料我哋就揀咗啲手工料，釀冬菇、魚腐、韭菜餃、墨魚滑，另外仲有鮮蔬竹笙、娃娃菜、萵苣，最後仲有熬粥嘅皮蛋，食到我地勁飽。食完配料，加上粥膽、葱、南瓜、芋頭同粟米，將丁塊壓爛，就煮成一鍋海鮮粥，入口鮮甜，仲會回甘。 好耐冇食得咁滿足嘅粥底火鍋，我同家姐都係捧住個肚返屋企。…查看更多

lost star 環景靚靚，野食又好食，當然要encore 💜今日下午冇嘢做，就同朋友去食下午茶。我哋嗌咗日本生蠔半打，肥美得嚟又非常新鮮，入口順滑，唔洗加檸檬都已經好好食。另外仲叫左芝士配墨西哥餅，芝士係熱鍋上，融化緊，放上暖暖嘅墨西哥餅上夾住食，加埋上面蜜糖令佢鹹鹹甜甜，食落夠特別。鐵板魷魚用酒煎過，再加上香料，魷魚爽口彈牙，鮮嫩可口，色香味都齊曬。最後嘅甜品係檸檬蛋白撻，唔會太甜，口感豐富，入口軟融。…查看更多

朋友喺尖沙嘴返工，今日未有嘢做就去搵佢食飯，佢帶咗我嚟食依間日本嘢，都幾得意，係用ipad落單。佢推薦我依個鰻魚飯套餐，我就跟機嗌咗，有鰻魚飯、刺身、茶碗蒸同味噌湯。鰻魚嘅肉身好厚，加上燒汁個惹味程度係馬上開心個種，肉質彈牙冇腥味，好下飯，成碗飯都食哂。刺身有甜蝦、三文魚、油甘魚同吞拿魚，最喜歡就係個甜蝦，黏牙綢密，個膏又好食。三文魚夠肥同滑，其他都唔差。茶碗蒸比較厚身，餡料都係一般會有嘅，好重蛋味，意外飽肚😂味噌湯暖胃，成個餐食完好飽。環境舒適，傾計一流。…查看更多

突然想食日本野，就搵左呢餐廳試一試～櫻花蝦拉麵硬麵，望落湯頭比較清淡，配料亦唔算多，但係櫻花蝦就最多，反而同個湯好夾，蝦味濃郁而且冇罪惡感！溏心蛋夠溏心，叉燒還好手包餃子煎到燶底脆脆地，仲有少少汁！鰻魚飯係一個set黎，有齊味噌湯、沙律、茶碗蒸同埋主角鰻魚飯，好豐富，飯量亦不少。茶碗蒸蛋夠滑，高湯亦都夠鮮，加埋隻菇仔同少少配料就相得益彰。鰻魚亦都入味，夠厚身，面積亦都好大，差唔多有蓋過哂啲飯，可以食到尾。燒牛舌燒得剛剛好，帶點油份又夠爽，加少少檸檬汁提哂味。好耐冇食過日式小丸子，賣相好掂，醬汁夠多，真係有粒小章魚係入面架！…查看更多