發哥粥底海鮮火鍋 (已結業)

粥底火鍋依家越開越多，又越來越多唔同款式，但係我最中意都係食有粥膽個款，落海鮮入粥水度煮熟，最後落配料同粥膽，最為鮮甜。依間喺九龍灣工廠區，有一番卧虎藏龍嘅感覺。除咗粥底火鍋，佢仲包咗一啲前菜小食。泡椒雞爪同拍青瓜，泡椒味濃，雞爪皮爽，青瓜入味。另外仲有一盅燉雞湯，加人瘦肉燉，入口鮮甜。仲有一道蒜蓉泰醬焗青口，依個口味唔常見，但係好有新鮮感，鹹香得嚟又夠乾身，唔會好笠。食煮海鮮之前仲有鮑魚食，我哋就揀咗冰鎮鮑魚，肉質爽嫩彈牙，加上處理得宜，配上胡麻醬，又係一個新嘗試。之後粥底嘅海鮮都非常豐富，有龍蝦一隻，仲要有膏，肉質鮮甜；海蝦都夠彈牙，而且又大隻；蟶子爽口，大過手掌，一樣清甜；貝類有大有細；魚件嫩滑，入口即化。仲有牛肩肉，味道唔差，唔馬虎。配料我哋就揀咗啲手工料，釀冬菇、魚腐、韭菜餃、墨魚滑，另外仲有鮮蔬竹笙、娃娃菜、萵苣，最後仲有熬粥嘅皮蛋，食到我地勁飽。食完配料，加上粥膽、葱、南瓜、芋頭同粟米，將丁塊壓爛，就煮成一鍋海鮮粥，入口鮮甜，仲會回甘。 好耐冇食得咁滿足嘅粥底火鍋，我同家姐都係捧住個肚返屋企。