TonyJarjar的个人专页

眼見前榮園麯家改左一間裝修幾特別的小食店一段時間，但政局加疫情真是有年多沒有落旺角晚飯，食市解封後晚市後，本著：裝修都幾落本，野食應該不差吧的心態一試。怎料一試，至今變了飯堂及朋友聚會的好地方。老闆的熱情及神秘的餐單，大家要試左先知緣份，但是，一間價錢不貴的本地小店，食物質素高底下，絕對一試。小店之神秘菜單，我估只要係食家老闆一定會有推介，其次，不要看輕一條後巷，租金的負擔、食物價錢及質素，絕對是一個平衡。小店的特色，我估計是要看大家對食店及老闆的緣份才能體會，大家先談食物，焗魚、鵝肝、小牛排、炸中腸真的要必試，炒麯、豆花、燒賣我會睇飽餓情況後補，直接睇圖。…查看更多

旺角有名氣或性價比高的火鍋放題都試過，見到台或火煱放題，網上有片介紹口啤亦不錯，今日星期六早場來試，選取中價的牛肉來試，埋單兩人$258。本身抱住台式火鍋，海鮮不多，又沒有任飲啤酒，沒有太大期望。環境舒服，二人都會俾張4人枱。侍應介紹下，選了牛骨湯。食材有自選丸類區或手機下單，上菜速度奇快，服務值得一讚。湯底上來，我已呆一呆，湯料本身已有很多牛腩牛骨，香味撲鼻。太太在自選區取了部分丸類後，手機點的菜已完全上枱。中價位牛肩肉已很好，其他食材款式超多，部分說是台灣直送，我基本上每樣也點了一客來試，試完之後我有半小時沒有講野，密密食，食材新鮮，特別，重點是牛骨湯底味道溶入食材中，令食物味道提升。牛筋、滑類、豬腸、滷肉飯、餃類、台灣入貨的鯛魚、牛肉係推介既。佢地既味道令我覺得沒有平時的平價海鮮也沒所謂，當晚我寧可多點一兩道台式料，也沒有選海蝦。飲品係我另一個驚喜，like餐廳FB會每人送一杯珍珠奶茶，正常味道，不是奶水個隻，另佢有4-5款凍花茶，及自選的烏梅汁，水準同平時賣3-40蚊杯的一樣，當晚我兩個人飲左4-5杯，計落抵過飲啤酒。有特色啤酒可自費。醬料充足而質素、款式亦很高，自選區質素也不馬虎，滷肉飯味道夠地道。整晚我少有地不停食，每樣試一轉下罕有地沒有一樣食物會中伏，以後旺角火鍋又多一個心水選擇。…查看更多

雖然我是少食酒店自助餐的人，但快船廊仍是我最推介的自助餐，諗住情人節提早慶祝一下，但今日確是有點失望。本身我不是生蠔愛好者，但有提供都會食半打過下口癮，早一日確認訂位前，餐廳講明生蠔會如常供應，但當晚係冇即開生蠔，換上每人兩隻波菜焗蠔。雖然味道是不錯，但每人限兩隻，我開始懷疑佢講既生蠔供應是否指這兩隻。重點二，文華出名既海南雞飯無左🤦🏽‍♂️🤦🏽‍♂️我心已沉左一半，經理話國內供應商無左，早排入法國雞，但質素不好，所以無提供，改左北京填鴨，需要質素都可接受，但一心想食你出名既文華雞飯，無左係好失落。最後一個重點，完全擊退我成晚既心情，文華出名既芝士旦糕，或基本上所有旦糕改左小件上，一寸x一寸個種，甜品選擇亦大減，我當場O左咀。食物款式都比我上次來少左一張枱既選擇，款式亦比較下價左，說實成既我感覺似旺角食放題多過文華自助餐。食物質素係合格，但無晒驚喜。另一個比較嚴重既問題係服務質素，基本上整晚我食完離枱取食物後，無一次係會回收我食完既碟。另我叫左餐酒任飲，亦同樣每次我飲晒後，都無人會自動查問或refill，這兩個情況上一次係無出現過。匯豐有8折仍舊，但如無晒個三個亮點，其實我寧願俾貴少少食港麗酒店，今晚是有點失望的。今次和我一年前既食評感覺，相差很遠。…查看更多

問心我係街坊，諗住閒食一餐，都冇諗過寫食評，相都冇影，但一陣會影張底單俾大家。廣告寫$38酸菜魚，2-3人份量，無限任叫。去到，每枱限一客，算，睇下你有幾好食。第一，上菜速度慢得龜速，6點黎到，叫4樣野，7:30都未黎齊。醉雞例牌，上菜時間15分鐘，雞肉合格，酒香不多。燻旦，$15隻，上菜時間25分鐘，一上枱原隻上，我都奇怪，一夾開，我就知咩事，根本係一隻流心旦。我老爸回應，我自己整流心旦還好食。我都想問，燻旦同流心旦都吾識分？無任何煙燻味。重話自己正宗上海菜？三鮮炒粗炒，上菜時間45分鐘，$6x，份量奇細，似湯浸，太咸。傳聞中的酸菜魚終於1小時15分鐘上枱，黎到，一個中碗，2-3人食？成碗野得6塊魚，侍應重要話係龍脷柳。餐牌寫龍躉、桂花，推廣就龍脷柳，不過算你老實。成碗野，一句完，咸菜大豆芽湯水滾魚片，真係正宗酸菜魚。最後碟肉絲炒麯，終於1小時30分鐘上枱，我已經吾想再講。寫埋寫評，都係7:38，埋單都成10分鐘。你俾錢買廣告不打緊，都要自己有實力先做啦，成餐飯俾兩老哦到暈，一肚氣，又慢又無樣好食，呢間店生存到一年的話，我俾錢再食多你一餐，又一間一期一會的餐廳。後記，埋單我忍吾住，講左句個酸菜魚差一些喔，同廣告有點出入，侍應答：係ah，廣告拍片同實際係有出入，我地為左就大眾食到，我地刻意同國內酸菜魚有分別，如果你想食麻辣既酸菜魚，我會加些味精同麻辣醬，就十足十，但我地吾會咁做。。。聽後，我無言。。。…查看更多

是晚食飯狀態，其實中午2點已食到好飽，其實9點晚上我吾食都得，家住大角咀，太太要外出食，俾佢選，見到雞煲任食，平平地諗住食一餐。入到去，有散叫，有任食。先講任食，任食普通牛15x，安格斯牛21x，牛頸脊26x一位，窩底可電半隻麻辣雞，所謂任食，都係蔬菜丸類，最靚好似係豬粉腸，無海鮮。半隻雞煲$128，一碟牛頸脊，細$198，大$288，任食加埋一成$600，因我真係吾想浪費胃口，就散叫細雞煲$128，細牛頸脊$198，加個老婆想食既薯粉$25，我叫多個粉腸$45。因真心無希望，真係相都無影，另外我對標埋個價錢，你會更明白我成餐飯心情。雞黎，我叫中辣，黎到水注注，其實我都打定輸數，但我個人較鍾意乾身既雞煲，是但啦，都係老婆食，雞煲目視，4-5個洋蔥圈，幾條蔥，冇咩香料，心諗，死得。我俾晒雞脾我老婆食，我自己食雞胸。但食落，雞胸都好嫩滑，食到15分鐘後，細火下，最後一件雞胸都吾鞋，眼突。個味雖然無太多配料，說實個汁味，係不錯。食完，上配料，薯粉我本身係吾食，可跳過，粉腸黎到得8條，牛頸脊10-12塊，樣可以，心諗，成6蚊一節粉腸，又想爆。粉腸食落，真係新鮮，冇咩冰味，收貨。牛因呢期上深圳食牛多，$198碟牛未能適應，但真心，佢既厚度同牛味，係大角咀咀多間火鍋店最好既一間，而其實，大碟牛係香港收$288，其實係合理。到最後，老婆當然食吾晒碟薯粉，我本身好勉強幫手食一口，但個汁加埋個薯粉口感，好配合，我本身鐘諗食粉麵煮到好諗，但佢個薯粉，外諗得來有少少口感，到最後我第一次食左半碟。食到最後，先真心想推薦給大家，唯有盡補相。宜定未埋單，食晒野，坐住打食評。但真心推薦下次轉食牛頸脊任食，兩個人$600，食兩三碟加埋半隻雞，都會好滿足。海鮮控不要來，海鮮眼見係零。…查看更多

土瓜灣小菜舊店，朋友訂枱，基本上都覺得吾會太伏，裝修算可以，6個人都坐得舒服，聽說後巷有露天位，但我又無行去望下，今次我坐店內。望見餐牌，大部分價錢都係50-80蚊左右，都無咩點理，想食就叫，主力搵點功夫菜試下，食評睇圖。服務算可以，至少聲線客氣，主動收碟。食物份量算標準，6人食小食就一人一件，小菜每人兩件左右，吾算大碟頭。味道有少驚喜，但未至少嘩一聲。叫左9樣野4支啤酒埋單$800，價錢合理。小店特色小菜，會再試。…查看更多

又遇一間伏店，個爐半個鐘都吾滾，我5分鐘就火滾。睇utube又話寶哥幾有經驗，食材有幾高檔，$198任食有幾抵，食評原來個個避重就輕。上到去$198說好了的任食，真係伏。坐低，侍應介紹，湯底任選，醬油蒜容另加錢，任飲另加20蚊，海鮮盤吾洗選，牛肉呢張選8款，最後呢張可以任食，自己睇。我問：牛肉那部分可以加單？無，一次過，要咩湯底？喔，我睇睇先。大哥，我剛坐底，你講完一輪，我睇都未睇，點選湯底？另原來係有限制任食，丸菜任食，牛係限制一碟。心想咁你吾好大大隻字寫$198任食啦。算，聽聞你食材高質，都一試。點完火鍋料上枱，當場呆左，海鮮每人一件，算。連牛肉也是每人兩片，鱔又係限制，兩片，最型係雞腸，兩條。我真係呆L左，心已沉一半。湯黎，Gas爐，滾左半個鐘個爐都未滾，我同太太就滾到7彩，45分鐘終於水滾，放海鮮，7樣入邊，蝦霉、貝臭、花甲死，吓，又話海鮮主打？創興$ 128任食都無限任叫蝦，重要爽，你俾兩隻都要俾死蝦我？食完海鮮，見到4片牛肉，2片鱔片，2條雞腸，4片鴨血.....已經火到黑晒臉，食物質素吾想講，只記得生平最差既$88定$98既德興火鍋，都好食過呢埋野。最後，我同太太係任食火鍋既第一次，第一次食了兩個出前一丁，食了一打餃，豆卜，這類平時食吾到既火鍋料去填肚（因為平時食牛食蝦食魚都飽晒）埋單，$480，我黑晒臉咁俾$500，寶哥都好似好有自知之明，直接俾$20我都吾R貼士，算有良心。$240一個人，創興兆萬最差個間，都好過所謂火鍋專家寶哥，大家食評吾洗咁假。我重申：$198係只任食丸、餃、菜，海鮮7款每樣每人一件，牛及非丸類肉食，亦係每樣一件，無得加單，吾好俾佢個牌$198任食昆到。PS：係後樓梯食煙時，有4-5條友都同樣話搵笨，睇黎，都吾係我心聲，一會一期。…查看更多

這間茶座不用說，食物質素已不是重點，但質疑絕對有保證，不比大酒樓出品差，食物停3點，最適合我兩點才到步的茶客，點心懷舊，鵪鶉旦燒賣、豆腐花必試。這裡好處是下午一兩點反而無咩人，靜靜地兩個人慢慢嘆下茶，享受一下郊外環境。服務姐姐超好服務，其實感覺媲美美X或X香。舊式傳統茶居，真係要多多支持，難得自家制點心，價格其實我都不太介意，風味勝於一切。與其花時間在大酒樓等位，不給坐多十分鐘車程，上來感受一下大自然環境下之茶居風味。…查看更多

話說早兩星期生日，搵左間茶餐廳式的法國菜，中伏到無朋友，今日結婚週年，都係安全些，搵返個老牌子既地方。上環一帶上樓餐廳，我試過幾間也不錯，特別是今次餐廳這幢大廈。餐廳間開兩邊地方，私隱度高，亦可能方便十零人包個細房，侍應安排左在房內靠窗枱。餐廳安排幾細心，我2人都安排張4人枱來，吾會太吝嗇。環境，燈光，合乎浪漫要求。上到來都吾想再睇菜單，餐廳有2/3/4道菜既tasting menu，最貼心既係，你可以自由配搭，吾要湯改頭盤，或加$80食多一個頭盤，呢點我係極讚，極度適合我呢種飲酒而吾想再飲湯，及又想食蟹肉同鵝肝做頭盤既麻煩客。當晚我吾太餓，和太太選了4道菜，兩頭盤一主菜一甜品。當中侍應係極細心去推介每一道菜，記住，佢係推介，吾係推銷，呢點其實一間高級餐廳既重點，當晚時令的有生蠔、藍青口、海魚，見隔離枱食晒三個時令菜，樣子不錯，只係今日實在太遲食lunch，食吾到咁多。酒款其實充足，而我因同時想飲紅白酒，就點了house wine，再一次讚既地方，係呢度侍應同餐廳都幾識做，份量都幾多，你知好多餐廳既杯裝酒，重慘過去wine & dine，差在佢未用量杯倒俾你，講真，一杯house wine 7-80蚊，你開4，都收3xx，阿差都知你house wine 貴極咩100幾十，其實吾洗太計，餐廳豪爽，我咩叫我豪爽攞。今晚最窩心係既一點，係我叫到第3杯時，佢倒完後見我黎左龍蝦及牛扒，佢轉頭係我面前開支新酒，再倒多杯俾我，話食main course 吾好飲舊酒。我心真係一種感動，吾係佢豪一杯酒俾我咁簡單，係佢真係有心去serve 我呢餐飯，而呢一句說話，我亦相信，俾你刻意去做都未必做到咁靚仔。甜品，不用說，基本功，寫字主動影相上蠟燭全部齊。特別讚個蘋果批，係侍應推介的，味道口感很特別。其實都會再來試5度菜，值浪漫食客及法菜食客來一試。…查看更多

其實黎得仙后，都不外乎張敬軒、睇裝修、聽現唱音樂，最後先會focus餐飯。環境一流，我們4位坐了包廂位，餐具用打了高級用具。一讚音響做得非常好，無回音，聲清。當晚就見吾到張生，不過沒所謂，我不是粉絲。3位主唱人功力很好，聲靚歌甜。食物就無謂講，4個人食個set，9千蚊埋單，轉頭重要落旺角打邊爐。朋友兩公婆吾太識食都講，落AMIGO都係二千，都可以食得飽喔。聽歌為主，食物為副，感覺個2千蚊俾得無咁肉赤。反正食物質素又不是太高質。…查看更多

個晚是慶祝太太同自己生日，上網搵左20-30間法國餐，其實大路出名既我們也試過，今次是想試新地方。從網上大至說這餐廳廚師攞過獎，有現場live band，環境浪漫，有海景，完全合乎要求，訂枱。上到去一出lift門，我竟然見到一塊透明膠黎做入門簾，我即時望望我有冇去錯地方，冇錯。再行入去，吾L係ah，呢度叫環境浪漫？地方細不打緊，問題係佢枱與枱之間係勁貼，坐位係硬椅，窗簾竟然係用「百葉簾」，坐底未食，已夠伏。因為塞車，差吾多7點半先到，侍應說8:30交枱，我都心知賴野，怕吾夠時間食，話晒法國菜麻，點知呢個時候侍應送上兩杯水，但係用「宜家水杯」，我和太太眼都突埋，coco duck隻杯都好過佢，呢度搞咩？算，可能食物非凡，但仍是在心亂如麻下點了幾樣食物。食評睇圖，但白膠盤，金鳳汁，原隻春雞，微型甜品，太太已黑晒臉。問題係，你吾係法餐咪出聲，如果我以食金鳳，coco duck 既心態，其實今晚係ok。小插曲，叫了3杯酒，竟然間餐廳係得二三種法國酒！其他全是智利西班牙，埋單成兩千，最後，呢餐法國餐比我食金鳳還要快，汁時8:30交枱，吾好再催我。真心，浪漫、環境好，伏。食物賣相，再伏。服務質素，三伏。食物味道，算吧，整熟俾你就叫攞獎廚師？我太太假假地都藍帶畢業。多謝攞獎廚師今年將個生日飯搞到咁難忘。總結，不。推。介。打。手。食。評。餐。廳。…查看更多

本身是青口控，青口本身吾難處理，在超級市場也輕易買到高質素的進口青口，但問題是汁底處理較煩。得知餐廳星期一有一個$195任食青口，就前來一試。選擇了銅鑼灣分店是因爲較近地鐵站，6點來到餐廳，環境不錯，高級酒吧感覺十足。坐底觀看餐牌，其實見不到有青口推廣的，心想是否已取消優惠。上網找到推廣後向服務員查詢，即時說優惠仍有。我點了一支紅酒，一杯檸檬茶，服務員建議青口先試店鋪主打味道。House 紅白酒$390起，mark價算合理，其他檔次亦有合理選擇。青口來到，原味有light cream洋蔥，味道標準，青口8成為細青口，2成有大青口，這一點期望上有少少落差，但勝在青口新鮮，煮功幼嫩，汁底味道十足。之後再試了番茄味，白酒味，地中海微辣。地中海味道有驚喜，帶點煙肉，有點咬口。另一驚喜是薯條，即炸起，脆身乾身，雖然明知飽肚，但也再追加一客。總結先不計任食價錢，青口質素，環境是值得一來，服務員亦不會因為任食而有所白眼，換碟上菜速度非常快，亦樂意建議口味作參考。其實我相信優惠是當吸網上食客居多，青口，真係好難食得飽，配埋汁底人工，真係成本價。我和太太最後食了10盤青口及兩客薯條，非常滿足。…查看更多

本身不是自助餐粉絲，但見很多人也推介這裡，價錢不高下都想體驗一下。平日晚餐，兩人枱都有一張半梳化椅，環境不用多說。海鮮盤有去殼凍蝦，凍龍蝦，麯包蟹，凍鮑魚，三款生蠔，青口。說實街市買隻蟹都百多二百元。刺身6-7款，油甘魚質素不錯，少有沒有帶子。燒牛扒係有驚喜的，海南雞飯見人見至，佢分左脾位及胸位兩盤自取，我個人就覺得不錯，似勝利道主打海南雞個間小店，太太就覺得合格沒特別。熱食十多款左右，夠食有餘，食材款式及質素合格。甜品聽說是文華主打，芝士蛋糕係無得輸，其他甜品亦見突出。服務員質素不用懷疑，收碟速度極快，加多$198有紅白酒任飲，雖然係17年澳洲酒，但兩款酒都幾出色。匯豐信用卡有折，埋單550左右一位，說實，很多大酒店式自助山比較，性價比很高。…查看更多

我家住太子，這飯店裝修前食過一餐晚餐，感覺不過不失，裝修後沒有太大衝動再試。今日行過見到$398有隻波士頓龍蝦食下，雖然要9:15後，反正食左tea，夜點就夜點，反正價性比幾高。夠鐘再到飯店，看到打左米芝蓮大廚牌頭，估計裝後可能有新班底，點了$398餐，白胡椒波士頓龍蝦粉絲，灼豬粉腸，灼豬脷，豉椒炒蜆，泥鰍粥，食評睇圖片。重點是胡椒煲一上，一開蓋再啫起來，香味已令人好想熱住都想食，可想而知大廚功力不錯。服務員好主動換骨碟，亦不時窩心問你味道如何，有需要再叫佢地。埋單兩位茶錢$20，花生$20，加一$40，$480埋單，味道十足，份量足夠，吾可以話好平，但質素合理，今次令我有回頭的衝動。…查看更多

本身是燒肉控，想來德家試好耐，睇見食評罕有地很兩極化，有點擔心，但曾睇過影片介紹，也是正評推介，最後本住二百零蚊，都來一試以作引證。我食第一輪5:30，有85折，也加了$50點選prime級牛，因口痕想食刺身，最後主餐選了$288，來多一碟刺身及海鮮盤。位置安排二人卡位，環境尚算寬敞，坐低後倒了杯清酒，合格，有hoegaarden rose 任飲，甜道偏甜個人不太喜好，飲品種類很多，大量樂天飲品，不錯。自助區食了溫泉旦，螺肉，八爪魚，標準食品，選擇款式尚可。留意一點，加了$50要刺身及海鮮盤，是每樣一碟的。來了刺身，5款每樣4片，新鮮度不錯，溶雪功夫不錯，厚切口感亦住。說實每人俾多$50，當自費食一碟刺身，心理上會好過一些。再睇下碟海鮮盤，就算吾加錢，餐單都有帆立貝，海蝦，魷魚點選的，海鮮算多了4隻蠔，兩隻鮑魚，1個蟹蓋。蟹蓋有驚喜，同日本當地食的相似，鮑魚及蠔不新鮮，有點伏。反而帆立貝，海蝦有賣點，新鮮爽口。建議大家不用加$50選刺身及海鮮盤，除非像我口痕想順便食幾件魚生。牛肉加了$50要了Prime牛頸脊，油花度不錯，肉質新鮮有牛味，較特別及推介的是有一個預先腌製的牛肉，一碗有5片，味道幾甜美，可一試。牛肉粒就比較瘦身，易燒乾。牛頸脊肉叫左幾碟，質素不差。中間我也叫了一碟基本牛來試，味道亦不錯，只是比Prime少了一點油感。燒烤途中留意到一個小賣點，枱上有支即磨黑椒粒，本身諗住都係普通野，試下落下，怎料個黑椒粒本身香味極濃，每次燒起肉後落少少，味道提升了不少。最後食了6隻帆立貝，牛肉叫了5轉，每次約16片左右，如只叫基本餐加$50，埋單$280左右。就算吾加錢，優惠後基本餐$230左右，都不難食回食材價錢。有食評說油煙味大，我覺得未算嚴重，但未至於冇味，抽風一般，始終室內食燒肉店，冇可能完全冇油煙味。服務員也是多人劣評的，但眼見上菜速度也快，冇漏單，也經常主動執碟執杯，服務我又吾覺太差。個人覺得食材、環境不錯，唯獨是不用加錢叫刺身及海鮮盤。…查看更多