Kelvin720's Profile

嚟到尖沙咀搵食，試吓啲特別嘅異國料理，上Openrice搵咗呢間巴基斯坦餐廳，裝修滿滿嘅中東風情，地方都算乾淨寬敞。餐牌係英文亦冇圖片嘅，所以需要上Openrice搵一搵圖再決定食乜。【LAMB KARAHI】我哋點咗半份，不過份量都幾多，兩個人食嘅話啱啱好，每人都分到3-4件，而且大啲係大大件嘅。羊肉冇羶味，口感亦十分好，烹調得好好！巴基斯坦嘅香料味道都幾特別，好香好濃郁但又唔會蓋過羊肉本身嘅味道，幾好食！【GALRIC NAAN】原本巴基斯坦都係食Naan，可以因為地理上係接壤印度，飲食文化都有某程度嘅相似性，Naan嘅味道同外形大致同印度餐廳食到嘅一樣，而呢間嘅Naan係一整塊原塊上，好香口好美味，配埋KARAHI嘅醬汁好惹味！正！坦白講，第一次食巴基斯坦帶住冒險嘅心情，因為唔知道啱唔啱香港人嘅口味（朋友分享去中東旅遊冇啖好食嘅經歷），不過食完發現其實好好食，鍾意印度菜嘅朋友我估都會啱食！今日Lunch時間嚟冇點太多嘢，下次再嚟試其…Read More

今晚嚟到觀塘駱駝漆大廈1座食呢間樓上串燒店！見二百幾蚊任食串燒吸引，平時食串燒真係閒閒地都幾百蚊落樓，任食又可以食得盡情啲，哈哈！除咗串燒，呢度仲有好多熟食，凍蝦、青口、各款炸物，多款小食，甚至連海南雞飯都有，其實真係食唔晒咁多。燒之前我拎咗少量炸物同海南雞飯食先，估唔到個海南雞飯都幾好食喎，細細兜又唔會食飽你，可以留肚食串燒。另外，除咗任食嘅嘢，每位會送半邊焗龍蝦、虎蝦同埋鮑魚一隻。呢度最正係部自動串燒機，識得自己轉唔驚唔記得反燒燶晒。而且唔駛成日顧住燒搞到手忙腳亂，等佢自己轉住燒嘅期間可以食吓啲熟食或者傾吓計，自動串燒機呢個構思真係好周到！串燒嘅種類都算幾多元化，豬牛雞呢啲一定有啦，我個人幾鍾意個豬五花串燒，燒到微焦勁香口，再加埋辣椒粉好惹味！另外仲有幾種瓜菜類同菇，其中雞髀菇燒完真係好正！仲有BBQ先有嘅大大粒棉花糖，真係冇試過喺串燒舖食到，久違了嘅BBQ感覺返晒嚟！仲有蒜蓉包都十分好食！120分鐘任食時間都幾夠，但係串燒始終需時，要花少少腦筋分配時間。仲有就係，部自動串燒機嘅位置都要好好分配，因為有啲串燒比較闊，如果放埋一齊會互相卡住轉唔到，開頭唔識玩我就唯有隔一個位先擺一串，但後來我發覺將比較幼嘅，例如係多春魚、車厘茄、秋葵、午餐肉粒呢啲，放喺其他闊嘅串燒中間，咁樣就可以盡用每個空間！臨走見到買邊有一間VIP房，問咗店員係可以book嘅，入邊可以自成一國有個空間，唔錯喎！…Read More

饒宗頤文化館嘅呢間悅滿軒之前嚟堂食過一次，環境同食物都十分唔錯！今日去住喺美孚嘅朋友屋企，近近哋就一於嚟返呢間試吓佢嘅外賣Pizza。可能由於即叫即焗，等咗大概20分鐘左右，都算係合理時間，好在都有位置畀等外賣嘅客人坐吓，坐咗一陣店員又畀咗杯水我飲（加分位）。食物到手後Pizza嘅香味已經湧出來，令人急不及待好想食，哈哈！拎到去朋友屋企大概10分路程，Pizza保持到溫度，一望就知係即製嘅手工Pizza，焗到微焦批邊好正，餅底屬於我最鍾意嘅煙韌口感。上邊鋪滿洋蔥、墨西哥辣椒同埋烤雞肉，呢個配搭好惹味，辣辣地好好食！卡邦尼意大利粉簡單但好食，意粉嘅硬度適中，醬汁唔會太漏，配埋香草嘅味道啱啱好。傳統法式蒜蓉包十分香脆，即使擺咗一段時間，依然都係脆卜卜，蒜蓉味亦都好夠，好香口，唔錯。今次叫呢個係二人套餐，一個Pizza、一個意粉同一個頭盤，仲有兩罐嘢飲，兩個人食都幾夠飽喎，而且只係300中嘅價錢，以呢個質素嚟計真係好抵食！…Read More

又喺上堂前喺銅鑼灣搵嘢食，C出口一出就見到嘅駱克全成幢樓都係食肆，今次嚟咗26樓呢間法國菜餐廳。裝修以月亮為主題，由門口嘅佈置，餐廳內大大小小嘅月球燈，到牆上嘅大形太空人油畫都襯到絕。座位寬敞舒適，加上餐廳位於高層景觀開揚，環境感覺好舒服。【牛油果虎蝦薄餅】每件都有好多牛油果醬，好好味！牛油果同蝦呢個配搭本身都無得輪，加埋蕃茄味都好開胃，唔錯。【封門牛柳配野箘燒汁】一上枱呢道菜嘅賣相已經好吸引，牛肉十分淋，肉味亦算濃，生熟程度控制得好好，配埋薯溶同野箘燒汁好夾好好食，唔經唔覺就KO晒成碟！【Oreo 沙冰】見到呢個配搭即刻已決定飲呢個！口感比較滑，味道都好濃，太好飲唔小心好快就飲晒，哈哈！【Little Pink Lady】西棟配梳打，感覺好清新！地點方便，坐得舒服，食物有水準，環境唔嘈可以慢慢傾計，同朋友去銅鑼灣食飯之選。…Read More

嚟咗呢間喺公司附近嘅酒店餐廳食晚餐，呢度除咗有半自助餐，仲有Set Dinner可以選擇，最後叫咗一份西冷牛扒同一份香煎多寶魚兩份食。頭盤喺每人3隻生蠔，正常尺寸亦好爽口鮮味，算係易入口嘅味道，未必太好生蠔嘅朋友都應該食到。紅酒係澳洲嘅Shiraz配Cabernet Sauvignon，果香濃郁易入口，唔錯喎！今日嘅餐湯係蘑菇湯，呢個真係要讚，超好飲！大量應該有炒香咗蘑菇切碎，味道濃郁得來唔覺有好重忌廉同粉漿嘅感覺，好清新唔膩。配埋個法包食好夾，個法包仲係熱嘅，外脆內煙韌，加少少牛油就好好食！西冷牛扒上菜嘅時候係跟一個鐵架，仲有火加熱，唔夠食食吓凍咗，幾貼心喎，鐵架唔會好熱只係微溫，所以都冇令到牛扒變得太乾。薯條分量足，冇飯落肚都食到餓晒。香煎多寶魚賣相都唔錯丫，皮脆肉嫩都幾鮮味，配埋忌廉汁同好綿好滑嘅薯蓉食感好好。呢個價錢喺酒店餐廳食到一個豐富嘅食餐都真係幾抵，而且環境寬敞舒適，間中嚟食返餐都係唔錯嘅選擇。…Read More

星期日去咗山林道間李家食下午茶，一個從外觀到入面裝修都好地道嘅韓國風味小店。之前叫快遞有食過李家幾次，覺得佢啲炸雞好唔錯，送到嚟都仲好熱同脆，今次一於再試試佢堂食！佢嘅炸雞有好多款口味，其實叫快遞都試晒咁濟，哈哈！今次我再encore我最鍾意嘅咖哩味，老婆就揀咗甜辣炸雞。呢度嘅炸雞份量真係超多，一份應該係足一隻雞，不過佢有得揀半份（但一定要叫兩個半份），兩個人食啱啱好。另外，我會鍾意無骨炸雞，只係加多10蚊，食起上嚟就方便好多！我比較鍾意冇醬嘅炸雞，食落冇咁膩，所以好鍾意佢嘅咖哩味，咖哩粉嘅香味配埋脆脆嘅炸雞好夾！甜辣炸雞都好惹味嘅，但食兩三件真係會膩。泡菜餅都好大塊，滿滿嘅泡菜同埋魷魚，不過略嫌煎得唔夠脆。淨係食炸雞會有啲膩，所以食吓泡菜餅酸酸辣辣咁可以平衡返。李家暫時係我食韓式炸雞嘅第一首選！…Read More

尖沙咀廣東道新開嘅一間韓國餐廳，一入到去就有種韓國家庭式小店嘅感覺，住位唔算好闊落但都舒適。【芝士泡菜煎餅】我又食泡菜煎餅喇，哈哈！同平時食開唔同，呢款有大量芝士喺面，勁拉絲超級芝味，同泡菜煎餅本身嘅味道都好夾，正！【餃子年糕湯】餃子係泡菜餡嘅，都幾辣吓，有五大粒幾好食！年糕嘅分量都幾多，原來諗住今晚係輕食嘅，點知都勁飽，好抵食。【水冷麵】麵嘅質地好煙韌，配上青瓜絲同雪梨片，仲有冰冷嘅湯汁，感覺好清新！不知不覺就食晒。除咗佈置，食物都好有韓國家庭式小店嘅感覺，令我諗返起一間喺韓國好鍾意嘅小店。店員同顧客都有講有笑，好親切！…Read More

銅鑼灣新開嘅泰國菜，茶記格局有大量卡位，裝修簡約舒適。價錢相當親民，精選2人套餐（$298)睇落好抵食，一於試吓！【碎肉生菜包（豬）】泰國菜必食之一嘅生菜包，呢度可以揀豬或雞肉，我覺得呢度菜最夾都係豬肉。豬肉加埋啲香料同辣椒，辣辣地好開胃！【泰式古法煲仔翅】呢個煲仔翅散叫都要$128，個SET包埋真係好抵食！上到枱可以見到上面舖滿蟹肉同金華火腿，最緊要係用「真翅」，並非素翅或粉絲，十分之足料！另外仲有一碗芽菜同芫荽畀你撈落去食，阿姐再三叮囑要撈埋落去，哈哈！同中式嘅翅真係有啲唔同，間中食到金華火腿個鹹味會彈出嚟咁，好特別吓！呢道菜我幾鐘意，下次再食呢間會Encore！【炸蝦餅】泰國菜定番菜式！以後套餐咁叫個份量會少啲，點知都係一齊碟，有八個半件，兩人食真係超足夠！彈牙嘅蝦肉配上炸到金黃色嘅脆片，冇乜嘢可以挑剔。【菠蘿海鮮炒飯】套裝可以揀金邊粉或菠蘿炒飯，散叫好似係冇菠蘿炒飯，於是就揀嚟試吓。算係好足料，份量都好多，有蝦仁、帶子、魷魚等等，係個魷魚冇乜味，其他配料都正常發揮！成個套裝真係好豐富，食埋個抄飯大滿足！【飲品】套裝唔包飲品，另外散食嘅！椰青鮮甜，椰肉未算最軟嘅狀態，但都好易𢳂埋出嚟食。珍多冰入面除咗三色啫喱，仲有大樹菠蘿肉同椰果，好豐富！銅鑼灣嚟講，少有一間好食又價格親民嘅泰國菜，絕對有潛質成為我星期三晚返學前嘅飯堂，哈哈！…Read More

食過天后嘅本店，知道尖沙咀開分店就即刻嚟試吓！店舖喺一樓，地下有專用入口，由梯間開始已經滿滿嘅日本Feel，店面比天后大得多。枱與枱之間有日式屏風，私隱度同防疫都照顧到，食得舒服又放心！【串燒】天后店最深印象嘅串燒，好有水準！今次揀咗以下三款：法式羊仔架 ー 燒得好香口，羊肉只有肉香但冇羶味。黑豚荔枝卷 ー 呢款係Encore再食！燒到微焦嘅黑豚肉好香口，配埋中間嘅荔枝肉就平衡返豬肉嘅油膩感。牛肋串 ー 肉質鬆軟，油花適中，牛肉味濃！好好食！【三點刺身盛】點咗三文魚、劍魚腩同油甘魚嘅三點刺身盛，食材真係超新鮮！！【鮮蝦青蘋果沙律】蝦都幾多隻咩！配埋青蘋果同沙律菜，好Fresh！【吉列海鮮炸串】好豐盛嘅海鮮炸品拼盤！火候控制得啱啱好，外脆內嫩，入面嘅各種海鮮都仲好Juice！【磯煮鮑魚】每人都有兩正片食到，煮得好入味又唔會韌，配菜嗰啲蘿蔔都超入味，唔錯！【鵝肝青瓜帶子海膽卷】一定要食飯嘅我點咗呢款卷物，三種食材都係至愛！！加埋一齊超好食！！…Read More

今日喺呢間觀塘工廈新開嘅餐廳食Lunch，可能新開嘅關係，12點幾去仲有位喎，唔駛等幾好。裝修係簡潔清新路線，環境幾舒服！12點幾除咗Lunch Menu之外，仲可以點Breakfast Menu喎（12:00-17:00），哈哈！【日式鰻魚蛋包飯】呢個價錢嚟講條鰻魚唔算細喎，都幾厚肉。滑蛋火候啱啱好，夠晒滑蛋味又濃。整體幾好食，如果飯用埋珍珠米會高分！【你諗啦】賣相好靚好IGable，食物好豐富，份量又夠！醋配沙律菜好Flash，蛋炒得好靚！【啤酒薯條配黑松露醬】薯條炸得好香脆，上枱時係新鮮炸起新辣辣，配埋個黑松露醬好惹味！白桃沙冰唔會太甜，濃濃嘅水果味好好飲！Flat White嘅啡底順口唔酸、奶好滑。整體嚟講真係幾唔錯，性價比好高嘅一間餐廳！舒適嘅環境好適合Lunch Time出嚟鬆一鬆！…Read More

今晚嚟銅鑼灣The L. Square食咗呢間西餐廳，一入到嚟已經俾強勁嘅音樂包圍，佈置都係同音樂相關嘅，見佢有DJ打碟位，不過今晚就冇人打碟。【卡邦尼意粉】首先上菜係意粉，醬汁好濃郁好Creamy，意粉都算幾彈牙。最特別係佢啲煙肉係一粒粒炸脆咗嘅，就係相片見到喺意粉上面嗰啲，脆卜卜配埋啲意粉一齊食嘅口感又唔錯喎！【炸魚薯條】第一眼見到真係差啲「嘩！」咗一聲，又有啲以為係唔係上錯菜，哈！原來兩條牛包咁大嘅係炸魚嚟㗎，份量真係比想像多好多！炸魚外脆內嫩，魚肉超多汁！配他他醬一流！薯條都好好食，食完呢道菜都飽咗一大半⋯【Greater Omaha 肉眼牛扒】牛扒有多款選擇，有美國嘅、齊有澳洲嘅，最後點咗美國Greater Omaha 肉眼牛扒，10安土其實都夠兩個人食喇，五成熟火候控制的好好，肉味濃又唔韌，唔錯！質數幾高嘅一間西餐廳，好適合同朋友嚟傾吓計、食吓嘢。希望吓次嚟有埋DJ打碟，氣氛會更加正！…Read More

尋晚上日文堂前又喺銅鑼灣搵食，嚟咗呢間朋友推介嘅泰國菜。餐廳佈置好靚好有格調，侍應安排咗我哋住窗邊位置，坐位好寬敞舒適。【青木瓜沙律】通常食呢度菜啲青木瓜成日都會唔夠熟偏硬，但呢個軟硬度適中，好爽脆！酸酸辣辣到惹味！【肉碎生菜包（豬）】泰國必食之一嘅生菜包，呢度可以揀豬或鴨肉，鴨肉生菜包又真係未食過喎，不過最後都係揀咗豬肉，哈哈！加埋多款香料，用生菜包埋食真係超正，份量亦幾多吓。【清蒸海鱸魚】今餐嘅主菜叫咗呢條魚，成條上超大盤！！湯底用多種香料煮成，有少少冬蔭功嘅風味，不過就偏甜味嘅，鱸魚超多肉好肥美，火候啱啱好肉質好嫩滑。除咗魚肉佢仲有豬肉丸，超豐富！【泰國露荀】平時食到嘅泰國露荀通常較幼身，呢個就比較粗一啲，不過一樣咁鮮嫩，配埋紅蘿蔔一齊炒，好清新。【蟹肉炒飯】臨尾再食埋個炒飯，其實已經飽咗一大半，呢間啲份量都幾多，個炒飯好有鑊氣，蟹肉份量都好多，配少少魚露好好食！【飲品】點咗兩杯飲品，上面都插住大量薄荷葉，無論味覺同嗅覺都係一大享受，我飲咗Vigin Taste of Maya呢款Mocktails，菠蘿味好突出！因為有蝶豆花，所以杯嘢係藍色嘅，視覺上都好特別！呢道嘅應待（同老闆？）都好好禮貌，而且好主動介紹菜色，真係有賓至如歸嘅感覺！另外，埋單嘅時候發覺原來係冇加一，見到佢嘅Lunch Menu都幾抵食，有機會下午喺呢頭要再嚟食呀！！…Read More

上星期就食咗健康印度西餐，今晚再嚟同一間餐廳食多次，不過食返正宗印度菜。咦！無嚟一個星期已經改咗Menu喎，索性二合為一，點乜都得。餐前嘅胡椒餅，兩種醬汁各自各精彩。【Butter Chicken】食返款傳統印度菜之一嘅「牛油雞」，滿滿嘅印度香味味，牛油味反而就唔重，雞肉份量都幾多吓，配埋Naan食好正！【Truffle Naan & Garlic Naan】麵粉控嘅我，又食我最期待係烤餅喇！對我嚟講佢先係主角，哈哈！今次點咗黑松露同蒜味兩款，都十分之好食，黑松露味道十分濃郁，完全唔會慳料，而蒜味嗰款再加咗芫茜，又幾夾喎！【Mix Grilled】呢道菜就有少少fusion，印度風嘅烤肉再加西式嘅薯條。有烤牛肉、烤雞同烤免治羊肉。比較少喺印度菜食牛肉，呢件係牛𦟌嚟，肉味算幾濃又唔韌，配埋少少香料烤又幾惹味喎！烤雞同烤免治羊肉係一貫印度菜嘅味道，略嫌烤得有少少乾，不過整體嚟講都好好食！唔講吓呢間餐廳嘅侍應真係好好，反應又快，見我哋食完牛油雞後又即係主動幫我哋換碟食下一道菜，好細心！餐廳環境亦好乾淨舒服，好滿足嘅一餐晚餐！…Read More

又食串燒喇！尋晚食咗呢間「噢吧串燒站」係朋友介紹嘅，佢話好食又抵食，就一於嚟食吓！店面係比較簡樸嘅街坊小店風格，玻璃廚窗見到廚師燒串燒，入面座位唔多，8點半嚟到滿坐，不過好彩等咗一陣都有位。睇一睇Menu又真係平喎，多數都好十幾蚊，真係可以盡情咗叫，雖然款式就唔算話好多同好特別，不過基本想食嘅都有齊嘅。其中最好食係雞軟骨， 爽得嚟又唔乾， 油脂位小小燶邊超正！食完再encore多兩串，哈哈！牛舌就又大份又厚身， 面層鋪咗大量芝麻好香口， 中間又唔會過熟淋身得嚟又有𡁻頭，好食！雞肉串大大啖雞肉又嫩滑， 賣呢個價錢真係好抵食！另外，羊架真係必食， 好香孜然粉味而又保留到小小羊騷味恰到好處，羊架嘅肥膏勁香每啖都齒頰留香！係邪惡少少不過間中食吓OK啦。其他例如豆卜、燒賣、台灣腸都唔錯呀！抵食又飽肚之選，我唔食菲菜嘅所以就唔評喇。整體嚟講都真係好食又抵食！…Read More

荃灣開咗間新嘅串燒店，原來唔止串燒仲有酸辣粉食！咁有幾好喎，冇澱粉質落肚唔餓嘅我，食幾多串燒都唔係好夠咁，叫多碗粉就啱啱好，唔係食串燒都食窮，哈哈！【酸辣紅薯粉】串燒即叫即燒需時，先嚟咗碗酸辣紅薯粉，我剔咗小辣少麻少酸，食一啖先發覺我應該可以食到中辣中麻，湯底好香濃，紅薯粉索晒湯，再配埋啲花生同酸菜，好正！配菜選擇都幾多，有唔同價錢嘅。【串燒】第一輪串燒上咗五款先：泰式豬頸肉搽咗蜜糖再燒，意外地好味，同喺其他串燒店食過嘅唔一樣；安格斯牛肉質唔錯，牛肉味濃；燒賣豆卜正常發揮，算係夠火候就好食嘅嘢；台灣腸幾多汁香甜。隔咗一陣再上第二輪串燒，等唔算太耐：羊架超級香，本來想食先，但超級熱拎唔到，哈！孜然粉同羊嘅肉味最夾，落得夠重手，好惹味；雞軟骨串正常發揮：金菇肥牛卷有成四件，份量好足；白鱔鮮味彈牙，燒到脆面鎖住肉汁，好好食！【炸物】波士頓龍蝦餅又幾特別，我以為入面係蝦膠或蟹柳嗰類嘢，原來佢喺類似炸鮮奶咁，不過入面係橙色嘅龍蝦濃湯；吉列海鮮卷抵食夾大件，飽肚之選。呢度嘅串燒整體嚟講好高質，唔會全部嘢都係孜然粉同一個味，所以食得返食材本身嘅味道，呢點做得唔錯！而且餐廳環境乾淨企理，而唔會好大陣燒烤味，坐得好舒服！…Read More