甜C思的个人专页

之前行過見到有新餐廳，見裝修簡約，佈置及餐具擺得很有格調，再睇埋傳單上的菜式，雖然選擇唔太多，但都好想嚟試一試!打算喺老公生日前夕嚟食，咁啱又有朋友約食生日飯，咁就一於一齊食，人多D，又可以叫多D!😆估唔到會有驚喜，食物價錢唔貴，但份量就幾多，而且擺盤都幾靚!主菜、意粉或飯加$20就可以轉餐加配餐湯、沙律同特飲，真係好抵!!!!!我地三個人叫咗兩個set、一個沙律同三個小食，放到成枱都係嘢食嗰陣真係好開心好滿足! 雖然無order到意粉或飯，但兩個主菜都有大大舊薯蓉，所以都食得好飽!呢餐都未食完，我就whatsapp約緊另外兩個friend再嚟食了!而家仲做緊新張優惠，11月30日前星期二至四晚市堂食，Set Dinner買三送一，嘩...咁就更抵食，點可以錯過，所以趁優惠期起碼要嚟食多一次!店員服務態度都好好，肥仔哥哥每次上菜時都好有禮貌，埋單離開時其他店員都有同我地道謝同say Goodbye!其實我都好耐好耐好耐無寫過食評，但見到有新餐廳如此用心製作美食，價錢又唔貴，份量又多，店員又有禮，係好應該支持一下。…查看更多

平時好少行呢邊幾條街，搭巴士都係行長沙灣道或元州街，但早幾日喺尖沙咀搭巴士返長沙灣，中途想去深水埗買D嘢，所以就喺荔枝角道嘅桂林街站落車，落車行咗陣見到呢間"麥芝連餅店"，見個名幾得意，於是就去睇下D麵包o唔ok，買定做第二朝早餐，最後我係買咗一個老婆餅同一個皮蛋酥。老婆餅幾好食，而皮蛋酥個皮蛋就好韌，其實我都好少食皮蛋酥，所以唔知D皮蛋特別韌係咪正常，但個酥餅係好食嘅 !適逢細妹生日，上次見櫥窗有個抹茶紅豆蛋糕幾靚，所以就再過嚟睇下有無其他蛋糕啱心水，屋企人比較喜歡簡簡單單的鮮忌廉雜果蛋糕，見到呢個士多啤梨蛋糕就啱晒，一嚟個樣好靚，細妹實鍾意，二嚟蛋糕外層舖滿滿滿的cream，一定符合大家的要求。原先無諗過寫食評，所以都無特別影相，不過見家人個個對蛋糕讚不絕口，食得好開心，既然店家用心製作，係值得俾番個評價，給予支持與鼓勵!👍👍👍個Happy Birthday、心心同菠蘿裝飾係自己另外加上去，餅店無提供的，雖然係咁，但其實個蛋糕本身都已經好靚，仲有金箔點綴，好elegant!味道方面，忌廉軟滑，蛋糕鬆軟，中間夾雜住一D熱帶雜果，甜度適中，好好味!至於士多啤梨🍓，因為小朋友好鍾意食，我將我嗰D都俾晒佢，所以無試到，唔知甜定酸。下次有機會要再試下其他味道嘅蛋糕先得!…查看更多

剛去完旅行返嚟,又係時候約朋友飯聚傾傾偈同派手信了! 銅鑼灣真係唔多熟,朋友提議到呢間左麟右李試下,好吖…可以試新嘢!我諗如果唔係搵食關係,真係唔會行入呢個商場呢! 坐低咗…揀嘢食先……都幾多選擇,粥粉麵飯點心甜品小菜款式多多,淨係粥麵都各有十幾廿款了,不過我地無試到! 價錢方面,比一般餐廳或酒樓貴,煲仔飯有D成$168,真係幾貴! 不過又唔係全部都咁貴嘅,好似我地揀中嗰D,都係同出面價錢差唔多又或者貴少少,可以接受!睇相見叉燒同燒腩仔都好吸引咁,於是就叫個雙拼,一次過試晒兩樣(仲有貴妃雞可以揀),叉燒軟身唔un甜度適中,好味,而燒腩仔就仲正,皮脆到不得了,又唔會有肥肉,所以食多幾舊都唔油膩,好得!!!!!落單時同咗店員講後上,店員仲幫我地換過筷子同碟,服務周到!…查看更多

香港人生活緊張,趁假日到澳門走走,放鬆一下!今次嚟澳門,打算參觀世界文化遺產-鄭家大屋,去之前開餐先,原本事前在openrice搵下附近有咩好食,諗住去南洋粿條麵食店,點知我地11點幾嚟到,無開嘅?! 又話開一至日嘅,門口又無貼字條,唔通去咗睇賽車?既然無開,試唔到,就要另覓選擇了,一於試下幾舖之隔的"老街坊"la! 其實嚟嗰陣已經俾佢門口招牌吸引住,顏色夠sharp,而"老街坊"呢個名我又特別喜歡,好有親切感!唔知點解,今日突然想飲凍咖啡……叫咗個咖喱魚餅麵,其實個碗唔使咁大,D麵上嗰陣跌晒喺底,會俾人覺得份量少的錯覺! 影相點可以睇唔到D麵呢,所以已經俾我動手腳了!我覺得辣咗D,咖喱味唔夠重,不過老公就覺得夠辣,好正!其實已經食飽,不過見到個牌同張相,有芝士的豬扒菠蘿包,咁特別,一於叫一個拎走,晏D食!不得不提的是,店員姐姐服務真係好好,我同老公兩個人嚟食,坐低咗揀嘢食,店員姐姐就醒目地額外拎多一個餐牌俾老公睇揀嘢食! 後尾有個男人嚟買外賣,叫咗豬扒包同咖喱牛肉包,因為咖喱牛肉廚房仲整緊,所以店員姐姐就提議客人改要牛肉包,當客人仲等緊嗰陣,又有另一女子嚟買咖喱牛肉麵,又係咖喱牛肉,店員姐姐就追問廚房整好未,終於整好,女客人有得叫咖喱牛肉麵之餘,店員姐姐唔使等男客人開聲,就話幫佢轉番咖喱牛肉包,真係令人覺得很窩心! 仲有個"芝朱波",我地話咗拎走,店員姐姐已經包好晒,見我拎番出嚟影相,主動話俾個碟我放上去影,咁可以靚D! 放喺碟影,真係靚好多ga!…查看更多

相約家人食飯,老公前一日才在openrice搵下有咩好食,因為尖沙咀較為方便各人,所以就search下尖沙咀區,之後就俾老公發現呢間NEW食肆了!估唔到早一日訂位都ok! 揀菜單…3選1,揀咗B餐!:)其實"源味"同我心目中的私房菜並唔一樣(雖然我都未試過),我總係覺得私房菜係會有D特別菜式,平時無咁易食到,但係佢個菜單就無咩驚喜,同酒樓套餐差唔多!不過…呢度有兩房一廳三張枱,一房一枱客,夠晒私人空間,慢慢食,傾下講下,仲唔係"私房"菜! 雖然菜式無咩驚喜,但食材新鮮足料,味道相當唔錯,姐姐服務又好好,不時加水收碟等,招呼周到,整體都很滿意! 臨走前同主廚陳生傾咗陣偈,睇佢咁後生,估唔到煮嘢食咁有水準! 佢話16歲就開始出嚟做嘢,累積經驗. 陳生鄉下係梅縣,客家人,其實可以考慮在菜單中加番D客家小菜,咁樣應該會更加吸引!…查看更多

之前上網搵下旺角有咩gathering好去處的時候找到這間Cafe,見在openrice的食評唔錯,食物賣相又吸引,所以一直想來試試! 上次約朋友聚會的時候有提議過,不過未有選中,今次同另一班朋友聚會,我又再一次作出提議,大家又話ok,所以終於可以一試!通常一般樓上Cafe地方較大,三五知己聚下傾下,對食物質素都唔會有太高要求,預咗唔會好好食,ok便可,但真係估唔到……雖然To-Gather Cafe呢度地方唔大,但總算坐得舒服,而食物味道同員工服務仲一流!我地坐低無耐,店員就向我地介紹佢地有set dinner同party餐,因為我地有6人,如果叫party餐,只得兩款主菜,而可選擇的飲品又唔夠吸引(雖然可以任飲),所以就想食咩就叫咩,揀咗一個沙律,兩個小食,4個set dinner,補錢轉$30以上飲品同另叫兩杯飲品,再跟餐加$10要蛋糕,好豐富!!!!!由沙律,餐湯,小食,主菜,飲品到甜品,每一樣都好好味,真的喜出望外! 因為店內只有兩位女店員(後尾見到有個穿圍裙的男人,唔知係咪老細呢?!),所以佢地大部份時間會在廚房準備食物,有時想叫人會唔見人,但佢地都會過一會就留意下店內情況,知道客人有需要就第一時間過來,到得閒D就自覺地巡視,替客人收走碟子,所以都感覺到佢地係重視客人需要的! 我地走嗰陣,店員除咗向我們道謝之外,我回望時仲見到店員同我地揮手講bye bye呢!有機會會再嚟食,不過都係要訂位穩陣D,因為今日坐到咁上下都full咗!…查看更多

2點幾,又係下午茶時間,行過呢間餐廳,見未試過,所以一試!入到去,見牆上的畫同埋噴上藍天白雲色彩的天花,都幾特別!睇下餐牌,難得茶餐廳有豬膶食,於是就叫咗碗鮮牛肉豬膶蕃茄米粉試下,但有點失望,豬膶"鞋"嘅!整體嚟講,食品同飲品都算OK,叫得澳門餐廳,下次嚟都係要試下個豬排包先得!…查看更多

同兩個朋友行完山,去咗熟食中心搵食,我叫咗個小辣嘅麻辣米線,朋友們就叫咗星州炒米同黑椒汁雞扒意粉,都好快就有得食la,而且仲大大碟,唔使驚唔夠飽呢! 仲有例湯送ga!店員服務都算唔錯,走嗰陣提醒我地走廊比較滑要小心,我地打算搭電梯走嗰陣,又主動話俾我地知有人維修緊,指示樓梯個方向俾我地知!…查看更多

今日係我同老公的結婚週年紀念,老公早幾日在openrice1月優惠度搵到呢間韓食,見有個$718餐半價咁抵(原價加一),所以就揀咗呢間la!呢度嘅座位都算幾舒適,我就幾鍾意店內放有書本同盆栽木架的擺設,讓人感覺舒服!個餐都唔錯,樣樣都有D,咁我同老公就可以試到唔同嘢,份量剛剛好,夠我地食飽,但係如果男士大食D,睇嚟就要加嘢la!店員服務好殷勤,個餐可以揀粥或湯,佢介紹完有南瓜粥同牛肉湯之後,就提議我地可以每樣叫一個,咁就可以試晒! 跟住又推介原本$20的蜜桃味茶做緊半價,問我地有無興趣,反正個餐無飲品,就叫嚟試下,又幾好飲wor! 後尾另一店員幫我地燒熟完D牛排同牛肉之後,先前個店員又再教我地將牛排放在白蘿蔔上,個面再放上D醃菜一齊食,除咗會好食D,亦會無咁熱氣呢!…查看更多

跑完渣打馬拉松10公里,消耗晒D體力,係時候開餐補充番了! 銅鑼灣一帶的食肆定必好多人,所以我同老公及友人一行5人就由天后一路行一路搵食,直至行到呢間餐廳. 當時未夠9點,店內只得2個食客,大家都有點猶豫點解會無咩人,但同時間又被門面及店內裝修所吸引,所以決定一試!我叫咗沙嗲牛肉出前一丁,一上枱就聞到好香la,牛肉份量都唔少,底仲有一層,肉質鮮嫰,不錯! 而老公嗰set早餐就有脆脆豬仔包+煎雙蛋+薯角+牛扒,樣樣有D,啱晒佢,咁多嘢食都係$32,抵!食物不錯,環境舒適,價錢又唔貴(不用加一),有機會再嚟試下其他嘢食先!…查看更多

今日同老公中午去咗嘉豪酒家飲茶,食飽飽之後就去咗西九龍中心行下,然後再去黃金電腦商場附近行,之後老公話有D眼訓要飲咖啡提提神,望望錶已經3點3,下午茶時間,不如就搵間茶餐廳坐低嘆茶同休息下.其實成日聽朋友講,深水埗有好多正嘢食,但我同老公真係唔熟,於是就上openrice搵食,起初搜尋到附近有間好運閣好似唔錯,但我又想搵多間比較下,之後就搵到行番遠少少的九龍餐室,呢間嘅like多D,我又鍾意佢個名,就試下呢間la!行到九龍餐室,當時門口有4個人等緊位,但因為我同老公2個人,所以就唔使等,坐咗一邊卡位. 個位真係好窄,坐低嗰陣仲膝頭頂到對面食緊嘢嘅小姐,真係唔好意思! 其實我都未肚餓,所以叫咗蛋撻+紅豆冰($26),而老公就叫咗特大菠蘿包餐($32),飲佢最愛飲的熱咖啡.剛落order,轉頭蛋撻就上枱,個面裂咗,仲要好似個笑口咁! 過多陣,其它食物同飲品都到了,可以齊齊開餐了! 呢度嘅蛋撻單賣$6個,比都幾出名的新華$5還貴,但真係貴得有道理,咬咗一啖,D蛋漿快要流下來,正!!! 至於紅豆冰,紅豆的份量都有半杯,D紅豆暖暖地,所以飲起嚟唔太凍,正啱我心意!而老公叫的菠蘿包,又真係幾特大,試咗D,個皮幾脆! 至於咖啡,老公話夠香濃,都OK!…查看更多