左麟右李粥麵小菜專門店 (已搬遷) 新店位置

刚去完旅行返嚟,又系时候约朋友饭聚倾倾偈同派手信了! 铜锣湾真系唔多熟,朋友提议到呢间左麟右李试下,好吖…可以试新嘢!我谂如果唔系揾食关系,真系唔会行入呢个商场呢! 坐低咗…拣嘢食先……都几多选择,粥粉面饭点心甜品小菜款式多多,净系粥面都各有十几廿款了,不过我地无试到! 价钱方面,比一般餐厅或酒楼贵,煲仔饭有D成$168,真系几贵! 不过又唔系全部都咁贵嘅,好似我地拣中𠮶D,都系同出面价钱差唔多又或者贵少少,可以接受!睇相见叉烧同烧腩仔都好吸引咁,于是就叫个双拼,一次过试晒两样(仲有贵妃鸡可以拣),叉烧软身唔un甜度适中,好味,而烧腩仔就仲正,皮脆到不得了,又唔会有肥肉,所以食多几旧都唔油腻,好得!!!!!落单时同咗店员讲后上,店员仲帮我地换过筷子同碟,服务周到!