EGG.K的个人专页

元朗都幾多邊爐店，但專食牛肉嘅就無乜，一於搵埋朋友去試下。舖頭就喺士林隔離，好易搵。門面同一般邊爐店差不多，入到去見到好多玩具、棋盤，裝修行懷舊風，都幾搞笑。坐低睇食乜，一路聽住歌一路用iPad點菜，有種去左k房嘅感覺～order完，店員會拎個漏斗泥計時，20分鐘以外先上枱嘅野就唔計錢。唔洗一分鐘，就泥野飲，果然好快手。菊花桂圓露，清清地唔太甜，又幾潤喉，唔錯～至於原漿啤酒，入口香甜，質感比生啤濃厚，幾特別，感覺有啲似韓式米酒。然後鍋泥喇～怕太辣所以叫左個鴛鴦鍋，一邊牛骨湯底一邊鮮青椒湯底，滿佈粒粒青辣椒，視覺一流。水蓮好少見，店員教淥6,7秒就好食，真係～脆架～～羽衣甘藍清新無苦澀味，一樣淥幾秒就食得，凹凸嘅表面索晒啲湯汁，辣得好過癮。點左3款肉，最前面係挽手腩，望落好新鮮，食落肉味尚算濃郁。右後係牛駝峰，同柑桔牛肉汁好夾喎又真係，有提升左肉味嘅感覺。至於左面係牛朴肉，3款之中最肥美，一咬果然油香爆發。個人覺得最有驚喜係牛丸，好耐無食過好食嘅牛丸，無雪味又好有彈性，咬開會feel到有肉汁慘出泥，大大粒好抵食，推介～最後泥個鴛鴦烏冬做總結，一邊吸晒啲青椒精華，好惹味。另一邊點柑桔牛肉汁食，即刻變沾麵，正。呢度野食同環境都唔錯，氣氛好輕鬆，慢慢傾慢慢食，得閒要再同好友泥小酌一番，嘆番晚～…查看更多

元朗呢期又興番好多手搖飲品店，唔好講咁多，試下個芝士奶蓋得唔得先。點左個芒果芝士奶蓋紅茶，先lam一啖芝士，唔～淡淡地，有鮮芒香味，濃度適中，唔會太杰身，仲有啲果肉添。茶底本身已經少甜，入口順喉，尚算甘淳，加埋輕盈嘅芝士，炎炎夏日飲都好消暑～(不過鍾情重口味芝士人士，呢款香芒芝士可能未必啱你🙈)至於朋友點嘅水果茶同鮮檸多多都可以，不過個人覺得芝士系列同鮮果沙冰系列較為吸引～另外仲有加分位～雖然不停有人泥幫襯，但條隊唔長，店員出茶都出得幾快，仲要服務態度好好，俾埋個photo corner你打卡，一個字，encore～…查看更多

Lunch唔知食咩好，行行下見到有間藍白色小店，咦有船麵食，正喎！泰國番泥都一段時間無食過，一於當重溫下。入到去，有啲泰國味喎都，裝修簡單唔花巧，半開放式廚房，格局開明又乾淨，印象分加左唔少～食物種類唔算多，叫左碗牛肉湯河同兩串串燒試下先。枱面有砂糖同幾款泰式醬料，魚露呀醋呀辣椒粉呀，可自行調味。先泥牛河，滿滿嘅牛肉牛丸通菜芽菜冚面，潑開就見到好闊嘅河粉～煙煙韌韌，似食緊厚身嘅港式腸粉。牛肉唔韌入晒味，牛丸都幾彈牙。湯底似牛肉清湯，入口清甜，有少少驚喜，不過個人都係偏向泰國當地果隻濃甜口味多啲～食到咁上下串燒泥喇，表面燒得好乾身，無油淋淋嘅感覺，雞肉比較juicy，豬肉就香口啲，加上好多花生碎又酸酸甜甜杰杰地嘅秘製沙爹醬，算唔錯～整體印象幾好，下次再泥想試雞飯，見唔少人都食，望落幾好咁款～…查看更多

元朗cafe仔越開越多，之前發現朗屏西鐵站下面有間人氣cafe，都幾多人等位，搵日同朋友去左食，整體幾滿意～地點唔難搵，正正喺西鐵站天橋底。水泥牆身帶少少工業風味，襯番啲射燈同掛畫，感覺沉實唔賣弄花巧。打開menu，都幾多選擇，午餐50有找好抵食，不過最後決定叫兩個主食，見到lunch時段可免費變set，有埋餐湯同飲品，又幾好喎。Order完飲品好快就到，點左個樽裝奶茶，外形好維他奶feel，雪到凍一凍，飲落尙算濃滑，係稍嫌甜左少少～ 反而熱咖啡比較有驚喜，香味十足，無酸味同苦澀味。餐湯味道唔錯，羅宋湯好多蔬菜，忌廉湯飲到好香牛油炒麵粉味，都幾杰身，完全唔係水咁稀，加埋帶少少脆身嘅足料蒜蓉多士，食完都有啲飽飽地～ 個湯碗仲好煮家風，好鬼cute。終於主食泥喇，份量都唔細，試下個蟹肉蟹膏意粉先～ 望個樣已經好吸引，啖啖都食到蟹肉，意粉俾濃厚嘅蟹膏醬汁包住，好creamy呀～ 仲有啲洋蔥好惹味。兩個人share食啱啱好。而個拿破崙鮮茄海鮮飯，一樣好足料，有魚有蝦有青口，如果有埋魷魚就好了。配料都有好多，蕃茄洋蔥加埋啲蔬菜同雜菇，酸味味好開胃，不過最正係個炒飯底，香口之餘又粒粒分明，感覺好有誠意～餐廳細細，但坐得都幾舒服，不過如果想悠閒啲嘆一嘆可能要就一就lunch時段前或後去，真係好多人等位架～…查看更多

前排同朋友去左間樓上串燒店度嘆，個店名都幾得意。入到去，暗暗地，一大個酒架，牆身亦放左唔少酒樽做裝飾，加上帶raw味嘅木吧枱，感覺幾有格調。枱面放左幾樽調味料，美觀得泥又好照顧重口味嘅客人。揀左Goldeneye Organic Pale Ale呢支手工啤酒，淡淡地少少甜，一路嘆酒一路望下街景，寫意～嘆下嘆下，啲串燒開始上枱喇，先泥個BB蘆筍清一清腸胃先，蘆筍望落好鮮嫩嘅感覺，入口果然juicy無渣，係略嫌孜然粉加得較重口味。繼續都係蔬菜類，微辣肉碎燒茄子，嗚哇手臂咁長，滿佈麻辣味嘅肉碎同茄子好夾，辣味唔算強烈，少少麻，好惹味，茄子熟度剛好，夠腍滑又唔會無左一絲絲嘅質感。送酒小食泥喇，脆卜卜嘅雞皮，真係薯片咁脆～ 食落唔肥膩，咸香咸香，仲feel到少少雞油香氣，邪惡感無晒。而雞泡魚乾，上碟已經好香，醃得好入味，入口係咸甜口味，煙煙韌韌，好有咬勁，同雞皮一樣，都係送酒佳品。肉類都唔錯，好似柚子燒雞翼，睇個樣得pat柚子醬以為好流，估唔到又幾好食。雞皮燒至金黃，好香口，入口強烈柚子香味，雞肉軟綿綿，仲好滑，熟得啱啱好。至於鰻魚，邊位燒得有啲脆有啲彈牙，魚身腍滑，咸味適中，係稍嫌有些微魚腥味，不過咁大條都好抵食～燒雞脾菇，個人至愛，真係點燒都咁juicy，如果一串可以多啲就好啦，得六小塊感覺少左啲。仲叫左個冬陰功錫紙包蜆，打開見到好多菇同蜆，充斥住香茅味，味道都唔錯，但個人口味覺得可以再酸啲。最後泥個甜點，綿花糖燒多士，賣相唔錯，雖然唔係厚多士有少少失望，但一咬落去又脆又鬆化嘅多士，加上只溶喺口嘅綿花糖，即刻心心眼～ 而且甜度唔高，食落唔滯，一個人都可以ko到一整塊。呢度環境唔嘈雜，好啱三五知己談天飲酒送小食，放工過泥飲番兩杯，爽番晒～…查看更多

之前泥過呢度食甜品，印象中唔錯，今次又試下咸點如何先。晚餐menu都有唔少選擇，又有湯/沙律同甜品，好似幾吸引，叫左兩個晚餐一個意粉一個小食share。先泥蕃茄湯，唔算太酸喎，食到有蕃茄蓉～ 如果麵包可以變成脆身嘅多士會更好。卡邦尼意粉好快就送到，配料多過意粉，份量十足，將洋蔥蘑菇火腿煙肉一次擺落口，爽呀～然後再送上芝士薯條，正呀有好多芝士喺面冚住啲薯條，好熱好熱，薯條仲係脆的，唔錯～ 係咸左少少。食完前菜終於到主菜喇，點左熔岩芝士麵包配炸雞粒，大大個脆身嘅麵包裝住啲芝士醬，醬汁唔杰身，雖然無芝士薯條果啲咁濃郁，但好香好滑，感覺無咁滯～ 好似芝士火鍋咁點泥食，又幾好玩，仲拉絲架～～～另一個主菜點左威靈頓牛扒，酥皮都幾鬆脆，夾住牛扒同蘑菇點住濃郁嘅燒汁食，幾好～ 至於牛扒，叫左五成熟，一切開係粉紅色，不過仲傳緊熱，食食下塊牛扒變到八、九成熟。如果鍾意食熟啲嘅朋友叫五成差不多，但如果鍾意食生啲嘅朋友就medium rare好了～當晚嘅精選甜品係菠蘿奶凍，賣相唔錯，入口有淡淡嘅菠蘿香氣，香滑得泥又唔太甜，讚好～整體泥講都幾好，店員幾nice，環境又舒適，咸點唔錯，有得食又有得玩，雖然甜點感覺略勝一籌，但都好啱一班朋友晚飯泥gathering下。…查看更多

蒸海鮮興左好幾年都未試過，之前擇左個好日子，一家人去食餐好嘅。六、七點左右去到，時間尚早無乜人，叫左呢個四人餐，好似好多野好豐富咁。仲有個醬料調味吧，鍾意撈咩醬任揀～傾下傾下就有野食泥喇，先泥涼拌小食同小籠包，小籠包要蒸一蒸，確保係新鮮出爐～又幾多湯汁果喎，鮮味都有少少嘅，塊皮亦唔厚，尚算唔錯。頭先等緊小籠包嘅時候，旁邊已經放滿一層層海鮮同菜蔬肉類，視覺好豐富～喺食小籠包嘅同時，店員又放左啲海蝦去蒸喇。相都影唔切就食晒喇～海蝦鮮甜彈牙，唔洗點醬已經好夠味，食得出係新鮮蝦，肉質仲彈下彈下。不過之後嘅龍躉同大蜆，就爭少少，前者魚腥味較重，唔夠厚肉，肉質又唔算有彈性。後者海水味重，仲有啲過咸。再泥就係北寄貝同元貝，兩個都ok，味道清甜，肉質爽滑又有咬口。隻蟹望落唔算吸引，估唔到入口咁甜，啲蟹肉一梳梳，好彈牙，拍得住啲蝦，好新鮮～食到呢度都開始飽飽地，但仲有蒸雞蒸菜蒸粟米，味道可以，以原味為主。蒸到最後終於都到主角出場喇～ 南瓜排骨粥，吸晒前面咁多食物嘅精華，用海鮮湯泥煲呢個粥，唔洗講都知好味，有海鮮甜味又無乜海水腥味，都真係有驚喜。甜點以高力豆沙做總結，味道一般，唔算好完美。價錢泥講又未算優惠，不過服務同食物尚算好評，感覺令人滿足，一試無防。…查看更多

中環嘅泰菜餐館唔算多，多數都係西餐廳格局。朋友介紹呢間樓上泰菜餐廳，一入到去就係café感覺，光線柔和又開揚。Set lunch選擇不多，但剛好有個人最愛嘅肉碎豆豆炒飯，即係香葉炒飯，可以配豬牛雞蝦或者菜，一如以往，我都係揀豬肉～先上雜菜豬肉碎湯，味道清清地，比想像中大碗，菜都算多，加玉子豆腐感覺唔係好match，但個人鐘意玉子豆腐，整體上都算滿意。香葉豬肉炒飯好快就到，見到有好多香葉同豆豆，賣相唔錯喔，仲有少量蔬菜伴碟，如果加多隻煎蛋就perfect喇～ 至於味道，咸甜適中，又唔會過份濃味同油膩，食到一半仲可以吱啲青檸汁落去，增加清新味道，一個炒飯兩種食法～至於椰子冰係另外加錢叫的，因為同朋友都偏好椰類飲品，而將椰青水打成沙冰算係少見，忍唔住要嘆一嘆～ 椰子冰全無酸味，非常清甜，配住啲椰子肉慢慢飲慢慢食，正！最後set lunch有椰汁糕做甜品，少少凍，唔太甜，爽爽地滑滑地，味道都ok。值得一提嘅係，餐廳除左一般餐桌餐椅外，仲有窗台座位，成個環境都唔嘈雜，好舒服，想悠悠閒閒避開人群去lunch的話，呢度都算係唔錯嘅選擇。…查看更多

有日行過元朗戲院果邊，見到多左間美式熱狗小店，正呀又有新野試～小店都係時下流行嘅簡約工業風裝修，入面仲有啲美式掛牌。不過堂食只有兩個位，果日好好彩，唔洗等即刻有位坐。試左兩款熱狗同小食。薯條最先炸起，揀左芝士煙肉同蜜糖芥末醬，撈埋一齊上，個樣幾靚，味道都唔錯，甜甜酸酸，份量亦算多。之後跟餐嘅洋蔥圈都熱辣上枱，粉漿包晒成個洋蔥圈，唔係好厚，質感有啲似炸麵包，包住帶甜嘅洋蔥，覺得好食過薯條，比較有驚喜～ 點少少芥末醬更加惹味。食住小食等熱狗，都唔洗好耐，熱狗都出場lu～ 先試BBQ手撕烤豬，賣相吸引，麵包同脆皮腸之間塞滿手撕豬肉，上面再放一堆沙律菜絲，即刻覺得balance番～ 汁醬好夠，一啲都唔乾，BBQ醬微辣微酸，好開胃，亦減低左脆皮腸嘅油膩感。至於招牌兄弟熱狗，孖腸再加芝士肉醬，好大堆頭。孖腸唔算有特色，係肉醬印象深刻啲，一入口就散發住啤酒香氣，啤酒肉醬香港比較少見。呢個份量較多，個人覺得share食會好啲，以免食滯～可能太多醬嘅關係，兩款麵包都稍嫌軟身，但欣賞店主嘅自家醬汁。再泥會試下牛油果果款，感覺較為輕盈～…查看更多

早排朋友話帶我去食海鮮，去左觀塘工廈呢間掌壽司，原來泥食日式海產，點左幾款都係海水味嘅食物。時令刺身先上，即係刺身拼盤，一上枱，全部都好厚切呀～有好常見嘅油甘魚、池魚、三文魚、帶子、赤蝦、赤貝。當中油甘魚、池魚同三文魚感覺較平時食到嘅突出。油甘魚油份充足，好肥美，如果嫌太多油，池魚就剛剛好，清清地，好甜之餘仲一啲腥味都無～但最估唔到係三文魚，肥美嫩滑之外仲多左份甘香味，唔錯喔～而當日新鮮運到嘅仲有鱈白子，平時較少見，望落好似個腦咁，其實係鱈魚嘅精巢。有少少驚會腥，夾住左啲魚子葱粒青瓜一齊食，食落又唔腥喎，仲有啲甜，好creamy嘅質感，不過都係試一次夠了，繼續食魚～再泥個燒霜拖羅壽司，本身對呑拿魚無乜好感，除左日本當地食到覺得好食，其他都麻麻。不過呢個拖羅都ok喎，輕輕炙燒魚肉表面，入口即化，好夠油份，又無腥味。至於海鮮壽喜燒，個人感覺魚味太重，壽喜燒好似都係同牛肉夾啲。但成個煲有好多蔬菜同海鮮，材料好豐富，如果想點呢個又怕會腥的話，議建先食煲入面嘅蔬菜，食到咁上下再加蜆去滾湯，會比較鮮甜。然後按照個人喜好放廣島蠔、三文魚骹同牡丹蝦，食完最後放金目鯛。當中三文魚骹唔錯，油份夠，肉質好滑，相對有驚喜～食到最後得番我地仲食緊，一路嘆3.6牛乳雪糕一路欣賞下室內環境。簡單報置帶點家庭式味道，感覺溫馨。每枱相隔一定距離，坐得好舒服，食物質素尚算滿意，打去book定仲有9折添，下次可以再試下其他壽司。…查看更多

見到雜誌介紹忌廉芝士年糕，好creamy好吸引咁，同朋友發左光猛話要去食～早排搵左個夜晚去嘆下。入到去係工業風加酒吧格局，座位寬敞坐得好舒服，環境都算唔錯，一啲都唔局促，仲覺得好嘆咁。落完單，店員送上三小杯忌廉南瓜湯，杰杰地，非常濃郁，似食緊南瓜醬～不過無過甜，調味幾好。湯都未飲晒，店員就捧住原隻炸魷魚過泥，剪開一圈圈方便我地食，魷魚炸得幾香脆，肉質唔韌無過老。魷魚之外，仲有啲蔬菜同彈彈麵，個麵真係好彈牙，有啲似韓國嘅筋麵，配住辣辣地嘅熱湯，食唔停口～再泥就係烤牛肉韮菜餅，薄薄一層粉漿，成個餅滿佈牛肉同韮菜，好足料，賣相一流～質感喺焦脆同鬆軟之間遊走，食落香甜，韮菜亦無搶味，散發住淡淡嘅香氣，做下酒菜應該會唔錯。最期待嘅忌廉芝士年糕終於泥喇，會有個爐不停慶住啲年糕，忌廉越煮越杰身，仲有一片片嘅魚糕夾住食～不過整體味道較清淡，同想像中有啲出入，好creamy但唔濃味。食物整體嘅味道都可以，雖然唔太突出，但咁舒服嘅環境同個牛肉韮菜餅，會引到我番泥食多次～…查看更多

灣仔有唔少burger小店，今次去呢間Burger Joys，小酒吧格局，暗暗地，都坐得幾舒服。burger唔算多款，最吸引係個signature double cheese burger，記得落order先俾錢。Happy hour酒精飲品半價，一於啤啤佢～揀左longboard craft beer，啖啖地唔太澀好易入口。最快到嘅係薯條，點左melt cheese fries，嗚哇啲芝士真係好溶呀～薯條唔算脆身，不過夾住啲芝士醬泥食，滿口芝士感覺幾正。然後burger緊接住上枱，大大個漲卜卜，兩塊漢堡扒都算厚身，拎上手好聚手。層層分明，賣相好吸引～面包有煎過，好鬆脆，啲生菜蕃茄洋蔥又好爽脆，漢堡扒juicy，每一口都充滿醬汁，成個包食落一啲都唔乾～連平時唔食嘅洋蔥同腌青瓜都食埋，整體味道唔錯。不過又係因為打橫左擺，食到最後醬汁過多，面包會濕晒。小食得一個又點夠送酒～點多左個經典小食buffalo wings。橙色嘅酸辣醬汁包住雞翼，呢度個酸味調較得比較重，辣味則係慢慢滲出泥，個人口味覺得唔係太辣，如果怕辣可以食番條西芹點一點藍芝士醬，解一解辣～整體感覺唔錯，雖然地方細細比較逼，但食物、服務、環境都ok，又唔會食完就趕人走，等人慢慢傾都得，鐘意飲下酒嘅又有半價，啱晒啲好耐無見又有排傾嘅朋友泥聚一聚。…查看更多

酸辣粉喺第二度食得多，試下其他新野先。豬骨濃湯配幼薯粉，再加墨丸同辣腩肉～個濃湯望落無乜味咁，其實好濃味下架，肉碎同薯粉煮得好入味，就咁食粉都覺得幾好味，反而啲餸破壞左咁和諧嘅感覺😂因為墨丸同腩肉都係一般般。之後再泥食，叫左個沙爹濃湯配幼薯粉。本身無叫過肥牛，唔知係咪送架呢～薯粉一樣煙韌，個沙爹湯好香，越飲越甜，最後甜到好似有啲粟米濃湯味😂跟麵加左個豬扒做餸，豬扒都ok，炸得香脆，腌得入味，尚算鬆軟。下次試埋個酸辣粉先～…查看更多

又一間喺元朗嘅日式小店，今次走手打烏冬路線，對於烏冬迷泥講，應該都幾吸引。舖仔細細，菜式都唔多，叫左兩個烏冬同一個小食試下。咖喱烏冬率先登場，「嘩賣相好日式呀～」撈勻咖喱汁醬同醬油清湯，即刻變成香濃嘅咖喱湯，咸甜適中，又唔會太過杰。餸比較少，得幾舊炸野菜同半隻蛋，蛋黃雖然唔流心，但尚算溏心。至於奶油烏冬，原來係忌廉汁泥嘅，比咖喱湯稍杰，每條烏冬都可以沾上忌廉汁～忌廉汁同野菜、煎過嘅雞肉煙肉好融合，調味唔錯。雖然同卡邦尼年糕感覺上有啲相似，但比起咖喱烏冬，會有驚喜。兩碗烏冬都比平時食開嘅粗，食落好厚身，個人口味鍾意呢種硬硬地嘅質感～有手造嘅感覺，食食下又有啲似上海粗炒咁～烏冬就唔錯，小食估唔到都幾好喎，個吉烈流心蛋免治肉餅外層鬆化，入面juicy，同沙律醬好夾，係覺得多油左少少。整體感覺都好滿意，服務態度又幾親切，下次想試下個五種芝士薯餅～…查看更多

人流不斷嘅肉餅哥，剛好撞正人較少嘅日子去，唔洗排隊，等左一陣就入得。一入去店員即刻送上例湯，正喎仲可以一路飲湯一路揀食乜～30幾款肉餅，有傳統有創新有煎有蒸，有好幾款都想試。最後決定試下有家鄉味道嘅肉餅先，即係潮洲家鄉肉餅，配菜飯，另外叫左啲小食同朋友share。涼拌小食好快泥，芥香木耳酸酸辣辣，帶啲芥末口味，涼拌萵荀比較少見，外型似西芹但無西芹味嘅，食落清爽，都係一貫涼拌味道，陳醋加蒜香口味。食食下，煎肉餅都泥啦～大大塊肉飯加大大碗飯，菜同飯嘅比例50/50，食極都有，真係好多菜～～～至於肉餅，聞落有陣好香嘅豬油味，又有啲似墨魚餅味，裡面肉質鬆軟，再加啲馬蹄、花生、沙葛、韭菜、冬菇，材料豐富。美中不足嘅係外皮唔夠脆，同油左少少，同涼拌小食一齊食，減輕油膩感，剛剛好～呢間自家肉餅小店，上菜好快，食物唔錯，服務都幾好，店員見我地坐咁耐都無話趕我地走～…查看更多