WaiYuChan9229的个人专页

呢幾條街都比較舊同窄，但入到呢間居酒屋又完全去咗第二個空間咁，食得舒服又放心。店內留有足夠空間俾客人，小小嘅牆上裝飾加木色枱櫈都增添咗日式感。明明食串燒主打，卻一點油煙感都無，配埋啤酒或特色酒精飲品，感覺好舒服。 食咗太多款，抽幾樣特別嘅嚟講︰白印提子酒梳打真係好香提子味，酒味同糖水味都唔多覺，但飲完睇身體反應酒精又唔係少。前菜番茄都認真整，係個好開始，仲先收$12好抵食。 燒芝士年糕呢個真係估佢唔到，超班！米香極重，皮軟得嚟有小小粉粒仔，口感非常好。紫菜又夠香同新鮮，真係有係日本食嘅感覺！ 吉列炸生蠔皮表夠曬脆，入邊又夠曬Juicy，蠔肉仲要非常飽滿添。  日本甜蕃薯仔面層甜甜地，仲有薄脆效果，紫薯味好出。 汁煮海螺份量都幾多，Size同肉質彈牙。甜味大於酒味，連螺殼內都係滿曬汁，做前菜同餸酒都好岩！ 黃花魚一夜干
第一次食一夜干，仲要成條上。醬汁好食，表皮同邊位香口，內裡肉質又厚實。 串燒秋葵唔知點解可以燒到面層索到汁又唔變硬，甜甜地咁，有驚喜。 螢光魷魚沖漬鰻魚茶漬飯月見自家制免治雞肉棒毛豆…查看更多

之前已經收藏咗佢，終於抽到時間嚟，環境如網上相一樣咁靚。自己親身仲可以睇到更多細節位，做得好徹底，真係做到美國餐廳嘅感覺，連電視都真係播緊。 食物選擇唔算係超多，但款款都好有特色。 I AM FABULOUS + VEGAN CHEESE紅菜頭腰豆磨菇扁豆蓉伴太陽番茄豆醬份量驚人，連薯角都係加大碼。沙律菜同漢堡面嘅豆芽都好新鮮同幼嫩，紅菜頭扒好厚身，亦成到形，平均切四份都無散開。好驚喜嘅係，番茄豆醬完全係貫徹起同帶領住所有材料嘅味道，番茄豆醬做底，然後一路細味係真係分別食到紅菜頭、豆香等味道同質感，最欣賞佢減到紅菜頭嘅草腥味。我自己係幾鐘意草青味，不過紅菜頭個種腥味係真係特別重。 好彩有加素芝士！估唔到係可以咁出色，開頭係山藥泥咁同小小粉粉地，去到中間就變成麻薯口感，可拉扯同煙韌。重點係，真係做到芝士香，反而仲出色過真正芝士，因平時拉芝都做唔到真係好重芝士味，而且質感好快就變。無諗過薄薄嘅芝士配料，可以做到咁多層次，真心覺得大廚花咗非常多嘅心機。另外漢堡內嘅紫椰菜都係超級好食的。 Trip to Bali印尼加多加多沙律，炸豆腐、腰果、大豆炸物伴椰汁飯又係份量驚人嘅一款，而且超多種類，各有特色。大家一家要將個沙律伴椰汁飯一齊食，互相配襯下真係更突出到兩種香味。呢款沙律一直都好野味，而且有唔同雜菜滿足口感。炸豆腐薄薄一層皮，內裡又保留到滑身同濕感。大豆炸物做得好仔細，形狀不規則，非常像真同有層次感。椰汁夠味，記得要食到底，因為又有另一款香汁係完全唔同感覺，可能係大豆炸物留下嘅汁嚟。嘢飲方面，試咗Mixed Berries Soy Shakes，Mixed Berries陣味超出。唔知大家有無印象細個食過一款深紫色長條方型嘅糖果呢？完全係個陣味嚟！非常有童年回憶。Mojito味道得宜，超級多薄荷葉，極級清新。食完成餐飯好滿意又滿足，薯仔同飯都食唔曬。本想試下埋泰式奶茶雪糕，可惜當日無提供，唯有下次再試。我都好期待下次嘅食物又會俾到咩驚喜我。仲有一點，食完成餐飯都無特別口喝，食得舒服！…查看更多

食物種類好多，又街坊價錢，完全係放飛自己想食咩就叫。另外座位都有得向窗口唔錯㗎。埋單都係人頭＄100鬆啲，好爽，配細枝養生涼菜類都唔洗加錢咖！ 手功鮮蝦雲吞、豬腸、一口牛腩幼麵配沙嗲汁雲吞皮好薄，餡料都幾多。豬腸厚身、一口牛腩食落好暢快，唔洗慢慢咬嘛！沙嗲汁幾香又唔會點辣，有蒜香味。 手功鮮蝦韮菜雲吞、手功煎鯪魚餅、冬菇烏冬配沙嗲汁韮菜雲吞包得好靚、鯪魚餅超大塊又好食，好彈牙又煎得好香。冬菇又厚又多汁，好食！佢款烏冬都幾好食，唔會重酸醋味。 生炸椒鹽魷魚鬚呢個非常有驚喜，炸得好香脆，粒粒炸粉出黎又夠薄身，魷魚有味又彈牙。 滋味三寶（玻璃魷魚、牛栢葉、豬皮配沙嗲汁）豬皮！！厚身索汁又入味！！！呀媽極欣賞！佢個沙嗲汁實在好食，配爽身嘅玻璃魷魚、大大舊牛栢葉非常夾。 腐乳通菜通菜嫩，份量多，腐乳香。 生菜魚肉碗仔翅生菜魚肉都好多，粉絲又好粗身，似湯羹都幾飽肚唔係講笑。…查看更多

手切牛小排蓋飯配溫泉蛋份量超足，溫泉蛋整得好靚。手切嘅牛小排順住紋理去切，夠厚肉感又不失嫰滑。長長的一塊食入口非常滿足，醬汁香而不搶味，昇華到整體味道。流心溫泉蛋同醬汁係會令人忍唔住食曬成個大大份嘅珍珠米蓋飯。 澳洲和牛漢堡配薯條嗱，呢塊和牛心絕對高質。口感做得非常好，夠汁夠軟而不失肉質感，而且完全無想散開嘅痕跡。漢堡無流心效果但芝士味又好香，原來底面都係溝咗兩款芝士。配番新鮮青瓜蕃茄已經好完美，靠材料取勝，絕不需要花巧。另外厚切薯條好脆又唔油。 木魚紫菜豆腐老闆炸嘢嘅技巧真心唔錯，外面夠乾身又非常脆口，入面保留到原汁同軟身喎。秘制汁有d台式蛋餅醬油膏嘅感覺，減咸再配番d日式感，芝麻紫菜碎，幾出色。 紅豆沙冰嘩，呢杯真心不得了，真係100％還原好味版嘅紅豆冰味道，仲要配番大大粒紅豆係入面。可唔可以以後嘅紅豆冰都咁整？沙冰打得超滑，一d冰碎都無。甜度同奶份量掌握得好好，重點係好夠凍！食到尾都唔會變曬水咖。 雙檸烏龍茶（青檸果肉＋鮮檸檬）誠意之作，烏龍茶底香而不澀，突出到雙檸鮮味。粒粒青檸果肉夠鮮又有口感，甜甜酸酸地好好咬，店家自己整咖。 芒果沙冰沙冰打得太出色，朋友忍唔住又叫多杯。沙冰係店家太太打嘅，會打足時間做出棉棉感。呢杯就反而用飲嘅方式會好味d，同紅豆沙冰食法唔同。 小店自己興趣志在有個地方，可以亦客亦友咁吹下水，講下飲食樂趣。老細仲好謙虛話自己煮嘢食唔叻，係純粹鐘意食嘢所以有d心得，但佢真係整得幾好，調味得宜喎！其實價錢都好抵食坐得都OK，可以再嚟！（路線教學）巴士站旁，行過一排餐廳後，見到綠白色建築物轉左，見馬路再轉左入到尾段就係，鋪頭係右手面的。…查看更多

太耐太耐無去Board Game Café，今次被意粉吸引到，都諗住可能人少少兩個人都有嘢可以玩下。地方唔大但隔格好，仲有3枱窗邊位。老細一早已經揀咗2人遊戲俾我哋。推介「衰事無極限」，唔好俾佢個名呃到，玩落幾有趣！羅勒海鮮海鮮泰國嘢以外都比較少食到羅勒，煮軟嘅羅勒好香，又可以撈埋意粉直接食。材料嘅份量同質素都唔馬虎，超多蜆肉，蝦都有三隻。意粉留有口感，夠掛汁，整體味道偏甜，感覺幾好。韓式牛肋條螺絲粉超開心有得揀螺絲粉，韓式牛肋條都係好岩呢個配搭。韓式汁令人好回味，螺絲粉嘅坑紋就岩曬用嚟食曬d汁佢！牛肋條煮得岩岩好，夠軟身。一樣甜甜地汁底，食得幾開心。焦糖雞翼無諗過有焦糖味揀，明明只係煎雞翼，用咗焦糖做法，唔只香甜，仲多咗層脆卜卜口感。芝士薯條D醬多到令人驚訝，薯條夠脆。醬汁做到沙沙口感，凍熱都好食。份量都超級多。蜜冬杞子紅棗元肉茶超足料，蜜冬味好出。鐘意咁健康養生嘅配搭。菠蘿加芒果特飲飲到菠蘿肉，堅有水果的。疫情間彈性營業，記得打去訂座呀！…查看更多

愈試得多，愈知道印度嘢唔只得個辣字，亦唔係一定好重香料味！先上超薄嘅薄脆，除左入面嘅黑胡椒，仲附上薄荷醬，好清新。Tandoori Chicken Momo 香烤雞肉餃子整個菜式表面被橙色醬汁包圍住，整體味道都好融合到。配菜無論係番茄、洋蔥定青椒都出奇地好食，大火燒軟表皮，另一面又保持到清新感，仲好香甜。餃子襯熱食，表皮脆卜卜。入面就好大反差，係滿滿白雞肉加肉汁，原汁原味咁，幾有驚喜。餃子伴上另一款香橙色辣醬汁，鐘意食辣又可以試多種味。Punjabi Saag Panner 芝士菠菜呢味係素咖哩嚟，打破咗我平日認知嘅辣咖哩。唔好睇佢形態就覺得好漏，口感好黏，當配上蒜蓉烤餅之後就係非常之夾，岩岩好。忘記影底入面好多粒正方形嘅芝士，佢嘅味道較輕又較硬身，增加番整味體口感。另外入面有番茄粒，都增添到多種味道。Garlic Naan 蒜蓉烤餅蒜蓉同兩款香草烤過後都好香，表面嘅棷欖油都係，亦令到烤餅更易入口，唔會話乾。欣賞佢d邊位烤得夠時間！Lemon Tea Cider嚟到酒吧，仲坐到吧枱位，梗係要飲番杯。呢款Cider先係檸檬味出，甜度適中，到後面就會飲到d茶味。老闆俾埋冰杯我哋，岩曬熱辣辣嘅中午爽番下。食埋經典甜點，熱辣辣加棉棉口感配上薑糖味，好滿足。最後附上門口翻譯咗中文嘅餐牌！…查看更多

小小門口，搭𨋢上到餐廳，原來地方咁闊落。一入到去已經被牆上擺設吸引，播住細聲音樂，仲有MV播。想睇就睇，又唔會太大聲。望落同平時食嘅印度嘢差唔多，但食落嘅整體風格就好唔同。都係有唔同香料味，而味道就較輕較短。Lahori Chicken Makhni Half最特別係咖哩雞汁同時會有雞絲在內，非常岩用嚟餸薄餅。咖哩汁包滿雞肉，咬開又見白肉，又夠juicy，味道一d都唔單一。Garlic Naan煙韌得嚟，保留番適當嘅空氣感，面嗰d卜卜就係喇，食落一人一半都唔會覺滯！味道上，蒜香都唔會過濃同烤得過燶，掌握得幾好。Golggappe新奇有趣的一款，我哋仲問店員係味要飲曬佢。汁底酸酸地好清新，表有小脆球索汁又增加口感。大脆球脆感剛剛好，又唔會一咬就碎。裡面用咗薯仔同鷹嘴豆等主食配香料，清新得嚟又好豐富。Chicken malai tikka 燒過嘅芝士味好香，包住好juicy嘅雞肉。唔知係點樣做到黏上芝士又唔需要炸粉。朋友最鐘意呢味。Vrigin mojito呢度都飲到mojito，值得一提係近窗口嘅空氣飲嘢係一流。襯夜咗人少少影番張相分享下，梳花位嘅枱係大木箱設計，幾靚。近距離參觀番擺設，仲發現有好畫。另外，仲有d特產售賣添。…查看更多

海鮮煙肉意粉 $92非常有驚喜，好有口感嘅意粉又夠掛汁。好多餸，海鮮亦無沙。牛油果忌廉芝士法式多士 $5爭扎咗陣食咸定甜多士，但配忌廉芝士實在太過分太吸引！！好融洽嘅味道同口感，一樣超足料。宇治抹茶紅豆梳乎厘 $112超級豐富嘅配料，而且樣樣都幾好食，特別係小丸子，另外d抹茶脆脆都好得意。醬汁無淋到成個梳乎厘都係，令食客可以自行調整甜度。梳乎厘有空氣感，奶甜味大於蛋香味。暖泡奶抹鮮奶（無咖啡因）$42夜晚都可以飲啡唔怕瞓唔著，好細心，又好好味。新鮮蘋果汁 $32好欣賞店家嘅環保意識，用咗甘蔗渣飲管。…查看更多

📍#素食 #健康之選 #本地菜 #舒適空間 #回饋社會 #手沖咖啡 #工作坊 #活動室↩️前身為「天恩饍館」，派飯活動同大型活動室都有保留落嚟。🪑餐廳空間非常闊落，有長木枱櫈，窗邊高枱、梳花及咕𠱸位。而我特別叫朋友留俾我嘅就係呢個自閉位，Hea住睇書一流📚！咁舒服得唔得咖？另外有工作坊空間，手沖咖啡車仔，我都偷師咗一陣。與其話係餐廳，不如話係一個多元化空間。🍽食物嚟講，的確有d顛覆一般西餐口味。有好幾款主菜，另可加配小食同飲品，而圓包就係任食嘅。🌝咩叫圓包呢？左邊食落回彈力好強，味道似旺仔小饅頭，又有江蘇餅感覺，米味較重。廚師由健康及惜食角度出發，做出🙅🏻‍♀️無牛油🧈無奶🥛無蛋🥚小糖🍭嘅純素烘焙。右邊籃莓就有奶嘅，口感似中式鬆餅。非常特別，新奇得嚟我係鐘意食嘅，而且唔肥又有素食，食得好安心。🧀芝士玉子燒夠層數，芝士夠Creamy，記得襯熱食。🥗嚟到重點推介主菜，即炸韓式雞球沙律。先講配菜，餐廳好有心，支持本地農業，🍅椒仔都係香港出品。色水誘人，食落爽口又清甜。用咗蛋沙律配青瓜底，非常清新，又避免咗平日使用嘅沙律菜苦味同🌱青味嘅可能性。🥚沙律仍然健康，滿滿蛋香唔會成口沙律醬，反而用咗鹽輕輕調味。🥔出奇地好食，不失本味亦有脆口感。原來係心機作，先烚後煎炸，做出少油效果。🐥炸雞非常新奇，係咕嚕肉口感嚟，薄薄嘅脆皮配啖啖肉。咬開你就知食得安心，並無過度調味。都係個句，炸雞都記得襯熱食呀。一碟十粒塞爆你個胃🤰🏻，原來餐廳係希望大家同朋友相聚分享美食，所以食物都係大大碟🙌🏼。🔜四月頭去嗰陣係試業階段。餐牌持續更新中，會多d特色嘢同有素食選擇。🥰感謝朋友邀請試菜（試業期間自由定價），食到你啲心機作覺得好幸福。見到你介紹食物時雙眼發光🤩，就知道係真心想將好食物分享俾大家，滿滿熱誠🔥。…查看更多

成個環境裝修，🔵⚪️藍白配色俾人感覺好乾淨企理，而的確嘢嘢飲嘢食貴都非常整齊乾淨。係連每一罐嘢飲都會正面面向玻璃，雪糕疊好晒，唔會有任何嘢食同醬汁被遺留係櫃邊地下🧺。👤一人一鍋設定好，每兩個人就有一個有一定深度嘅長兜拎嘢食，令到成個枱面都非常整齊，而員工都好勤力不時過嚟收飲完嘅飲料👩🏻‍💼。嘢食唔算超級多但夠高質，好驚喜有羽衣甘藍🥬，而無論萵筍、🍅番茄定係雲耳等都新鮮好食。丸類有不少新奇選擇，☘️芫荽燒賣吸引咗我拎第二次，好彈牙好似魚肉咁，芫荽又夠香。任食嘅🐷豬同🐮牛，雖然只得兩款，但由於質素好，同朋友share埋湯底就多咗口味。上得快、切得薄、油脂平均、有肉味👅。嘢飲🧃同雪糕🍦都好多款，最開心有飲品暖櫃🥰。另外低卡果汁乳酪雪條，佢一開始出$10枝，後未賣到成$1x就唔捨得食。第一次食提子味幾正喎，仲好食過士多啤梨同藍莓！食飽飽閃水，走先嘢，下次再食呀🙌🏼🙌🏼！…查看更多

是晚目標係經濟得嚟又足以慰勞自己🤤，美食對我來講永遠都係最好嘅打氣良方。顯徑站落，過對面個商場地舖就係。選擇都幾多，第一次嚟食番廚師推介👨🏻‍🍳🦐櫻花蝦餅拉麵配自家製海鹽湯底湯底落望清到咁，食前係有啲擔心，而且怕蓋唔住拉麵嘅鹼水味。食後覺得個湯啱啱好，清清地得來都夠味，湯飲落好舒服🧘🏻‍♀️，唔油亦唔過咸。醬油筍同食開有啲唔同，感覺比較中式同偏重豉油味。醬油糖心蛋🥚時間掌握得好，對我來講偏鹹。面底正常嘢，冇鹼水味，軟硬都可以，浸湯太耐就開始腍，不過我自己食嘢係比較慢嘅。櫻花蝦為主嘅蝦餅係幾香，加埋啲蝦子粒，算係加工得幾有誠意，質感都算彈牙嘅。旁邊嘅椰菜都新鮮，醬汁都好食✨。食到咁上下想轉下口味，旁邊亦有兩款調味可用，我只係加咗兩滴辣麻油，即刻香曬，雪雪聲食埋最後嘅拉麵🌶。餐廳仲好sweet同DSE同學打氣💪！…查看更多

已經兩度係日頭時間光顧過，今晚帶生日果個嚟仙吓。好鐘意花草滕木類嘅裝飾，奶綠色亦俾人感覺好舒服。🖼西班牙黑毛豬無花果Pizza🍕薄皮超香脆，薄餅底同芝士之間有層茄醬。芝士分量岩岩好，煙韌得嚟亦好夠芝士味。簡單配番清新無花果同黑毛豬，味道已經夠曬。只要用料好，配搭佳，少量配料已經好好食。食到尾聲，薄餅底變為煙韌，而薄邊亦然脆口。芝士菠菜龍蝦蟹肉意粉卷🦞🦀超級足料啖啖肉，肉質夠新鮮，重蟹味，口感亦夠曬厚實。醬汁以番茄同芝士粒為主，旁邊圍繞住忌廉，碟邊仲有薄荷醬。意粉卷保留原材料味道，多款醬汁令到選味嘅自由度好高。我自己就幾鐘意薄荷醬，清新中和，事關個分量都唔講得笑，意外的飽肚。餐湯麵包甜品🍵香濃幼滑嘅粟米湯，滿滿牛油蒜蓉嘅脆法包。甜品超重抹茶奶味，兩個人食啱啱好。夢幻薰衣草🌬真係有夢幻感覺，超香薰衣草味，聞落就有玫瑰味。飲落唔甜，好新爽，好鐘意佢！柚香紅顏🍊大家行Ikea時，咪成日有袋橙紅色香芬木，就係個隻味！香香甜甜咁！晚市人比較多，我哋揀到最近餐廳樹景位座。對外望嘅視覺好好，食住影相又美美地。餐廳外座有兩張枱，如非繁忙時間出去Chill下應該都開心。🥂…查看更多

尋晚第一次去印尼🇮🇩，啲嘢又幾鬼好食，門口打卡仲好正添📸！巴東牛肉飯🐃第一次食竟然係喺澳洲，食過之後非常難忘。今次食返正宗印尼版本。肉質仍然鬆軟，啖啖肉得來，冇嗰種牛腩嘅肥膩感。沙嗲汁配菜出奇地好食，超級豐富多款式嘅配菜，非常爽口。泰國米粒粒分明而細長，非常好撈飯又唔會一pat pat。印尼秘製汁燒魚飯🐟奶綠色嘅班蘭飯實在太吸引，非常香，唔需要額外撈汁已經好好食。俾足成條燒魚你，配一個秘製香辣汁。燒魚本身已經好夠味，重點係佢個甜甜地嘅脆皮，所以肥啲都要連皮食啊！雞肉黃金餅🫔分量大到O咗嘴，餡料同想像中都有唔同。黃金係有蛋有雜菜有芝士，幻想下有啲菠菜蛋餅嘅感覺，但係春卷嘅脆皮，當然仲有好多爽脆嘅蔬菜啦。個汁就甜甜辣辣，點小小都唔錯㗎。黑糯米特飲🧉餐廳可以比客人選擇少甜，減甜後減少負擔，黑糯米本身都唔係用糖水浸個種，可以食返原材料原味。斑斕蘭沙冰🌿貴餐廳嘅斑蘭真心冇得輸，沙冰震驚到我朋友，加上食物都係偏香脆同多味道，有清新嘅斑蘭特飲中和下就非常啱了。…查看更多

「你問我，我問棵🌳啊？」呢度真係有棵樹俾你問，仲有🦋添！位於紅磡嘅小店，設計同裝修都好有品味，連員工制服都勁靚，心都靚呀，因為店員個個都好nice🙆🏻‍♀️🙆🏻‍♂️食物選擇唔算多，但都有齊主食、小食、沙律，同☕️🍵🥛梳打等飲品。香辣蒜片蜆肉意粉🐚好多蜆肉又無沙，辣椒同黑白胡椒味重，的確好香。用咗扁意粉增加口感，又唔會過分索到辣味，係食完都唔會覺得漏嘅主菜。脆炸雞中翼🐥有驚喜嘅一款，係煎炸嘅形式，香口而唔會過油膩。醃得入味又多汁，配埋五香粉加乾辣椒，味道啱啱好。脆炸薯格🥔超大份又厚身，夠熱又夠脆。金-烏龍桂花茶🌼清清地解下膩，隨時可以叫店員添熱水慢慢飲，店員仲不斷幫我哋斟茶添。…查看更多

呀媽抽起條筋話要食蘿蔔糕，新年都等唔切。做女嘅快快趣做嘢啦，就俾我搵到呢間。上網已經見到早一日就可以訂到老祖·秘傳瑤柱蘿蔔糕850g，仲有法式陶瓷盤裝添！咁岩最近又真係物色緊陶瓷盤焗野食用，岩曬！850g都真係幾大份，一拎到番黎已經即時開封連埋晚飯食。打開已經見到滿滿嘅材料係正中間，旁邊嘅蘿蔔糕都溝咗唔同料，好吸引。是日想食香口野，所以切咗部分黎煎。蘿蔔糕切起好成型，唔會散開，煎落聞到陣陣蘿蔔香。最後加d面嘅蝦米，臘肉，臘腸，瑤柱絲爆一爆，上碟！材料都好有咬口好充足，蘿蔔糕煎香完依然完整，食得出唔同香味。味道偏重，咸咸香香，又幾岩屋企人口味。滿足到呀媽喇今次，剩番諗住煎黎食，睇下口感又會唔會唔同先！另外見到鋪頭其他小食都幾吸引，下次經開黎食先，雖無堂食，但附近都有個公園可以坐底食嘅！提提大家鋪頭唔收現金，記得帶機上顯示嘅電子錢包喇～…查看更多