lanwong167的个人专页

其實幫襯了牛牛都好一段日子, 我基本上對佢地嘅食物質素沒有任何挑剔, 睇相都已見食物種類, 甜品及飲品啤酒汽水選擇極多, 每人$200樓下都不會對提供的牛肉抱有太高的要求, 個人覺得三款可選擇的牛肉, 以下肩胛肉較為出色, 而豬肉羊肉蝦及蜆亦不過不失, 蝦尚算新鮮。若果平日行得開, 我極喜歡獨個兒在較少人的時段4點半前入座過來休閒放空一番, 飲下啤酒食下肉及出色的甜品, $158 免收加一這個價位極為吸引, 週末同時段若約到三五知己, 又可以暢談150分鐘, 比閒日收費都只係貴多 $10, 咁多啤酒選擇真係好過落 Bar 😆如果要求唔高, 想搵個地方同朋友 hea 下食下飲下, 牛牛永遠係首選 👍🏻…查看更多

葵涌屏富徑近月開了這間越南小店 Pho M Cuisine, 店內員工都是用越南話互相溝通, 地方較細, 3 張枱最多可容納 10 個顧客, 但去過兩次, 我所叫的招牌菜牛肉牛丸河都令我感到非常滿意。食越南河, 湯底是最重要的一環, 我可以肯定 Pho M Cuisine 嘅湯底係我喺香港食過嘅越南河粉最好的頭三間其中一間, 上枱時夠熱, 湯味濃郁清甜, 飲後不口渴, 而提供的牛肉不鞋身, 且略帶點肥, 相當足料。現時 Pho M Cuisine 牛類嘅湯河只有牛肉+牛丸提供, 所以希望 Pho M Cuisine 營運一段日子後能夠提供更多選擇給顧客。…查看更多

其實都唔需要講太多，因為對福龍門嘅良好感覺同其他師兄師姐大同小異 😆我敢講福龍門絕對係任食雞煲火鍋嘅天花板，任食得黎，同埋比差唔多價錢嘅情況下，佢地炮製嘅雞煲絕對比其他地方嘅任食雞煲做得出色，雞煲整得極入味，唔會好似有啲任食雞煲怒放醬汁搞到過甜，而雞肉斬得大大件又夠滑，我同幾個食得麻辣大辣嘅朋友，都極滿意佢地調教嘅辣度，辣得嚟又唔會搶咗雞肉嘅鮮味，正呀！😎至於火鍋，簡直又係正到離譜，所有食材睇相都知道極新鮮，啲蝦上到枱時仲識郁，而任食嘅牛肉唔係只得啲肥牛或牛板鍵，係有封門柳牛小排等，肉味十足 🤤服務方面亦不俗，主持人能跟客人打成一片，氣氛甚佳，近日裝修後冷氣充足，夏天嚟食都唔會熱。福龍門太受歡迎，如有心去食，記得預早兩星期或以上 book 枱，喺呢度寫到已期待下次光顧了 🤣…查看更多

之前喺網上搜尋巴基斯坦菜, 已被 Pakeeza Food Restaurant 提供的自助餐吸引著, 昨晚終於都試咗。由於都係第一次光顧, 就揀了唔需要多諗及最大路的3款任食咖喱自助餐, 我點了 A 餐, 有咖喱雞粥 chicken haleem, 咖喱牛 beef nihari, 以及鷹嘴豆辣汁煮骨 beef channa paya, 每款咖喱都是細細碗, 可以無限 refill, 但由於自助餐已包括了 tandoori naan, roti, 以及巴基斯坦米, 而且份量唔少, 幾件帶有芝麻嘅 tandoori naan 亦好厚 (個人感覺帶點中式風味), 在這個情況下其實都食到幾飽肚 😬, 咖喱難以refill 多轉, 我唔想浪費食物, 所以下次再來我會同佢地講聲俾少啲 tandoori naan / roti 😅這幾款咖喱都係偏稀的風格, 跟印度咖哩那種厚質感好唔同, 而試過另外一兩間巴基斯坦餐廳, 都感受到巴基斯坦風味嘅咖喱都帶有少許酸性味道, 而這晚的咖喱牛 beef nihari 肉質亦較鬆散, 但很入味, 咖喱雞粥 chicken haleem 亦係第一次接觸, 唔需要配飯或餅就咁食亦可, 而這晩三種咖喱中我就最喜歡 beef channa paya, 應該是牛筋部位吧。這個 buffet 餐亦奉送一份沙律, 辣粟米湯跟甜品, Mango Lassi 一大支, 及餐後一杯 masala tea。每位 $150 蚊就試到幾款咖喱其實相當唔錯, 幾個人來食就可以嘗試到更多不同口味, 而這裡的巴基斯坦咖喱風格幾特別, 喜歡品嚐不同咖喱的話絕對要試一試, 店員亦相當友善, 到時到候都會過來問你需否添加食物, 環境舒適冷氣充足。這晚食得超飽, 所以下次再來的話有需要減少一下 tandoori naan/roti 的份量, 因為實在太飽肚了, 又或者散叫試試佢地嘅燒烤食品。…查看更多

Odelice! 沙田分店其實喺新城市廣場已開業一年有多, 而我亦係常客, 對這間餐廳嘅食物質素及服務都感到非常滿意, 環境舒適, 播放嘅音樂好聽, 而佢哋會隔一段時間會為餐牌作出輕微改動, 我認為這是一個很好的舉動, 除了可保持一份新鮮感外, 亦反映 Odelice! 不會墨守成規, 是對食物出品有要求, 有心求進步的 👍🏼主餐牌除了有沙律及分享前菜小食外, 主要都係海鮮, 肉類, 義大利飯/Pasta 及蕎麥薄餅。基本上所有食物我都很滿意, 但若要推介幾款, 我就特別喜歡佢地嘅生牛肉他他, 紅鯛魚柳, 帶子燴意大利飯, 油封鴨腿, 以及逢星期一的牛扒任食推廣, 用的是牛胸腹, 雖然是任食, 但仍然處理得極有誠意, 最精彩是牛肉的邊位整得很脆 😎飲品亦有多種選擇, 除了果汁, Smoothie, 茶及酒類外, 我特別欣賞佢地嘅咖啡, 十分薰香濃郁。星期六日的 brunch 由早上11點供應到下午5點, 最適合一家大細去品嚐美酒佳餚, 但建議最好預先 booking。咁高質素嘅法式餐廳, 希望佢地可以喺沙田市中心長做長有！…查看更多

葵涌南亞小社區屏麗徑屏富徑有三間巴基斯坦餐廳, 其中以穆斯林餐廳最為知名, 歷史最悠久, 較多同鄉幫襯。穆斯林餐廳餐牌選項比起附近兩間巴基斯坦餐廳較為簡單, 都係提供基本嘅巴基斯坦咖喱雞/羊/牛/魚/素都或者 masala, 可配搭 roti 或者 basmati rice。如喜歡更濃味及對辣度有要求嘅話, 建議貴多十蚊左右 order masala, 因為一般嘅咖喱味道雖然不俗, 但就比較稀而水汪汪, 而無特別要求下, 唔會覺得佢好辣, 亦可能因為已一早準備好, 基本上坐低一陣就即刻有得食, 亦會奉上一份洋蔥及青瓜俾你 (以前仲有番茄)。個人略嫌咖喱汁嘅份量比較少, 碟 basmati rice 我食了一半已唔係好夠汁, 要慳住慳住用 😆 如果唔想跟飯, 其實穆斯林嘅 roti 係出色亦具特色, 亦可能係吸引區外人來幫襯嘅原因之一, 夾埋 masala d 餸來食確實頂瓜瓜 👍🏻咖喱嘅餸其實無咩好講, 因為個人覺得印巴食品好味與否取決於個咖哩汁, 不過食過好多次, 個人認為雞肉就稍為遜色, 羊牛魚都唔錯, 而魚佢地會剁到碎晒, 有好幾個朋友都鍾意食佢地嘅 masala 魚。穆斯林餐廳亦有多款小食, 而且價錢比其他地方亦相對便宜, 熱辣辣嘅 masala tea 及 Mango lassi 亦係好飲又抵飲。…查看更多

這家印度餐廳, 十多年前我喺北角返工時已經常光顧佢地位於炮台山電氣道市政大廈街市嘅總店 Clay Pot, 當時唔少報章雜誌都有介紹, 除了美味嘅食物外, 佢哋親切嘅招待亦令我難忘, 價位及招呼都極親民, 而佢地位於葵涌和宜合道嘅分店跟總店亦係同樣風格, 亦係開喺熟食中心裡面, 隔咗咁多年, 上到去都仲記得我 ❤️今日午市叫了一份中辣嘅牛油雞咖喱, Garlic Naan, 同埋一杯 Sweet Lassi。牛油雞肉身嫩滑唔鞋身, 而且俾嘅份量亦係超多, 極之抵食, Garlic Naan 上到枱熱辣辣, 而我覺得佢比附近幾間本身已很出色嘅巴基斯坦餐廳嘅 Naan 厚身, 夾埋牛油雞個咖喱來食正到痺呀！今日隔離枱有幾位客人點了 Tandoori Chicken, 經過我枱時香噴噴好吸引, 所以下次再來, 同朋友食嘅話一定會叫佢哋嘅燒烤食品 😄 其實佢地午市都有提供一般嘅 lunch set 咖喱跟飯或 Naan, 不過通常這類咖喱都會相對普通及, 而飯亦不是使用長身米, 對於食有要求, 橫掂嚟食就食好啲, 所以我會選擇番 main menu 嘅菜式 🤤美滿嘅一個午餐, 飽而不滯 👍🏻…查看更多

位於旺角亞皆老街 (近洗衣街同黑布街) 嘅越星餐廳, 其實都已幫襯過好幾次, 而幾次過來幫襯後我都非常滿意, 絕對係我本地越南餐廳最愛嘅頭三甲之一，好幾次都見佢地有同鄉來幫襯, 可知道有一定水準 ☺️越星個生牛河十分足料，超多餸，湯底超濃郁入味 (但建議最好唔好太早嚟食，可能湯底未餚得太耐，味道會偏淡)，雖然無另外奉送各種香葉, 但畢竟唔少食客，包括自己以前，都未必受到越南粉香葉嗰啲味，但我相信其實已一早放左落湯裡頭，否則個湯底唔會這般濃郁入味，而且就算成碗湯飲晒都唔會覺得口渴。我亦試過佢地其他小食例如越式春卷, 香茅豬扒/雞翼，同樣出色。市面上，特别係喺商場內有唔少裝修華麗嘅越南餐館，中伏機會其實極高，但越星這間越南小店絕對係信心態之選，食物質素及性價比極高，誠意推介 👍🏻…查看更多

有次落開去紅磡, 一直都想試下 Curry & Kabab Hut , 以下係我對佢嘅簡短評價。食物：咖喱羊個味 ok, 但又無乜特別, 感覺佢地落得唔係太足香料, 而且羊肉切得太細舊同埋瘦, 導致性價比低。Mango Lassi 都幾甜下, Naan 就正正常常。環境：雖然卡位好坐, 但冷氣不足, 都幾熱下服務：冷淡, 好似只係想做番同鄉生意咁, 埋單 thank you 都無, overall 感覺唔係太好同區近似嘅選擇都係得嗰間中東連鎖店, 或需要過去土瓜灣, 但首次光顧嘅印象麻麻, 回頭機會極微了。…查看更多

葵涌青山公路葵涌段一帶又唔少小店餐館, 除了茶餐廳外, 亦有其他亞洲美食例如雲南米線, 泰國菜及韓式炸雞, 但其實這個區域亦係不少南亞裔的聚居地, 擁有三間巴基斯坦餐館, 今日想介紹是位於屏麗徑近巴士站既卡拉奇 Karachi Have A Bite.最初光顧卡拉奇主要都係食佢地既卡巴卷, 但後來發現佢地嘅 Biryani 及咖喱同樣出色, 特别是 Biryani, 我比較過其他巴基斯坦/印度餐館, 我敢講卡拉奇既 Biryani 絕對是 5 星級, 上到枱熱辣辣, 相比起其他我覺得佢地落足香料, 亦跟埋沙律, 正到震撼！至於咖喱, 主要都是 standard curry, 菠菜羊/雞, 或者 masala, 亦當然有素食, 如閣下食得辣, 謹記落餐時提老闆要辣啲, 最辣可以去到 Vindaloo 級數 yeaaaaah🔥🔥🔥 如果無提及, 個人口味認為會相對普通, 但都惹味, 最緊要係唔會覺得鹹。至於其他食品, 亦有 tandoori chicken, 咖喱角, salad, pizza 等等, 環境座位亦十分舒適,風格有點似某間中東連鎖店, 但卡拉奇嘅價位就理想得多。唔少旺區好多時都難以容納這種另類/小眾食品, 若果想尋求不同類型食物及正宗口味, 絕對可試卡拉奇, 絕對值得支持這類高質素小店 👍🏻…查看更多

雲米家這家分店本身喺我公司附近，開咗好一段時間，今日經過捧住一試無妨嘅心態入去作首次幫襯，印象極之良好。是日叫咗碗大麻中辣米線，餸就揀咗腩肉、豬紅、豬大腸，好足料，由於揀了大。。麻😜 嘅關係，麻辣程度好過癮，好啱我口味，食到我感激流涕，眼水都標晒出嚟 😆 另外我亦叫咗份小食炸雲吞，佢個餡就齋菜，味道亦不俗。店內環境頗舒適，而店員態度亦十分良好，所以一定會再來幫襯，下次會試下佢哋嘅串燒及麻辣雞煲 👍👍…查看更多

心血來潮想食 Burger, 唔係健康嘢, 亦唔會成日食😆, 所以一食就寧願俾貴些少食好啲嘅, 好過俾幾十蚊食老M然後喊苦喊忽唔開心成日 🥲😅第一次幫襯 Five Guys, 叫咗 Cheese Burger with Bacon+ 細 fries + milk shake, 加埋都已超過2舊水, 但食得很滿意 👍, Burger 好多配料可以揀, 雖然只係細 fries, 但一支公食, 個份量其實都已極足夠, 橫掂第一次來食同橫掂預咗唔健康一次, 去盡啲所以叫埋杯甜嘢 milk shake 囉 🤣 原來係可以揀多過一隻味, 咁我就揀咗 Chocolate 同 Salted Caramel, 都唔錯啦。好食嘅一餐, 唯獨是鹹咗些少, 事後需要補充大量水份, 健康番晒。晏晝1點左右食, 飽到夜晚唔洗再食, 抵哂 🥸✌️我亦幾鍾意餐廳嘅設計, 加上個場播啲音樂都係80年代英文流行曲，極有懷舊氣息。期待下一次 😎…查看更多

Pizza Express 食物本身無乜問題, 帶小朋友食嘢亦算係一個好選擇, 但此店服務效率欠佳, 早餐叫杯咖啡都可以甩甩漏漏等成15分鐘, 但都未到 Blacklist 程度, 不過最近既制度就令我對此店非常反感。餐廳本身係有普通食水提供嘅, 但最近一次去已變成無普通食水供應, 要飲就逼你每個客額外俾多$16 飲佢地嗰啲所謂靚水, 我飲你一杯啤酒收再收加一都已經差唔多$80一杯喇, 唔係孤寒嗰十元八塊, 係條氣唔順, 雖則你可以話餐廳無義務供應普通清水, 但我認為此行徑極不友善, 因嗰十元八塊變成與客為敵, 中價懶酒店式高檔, 已徹底 Bkacklist 👋👋👋…查看更多

之前喺網上見到對沙角邨嚐聚嘅評價普遍正面, 最後膽粗粗一支公入去一試。第一次去, 五點半鐘晚市剛開始, 叫咗佢哋嘅雞煲, 先試中辣, 結果無令我失望, $168 份量極足, 物有所值, 雞件斬得大大件, 香滑可口, 一啲都唔鞋身, 現今出邊好多雞煲都整得太甜, 嚐聚嘅雞煲就無咗呢個問題, 如果再多些少香料就更理想, 再嘆番兩杯 Suntory 神泡生啤, 配搭舒適嘅環境及優質友善嘅服務, 感覺非常良好。後來發覺就算一個人入座, 都可以以$188 叫佢哋嘅任食火鍋, 再每位加 $20 就可以任食埋雞煲, 而7點半前埋單平$30, 即係$178, 比齋 order 雞煲只是貴咗 $10, 就可以打埋邊爐, 任飲汽水/罐裝茶, 及包多一杯特飲, 相當抵食 👍 晚市亦有串燒套餐供應, 價錢$148 包任飲, 亦都物有所值, 約 friend 過嚟食下串燒飲下生啤吹下水唔錯㗎, 有如屋邨內的酒吧 🍺🍺🍺 有第一次, 結果有第二三次, 值得光顧 👍…查看更多

想喺沙田市中心搵啲大件又較為抵食同埋好食嘅實在太難，要食得開心又要夠飽，都需要花費最少$150左右，所以好多時我索性喺好運中心過條橋行過去瀝源，商場裡面蘭香閣這間老店我認為出品極為穩陣，最欣賞係佢地嘅焗飯，特別係焗豬扒飯同埋牛魔王焗飯，牛摩王焗飯半邊係咖喱牛腩，半邊係黑椒牛肉，十分惹味可口，而焗飯份量十足，我慣早食晚餐，去到臨瞓前都唔會再肚餓。另外亦試過佢地嘅滑蛋蝦仁叉燒飯同埋咖喱海鮮炒飯，亦有一定水準，飲品不過不失，而環境座位亦算舒適，值得支持 👍…查看更多