嚐聚 (已結業)

之前喺網上見到對沙角邨嚐聚嘅評價普遍正面, 最後膽粗粗一支公入去一試。第一次去, 五點半鐘晚市剛開始, 叫咗佢哋嘅雞煲, 先試中辣, 結果無令我失望, $168 份量極足, 物有所值, 雞件斬得大大件, 香滑可口, 一啲都唔鞋身, 現今出邊好多雞煲都整得太甜, 嚐聚嘅雞煲就無咗呢個問題, 如果再多些少香料就更理想, 再嘆番兩杯 Suntory 神泡生啤, 配搭舒適嘅環境及優質友善嘅服務, 感覺非常良好。

後來發覺就算一個人入座, 都可以以$188 叫佢哋嘅任食火鍋, 再每位加 $20 就可以任食埋雞煲, 而7點半前埋單平$30, 即係$178, 比齋 order 雞煲只是貴咗 $10, 就可以打埋邊爐, 任飲汽水/罐裝茶, 及包多一杯特飲, 相當抵食 👍

晚市亦有串燒套餐供應, 價錢$148 包任飲, 亦都物有所值, 約 friend 過嚟食下串燒飲下生啤吹下水唔錯㗎, 有如屋邨內的酒吧 🍺🍺🍺

有第一次, 結果有第二三次, 值得光顧 👍