菜虫的个人专页

朋友返香港，梗係要搵間吹水舒服嘅餐廳坐啦！朋友好鍾意食嘢，所以無限時放題係我哋嘅唯一選擇！呢間餐廳外表好搶眼，相信喺呢頭嘅街坊都會認識～上到去職員就好友善咁介紹呢一個花膠雞套餐有啲乜嘢食。首先一嚟就係上咗個花膠雞湯，職員喺我哋面前將雞肉放落個鍋度，仲叫我哋記得飲咗湯先開始打邊爐～個湯好清，唔會話因為有雞所以變到好油，飲完碗湯打咗個底就開始食嘢！刺身拼盤有帶子三文魚同埋好大隻蝦，啖啖肉夠晒甜！海鮮拼盤勁豪華，兩隻蠔就算煮熟咗都唔會縮水，肉質好鮮甜；鮑魚又係唔會好韌好老，肉質軟腍腍～啲蝦鮮甜又爽口，正！肉拼盤擺得好靚，係一個驚喜～而炸蝦丸新鮮即香脆可口，同類食品喺中菜廳食好貴㗎！大推！食完以上食物，我哋仲可以出去自助區任拎，竟然連海鮮都可以任食，仲有蔬菜丸類同其他配料揀！最開心係仲有個熟食區，有前菜、沙律，又有好多炸物選擇，仲有烤香腸同埋關東煮！飲品除咗汽水之外，又有啤酒同特製飲品揀。甜品就有好多種味道嘅香港製造雪糕，同埋幾款甜品～最後我同朋友吹水吹到10點幾都唔肯走，朋友話啲枱空間比較闊，啱晒聚會吹水，飲下食吓咁樣過一晚！…查看更多

今晚同朋友去咗呢間餐廳，真係好大驚喜，樣樣都好正！😍首先叫咗個前菜「金平牛蒡漬」，馬上就送上嚟，入味又爽口，開個胃先！然後我哋點咗幾款串燒：「免治雞肉棒」係我去日式居酒屋必點 ，雞肉調味剛剛好，口感超juicy，一定要撈埋隻生蛋同埋豉油，食落好有層次！「紫蘇蟹籽墨魚滑 」爽口彈牙，柴蘇嘅清香同蟹籽嘅鮮味一齊爆發，食落有種高級感，點多幾串都唔會嫌多！「牛小排串」真係不得了！牛肉烤得外香內嫩，有返少少厚度，肉汁鎖得好好，每一啖都係滿滿嘅牛肉香，諗起都好回味！主食方面，我哋忍唔住點咗兩款，因為兩款都想食！果然冇揀錯，「黑松露野菌炒烏冬」個烏冬炒得彈牙，條條分明，黑松露嘅香氣好出，濃郁得嚟又唔會太膩，加埋香菇同洋蔥，好好味呀！「鰻魚炒飯」又係另一款居酒屋必點名菜，食過咁多間，呢間係最揼本咁將鰻魚大塊大塊咁車落去，而且佢個炒飯粒粒都包住醬汁，好有咬口，唔會又乾又冇肉食，所以就算份量大大碟，我同朋友都隊晒！大推！壓軸登場嘅餐廳得意之作：原條蒜茸茄子，店員仲親手幫我哋撈勻，茄子烤得軟熟入味，蒜茸香氣撲鼻，入口又嫩又juicy，正到爆！重點之中嘅重點！所有食物都熱到標晒煙，真材實料，店員仲細心提醒我哋好熱😆食到勁飽勁滿足！飲品方面，芒果梳打同荔枝梳打 都好清新！氣泡感好refreshing，超解渴，飲完一啖就想再飲，真係完美嘅飲品！總括嚟講，呢餐飯每一道菜都好有水準，味道同賣相都一流，服務勁好，好似去咗朋友屋企咁自在，絕對係一間值得再返嚟嘅餐廳！強烈推介俾大家！…查看更多

約舊同事食飯，佢話上次去尖沙咀Mira Place見到有間好靚裝修既新派泰國菜，真係一個驚喜嘅體驗！餐廳裝修由門口開始已經好有格調，高雅得來又有啲泰國風情，燈光柔和，坐低即刻有種chill嘅感覺，超適合同朋友或者另一半嚟食飯飲酒！一入座，waiter好有禮貌送上menu，選擇多到有啲眼花！為咗試多幾款食物，我哋叫咗幾款小食，有泰式蝦多士、紅磚豆腐、炭燒豬頸肉同埋酸辣無骨鳳爪，另外再叫多個炭燒沙嗲牛，開開胃先！先講酸辣無骨鳳爪個醬汁入晒味，食落有爽口嘅口感，酸辣度啱啱好，食完就開晒胃喇！泰式蝦多士隻蝦炸到金黃香脆，點啲甜酸醬，酸酸甜甜好開胃。紅磚豆腐炸得外脆內軟，口感同味道層次好豐富，熱辣辣又香口！炭燒豬頸肉同炭燒沙嗲牛都係炭燒嘅精髓，豬頸肉薄薄一片，肥瘦均勻；沙嗲牛肉串就更正，平時食串燒好驚燒到乾晒，呢度個串燒牛肉大粒得嚟又好嫩滑，啖啖肉好滿足！之後仲叫咗泰式椰子鮮雞湯，大推！估唔到個湯勁好飲，椰汁香濃但唔膩，雞肉好嫩，香甜清新，份量又足，我同朋友一人飲咗三碗飲晒佢！酒香火焰骨係全晚嘅高潮，侍應幫手淋酒，再加火焰一燒，畫面勁靚！最估唔到係份量勁大碟，排骨入晒味，肉質軟腍到軟骨都可以食埋，食到停唔到！食完個排骨，再嚟多個泰胡椒和牛炒糯米河，又係一個大驚喜！河粉炒到好彈牙，和牛又勁嫩滑，而且一啲都唔油，唔會好似中式炒河咁食到個人好大罪惡感～甜品嘅黑糖椰子雪糕為晚餐劃上完美嘅句號，椰子乾加埋一球大大既雪糕，仲有好多配料，無論口感定係味道都好平衡！全晚係座無虛席，所以大家如果想試，記得要訂位呀！呢間新派泰國菜真係將傳統泰菜同創意融合得好好，每道菜都有驚喜，服務又貼心，環境一流，勁高質！無論係同朋友聚會定係約會都啱晒！…查看更多

我同屋企人一向都鍾意食酸菜魚，所以已經去過唔同餐廳食～而屋企人話佢每次食酸菜魚魚片，魚肉都上咗厚厚嘅漿，令到魚嘅口感變得好滑，滑到唔似魚片。上網搵到呢間25年老店，標榜佢哋嘅酸菜魚，連湯底都飲得，就決定帶屋企人去試吓啦～酸菜魚魚片有兩種揀，我哋揀咗貴啲嘅桂花魚，希望有質素啲，屋企人會滿意啦～一上枱見到滿滿嘅魚片，下面仲有好大塊木耳同埋萵筍，最底係吸晒湯底嘅薯粉！我哋首先飲咗個湯底先，果然同其他餐廳唔同，唔會太酸辣，真係可以當湯飲喎！飲完亦唔覺得口渴～而魚片雖然都好滑溜，但係食得出係真正魚肉；木耳大大塊，咬落好爽口，好快就掃晒成盤～孜然炒羊肉，一食落口就知道唔係平時是但灑孜然粉，再求其用啲急凍羊肉片咁煮。手切羊肉好有口感，配菜嘅洋蔥勁香甜好食，俾我掃晒～另外仲叫咗個蒜泥青瓜，勁大碟，喺炎炎夏日清新一下！飲埋杯凍檸茶，好滿足！味道嚟講真係食得出好有鑊氣好用心去煮好有驚喜！餐牌上面仲有好多睇落好吸引嘅菜，要留返下次先可以試啦～！…查看更多

呢間放題之前已經幫襯過旺角店，我同朋友食完之後讚不絕口。最近先發現原來觀塘都有一間，於是就叫朋友嚟試吓喇！一去到餐廳，未入到去，朋友就已經大讚觀塘店既裝修，環境好乾淨，充滿中國建築風味，睇睇門口海報，原來平時可以飲茶食點心咁開心！我地叫咗性價比最高既小寶餐，因為最平既餐都已經有個雞煲或者酸菜魚二選一，我地當然揀返上次食過返尋味既酸菜魚啦！觀塘店一樣係大大份咁上，絕對唔會姑寒，喺等湯底上果時，就可以食佢兩個前菜同埋個酸菜魚啦！飲品方面都同之前食旺角店有出入，除咗唔少得下火既中式飲品之外，仲有好新奇既有汽洛神花茶，算唔算係中式ｘ西式呢？自助吧一樣有蔬菜同埋各種丸類自取，魚皮餃、響鈴呢啲絕對唔少得，所以叫咗個冬蔭功湯底，索晒啲湯汁，勁正呀！肉類方面，大推肥牛同埋封門柳，肉質香甜！豬肉片都好美味，厚薄適中，豬味濃郁，都係任食之選！而海鮮方面，最平既餐都有得食蠔、蝦同埋鯇魚片，又有手打蝦丸同墨丸，夠晒多選擇～而家好多放題店都已經轉咗無限時任食，唔再局限2小時，所以大家絕對可以舒舒服服咁試晒咁多野食啦！…查看更多

臨急臨忙想搵地方食個飯，就入咗呢間餃類專門店，因為好肚餓，就同朋友叫咗三款餃share嚟食～因為即叫即煎要等一等，就同朋友叫咗個前菜「黃金原味皮蛋」食住先，話咁快就上枱，隻皮蛋仲好彈牙～跟住先嚟既係「至尊松茸豬肉餃」(8隻)，勁大隻，皮薄但餡勁多，一咬落去真係食到松茸味～再等多一陣就煎好咗餃，我地分別叫咗「香煎軟心芝士餃」同埋「壽喜燒牛肉餃」，即煎即上，熱辣辣到放唔到入口，平時喺屋企都好難煎到咁香脆，但餐廳將兩邊都煎到好脆口！芝士餃入面有爽甜粟米，芝士反而唔係最多，唔會好漏～壽喜燒就有甜甜豉油味～另外叫咗山楂雪梨水同埋蜂蜜檸檬薏米水各一杯，食完煎餃飲返杯飲品就最正啦！無論係湯餃定係煎餃，全部都咁大隻，初頭有啲擔心食唔晒，但好彩餐廳冇趕人，再坐一陣吹吓水，食吓食吓就食晒了～！…查看更多

呢間同家人朋友幫襯過幾次，之前去銅鑼灣店都好滿意，今日就帶未試過既朋友嚟炮台山店食飯～仲記得之前同大班朋友嚟食，仲有間房可以坐，好方便傾計！今次就坐吧枱，一樣係咁舒服好坐～［溫泉蛋蟹肉沙律］賣相好靚，我本身唔食蕃茄仔，但試咗一粒勁新鮮爽脆，撈埋個芝麻汁同埋溫泉蛋黃，味道好balance～［究極火龍卷］名符其實既一道菜，竟然真係識著火，賣相滿分！入面有6件手卷，6件個topping都唔同款，一碟就可以食勻晒，中間仲有個炸到好酥脆既蝦頭，好有趣！［鰻魚芝士玉子燒］玉子好嫩滑，加埋入面鰻魚肉，熱辣辣，居酒屋必食！［海膽右口魚邊蝦卷］賣相精緻，一啖就有齊豐富海產味道［究極炎之丼］熱辣辣既一碗丼飯，刺新好肥美，火炙過後好香口，正！飲品方面，我地點咗［巨峰提子蘇打］同埋［青檸蘇打］，真係有幾粒青檸可以篤，唔會好假好甜，解膩啱啱好～朋友都覺得我冇介紹錯，呢度可以食到有別於一般日本餐廳既創作料理，又靚又好食！佢地平日仲有豐儉由人既lunch menu，就算一個人嚟都可以盡興～！…查看更多

喺台灣旅行時食過燒肉Smile，對呢間台灣no.1單人燒肉嘅性價比念念不忘，竟然俾我等到佢嚟香港插旗！最近終於有時間去試吓香港店嘅水準啦！我同朋友分別點咗一個餐，有「日和極上盛合套餐」同埋「SMILE盛合套餐」，等緊食物到時，仲可以去自助吧食嘢～自助沙律吧有好幾款蔬菜同醬料，但真正吸引我哋嘅係旁邊個涼盤吧！海帶、泡菜、小黃瓜加埋十幾款任食，最正係滷鵪鶉蛋，個蛋黃入晒味，放喺爐上面燒兩燒，勁好食！過咗一陣，兩個套餐就到～店員特別推薦升級做韓式雪蟹膏拌飯，一嚟就好大驚喜！配料鋪到滿晒之餘，竟然仲有魚籽喺中間！惹味到未開始燒肉就已經食咗半碗飯～跟餐仲有個濟州海帶豆腐湯，但燒肉當然要飲多啲嘢啦！我哋加錢點咗鳳梨冰茶同埋冬瓜檸檬，飲品勁大杯唔會飲兩啖就冇，仲方便帶走，正！肉類同喺台灣食嘅一樣，全部都好高質，我哋叫嘅套餐仲有海鮮食，真係超豐富！不過熱愛牛舌嘅我，心思思都係再點多個蔥鹽牛舌（日式麻油椒鹽）$88，結果俾個咁有誠意嘅份量嚇到！而佢個牛舌都好好味，極之抵！差啲唔記得我哋仲加咗兩個甜品，分別係焦糖布蕾同埋黑糖白玉，食完啱啱好，大滿足！食完餐飯，未出門口已經同朋友講話要再帶其他朋友嚟再食！佢哋平日好似有啲更加平嘅套餐，門口廣告話$58起咋，真係唔好錯過！…查看更多

同事之前嚟過呢間喺佢屋企附近嘅鐵板燒食飯，話食物質素好高，於是我就約埋朋友放工過嚟試吓！餐廳好似曾經搬過，呢間新店裝修新淨又有格調，我同朋友坐咗喺和式窗邊位，叫咗個「鳥海山鐵板套餐 二人前」，話咁快就先嚟兩份沙律前菜：之後係是日刺身，侍應耐心介紹進食次序，刺身刀功好好，食落好柔軟有魚味，唔需要點豉油就好正啦～聽到鐵板區師傅煮食嘅聲音，就知道有熱辣辣嘅嘢食啦～！先嚟一人一隻活鮑魚，已經切好一件件，好香口彈牙！然後係一隻活龍蝦，師傅起咗龍蝦肉，再用蝦膏醬汁炒到龍蝦肉爽口彈牙，令人回味無窮！牛肉薄燒好惹味，入面包滿咗蔥粒，咬落去仲係熱辣辣～鵝肝多士係全日最邪惡，鵝肝火喉恰到好處，份量啱啱好，多士脆口度剛好，兩樣配合埋一齊，食完都唔好話好漏！最後嚟個炒雜菜同埋炒飯，個飯大大碗仲有櫻花蝦，飯粒分明，炒菜份量又足，熱辣辣咁上枱，最後乾杯埋個面豉湯，食咗大約1.5小時，傾住計、欣賞住裝修咁嘆完個餐～…查看更多

臨時約朋友出嚟傾野，上網想搵間cafe方便吹水，見呢間cafe既dinner set價位都唔錯，就急急訂位夜晚去食，好在有訂位，去到發現full house，可見食物應該會有一定水準！我地叫咗兩個套餐，兩個都+$38有埋沙律同芝士蛋糕。沙律菜好新鮮爽脆，份量都好足，食完冇幾耐就上主菜喇～「香蒜白酒蜆肉意粉」個意粉彈牙有咬口，唔會過淋。微辣惹味，蒜蓉味又夠。而且D蜆肉好似唔使錢咁勁足料～而「西班牙海鮮辣肉腸燴飯」每粒飯都上晒色，口感剛好唔會太硬～海蝦爽口彈牙，飯係有咬口嗰種，加埋豐富醬汁，每粒飯都俾微甜既惹味醬汁包裹住，啱哂鐘意汁撈飯人士!另外仲叫咗個黑松露薯條，勁大份！灑滿晒黑松露粉！因為好大份，所以食完主菜都未食完個薯條，但到最後食個薯條都仍然係好脆口，真心推介！真係好啱約人吹水果時，叫杯飲品，叫份薯條～我叫咗杯「女皇」特飲（跟餐+$10），面頭玫瑰好靚，飲落唔會太甜；而朋友就叫咗 凍薄荷朱古力，好夠薄荷味，同朱古力味比例剛剛好，唔會太甜，夠清新。兩杯都好好飲！飯後甜品我地都叫咗藍莓芝士蛋糕作為一餐完美既句號🤤，個擺盤都有心機，整得幾靚。幼滑口感加上清甜藍莓醬，好滿足呀！估唔到臨時約嘅一間餐廳都咁驚喜，我同朋友都覺得好運連連🥰…查看更多

旺角瓊華一向係高質餐廳集中地，我同朋友已經試過入面好幾間餐廳，今日去到12樓試下呢間做緊優惠嘅涮涮鍋先～我地食既係D4日本黑毛和牛餐！呢個餐真係好豪華好豐富，有龍蝦、有鮑魚、黑毛和牛、刺身等等！鮑魚好腍，鮮蝦好甜！湯底一開始先俾一個雞煲我地嘆吓～我地又想惹味又唔太食得辣，店員就貼心咁幫我地叫BB辣，辣度剛剛好，個汁仲好香好惹味！一食就覺得有雞味得嚟又唔會太老，話咁快就食晒啲雞～食完個雞煲之後，店員話可以直接加湯做雞煲醬湯底，又可以另外揀一款湯底。我地二話不說就決定繼續食呢個雞煲醬湯底！食材同飲品都好多選擇，可以自己任拎，醬料區都有好多配料，但因為個雞煲湯太惹味喇～我根本唔需要再另加醬料！全晚最大驚喜：竟然有大閘蟹食！最近成日心思思想食大閘蟹，估唔到呢個套餐有得食，仲蒸到熱辣辣送上，真係好滿足呀！最後當然要食返個甜品啦！雖然甜品選擇唔多，但仲有好多款雪糕同雪條食～食到捧住個肚走！…查看更多

留意到尖沙咀最近開咗間火鍋餐廳，竟然有激罕雞部位食，就拿拿臨叫埋朋友去試！店員推介２人餐俾我哋，仲話２人餐只包兩罐飲品，但打完卡就可以變無限暢飲！咁抵，梗係拎埋個優惠先啦～我地點咗招牌牛骨清湯底，店員好快手就幫我地上菜，上到一枱都係！先飲一碗清湯，香甜得嚟仲有勁香黑椒味，然後就放一片吊龍落去，再點個自己組合出嚟既醬料，好鮮甜美味！肉類方面除咗吊龍之外，仲有招牌脆皮雞同埋一盤新鮮雞雜，店員耐心教我地唔駛淥太耐，雞雜本來都擔心，但食落冇怪味又幾過癮！最注目當然係「提燈」位啦，原來係雞卵巢加埋未孵化既蛋，其實食落係一粒外面爽脆、入面流心既雞蛋，我都係第一次見，仲要係第一次食～人一世物一世真係要試吓！其他仲有大大份蔬菜菌菇拼盤，同埋半打手打牛肉丸，牛肉丸食落好彈牙，另外仲有少見既高山筍芯，餐廳仲以油條取代平時打邊爐食開既響鈴，又幾好食喎！如果食慣港式日式台式火鍋，嚟呢度食吓未食過既部位都幾新奇刺激有趣～！…查看更多

今日嚟到家賀屋食日本菜，首先叫咗杯<巨峰提子乳酸梳打酒>先！香甜易入口，但之後酒精就會出嚟，啱晒我呢啲唔飲得酒又想過吓癮嘅人～之後朋友就話想叫個<海膽龍珠卷>，佢話樓下見到廣告牌果時已經覺得好吸引～咁啱我又想食海膽！不愧為招牌菜，一上枱就覺得好靚！食落口味道勁豐富，正！見到落單頁面有款<豐州直送-令和之怪物蠔 約250g>，本來想叫2隻，但因為太搶手所以得返最後一份，果然夠晒大隻，勁香蠔味，好新鮮～再叫埋個<油甘魚腩刺身>，呢款刺身油脂好足，肥大肉厚最近成腦都係大閘蟹，當然唔會喺日式餐廳搵到啦！所以都係忍唔住叫咗個<炸軟殼蟹>，唔駛慢慢拆肉，一啖放入口好方便！朋友想食內臟，就點咗個<阿波尾酢橘半熟雞肝串>，好在又冇怪味，咁啱我又叫咗個<汁燒免治雞軟骨棒>，可以點埋個生蛋汁一齊食去balance返，啱啱好！肉類方面另外仲叫咗<鹽燒仙台熟成牛舌>，厚切牛舌但唔會咬極都咬唔開，啖啖肉好滿足！最後叫咗期間限定嘅三款食物：有<火炙厚切鮟鰊魚肝>、<黑松露煙燻帆立貝>同埋<柚子風手切本鮪魚腩蓉>，全部都放咗滿滿嘅配料，下面張「紙」其實係紫菜，可以一啖食咗佢，夠晒方便～呢度有勁多酒類選擇，又有好多啱做下酒菜嘅食物，地點方便，環境舒適，服務又好，約朋友吹水食飯真係一流！…查看更多

朋友話最近去咗一間以貓貓為主題嘅餐廳，身為奴才嘅我二話不說就約埋主子契媽去試吓！Menu有好多款式，有拼盤又有散叫，店員推介我哋點做緊優惠嘅「厚切和牛貓罐頭」，大大份先話$268，啱晒唔想用腦只想食肉嘅我哋！呢個拼盤一上枱就令我哋好興奮，因為佢用一個巨型貓罐罐裝住啲肉，店員一打開罐蓋，乾冰嘅煙霧效果就出晒嚟, 非常高級，梗係要狂影相啦！貓罐罐入面有厚切美國牛肋、厚切西班牙黑毛豬五花、厚切牛舌、厚切日本宫崎A5和牛同埋厚切澳洲縠飼牛板腱，冇錯！呢個罐入面全部都係厚切，啖啖肉真係好滿足！除咗厚切牛舌比較難咬之外，其他肉都好腍，主打嘅A5和牛真係好好食，油花分佈剛好，唔會成口油～一場嚟到，我哋仲點咗電視節目有介紹嘅貓抓泡椒肥牛，見到一排肥牛上面滿滿嘅泡椒醬料，兩個人合力夾住頭尾搬上去燒烤爐，好快就食得！呢款肉真係全場惹味NO.1，泡椒辣得嚟好清新，雖然食完要飲水解解辣，但真係辣得好過癮呀～朋友見貓抓洋葱牛小粒都係餐廳推介，就心思思想點嚟食，但之前同佢食燒肉放題食到咬唔爛嘅牛小粒，我哋都有啲擔心同類產品會唔會有一樣問題。結果呢度嘅牛小粒冇筋之餘仲好軟腍腍，而且份量都多，仲炒埋個洋葱嚟食，勁香口！食完咁多肉，當然唔可以錯過甜品啦！呢度嘅甜品款式比同類烤肉店多，而且款款都好啱用嚟打卡～我哋點咗一人一個貓抓焦糖布丁，$22呢個價錢真係冇得挑剔，即叫即做，上面仲有一個可愛貓手～最後仲忍唔住再叫多個白喵雪花冰，層次分明，又靚又好食！因為甜品即叫即做，建議大家要早15分鐘就落定order，咁就唔駛慢慢等啦～！又有和牛又有甜品，最後埋單每人唔駛$300，我哋就覺得抵過食放題，朋友仲話下次要叫朋友嚟試試，可以再戰！…查看更多

利舞臺喺時代廣場旁邊，位置方便，入面好多裝修新淨又有格調嘅餐廳，今次就同朋友揀咗喺18樓嘅韓國菜，門口已經見到好多打卡位，入面座位闊落舒適，好啱同朋友傾計～不過店內音樂都係我同朋友耳熟能詳嘅經典歌曲，識唱忍唔住一齊唱咗～嚟到韓國餐廳，當然要食佢地主打既炸雞啦！我地擔心一份炸雞會太多，就點咗半份「蜜糖牛油香蒜炸雞」$152，半份就係半隻雞，總共有6件，包括1件雞翼同1件雞鎚。店員俾咗手套我哋，但炸雞新鮮即炸所以好燙手，放咗一陣先享用到～外皮炸到好脆口，充滿蜜糖及牛油香，雞件尺寸都算大，份量啱啱好唔會太漏～另外仲點咗「芝士蛋卷」$135，好似玉子燒咁大大條，一切開，入面流心芝士就爆出嚟，仲有拉絲效果，正呀！炎炎夏日，加上食完炸雞，我哋各自點咗杯消暑特飲，朋友點咗「士多啤梨奶昔」$58，我就點咗「柚子(Yuja)乳酪」$48，酸酸甜甜咁，飲落即刻透心涼呀～最後兩位埋單$432，渡過咗同朋友開心嘅吹水時光！…查看更多