当前,相机食先。作为foodie,先影为敬再放上IG直情系反射动作!优秀开饭热店2018以「美食大晒 尽情Show Quali」主题,无论你系食家定系大厨,有好嘢自然要晒一晒!即刻睇睇各区同各类型必试热店如何大晒功架!
去澳门除咗赌两手,当然仲要食返够本!澳门独有唔少地道食店,系要过大海先食到嘅风味!老店继续多人力捧,亦有大量新势力加入,连国际品牌及创作小店都有有,即刻睇睇今次首次入围名单,支持心水实力餐厅啦!
老牌厚多士 青洲灶记咖啡
本来位於青洲嘅五十几年历史老店,於两年前喺氹仔开设分店。虽然冇咗昔日矮櫈,但食物仍然保持水准,必吃蜜糖粒粒厚多士、趣脆咖哩辣鱼包同牛尾汤通粉,炒面炒河亦好有镬气,大碟足料,游客同本地人都力捧。Tiffany Blue嘅小屋墙身,更系打卡胜地。
着名美国连锁café Dean & Deluca
源自纽约的café及食品杂货店,於全球有六十多间分店,澳门店为中港澳地区首间分店,装修更加融入澳葡元素。招牌作有彩虹千层蛋糕,层层唔同颜色,非常之IG-able,红丝绒蛋糕亦系招牌作。澳门独有菜式包括非洲鸡炸肉丸、港式奶茶柏林果酱包等,亦有果酱、朱古力等乾货售卖。
驰名咖喱面 咖喱全
呢间主打咖喱嘅食店,咖喱味道独特,有啲似印度再加埋港式咖喱,香口微辣,招牌菜咖喱牛腩面,牛腩炆得松化入味。而锺意重口味要点咖喱饭,因为饭底都充满咖喱味!另外猪扒包亦系必点,即焗够香脆,点咖喱汁食一流。茶餐厅格局,但仍然不乏嚟朝圣嘅游客。
人气葡菜老店 山度士葡式餐厅
由葡国人主理嘅老牌食店,1989年开业至今,仍然保持地道葡萄牙南部风味。装修同食物实而不华,甚有家庭feel,葡式烧乳猪皮脆肉嫩,焗鸭饭、炒蚬、葡国鸡及马介休球都系受欢迎嘅菜式,连汽水都系葡国进口。店子小小,但每晚都座无虚席,想食一定要先订位。
甘香蟹黄捞面 澳门新龙记
澳门有多种特色地道粉面,呢一间主打蟹黄捞面,蟹黄系人手鲜拆,味道鲜味甘香,而且蟹油丰腴,面条爽弹冇硷水味,捞面味道啱啱好,想再浓味可以加码,更加满足。配料就一定要拣墨鱼饼,每日新鲜打成,弹牙又鲜甜。另外花雕鸡、咖喱都系在地人推介食品。
独有缅甸鱼汤粉 雅馨缅甸餐厅
澳门曾有唔少缅甸华侨居住,尤其是三盏灯区域,特别多缅甸食店。呢一间唔少旅游书都会推介嘅名店,以一道缅甸鱼汤粉打响名堂,浅黄色鱼汤用上手拆鱼肉、酱料、芭蕉树芯、咖喱等多种材料熬成,鱼香浓郁而且食到鱼肉碎,椰汁鸡、缅甸捞面、马拉盏捞面都系必吃之选。
年轮蛋糕专门店 不是葡挞
游客去到澳门指定动作系食葡挞,不过呢间新开食店主打嘅系年轮蛋糕!分似曲奇嘅硬身及蛋糕口感嘅软身,卖相如蛋挞,有芝士及葡式两种,葡式蛋糕馅同样系蛋浆,但其实以千层蛋糕代替酥皮,口感有别於一般葡挞。芝士就用法国芝士,食落有少少柠檬香,不觉油腻。
酒店新贵 巴黎人法式餐厅
万众瞩目嘅巴黎人酒店除咗铁塔吸睛,呢间法式小酒馆都被受吹捧。气氛轻松,供应经典家常菜式,招牌菜有生牛肉他他、香煎法国鸭肝、法式焗蜗牛等,难得价钱唔算贵。下午茶套餐更以铁塔三层架上枱,非常IG-able。
其他首次入围嘅餐厅仲有好多架,包括世记咖啡、度小月、安德鲁饼店、乐点咖啡、皇雀印度餐厅、南洋粿条面食店、金马轮咖啡饼店、柠檬车露、利安咖啡屋,睇完有冇立即想过大海食返餐嘅冲动呢?去唔到一样可以投票支持,即去优秀开饭热店大赏2018网站啦!
立即投票:https://www.openrice.com/info/awards2018/index.html
文:Perrins