鬼金棒

营业中

休息中

天氣凍凍哋，感覺又悶悶哋，最好就梗係食啲熱辣辣嘅嘢嚟增強吓能量值啦。喺呢個時候發現東京嘅人氣麻辣拉麵店「鬼金棒」原來嚟咗香港，咁仲等乜？熱騰騰嘅拉麵，仲要係辣嘅，咁仲唔係熱辣辣？行到去附近，好容易就SPOT到「鬼金棒」喇。因為佢門口嗰支狼牙棒夠哂先聲奪人！勁有日本FEEL，入去坐低直情以為自己去咗池袋。MENU選擇都好多，兩個人一個叫咗炒豆芽菜辣麻味噌拉麵，一個就叫芫荽辣麻味噌拉麵，我哋保守地分別叫咗小辣小麻同中辣中麻，當然唔少得追加味玉啦。先嚟炒豆芽菜辣麻味噌拉麵，勁大碗，芽菜份量好夠，無呃你。至於芫荽辣麻味噌拉麵，成碗面頭鋪滿芫荽，童叟無欺。食落發現辣度同麻度都不妨大膽啲挑選，因為去到中辣/麻，其實都好平易近人。湯底惹味得嚟，又唔會好似有啲拉麵湯底咁，一味死鹹，好味道！至於個拉麵就夠哂彈牙，食落仲有啲蛋香，配埋個湯汁真係一絕。至於個腩肉叉燒更加係不得了！入味得嚟仲非常之嫩滑，入口即溶，完勝平時食嗰啲鞋霎霎叉燒！加埋個溏心蛋，三個字：「大滿足」！