第一郡 (已搬遷) 新店位置

深水埗咁多平靚正好西，中韓意泰…乜都有，如果想食地道足料越式野，可以試下第一郡。老闆娘係正宗越南人，煮既越菜夠晒正宗好食，難怪小店吸引咁多人排隊。蟹膏番茄湯檬粉$60招牌菜，湯底用大量蟹同番茄熬製，未食已經聞到好香，入口啖啖充滿蟹既鮮味同番茄酸味，幾開胃。有豆卜，豬紅，生菜，蟹糕，當中既蟹糕用蟹肉加蛋製成，吸收埋湯既精華，食落夠晒鮮味。成碗檬粉加埋餸都算大份抵食，同一般越式餐廳比較，呢度既湯檬比較香濃。斑蘭葉綠豆糕 $15呢舊凍糕未食前都會聞到斑蘭香味，上層係斑蘭葉製成，下層係綠豆糕，口感非常煙韌，甜度適中，食落清新唔漏，斑蘭同綠豆味好夾。牛油果沙冰$35好重牛油果香，口感幼滑無冰粒，似奶昔，飲完會好飽肚。