影片
更多
2019-06-18
852 浏览
女朋友已於早幾日進化成為老婆，所以決定食返餐好嘅去賀一賀，因為老婆最愛食日本菜，所以今次就book咗位於黃埔嘅「鮨文」試下。一間食肆能夠令客人有賓至如歸嘅感覺真係好難得，慶幸今晚我哋遇上總廚趙先生，一邊食一邊同佢傾計。聽下佢踏上廚師之路嘅心路歷程，有機會到日本學藝，每日都好辛苦，捱到今時今日終於能夠做到一間omakase嘅總廚。有好多人將自己興趣變成職業，但係趙總廚由職業變成興趣，了解食材嘅產地，食物嘅故事起源，最重要嘅係令客人知道究竟佢哋放咗咩食物落口，真係令人佩服！第一道，前菜為三文魚子蒸蛋，三文魚子新鮮而且多汁，蒸蛋入面似係落咗元貝同配菜一齊蒸，食落有係有鮮味嘅蛋👍🏻第二道，前菜第一味包括海葡萄同水雲，配埋酸汁，認真開胃！趙總廚亦有講解到海葡萄係有分級別，高級嘅海葡萄係會粒粒分明。第二味係梅酒蕃茄，採用咗8度糖份嘅蕃茄，甜中帶酸。第三味係著名北海道產物白粟米，不過由於正直夏季，白粟米產地轉為沖繩，汁多而且清甜，老婆一咬白粟米，啲汁就飛晒去我個頭度，我仲以為係冷氣機滴水🤣第四味為辣汁黑梅貝，又係一樣開胃食品，食多兩粒會覺得好辣，食一粒就啱啱好吊下癮！第三道，為真鯛刺身，加咗綠色柚子
一間食肆能夠令客人有賓至如歸嘅感覺真係好難得，慶幸今晚我哋遇上總廚趙先生，一邊食一邊同佢傾計。聽下佢踏上廚師之路嘅心路歷程，有機會到日本學藝，每日都好辛苦，捱到今時今日終於能夠做到一間omakase嘅總廚。有好多人將自己興趣變成職業，但係趙總廚由職業變成興趣，了解食材嘅產地，食物嘅故事起源，最重要嘅係令客人知道究竟佢哋放咗咩食物落口，真係令人佩服！
第一道，前菜為三文魚子蒸蛋，三文魚子新鮮而且多汁，蒸蛋入面似係落咗元貝同配菜一齊蒸，食落有係有鮮味嘅蛋👍🏻
第二道，前菜第一味包括海葡萄同水雲，配埋酸汁，認真開胃！趙總廚亦有講解到海葡萄係有分級別，高級嘅海葡萄係會粒粒分明。第二味係梅酒蕃茄，採用咗8度糖份嘅蕃茄，甜中帶酸。第三味係著名北海道產物白粟米，不過由於正直夏季，白粟米產地轉為沖繩，汁多而且清甜，老婆一咬白粟米，啲汁就飛晒去我個頭度，我仲以為係冷氣機滴水🤣第四味為辣汁黑梅貝，又係一樣開胃食品，食多兩粒會覺得好辣，食一粒就啱啱好吊下癮！
第三道，為真鯛刺身，加咗綠色柚子皮，未食就已經聞到好香好清新嘅柚子味，估唔到配落刺身上竟然係會有出乎預料之外嘅味道，相信都係趙總廚累積返嚟嘅經驗而創造出呢一個配搭。
第四道，太刀魚天婦羅配上紫菜茨，天婦羅皮脆，雖然係厚身，但絕對唔會食到成口都係粉嘅感覺👍🏻太刀魚好嫩滑，肉汁多，啖啖肉，配埋紫菜茨係幾特別！
第五道，池魚刺身，趙總廚解說話係加咗蔥、萌荷以及大葉絲，大葉嘅味道其實有啲似芫萎同泰國香草，因為陣味好濃，未必個個會鍾意同頂得順。我起初都有少少抗拒，不過食落又幾夾。
第六道係蒸毛蟹肉，紫蘇花做點綴，配上自製蟹啫喱同炸澤蟹，蟹肉好鮮甜，蟹啫喱係用蟹殼去整出嚟，炸澤蟹有少少似軟殼蟹，食落有啲似食薯片咁好脆！
第七道為清酒蒸鮑魚，老實說，我覺得個鮑魚好似好普通咁，但係個鮑魚肝醬真係不得了，非常之好食，然後將個鮑魚肝醬撈埋食真係一流！嗰種味道係非筆墨所能形容的，真係要食過先知😋
第八道非常之特別，小川海膽加中拖羅多士，海膽一啲都唔腥而且非常之有鮮味，中拖羅油脂分佈亦都好平均，令到塊多士唔洗搽牛油已經有陣油香味😍
然後開始上壽司，配料有淮山，係用芥茉醃製過，趙總廚解釋話淮山有四種，只有一種可以生食，正正就係今次我哋可以試到呢一隻「長芋」，咬落非常之爽口，唔似一般淮山食落好鞋。至於壽司薑，師傅解釋係用醋同糖醃製，食落辣中帶酸，酸中亦帶甜，佢仲解釋話坊間有種錯誤食法係一件壽司一件壽司薑，佢話薑係隨時都食得。
壽司8種🍣包括咗鱸魚、網燒深海池魚、赤貝配上橘子汁、赤座蝦、中拖羅、拖羅魚骹、穴子亦即係海鰻，以及大極上海膽。
最令我印象深刻嘅，係赤座蝦，配上自家製蝦豉油及燒蝦頭嘅蝦膏，呢一種蝦都唔常見，好少機會可以食到，蝦肉嗰種鮮味確實係會令人回味。
今次亦都非常有運，可以試到天然拖羅魚骹，唔係養殖，趙總廚話係百年難得一見，而且天然價格比養殖嘅高4至5倍，我哋兩公婆真係有口福🤨😍師傅喺刺身上加咗自製蒜汁，佢講解話呢種蒜要整完兩個月後先用得，可見師傅對食材品質嘅要求係幾咁高！
另外，大極上海膽最令我意外，原因係師傅解釋話原產地為俄羅斯，只係運送去北海道根室作加工，佢亦都話依家好多靚嘅海膽都已經唔係日本原產。
然後有份魚湯，係利用白身魚魚頭魚骨煲出嚟，配上適當嘅調味，突顯出魚嘅鮮味。
手卷方面，係利用咗右口魚刺身（亦名鰈魚）加上甜蝦，紫菜係脆得嚟易咬開，趙總廚更講笑咁話呢一種係紫菜界嘅Rolex🤣右口魚嘅油脂真係唔講得笑，一路食一路滴，真係令人垂涎三尺🤤
到最然，有山形櫻桃、靜岡蜜瓜再加埋宮崎太陽之子，進食時都要跟次序，我諗係因為每款水果甜度不一，我哋先食較淡口的，然後逐級逐級上。
Omakase之所以貴，係因為本身採用咗好高質嘅食材，再加上一路等一路望住師傅用心準備食物，而且今次更可以喺趙總廚身上學到唔少食材嘅典故同資料，真係好開心☺️成個套餐$1980 per person，即使平時好少食貴價菜嘅我哋，都覺得超值！
张贴
