魚がし日本一 (AIRSIDE)

营业中

休息中

傍晚六點幾，響啟德airside搵嘢食，見到一間外表睇落好高級嘅日本餐廳，行過去望吓個Menu，刺身丼嚟講，價錢都貼地，今晚就一於就試吓。店內環境十分整潔，裝修佈置都好grand，燈光柔和舒服。店員帶我哋坐低咗之後，就為我哋介紹Menu，最後我同老公兩個人分別叫左三味吞拿魚丼同埋油甘魚洋蔥焦醬丼，每一個丼飯都會配上熱辣辣新鮮煲好鯛魚湯，可以拎黎做茶漬飯。兩個丼既刺身都好新鮮，尤其係三味吞拿魚，有呑拿魚3個唔同部位，分別係赤身、中拖羅同埋大拖羅，每一件都厚切肥美，入口就感受到魚油既甘香。而另外嘅油甘魚洋蔥焦醬丼，本身佢嘅油甘魚已經鮮味十足，再加上洋蔥嘅甜味，簡直係令油甘魚再昇華，而家返入面佢仲有放幾片日本茶漬白蘿蔔，酸酸地，好開胃。餐廳裏面有好多款唔同嘅日本酒選擇，我揀咗紅葡萄柚果酒同埋桃酒，店家仲好貼心，可以俾你選擇加梳打水，香甜嘅果味、酒精濃度唔算高，好適合女士們。最後我哋點咗開心果雪糕做甜品，呢個簡直係必食！佢係好食過我之前試過嘅所有開心果雪糕，粒粒開心果碎充滿成個雪糕，再加上牛奶嘅香味，不得了。